Zo Kawtchhuah

Lawrkhawm

2012-02-08T10:11:00.002+08:00

Myanmar Ram-in US Dollar 11.023 Billion Leiba A Nei
    Myanmar ram chuan ram danga a leibat zat chu tun hnai lawk khan mipui hriatah a puang zar a US dollar cheng 11.023 billion leiba a nei a ni. Heng a leiba te hi rulh theih dan kawng dapin Japan leh Italy ramte nen an in be mek bawk.
    Finance minister Hla Tun-a sawi danin US dollar 8.4 billion hi socialist sawrkar, general Ne Win-a hun lai kum 1962-1988 chhunga an leibat te a ni a. Tin, dollar 2.61 billion hi sipai sawrkarin 1988 a lalna a lak atanga an leiba niin a sawi bawk. Heng an leibatna chhan hi sum enkawl that loh vang leh khawthlang ram ten sipai sawrkar an hrek beh vang ni a sawi a ni a. Kum 1988 hma lam zawnga an ba te hi hmun hrang hrang atanga an bat a ni a, an pek tlak hmain sipai sawrkarin lalna a chang a, Democracy siam theih a ni ta lo a. Chumi avang chuan ram dang dangin sipai sawrkarna duh lohzia lantir nan tanpuina an pek a tih tawp tak avanga rul thei ta lo niin a sawi.
    1988 hma lam a Myanmar ramin a leibat tamna ber ram chu Japan ram a ni a, dollar 6.39 billion a ba a. Tin, kum 1988 hnuah a lei bat tamna ber chu China ram niin US dollar 2.13 billion a ba a ni.
(Source: The Irrawaddy)

CHIT SAN MAUNG CHAWIMAWINA PEK A NI
    Union Biblical Seminary ( UBS; Rev. Dr. Morris Remlalliana sikul) chuan kawlrama Music thiam ber Chit San Maungte nupa hnenah Feb. 4, 2012 Inrinni khan chawimawina ( Honorary Doctorate Degree) ropui tak an hlan.
    UBS-in he chawimawina an hlan hi mipui pawhin phu an ti hle mai a, Chit San Maung-a hi music thiam a nih mai bakah Pathian tih mi, thil eng pawh ti dawn se, tawngtaia inhlan thin a ni. Tin, a nupui hian rawngbawlna ministry chi 7 vel a nei bawk.

Firfiak Pawl Hruaitu Lu Thah A Ni
    Khawvela sawrkar hrang hrang ten an mi man chak berte zinga mi Jemaah Islamiyah firfiak pawl hruaitu lu Zulkifli Abdul Hir- a, chu Philippines ramah thah a ni. Kum 46 upa Malaysian mi Zulkifli-a lu man hi RM.15 million a ni a. Philippine ram sipai ten February 2, 2012 zing dar 3:00 vela an beihnaah a thi a. Amah tiamin firfiak mi 15 te chu sipaiten an beih naah an thi a ni. Marwan tia hriat lar Zulkifli-a hi America ramah engineer zir chhuak a ni a Muar, Johor ah kum 1966 khan a piang a. He pa hi kum 2003 atang khan Phillipine ah a che tla nia hriat a ni a. March leh October, 2010 ah sipai ten tum hnih an bei tawh nghe nghe. Kum 2002 a Bali, Indonesia ram bawm puak mi 202 thihnaah inhnamhnawih nia hriat a ni a. Marwan-a nu Aminah chuan a fapa thih thu police thuneituten an hriattir chuan a barakhaih hle a, a fapa-in he fifiak pawl zawm tawh lova inah tha taka a lo kir leh theih nan nitin a tawngtai thu leh a fapa ruang chu a hnenah rawn thlen ngei turin Philipine leh Malaysia ram thuneitute a ngen a ni.
(Sourche: The Star)

MRO Huang

2012-02-08T10:10:00.000+08:00

        MRO PROJECT

    Kumin 2012 chhung hian MRO hmingin Member-te hlawkpui tur ruahmanna ( Project ) chi hnih kan siam a, chungte chu:
1. ZOTE Baking ( Chhang siam zirna)
2. Grace Computer Learning Center

Zote Baking zir dan tur:
    Chhang siam hi chawlhkar khatah ni hnih Zirtawp leh Inrinni apiangin zir tur a ni ang.
    Zir tan hun: March 23, Zirtawp chhun dar 2:00- 5:00.
    Zirna hmun : Pastor Quarter
    Zir man mi khat tan Rm. 20/-
Grace Compute zir dan tur:
    Computer hi chawlhkar khatah ni thum, Thawhtan, Thawhleh, Nilai zir tur a ni ang. Zirna hun ( Period ) thumah then a ni.
    Zing dar     10:00- 12:00 Chhun dar 02:00- 04:00    Zan dar     09:00- 11:00

Nilai zan hi veng inkhawm hun a nih avangin Nilaithawhtan zanah zir a ni ang.
    Computer zir duhte tan zir man mi pakhat Rm. 100/- Chhungkaw khata mi pahnih an zir chuan Rm. 150/- mi pathum chin chung lam chu Rm. 200/-
    Course khat tan zel a ni ang.
Zir tan hun: March, 29, 2012 ( Opening Ceremony hun hman tur)
    Zir duh chuan hming pek lawk tur a ni.

Hna Ruak

2012-02-08T10:08:00.000+08:00

JOHOR BAHRU-AH RAWNGBAWLTU MAMAWH

    Johor Bahru hi Kuala Lumpur atangin km. 365 vela hla, Singapore ramria awm a ni a. Kum 2008 January thla vel atang khan Mizo hminga inkhawm an lo nei tan tawh a, tichuan April 2, 2008 khan MCF din a lo ni ta a ni. An din hlim chuan sunday apiangin an inkhawm thei lo va, mi an la tlem avang leh inkhawmna hmun tur an la neih loh avangin thla khatah vawi khat, nilai ni-ah an inkhawm thin.
    Tunah chuan mi an lo pung zel angin inkhawmna tur tha tak mai, Rev. Lalthuamluaia leh KLBC Pastor Rev. Eddie-a remruatpuinain Johor Bahru Baptist biak in chu mahni ta ang maiin an lo hmang thei ta a, a lawmawm tak zet a ni.
    Sunday a piangin an inkhawm thei a, member pawh mi 60, 70 vel an lo ni chho ta zel a, MCF Pastor pakhat tan chuan bialfan sen a ni ta lo. Chuvangchuan rawngbawltu bik, ( Pastor ni kher lo) Pathian kohna dawng, Bible lam thiamna nei, a tul dan a zira sap tawng leh kawl tawng thiam, Johor Bahtu Mizo Kristiante enkawl theitu tur kan mamawh ta a ni e.
    Johor Bahru MCF tana rawngbawl tur hian dilna hawn a ni. Dil hun chhung March 3, 2012 Inrin ni thleng. Diltu chu March 4, sunday chhun dar 1:00 MCF EC Meeting-ah inlan tur a ni.
    Thla hlawh cheng 1,000/-
    Awmna in leh TA kohhranin a pe ang.
    Diltu chuan UN Card a neih tawh tur a ni a, chhungkua, mimal, mipa hmeichhia, a duh apiangin dil theih a ni.

General Worker Hna Hawn A Ni
    MCF General Worker hna a ruak dawn a, dil duh tan dil theih a ni.
    General Worker thawk mek, R.Lalnunmawia (Manuna) chuan ramthumna min kalsan tawh mai dawn avangin aiawh lak a lo tul ta a, dil duh tan dilna hawn a ni e.
    Thlahlawh Rm. 600/- ( Tan nan)
    General Worker hi Pastor Quarter leh MCF Office enkawltu tur a ni a, Quarter-ah a cheng nghal ang.
    Diltu chuan UN Card a vuan tawh tur a ni a. March 4, sunday hmasa ber MCF EC Meeting-ah inlan tur a ni.
                                MCF Office:

MEETING ROPUI MANADO KHAWPUIAH

2012-02-08T10:06:00.000+08:00

MEETING ROPUI MANADO KHAWPUIAH
                                  By Rev. Dr. Morris Liana

Pathian khawngaihna zarah October 3-7, 2011 khan Indonesia ram, Sulawesi State, Manado khawpuiah Khawvel pum huap Kristian pawl hrang hrang hruaitu lawk rual mi 314-te kalkhawmna “Global Christian Forum Second Gathering” meeting ropui tak chu ka zu chhim ve a. Chuta ka thil hmuh leh tawnte chu tlem azawng ka han tarlang ve teh ang.

Inbuatsaihna leh Kalkawng: A hmasa berin Indonesia Visa chu ni thum chhung lekah awlsam takin min lo pe ve mai a, a fee pawh US $ 45/- chauh a ni. October 2 ( Sunday) zing dar 11:30 vel khan Thai Airline-in ka thlawk chhuak a; darkar khat vel kan thlawh hnu chuan Thailand ram, Bangkok khawpui, Suwanabomi International Airport ka thleng ta mai a. Chuta tangin darkar 3 kan thlawk leh a, Indonesia khawpui Jakarta chu tlai 6:00 velah kan thleng ta a.
    Jakarta Airport chu Suwanabomi ( Thailand) Airport tlukin ropui lo mah se, Bangkok tluk lohna a nei tlem hle a ni . An motor car-te chu nimina siam ni awm tak hian a tle var ser hlawm a, motor hlui deuh hmuh tur reng reng a awm lo. Airport atanga khawchhung lamah darkar khat dawnlai Car-a kan tlan hnuah Aryaduta Hotel ropui tak mai, chhawng 60 laia sangah min thlentir a, an hotel a ropui lutuk a, mut a tui lo tep zawk a ni. Chuta tang chuan a tukah darkar 3 lai ni chhuahna lamah kan thlawk leh ta a, kan meeting-na hmun Mando chu kan thleng ta chauh a ni.

Indonesia chu: Indinesia ram chu thliarkar 17,000 chuang infin khawm ram a ni a, mihring maktaduai 210 chuang an cheng. Khawvelah ram khat chauha Muslim tamna ber ram a nih laiin Kristian pawh maktaduai 26 lai an lo awm hi mak ve tak chu a ni. Chu aia la mak zual chu Sulawesi State phei chu Kristian 90% awmna State a ni a, kan meeting-na hmun Manado pawh Kristian khua a ni tawp mai.

GCF Meeting chu: Global Christian Forum tih chu Khawvel pum huap Kristian pawlho chi hrang hranga hruaitute inpawlhona a ni a, chutah chuan Roman Catholic Bishop leh Arch Bisho rual te, Greek Orthodox Bishop rual te, World Evangelical Alliance ( WEA, Khawvela pawlho lian ber) hruaitu lawk rual te, World Council of Churches ( WCC), International Pentecostal Assciation hruaitu lian rual te, Mennoites leh Seventh Day Advantist hruaitu te, khawvela local lian zual 7 atanga Senior pastor te, leh Indonesia rama Kristian pawlho hrang hranga hruaitute an tel hlawm a. Kan ram (Myanmar) atangin MECF ( Myanmar Evangelical Christian Fellowship) aiawhin kei leh MCC ( Myanmar Council Of Churches) aiawhin Rev. Sang Dun te kan ve tel ve a.
    Kan thlen zan atangin Sulawesi State Gorvernor-in zanriah tuihnai tak leh zai leh lam chi hrang hrangin min hmuak phawt a. Mak ve em em chu an Gorvernor te, a vengtu sipai leh police te pawh Kristian vek an lo ni a. Amaherawhchu, chuti khawpa khawvel pum huap Kristian hruaitu lawk rual fuan khawmna a nih avang chuan a bul atang a tawp thlengin meetingna hmun luh leh chhuah chu khawl leh mihringin min check vel reng a ni.
    Kan meeting thupui chu “ Kristaa nunhona, Thlarau Thianghlima tihchak” ( Life together in Christ, Empowered by the Holy Spirit) tih a ni. Khawvel kohhran tam tak chu mahni pawlho zinga mi chauh intialtual a, mi dangte engah maha ngaih lohna a lian sawt hle a. Kan insawiselin kan inten tawn vek hi a ang a. Chutianga kan awm hrang nuaih chu GCF hian a huikhawm a, sawihona leh nunhona ropui tak tak neiin Kristaa kan inpumkhatna kawng a zawng mek zel a ni.
    Kum 4 kal ta khan Africa khawmual Ghanna ramah a tum khatna neih a ni tawh a. Chumi inkarah chuan Regional meeting hmun hrang hrangah: Africa, South and North America, Europe, leh Asia ramah te neih a ni. Kum 2010 October thla khan Korea ram Seoul khawpuiah Asia Regional meeting chu ka han chhim ve tawh nghe nghe a. Rev. Dr. David Yongi Cho-a kohhran Yoido Full Gospel Church-in min lo mikhual a, kan hlim tlang hle a ni.
    Tun tuma kan ni tin hun hman dang tlangpui chu zing lamah thupui bik neiin khawvela mi ropui rualten paper an chhiar a. Tichuan mi 15-20 zela group inthenin kan sawiho leh a. Kan thupui tam zawkin min zirtir chu “ Thlarau Thianghlim hnathawh engtin nge kan lo dawnsawn ang a, chu chu a takin engtin nge kan hman chhuah leh ang? tih lam hi a ni deuh ber mai. Khawvel Kristian kohhran leh pawl hrang hrang hian mahni kan induhtawk vek a, inmamawh tawn lo ang mai hian kan insawisel nuai nuai tawh avangin chumi min huikhawm leh tur chuan Thlarau Thianghlim hnathawh nasa tak kan mamawh a ni, tih hi kan thupui a ni ta ber mai.

Thil mak ka tawn thenkhatte:
    Rilrua ka lo beisei ngai loh, thil mak tak tak ka va tawng ve a.
1. Tukthuan ( breakfast), chawchhun ( lunch) leh zanriah ( dinner) einaah te hian hmelhriat thar zawn a, hmun dang danga thut zel tur an tih avangin mi dang dang nena chaw ei a ni thin a. Tuk khat chu ka bulah hian sap nupa, an pa zawk chu America President hlui Bush-a ang deuh mai, kei aia arte lu pawn awm velte hi an rawn thun a. Kan han inkawm chu an lo tha khawp a. An nupa chuan an inngaitlawmin kawm an nuam em em mai a. An titi chuan kan dawhkana mite chu a hip hneh hle. Tukthuan ei kham tawk fangah chuan hotu dangte nena inbe tur an nih avangin min tinsan ta a. Ka bul lehlama thu sap ve tho chuan, “ Brother Morris, i bula thute nupa kha i hre chiang em?” min ti a. Kei pawh chuan, “Hre chiang hlei nem, America ram, Florida State, Orlando khawpuia mi an nih thu chu ka hriat a ni mai a” ka han ti a. Ka thian pa chuan, “ E, i la hre chiang lo a nih chu, Local lian taka senior pastor a nih kha” min ti a. A zanah Internet-a ka han en nak alai chuan an local chu Pathiannia mi 15,000 vel inkhawm thin hi an lo ni reng mai a. An inngaihtlawm dan en chuan an chhungah Krista a nung a ni, tih a lang chiang hle a ni. An pa chuan, “ Kan rama i lo kal hun chuan min rawn fawn ngei ngei la, Coffee te kan in dun ang chu” min ti nghe nghe a.

2. Pakhat dang leh chu kan group inthenna min hruaitu Korean pa hi a ni a. Chu pa chu a inngaitlawm em em a, a thu a fingin a tawng a zahawm a, a nelawm em em bawk. Doctor degree pawh pathum ngawt nei, TORCH an tih baibul sikul neitupa, mi hausa tawntaw hi a lo ni a. Seoul khawpui chhunga a Bank building te chu chhawng 60 laia sang a ni a, Korea rama mi hausa sawm thlang chhuak se, chung zingah chuan a tel ve ang an ti nia.

3. A dang leh chu London khawpui thlang lawka awm, Roman Catholic Bishop pension tawh hi a ni a. A nun a tuihnang a, a bula khawsak a nuam em em mai a. Tuna a hna vawn mek chu khawvel pum huapa Thlarau Thianghlim hnathawh a darh zau lehzual theihna tur kawng zawngtu pawl “ International Charismatic Movement Renewal” Chairman hi a lo ni a. A thlarau mi em em mai te ka hmuhin ka rilru te tein “ Roman Catholic hruaitute zingah pawh thlarau lama ka tluk loh an lo tam mang e,” ka ti vang vang mai a ni.
    Malaysia Pastor pakhat nen kan inhmel hriat bawk a, kan han inkawm nel hnu chuan Kuala Lumpur Baptist Senior Pastor hi a lo ni a, a kohhranah chuan Mizo an inkhawm thute min hrilh a, lawmawm ka tiin amah nen pawh kan inkawmngeih phah hle.

Tlangkawmna:
    Kan thil hmuh leh tawnte chu sawisen a ni lo vang a. Kan ramah mahni awmna kohhran chauh dik bera ngai, mi dangte ngaihnepna hi a lian ta hlein a lang a. Krista kan pumkhatna leh Thlarau Thianghlim hnatawh lamah hian ke penin hmasawn ava tul ta em! Mahnia kan lo induh hlur laiin miten mual min lo tlanpel takngail dawn e. Miten Pathian hmangaihna thuk leh zau tak hi an lo hmuh fiah deuh deuh theih nan rilru zau tak puin rawng i bawl zel ang u. Mite sawisel a, nek chep tum a, a zim zawnga ngaihdan hmang thintute aiin a zauzawnga nun dan thiamte hian Thlarau Thianghlim an tilawm zawk ngei ang.

I LEI VENG THA RAWH

2012-02-01T12:28:00.001+08:00

       Editorial

“ Dam thlahlela hlim ni hmel hmuh duh chuan sual lakah a lei veng tha sela, A hmui pawh bumna thu sawi lo turin veng rawh se.” ( I Pet. 3:10)

    Mi tupawh mai hian dam kan thlahlel theuh. Damna a nih dawn phawt chuan neih zawng zawng sen kan huam thin. Tawngna mahah ‘A dam hauh phawt ila,” kan tih thin hi! Khawvel thiamna chuan kan lei taksa natna hi tawk fang chu min tidam a ni mai thei e, mahse kawla ni lo chhuak hi kan tan hlim ni a ni tuktin kher lo vang.
    Petera lehkhathawn pakhatna ziaktu thu hi a ril ngawt mai. Ringlo miten Pathian chhandamna an chan theih nana ziak a ni lo va, ringtu nang leh kei hian Damna leh hlimna kan chan theih nan sual lakah kan lei kan ven that a ngai, tih thu min hrilh a ni. Kan tuh ang zel kan sengna he khawvelah hian i ka atanga chhuak thu tinrengte khan awmzia an nei a, chu chu nangmah leh i thlah lo la awm zel tur tan pawimawh tak a ni. Zahmawh sawina, dawt sawina, mi relna, anchhe lawhna hmui atang chuan malsawmna dawn tur a awm dawn loh tihna a nih chu!
    Ni tina i tawngkam chhuak zawng zawng hi record vek a ni a, chu chu nangmah leh i thlah lo awm zel turten in la ngaithla lehdawn. Mi bum thintu i nih chuan bum i la ni ve ang. Mi rel hmang i nih chuan an la rel ve ang che! Sawisel hmang i nih pawhin an sawisel ve ang che. Chung chuan i hringnun a hliam ang a, dam ni i nei ngai lo vang a, i hlim thei na hek lo vang.
    Kan lei hi ven that a va ngai teh lul em! Lalpa mit chu mi felte chungah a fu a, an tawngtaiin a beng a lo dawh thin.

Aw, Zo Lanu

2012-02-01T12:26:00.000+08:00

            AW, Zo Lanu
                                    Henry Khama
    Vawikhat chu Headteacher meeting tura Tanjung Sepak atanga KL bus ka chuannaah ka sira thu kawlpa chuan a thiannu chu mobile phone-in duat awm tak, aw nem tak hian a chhaihvel a, a zeiin sazu bawhdan a thiam hmel khawp mai. A biak dan atang chuan a thiannu chu CHIN mi a ni a, chik taka ngaihthlak chuan Mizo ngei a ni tih ka hre thei a, ka thin a khei kher mai. Chu kawlpa chuan a thianpa hnenah Chin nula thawihzia sawiin a uang vel a, amah pawh a duh chuan a puih theih thute chu a thianpa a hrilh a, a insawi thei khawp lehnghal. Motor (bus) ka ruih deuh avangin engtinmah ka chhang buai duh ta lem lo va. Ka rilru te te chuan kan hnam nulate hi kan humhalh a pawimawih a ni. Kawlpa hi va mawhchhiat tur a ni lo, tiin ka ngaihtuah ta neuh neuh a, tichuan Zomi Theological College ka kai laia pastoral Theology subject min zirtirtu kan professor Dr. Van Bik ( Ph.D ) thu sawite min hriat chhuahtir rum rum mai.

Falam khawtlangah
    Falam hi tun hma chuan Chin hill ah nula hmeltha tamna hmun a ni thin a.Tun hnua hmeltha an awm tawh lohna chhan ka zawh hian sipaihovin an nei zo vek an ti mai a. Sawrkarin Chin Hill-ah sipai an dah dawn khan sorkar laipui chuan thil tum an nei sa bawk a, sipai zingah Chin nula nei an tam khawp mai. Culture imperialism, hnam chim ral kan tih hi kawlho thil tum a ni. Thawkkhat lai pawh khan, sipai Chin nula nei chu an rank an kai sang dawn tih chu tlang hriat a nih kha. Hetiang hi hnam lian zawkten hnam tenau an chimpil dan chu a ni.
    Falam khawpui hi distict hmunpui a nih angin sorkar hna thawkte pawh an awm nual mai a. Towship distict tehfung angin department tinah Gazatee officer an awm nual a. Chung mite chuan an nupui fanaute an hruai hlawm loh avangin, tlangval angin an leng a, Chin nulate rimtuina chu par anga tlanin an tihmelhem (deflower) a, an tihmualpho nasa hle. Chutianga kan nula te an awm chu kohhran upa leh pastor ten an en liam mai mai thei a, mak ka ti khawp mai. Falamah chuan Baptist kohhran an tam ber a, biak in puiah mi zaruk lai an inkhawm thin a, Pastor leh upa mi thiam tam tak an awm. Mahse pastor te chuan sunday chhuna sermon hi an duh tawk a, an hnam a boral tur hi an ngaihtuah lo ni hialin ka hria.Tak takah chuan pulpit sermon chu Pathian thua tui mite chuan an ti thei vek, pulpit sermon hi chu pastor te ministery item chi khat a ni ve mai.

Kawl phaiah:
    Kalaymyo hi Sagaing Devision ah chuan Mongwa tiam lohvah khawpuiber a ni a, khawpui pakhata zofate tamna ber a ni bawk. Kalaymyoah hian khua 39 vel a awm a, Dassakah thutna hmunpui a ni. Kum 2000 hma lam kha chuan kawlho hi chinho aiin an tam deuh. Chuvangin Kawlhoin min chimin ka zonula tam tak chu kawlhovin an titlawm hle thin. Military Inteligent (M.I) hun lai phei chuan kan nula hmeltha tam takte mawina chu tihhmelhem a ni a, Pastor fanute meuh pawh an bang bik lo.

Malaysiaah
    Pathianin UNHCR kaltlangin mal min sawm nasa hle mai a. Malaysia atangin raltiang kan kai mek a, kan mumangah pawh kan hmuh phak ngai loh chu a takin kan hmu a. Mahse, Isreal-ho Aigupta sal a tanga ram thar (ram tiam) kai chu tlemte chauh an ni ang kha nih ve ka hlau khawp mai. Puitling chauh pawh nuairuk, hmeichhia leh naupangte nen chuan nuai 20 vel niin, New Living Study bible chuan a sawi. Mahse Joshua leh Kaleba tih loh chu kawng laka piangho chauhvin ram tiam an thleng a nih kha! Malaysia ah chuan mipa tam zawkte (90% hial pawh ani mahna) chuan hna tha tak thawkin ramthumna kai kan tum a. A tlem zawk chu zu leh ruihhlo lamah kan buai a, chutih laiin kan nula tam zawkte chuan an tihsa chakna chu an control thei lova, nu leh pate hmuh phak lohva awm an nih in hriain an zauthau va, hnam dang kawl leh vai hmaah kan mualpho zo ta a nih hi! Tunlai tak phei chuan kawl leh vai ni tawh lohvin mi dum (NERO) ho te nen an leng dun ta. Kawng lakah Pathianin a tih boral tak Isareal ho kha vanram an kai leh kai loh chu Pathian thu a ni a, mahse nang leh kei kan khawloh chuan meidil ah kan tla ngei ang tih hi a chiang khawp mai.
Hruaitute leh Pastor tehna
    American-ah chuan bibilical leh theology mi thiam, an tam tawh khawp mai. Mahse chung mi thiamte chuan kohhran an enkawl thiam lova, member an neih loh avangin hmun thenkhatah chuan biak in khar a ngai hial mai. Chutiang boruakah chuan a pawimawh ber chu rawngbawltu pastorten care and couseling an thiam leh thiam loh hian kohhran nung a nih leh nih lo a sawifiah a. Pastor couselling thiam chuan member-te tlakcham kha an hre thiam a, chu chuan kohhran mipui muhil chu kai thovin kohhran nung an lo ni mai thin.
    Malaysia ah pawh member te awmna hi hriat kim a har ang a, mahse a tih thei chu hnam dang pasal neih a that loh thu hi sawiin infuih thin ni se la.Tin, hruaitu EC te pawhin hnam dang pasal neite chu community a tanga banin, hnam leh sakhaw pasantu, (apotacy)ah puang se, a ziaawm phah viau ang. Tin HNAM dang pasal nei chu pastor pawhin kutsuih lovin sawma pakhat an pek pawh hnawl ngam se, tun ai hian boruak a tha zawkin a rinawm.
    Kawlhovin ramthumna kal an duh a vangin kan Zonulate an nei a, Kristiana inlet, baptisma an chang tih vel hi chu kei chuan ka rin lem lo. Achhan chu Anawratha hun lai daih tawh khan Buddist an ni a, kum 1000 deuh thaw a ni tawh a, keini ZORAM AH 1994, CHIN STATE ah 1999 khan kumza kan lawm ve chauh a ni kha. A la rei lo. Tin, Literature-in min chimpil thei bawk. Phiu leh mon ho hi Kawl ho aiin literature an nei hmasa zawk daih mai. Mahse tunah Phiu hnam tih tur an awm tawh lo. A chhan chu kawl hoin an chimpil a, kawl tawng an hmang vek mai .CHU CHU HNAMPUI in hnam tenau an chimpil dan chu a ni. Kan hnam, kan culture kan hloh chuan kan identity kan hloh a ni mai. Chuvangin kan culture, kan sakhua leh rinna, kan hnam a bo loh nan kan inhumhalh a ngai a ni.

AW, ZO LANU
    Aw, Zo Lanu, fimkhur rawh, hliamin in awm hlauh dah ang e. Hliama i awm chuan i hnam mipaho hi min tithangtlawm hle a ni tih hi theihngilh ngai hauh suh. Aw Zolanu tang fan fan, hnam dang leh sakhua dang valten neih tuma an chhai chea thlemna i thawh kha, hneh tumin tang fan fan rawh. Hliam i nih chuan i chi leh kuang, i hnam leh nunphung, i Pathian leh sakhua te hi tihmualphovin kan awm a ni, tih hi hre reng ang che. AW ZO LANU!

Kan chanchin

2012-02-01T12:23:00.001+08:00

Malaysia Chhandamna Kutpui
    Kan tawngtaina Pathianin min hlawhtlintir a, Kawlram atangin Pathian thu hriltu Evan. Thlamuanthara chu Jan. 13, 2012 Zirtawp zan khan Malaysia ramah tluang takin a lo thleng a. Jan. 14, Inrin zan atangin MCF Pastor Quarter-ah rawngbawlna neih tan a ni. Inkhawm hmasa ber zan atangin mi kan thahnem hle mai a, hetiang tak hian Pathian thu ngaihtlak kan lo rawp a ni maw kan ti hial!
    Jan. Ni 17 chhun atangin biak in-ah Pathian thu zirna tan a ni a, Zan lam pawh dar 9 atangin dar 12 thleng biak in ah zir a ni ta bawk. Pathian thu zir hi mi 120 atanga 140 kan ni tlangpui a, Chinese kum thar hna chawlh lai khan mi 180 kan chuang a, Thalai rual he ti taka Pathian thu ngaithla tura kan hun kan pe phal hi khawvel thilin kan nun min chawm lohzia a hriat mai awm e.
     Tun tum hi MCF Combined Meeting hming ngata Evangelist kan rawih vawi khatna a ni a, Pathian hnathawh mak tak a lo thlen theih nan, theih tawpa kan tawngtai mai bakah tawngtai kut pawh kan dawh nasa ve ngiang mai. Chuvang chu a ni ngei ang, kan ruahman dan angin engkim mai kha tluang takin kan hmang thei zel a, a ropui kan ti tak zet a ni.
    Kan ram leh kan khuaa kan awm lai kha chuan Evangelist te thu sawi ngaihthlak tur a awm deuh reng thin a ni mahna, Malaysiaah hi chuan Pathian mi hman, kan tawng ngeia thu sawi ngaithla tur hian a man sen a ngai tam teh mai a nia. Tin, kan thu ngaihthlak zawng zawngte kha, kan tih mai theih vek an ni. Ban phara Pathian fak te, thingthia tawngtai te, Bible By-hard te hi ringtuten nitin malsawm kan dawn zelna atana thil pawimawh tak an lo ni.

    Thilpek kan dawnte
    Kan Evangelist lo kal nan hian Pi Thanmawii ( Yangon) chuan Yangon to Malay senso zawng zawng min tum sak.
    Jan. 26, zanriah man Tv. Kunga min tum sak bawk.
    Rinna thlaichi mi thahnemngaite hnen atangin kan dawng nual bawk.
    Thilpeka rawngbawltu zawng zawngte hi Lalpan an ramri zauh sakin, an thinlung duhzawng chu pe phal mawlh rawh se. Amen.

Computer Lap-top:
    MCF Upa thenkhat chuan Malaysia ramah kan chenga Hlabu ena zai rut rut zawng a tunlai lo lutuk, an tih avangin Biak-ina hman tur Lap-top 1,599 man kan lei fel ta! A lei lam kan thiam ang hian a hman lam erawh kan thiam tha thum lo vang tih chu hlauhawm ve deuh a sin.

Naupang sande sikul zirtirtu:
    Kum 2012 MCF naupang sande sikul zirtirtu tur mi remchang kan mamawh hle mai. Tuna naupang zirtirtu thawk mekte bakah hian naupang sande sikul zirtir kawnga remchang thei tur chuan rawngbawlna pawimawh tak a ni tih hriain in pek theih reng a ni e. MCF Secretary hnenah emaw Pastor hnenah emaw hriattir mai tur a ni ang.

MRO hminga Project turte:
1. Grace Computer Learning Center
2. Zote Bakery ( chhang siamna)
    Project tan hun March 23 atangin a ni ang.

Mission Sum
    Kumin chhungin Kawlramah Missionary pali MCF hmingin kan chawm dawn a, chumi atan chuan sum kan mamawh hle ang. Chuvangin thlatin sunday vawi hnihnaah Mission puala thilpek khawn thin tur a ni a. Kan thilpekte hmangin kan ramah chanchin tha kan hril a ni, tih i hre reng ang u.

Innei ( Kutsuih) chungchang
    Biak in-ah inkutsuih theih loh emaw kan ti, a ni mai thei. Mahse thil awmdan chu hetiang hi a ni e. MCF Inkhawm hun chhung darkar 2 lekah hi chuan inkutsuih a remchang lo a ni. A chhan chu mipui inkhawm hun pangngai a nih tlat avangin.
    Inkutsuih duhte chuan hun dangah engtik lai pawhin Biakin a hman theih reng a. Pastor Quarter-ah pawh inkutsuih theih reng a ni bawk. Chuvangchuan mipuiin thu kan hriat sual loh nan, MCF inkhawm hun pangngai ni lo, eng tik hunah pawh Biak in leh hmun dangah pawh inkutsuih a theih reng a ni. A pawimawh ber zawk chu Pastor biak rawn hmasak zel tur a ni e.

Johor Bahru-ah Rawngbawltu Mamawh

    MCF Branch Johor Bahru ( Singapure ramri)ah rawngbawltu pakhat kan mamawh.
    Rawngbawltu tih hian Pastor tihna ni lovin Bible Degree nei tawh, Saptawng leh Kawl tawng thiam, rawngbawl tura Pathian kohna dawng UN Card vuan tawh a ni tur a ni.
    March 3, 2012 thleng dilna hawn a ni. Diltu chu March 4, 2012 MCF EC Committee-ah lak tur a ni a, March 11 atangin rawngbawlna a tan ang.
    Lawmman thlakhat 1,000
    TA leh awmna in pek a ni ang.

Chin National Foot-ball
   21st Jan. 2012 khan Malaysia Chin National Foo-Ball inkhelh tan a ni. Inkhelh tan ni hian Team zawng zawng inlan vek tur a nih avangin, MCF Team pawh kan thalai thenkhatte nen Imbi Field-ah an zu inpho tang ve a.
   22nd Jan. zing dar 8 khan keini MCF leh Mindat Team kan inkhel ve ta. He ni hi sunday a ni kher kher a lawm le. Pathian biak inkhawm a ngai si a. MCF Team chuan Mipui autu an neih ve tak loh avangin ( Ti mai ang u) 2:1 in kan chak ta lo a ni.
   Mahse a pawi lo, Team hnih HPH leh ZOTUNG khelh tur kan la nei. Kan hneh chuan Group atangin kan la kai chho thei a lawm, tiin kan inhnem ban chap mai le! Tichuan HPH nen chuan Jan. 23 khan kan inkhel leh ta a, kan tum ang takin 2-1 bawkin kan hneh leh ta lo. Tunahchuan ‘sanding a um lo’ tih ang mai kan ni ta.
   25th Jan. ah ZOTUNG nen inkhelh leh tur a ni a, mahse a phurawm ta lo tlat. Hun sen lo tul ve chhen bawk nen, “ Hawh u... i pet tawh lo mai ang u, Patling, mahni pet lum um vak vak mai chu a fin loh thlak” te kan ti ta mai mai a nih kha!

Chhandamna Kutpui

2012-01-23T09:33:00.001+08:00

Tunlai Malaysia Mizo zinga thil thleng tlem a zawng kan han tarlang e.
Kan tarlan tawh angin Jan. 13. 2012 khan Kawlram aṭangin Evangelist Thlamuanthara chu kan beisei leh
ruahman lawk ang takin Malaysia a lo thleng a. Jan. Ni 14, inrinni zan aṭangin MCF Pastor Quarter-ah
Crusade ṭan nghal a ni a. Mak tak maiin mi 40 vel kan inkhawm ta mai! Tichuan Pastor quarter-ah chuan

zantin inkhawm a ni ta zel a, mi kan pung deuh deuh a. Jan. Ni 17 chhun atangin MCF biak in-ah Pathian thu zirna tan a ni leh ta a, hetiang reng reng hian Pathian thu zir turin mipui kan kalkhawm theih kan ring ngai lo. Mahse kan kalkhawm tlat si. Chhun lam zirtan ni atangin mi 60 kan tling ta mai.
    Zan lamah pawh zan dar 9 atangin dar 12 thleng Pathian thu zirna tan a ni tho zel a, Lalpa hnathawh a ropui tak zet. Pastor Quaret mai ni tawh lovin Biak in lamah Jan. Ni 17 atang chuan chhun zanin kan zir ta tluk tluk mai le! Zan inkhawm hi mi 120 atanga 140 kan ni.
    Jan. 23, 24 hi Chinese kumthar a nih angin hnathawk tam zawk chawlh hun a ni a, chumi tinzawna tun tum Chhandamna Kutpui pawh buatsaih a ni reng a, he hunah hian mi kan pun zel kan beisei bawk. Tin, Pathian thu zir zawng zawngte tan tukthuan leh zanriah buatsaih a ni.
     Tun tum hi MCF Combined Meeting hming ngata Evangelist kan rawih vawi khatna a ni a, Pathian hnathawh mak tak a lo thlen theih nan, theih tawpa kan ṭawngṭai mai bakah ṭawngṭai kut pawh kan dawh      nasa ve ngiang mai. Chutichuan ram chhung ram pawna u leh naute pawhin mi ṭawngṭaipui zel kan beisei Pathianin rem a tih chuan Jan. 27 thleng KL MCF biak in-ah chhunzawm zel a ni ang a, chumi hnu lam chu Visa dil belh dan a zirin Johor, Penang, Tumbuk, Batun Untung lamahte Chhandamna Kutpui hi chhunzawm zel a ni ang. Kan hun awl neih a tlem em avangin kan hun neih chhunah kan am hle a, kan Speaker pawh chau tak a ni. Chhun lam darkar 4 leh zan lam darkar 3, ni khatah darkar 7 dingin a au reng mai a ni a, Pathian awmpuina a mamawh em em a ni.
     Malaysia Mizo tam zawkte chuan ramthumna kan mitthla deuh vek a ni a, he hmun atanga, Pathian thua kan puitlin hi a pawimawh dawn khawp mai. Kan Speaker leh chhimtu mipui ten Pathian thuah harhtharna kan chan theih nan, min ṭawngṭaipui zel teh u.

Thu dang deuh:
    Nimin Jan. 22, 2012 atang khan Malaysia Chin National Day Foot-ball ṭan a ni leh ta. Vawiin sunday zing khan Mizo leh Mindat kan inkhel a, Mizo 2-1 in kan chak...... ta lo.

In thian
Zara
KL

Tuartute Hlawhtlinna

2012-01-19T10:42:00.003+08:00

TUARTUTE HLAWHTLINNA
                                      Zalianthanga,Tahan

       He khawvel tlawh tura zin kawng zawhte hian tan ni leh tawp ni chu a hmachhawn lo thei lova, thenkhat zin kawng chu a pheiin a nuam a, thenkhat zin kawng erawh hi chu a chhuk chhovin a hahthlak hle thung a ni. Tawrhna kan tih hian chi hrang hrang sawi tur a awm ngei ang. A thenin hreawm an tih laiin chu harsatna chu an tuizawng leh ti ngei tura hlen tumtute tan chuan a chuti lua lo mai thei.
       Nun beidawngten ni eng hi thima ngai a awm theih a, Pathian thilsiam pawh zah lo vang ni lovin, hlimna leh muannain hmun chang pha lo mah se, an beisei tawp khawkah chuan tawrhnain a phut engthawlna chu a thlir doh doh thin a ni. Chuvangin Taivela’n:-
    “Ka tan ni leh thla reng a eng tawh lo,
    Thimin min bawm e, aw ka Chhandamtu;
    I hmun ropui thlen hlan ka nghakhlel e.” a lo tih hial ni. Tawrhna hian a tuartu tan beiseina eng a pe zawk thin a, a tawpah hlawhtlinna mualah an chuang thin a ni. Rilru hnual avanga awm mai mai hian chhungril natna a tipunlun thei a, phurna kawng zawh tur a tiphui thei a ni.
       Pathianin ‘rim taka thawk’ turin min phut a, chu mi hna bawhzui lotu chu a chung a pik lo thei lo a ni. Holam taka sum lak luh hi ho lam takin a put leh mai a, bul thut nei lo bawhkan thiamna pawh rei a daih ngai lo bawk. Rilru lama pa nih tling Alfred Adler-a chuan, “Tumah hi hlawhchham tura siam kan ni lova, hlawhtling tura siam vek kan ni” a tih pawh hi a awm reng a ni.
       Mihring siam that nan ‘khawdur’ a ngaih chan a awm a, rangkachak fim
tak siam tur pawhin mei nasa tak a tul ta thin a. Chuvang chuan vanneihna tawng baw tur pawhin theih tawp chhuah a tul tak meuh a ni. Khawvel mi ropui hnuhma chik chian chuan harsatna namen lovin a lo bawh buai tawh thin a, chu mi chhum pik atanga ni eng mawi hmutute hi chu an chan a tha a ni. Chu mite thawh rah chu a mihringpuite tan kori a tu em em mai a ni.
       Tuartute zinga sawi hlawh tak pakhat chu Helen Keller-i hi a ni. Kum khat leh a chanve chauh a nihin a mit a del a, tawng thei lovin a beng a ngawng bawk. Kum 6 a nihin mitdel hawrawp zirtir a ni a, awmze nei lovin a rak nawk nawk thin. “Ka tum nge ruh sa ruh” tiin a insehruh ni fahmiang. Zawi zawiin hma a sawn zel a, a hnuah “Ka tawng thei ve ta” a tih tum phei chuan a zirtirtunu chu lawmin a tap zawih zawih mai a ni. Kum 19 a nihin B.A. a buan zo va, lecturer-ah a tang a, lehkhabu 80 lai a ziak ta nghe nghe a ni.
       America President zinga mite entawn leh chawi lar F.D. Roosevelt-a pawh kha Politic a khel tan dawn chauhah a zeng ta hlauh mai a, kum tam tak zun leh ek pawh thiar thei lovin an bawisawm a, rilru beidawng lovin a incho phur zel a, tiang hawlin a kal auh auh a, a tawpah America President dinhmun a chelh pha tlat a ni. Sawi hmaih hauh loh tur Abraham Lincoln-a, Jimmy Carter te pawh hi mak tih tling khawpin an tuar nasa a. Mahse, an hnung tawlh duh awzawng bik lo, a tawpah mipui sang sawm tan nihhlawhna kawng sahawngtu an ni tho tho mai.
    Chutiang zelin sakhuanaah sawi tur an kat nuk mai. Khawvel harhna hmasa ber hma tawngtu John Wesley-a sulhnute hi thlir ta ila. A thu hrilnaah a hun laiin mite neksawrna leh entleu ni mah se, a zam lova, a tanna a phet hek lo. Sakawrin mel 25000 chuang a zin a, Hla 6000 a phuah a, vawi 40000 a sermon a, lehkha bu 50 lai a buatsaih bawk. Chuvang em ni le, “Hun awl nen kan inthen fel ta” a tih theih ni.
       Thlarau bo zawnga enna petu lu chhum, ban chhum huam, D.L. Moody-a te, John Knox-a te, James Hudson Taylor-a te, J.H. Lorrain-a te, Adoniram Judson-a etc., te hi an sulhnu a duhawm ngawt mai. Kal hmasate thawm kan hriat danin an thawhrimna rah chu a thlawn lo va, nung dama la awm zelte tan khawnvar a ni. Kristiante tih makmawh lian tak pakhat chu Mission hna hi a ni a, chu mi hna bawhzui tur chuan kan tawrh ngam pawh a tul ang. Nazaret tlangval tawrhna chuan khawvel a chhamdam a, a hnungzuitute chuan chu tawrhna chu a phut ve a ni.
       Tawrhna hi a thlawn mai lova, a chang chuan nghah fan fan a tul si thin. Ni tin nun kawngah pawh hlawhtlinna paw chhuak tur chuan kan hma zawna tih turah harsatna tawrh hmasak a ngai a ni. Chumi hnu feah chuan an tuarna phena malsawmna chu a lo chang leh nge nge thin a ni.

Thalaite Harsatna

2012-01-19T10:42:00.000+08:00

THALAITE    HARSATNA


Hrangkaptluanga, Letpanchaung

       Kan thupui hian a huam zau hle mai a, kan that lai huna harsatna kan tawh dante a inang lo ngei ang a, thenkhat tan harsa tak pawh a then tan chuan harsa lo tak a ni thei a. Tun tumah hian thalai tam zawkten harsatna kan tawh thin nia kan hriatte a tlangpui chauh kan tarlang dawn a ni.

1. Thil tha kan tihna tura kan zak thin hian harsatna min thlen:
       Thalai tam zawkte nun kan enin hmasawnna tur kawng kan zawh dawn tak tak hian kan zak tlat thin. Nu leh pa, unauten hna min zawnsaka miin min ngai nep ang tih kan rilruah a awm nge maw ni, kan thawk duh leh thin lo. Tin, zirlai tam zawk phei chu kan hriat thiam loh zirtirtute han zawh tur kan zak thin avangin kan thiam loh phah thin a ni. Mahse thiam awmin kan awm a, zawh erawh kan hlau hle thung. Zirtirtute kan bum a ni lova mahni inbum kan ni zawk. Sum leh pai nei si lo, nei lo anga awm chu zak bawk si, sum zawnga hna thawh pawh zahthlak ti kan tam a ni. Thil tha kan tihna kawnga hmasawnna tur kan zawn dawn tak tak chuan zak chung chung leh hrehawm ti chung chung pawha kan thawh chhuaha kan nihna dik tak kan tarlan ngam a tul. Chutiang ti ngam chu mihuaisen dik tak an ni. Jakoba 4:17-ah, ‘chuti chuan tupawh thil tha tih tur hriaa ti si lo chu a tan sual a ni’ tih kan hmu a. Chuvangin ka zak tia thil tha tih tur kan hriat kan tih loh emaw, kan hlauh vang emaw pawh ni se, nakinah harsatna kan tawh phah a, kan inchhir leh thin. Mahse, inchhir pawh hi a hun khelha kan inchhir loh chuan a tangkai tawh thin lo. Thil tha tihna tur kawnga kan zak te, kan hlau te hi Setana hnathawh a ni. Pathian lak atanga chhuak chu thlamuannate, hlimnate, lawmnate, thiltihtheihnate, huaisennate a ni thin. Thil tha ti atan Krista Isuaah chuan siama awmin ama kut chhuak kan ni si a; chu thil tha tih chu kan awmna turin Pathianin a buatsaih lawk a ni (Eph. 2:10).

2. Lunglenna hi kan harsatna a ni:
       Mizo hi a huhova awm nuam ti pawl tak kan ni awm e. Kan hnam nunphung
kan enin a hranga awm harsa ti hnam kan ni. Chuvangin tuan tul vanga khua leh tui, chhungkua, thenrual kalsan a lo tul hian kan inkhawngaih a, kan lung a leng em em thin a. A then phei chuan kan tih tur kan puitlin loh phah hial thin. A thente erawh chuan an tihram hram a, mahse a ti tha ber pawlah an tang pha chuang lo. Hnam dangte pawh hi mihring ve tho an ni a, lunglen hi chu an nei ve ngei turah ngai ila. Amaherawhchu an dinhmun hniam phah nan an hman a rinawm lem lo a ni. Lunglen vanga kan dam chhung nun hniam phah, kan level pui phak lo hi kan tam hlein ka ring. Milton-a chuan, “Tuar chhel ber chuan a ti tha ber thin” a lo ti reng a. Hei hi hna hahthlak tak emaw, tuarna hrim hrim emaw chauh kawh tir kher lo ila. Tuna kan thupui nen pawh inmil tak niin ka hria. Hmasawn kan tum a, changkan kan tum chuan he harsatna hi kan tawntlang a tul a ni.

3. Tum fel tak kan nei lo hi kan harsatna a ni:
    Thalai tam tak chu tum fel tak nei lova awm ve mai mai kan ni. Mi thenkhat chuan sum kan neih loh vangin engmah kan thawk thei lo an ti a. Khawvela mi ropui leh thiltithei tak tak hi a tirin nei sa an ni vek kher lo. Tumna a awm chuan kawng pawh a awm thin. Tum mumal tak nei lo kan tam ang zelin kan ram, hnam, kohhran leh chhungkua a tlahniam zel a ni tih hi kan hriat reng a pawimawh. Tlangmi hi thil ruahmanna thui tak (long time plan) nei kan tam lo. Thiltih tur tha tam tak kan hria a, kan ti lawr dun dun a, hlawk thamin engmah kan ti peih si lo. Vaiho thenkhat chu thir chhe zuar chuan hlawk thamin rei tak an zuar mai a, chhang siam pawhin chhungkua chawm nan hmang thei an tam. Hna pakhatah hian an bur ngar ngar mai a, hatsatna an tawh a, engemaw changa hlawhchham dera an awm pawhin beidawng lovin an thawk talh talh a, an hlawhchhamna dinhmun kha hlawhtlinna rahbiah an hmang thiam leh thin a ni. Keini thalaite pawhin kan hlawhchhamna hi hlawhtlinna lungphum atan kan hman thiam a pawimawh. Kan harsat avanga tum mumal tak nei lo kan ni lova, tum mumal tak kan neih loh vanga harsatna tawk kan niin kan hria. Bible chhungah Jak. 1:7-8 leh Thup. 3:15-16-ah hian tum fel tak nei tura Pathian pawhin min phutna kan hmuh rualin, rilru bulbal nei lo erawh chu a duh lohzia kan hmu bawk a. Chuvangin thalaiten tumna fel tak kan neih a tul a, Pathian nen engkim tihtheih a ni (Matt. 19:26) tih pawh kan hriat reng a pawimawh bawk ang.

MCF HUANG

2012-01-19T10:35:00.000+08:00

         KUM 2012 EC MEETING ROREL-TE

    January 8, 2012 Sunday chhun dar 1:00 khan EC Meeting hmasa ber chu Pastor Quarter-ah neih a ni a. Meeting kal zat mi 23 kan ni. Kumin hian Committee member mi 30 kan ni a, mi 5-te chu hnathawh tul avangin an lo tel ramchang thei lo va, mi pahnih dangte erawh an lo tel loh chhan hriat a ni lo.

Sum leh pai chungchang:
    Kohhran (MCF) hian sum endiktu mi 5 kan nei a, chung zinga mi 4-te chuan a dawn zan (Jan. ni 7) atangin sum leh pai an lo enfel vek a, an fakawm hle mai. Kohhran sum hi thlakhat vawi khat endik thin a ni a, sawma pakhat kan pek dan te, member/ chhiatni fee kan pek dan te, MRO card siam dan leh nepnawi chi hrang hrangte endik thin a ni.
    Kohhran hian sum leh pai hman dan chungchangah fim khur tak leh felfai zawka tihdan ngaihtuah zel a ni a, sum enkawltute an hahin an fel em em a, a hman danah pawh Committee rorel dan ang thlap zela hman a ni. Chutiang chu a nih avangin sum leh pai chungchangah kohhran upate an lawm tlang niin a lang.
    Computer Lep-top:
    Biak in-a mipui zai hruai nana hman tur Computer Lep-top lei a ni ang. Biak in-a hman atan hlabu kan siam a, mahse a bo duh phian a, a tlem sawt hle. Computer Lep-top kan neih hunah chuan kan hla duh ang ang projector-in kan kap chhuak tawh mai dawn a. Tichuan hla thar tha tak tak kan saiin hlabu indaih lo emaw, hlabu kim lo emaw a awm tawh lo vang.

Naupang sande sikul zirtirtu:
    Kum 2012 MCF naupang sande sikul zirtirtu tur mi remchang kan mamawh hle mai. Tuna naupang zirtirtu thawk mekte bakah hian naupang sande sikul zirtir kawnga remchang thei tur chuan rawngbawlna pawimawh tak a ni tih hriain in pek theih reng a ni e. MCF Secretary hnenah emaw Pastor hnenah emaw hriattir mai tur a ni ang.

Motor kan lei dawn!
    Kum 2009 atang khan MCF hminga motor ( Texi) lei tumin EC Meeting chuan ruahmanna a lo nei tawh a, chumi tihhlawhtlin nan chuan thlatin cheng 1,000 ( sang khat) dah that zel tawh tur a ni ang. Motor lei theihna khawp sum kan khawltlin hunah Malaysia Mizo zawng zawng tana tangkai thei tur Motor lei kan tum dawn a ni.
    Chu motor chu kohrhan tana sum lakluhna tha tak a nih kan beisei bawk.

MRO Card:
    MRO Card siamna khawl tha lutuk tak mai kan lei thar tawh a. En thuak chuan UN Card emaw tih mai tur a ni ta! He khawl thar lei nan hian Rm. 5,300 kan seng a, Card siam man erawh chu a ngai reng a la ni thung. Tin, MRO atang hian UN-ah lehkha pawimawh thawnsak ngaite leh kohhran lehkha ziak sak ngaite pawh MCF member an nih phawt chuan cheng chawi awm lovin ziak sak zel an ni a, chung zawng zawng chu pawl dang ( Comunity) dang nena kan inan lohna a ni. MRO leh MCF hi tangtlang an nih angin member-ten a zar kan zo nasa em em a ni.

MRO Hminga Project:
    Kumin 2012 chhung hian MRO chuan Project thar hmalak tur a duang ta: He Project atan hian Board din a ni. January 9, khan Board Meeting vawi khatna neih a ni a, Member mi 7 an kal.
    Board chairman: Josiah
Secretary : B. Zarzoliana
Treasurer : K.Vanlalnghaka
Member-te : Pastor,
Lalhmingliana, Lalhmingsanga, Malala,
Ngursaithuama.
Member lak tharte: Biakenga, Lalsanga, Joseph Saia

Project turte:
1. Grace Computer Learning Center
2. Zote Breakary ( chhang siamna)
    Chhang siam zir hun Feb. 13, 2012

Computer zirtirtu dilna hawn a ni
    Dil theih hun Jan. 29 thleng.
UN Card nei tawh, mi tupawh dil theih a ni e.

Mission Sum
    Kumin chhungin Kawlramah Missionary pahnih MCF hmingin kan chawm dawn a, chumi atan chuan sum kan mamawh hle ang. Chuvangin thlatin sunday vawi hnihnaah Mission puala thilpek khawn thin tur a ni a. Kan thilpekte hmangin kan ramah chanchin tha kan hril a ni, tih i hre reng ang u.

Innei ( Kutsuih) chungchang
    Biak in-ah inkutsuih theih loh emaw kan ti, a ni mai thei. Mahse thil awmdan chu hetiang hi a ni e. MCF Inkhawm hun chhung darkar 2 lekah hi chuan inkutsuih a remchang lo a ni. A chhan chu mipui inkhawm hun pangngai a nih tlat avangin.
    Inkutsuih duhte chuan hun dangah engtik lai pawhin Biakin a hman theih reng a. Pastor Quarter-ah pawh inkutsuih theih reng a ni bawk. Chuvangchuan mipuiin thu kan hriat sual loh nan, MCF inkhawm hun pangngai ni lo, eng tik hunah pawh Biak in leh hmun dangah pawh inkutsuih a theih reng a ni. A pawimawh ber zawk chu Pastor biak rawn hmasak zel tur a ni e.

Pathian ram ( Sawma pakhat) lawmna
    Thla thar sunday hmasa ber hi Pathian ram/ sawma pakhatna lawmna hun kan hmang thin a, chu mai bakah thla khat chhunga birthday neite tan tawngtaina hun hman thin a ni bawk. Chu chauh ni lovin, sacrament ni a ni a, he ni hi MCF tan ni pawimawh lehzual kan ti thei ang.

Kum 2012 Steward turte

    1. Lalsanga ( Leader)
    2. Piandanga
    3. K.Vanlalnghaka
    4. Ngursaithuama
    5. Biakenga
    6. Lalrinchhana
    7. Zoremsiama
    8. Vanlalhruaia
Steward-te hi MCF inkhawm hun chhunga thil pawimawh engkimah mawhphurhna neite an ni. Thilpek chhiar te, Mission sum khawn, Sacrement buaipui leh inkhawm mipui thutna chungchangahte fel zawka hun kan hman theih dan turte thlengin an kutah an awm vek a ni.
    Inring thul lova, mawhphurhna an lak theuh kan beisei.

Literature Sub. Committee Member-te
    1. Joseph Saia
    2. Josiah Zanthanga khiangte
    3. Biakenga
    4. Lalhmingliana
    5. Ngursaithuama
    6. B.Zarzoliana

Music Sub. Committee Member-te
    1. Ngursaithuama
    2. B.Zarzoliana
    3. Lyinte
    4. Lallawmawma
    5. Mahrila
    6. C.L Dinzoa
    7. Edenthara

    Heng Sub. committee-te hi hun remchang hmasa berah Meeting tur a ni.

Chanchinbu Joint Editor:
    Kan chanchinbu Joint Editor Tv. Lalchhanhima chuan January 4, khan ram thumna min kalsan tak avangin Pu Joseph Saia chu chanchinbu Joint Editor atan ruat a ni.

Chin National Day Foot-ball

    Chin National Day hmingin Malaysia Chin mite Foot-ball inkhelh tan a ni leh dawn ta. Kum 2010 khan Mizo-in lawmman pakhatna kan lo la tawh a, ni kum 2011 khan kan che tha lo hle. Kumin teh hi engngemaw kan an dawn ni!
                  Inkhelh dan tur tlangpui
Jan. 21 Inrinni
TPF Vs Kanpalet    9:00 am
HPH Vs Zotung        1:00pm
Senthang Vs Falam    3:00pm
Lautu Vs Mara        5:00

Jan. 22 Sunday
Mizo Vs Midat (Cho)    8:00 am
Zo Vs Mindat (Kang)    10:00 am
Dai Vs Matu        3:00 pm
Zophei Vs Paletwah    5:00 pm

Penang Krismas leh Kum thar

2012-01-11T11:01:00.000+08:00

Penang Krismas leh Kum thar

A hmasaberin Pathian hmingin kumthar chibai ka buk a che u. Hei keini Penang MCF Christmas leh kum thar kan hman dan kan han tarlang ve e.
             Dec. 23, 2011 ah kan President Tv. Kima te veng Per Matang Pauh lamah a thei thei chu riak phei turin kan in sawm a. Tichuan 23 zanah chuan member 13 vel kal khawmin, hlim takin kan inkhawm a, tawngtai rual leh zaikhawmnatein hun kan hmang chhunzawm.
             Tichuan a tuk ni Dec. 24, 2011 chu Batu Fringi ah picnic turin, zing dar 9 velah Bukit Mertajam (B.M) lam chu panin kan chhuak ta a, B.M ah innghakkhawmin mi 19 lai kan lo tling chho ta a. Batu Fringi kan han thlen meuh chuan dar 2 vel a ni a. Intihhlimna chi hrang2 buatsaihin kan hlim tlang hle. Tlai dar 5:30 ah Christmas thlen in lam kan pan leh dial dial a.
    Zanriah kan ei kham hnuahin kan inkhawm a, Pu Masena'n "LAL LO PIANG TUR CHU CHIBAI I BUK FUH EM?" tih thupui hmangin Pathian thu chah a sawi. Pathian hnenah kan hmalam hun turte hlanin tawngtaina kan nei. Intihhlimna Lucky Ticket leh Gift Exchange kan hmang bawk. Tichuan, a tuk CHRISTMAS kan nghahhlelh em em chu Pathian zarah dam takin kan lo thleng leh ta! Tv. Kima'n "LAL LO PIANG TUR HI ENGTIA CHIBAI BUK NGE I TUM?" tih thupui hmangin Pathian thu ngaihnawm tak a sawi. Krismas zan zaikhawmnain hun kan hmang a, kum 2012 hruaitu tur hetiang hian kan inthlang.

                            President                        : Lalthankima (Kima)
                            Vice President                : M.S.Dawngliana (MSA)
                            Secretary                       : Vanlalroluahpuii (Mapuii)
                            Assts. Secretary             : Lalrinmawia (Masena)
                            Treasurer (1)                   : Robin Hranga (Hranga)
                            Treasurer (2)                   : Lalpekzuali (Peki)
                            Journalist                       :   Lalnunpeka (Manuna)
                            Auditor                           : Lalliansanga (Sanga)
                                                                    Ruth Lalbiaknungi (Mambawihi)

                Dec. ni 31 zan pawh Tv. Kima te vengah bawk kan riakkhawm leh a. Zan dar 11:45 ah inkhawm tanin tawngtai rualna leh zaikhawmnain hun kan hmang a, kan hlim tlang hle. Jan. 1, 2012 Kum thar ni chu biakin lamah Tv. Kima'n "HUN KAL TAWH NGAITUAH AIIN HMALAM HUN HI ENGTIN NGE KAN HMAN DAWN?" tih thupui hmangin thu ngaihnawm tak a sawi. Inkhawm banah chaw kan ei khawm a, chumi zawhah keimahni awmna mual lam panin, inthlahlel tak chunglin kan inmangtha ta hlawm
                A tawp ber atan, Penang atanga ram thumna kal tawhte chungah kan lawm tak zet a ni. Penang MFC memberte tana Christmas intihhlimna nei thei tura min pui avangin Pathianin malsawm zel che u rawhse.

MS Dawngliana

Keimahni

2012-01-10T18:04:00.001+08:00

KUM 2011 KRISTMAS THLIR LETNA

MCF Branch tinte Kum 2011 Kristmas kan hman dan report kan dawn tlangpui i han lawrkhawm diat diat teh ang.

Penang: December 23 zan atangin President Tv. Kima te veng Per Matang Pauh lamah a thei thei riak khawmin, a tuk Dec. 24-ah Picnic turin Batu Fringi-ah an kal a, mi 19 lai an tling thei a ni. Tichuan urlawk zan chu Mas thlen in ( President in)ah inkhawm a ni a, tawngtai rualnate an hmang ho a, sermon ropui tak tak an ngaithla bawk. Intihlimna leh zaikhawmnain hun an hmang chhungzawm a, a tuk Kristmas pawh hlim takin ruaite an theh a, inkhawmna boruak nuam tak an hmang a ni.

Johor: Dec. 24 zan khan biak in-ah a thei thei kalkhawmin tlai varin an zaikhawm a, mi 44 lai an ni. A tuka hla mawi sak turte zir phah zelin intihhlimna hunte an hmang a, tichuan hlim takin an zai tlaivar thak mai a ni. A tukah chuan an biakin neitute inkhawmah hla mawi an rem a, Kristmas hla mawi remah chuan mawi an tih ber a ni hialin an sawi.
    Chutianga zing lam hun an hman zawh hnu chuan Mizo service hman chhunzawm a ni a, mi 46 laiin Kristmas hlim takin an hmang ho a, kumin ang reng reng hian JB-ah Mizo ten Kristmas kan la hmang nuam ngai lo an ti hial.

KL: KL lam pawh Dec. 24 zan inkhawm kan biak in-ah kan hmang thei a, mi 120 vel kan ni. A tuk Kristmas ni pawh kan hun pangngai ang takin kan hmang thei a, inkhawm mi 465 vel kan ni a, ruai kil mi 440 vel kan ni awm e. KL lam pawh kumin kan Kristmas hman danah kan lawm tlang hle a, kawng tin rengah Lalpan min awmpui tih a lang chiang khawp mai.

Crusade tan hun
            January 15 - 24, 2012 ( Chhun leh zan)
              Speaker : Evan. Thlamuanthara
            A hmun : MCF Biakin; Alor

KUM 2011 Record Thenkhatte

    Kum 2011 chhunga MCF Nausen Baptisman zat -   22
    Kum 2011 chhunga MCF Pastor Kutsuih zat tuak-   27
    Kum 2011 chhunga MRO Card siam zat mi            - 251
    Kum 2011 chhunga Member fee petu zat            - 607
        ( Member fee hi KL huap chin chauh a ni e )

Chin National Day Foot-ball
January 21 atangin tan a ni leh dawn ta.
        22nd January 2012
1. Mizo Vs Mindat ( Cho) 8:00 am
    A hmun : Imbi Khelmual
         MCF Member zawng 2 en vek tur.

HMEICHHE HLUTNA

2012-01-10T17:58:00.001+08:00

Dr. Than Bil Luai,Tahan

Hmeichhe hlutzia chu mi zawng zawng hriat a ni a. Engang takin nge an hlut tih erawh chu sawi dan a inang lovin teh dan pawh a inang lo thei hle awm e. Mipa leh hmeichhia chu khawvela mihring lo awm tantirh ata, hmasa zawk awm chuang lova lo piang tlang an ni ngeiin a rinawm a. Mihringte lo awm tan hun chiah hi chiang taka hriat ni rih lo mah se, tunah chuan khawvel chu mihringte hian an luah khat tawh a; mihringte chu hnam chi tinrenga then an ni bawk. Mipa leh hmeichhe dinhmun thu-ah hnam tinte tih dan a inang chiah hlawm lo va. Khawvela thuneihna pawh hi mipa kutah chauh a awm lova; nuho rorel hun pawh a lo awm ve daih tawh a ni. Hmeichhe hlutna chu Bible, sakhuana, hnam dan leh kan tih dante thlirin han chhui chik deuh ta ila.

Bible-a hmeichhe hlutna:
    Bible-ah chuan mihring lo awm tan dan kan hmu a. Pathianin anmahni anpuiin mihring a siam tih a ni a. A siam hmasak ber chu mipa, Adama kha a ni. A hming pawh hi Pathian sak ngat a ni awm e. Pathianin Adama khawhar lutuk hmel kha a hmuhin a khawngaih hliah hliah a, amah tihlimtu leh awmpuitu atan hmeichhia a siamsak a. Chu pawh chu hmun dang leh thil dang atangin a ni lo; Adama taksa atang ngeiin a siamsak a. Chuvangin, hmeichhia chu mipa atanga lak chhuah, mipa khawhar lutuk hnemtu atana Pathian siam a ni a. Bible pawh hian, Pathianin mihring a siam atang reng hian, hmeichhia chu mipa aia hniam deuh zawkah a dah a tih theih hial awm e.
    Adama chu sualah a lo tlu a. Eden huan atanga hnawhchhuah ngai khawpin a lo awm a. A thiltih sual chu "thei ei thiang lo" a ei vang a ni a. Chu thei a lo ei ta pawh chu ama duh vang ni hauh lovin hmeichhia-in ei tura a thlem thluk vang a lo ni lehzel a. Chu hmeichhia chu setana pawhin a zuam a, a thlem thlu thei reng bawk a. Chuvangin, mihringte tluk chhiatna pawh chu "hmeichhia" vang a ni, tih theih turin Bible-ah a chuang a.
       Abrahama nupui Sari chuan fa a nei thei lova. A mangang lutuk a; a chhiahhlawh Hagari chu a pasal Abrahama nen a muttir a. Hagari chuan fapa a nei a. Sari pawh chuan fapa a rawn nei ve leh a. Sari chuan Hagari leh a fapa Ismela chu hnawtchhuak turin Abrahama chu a kar chiam a. Abrahama pawh chuan Sari thu angin a hnawtchhuak ta nge nge a. Hetah pawh hian "hmeichhia" Sari hi chhungkaw buaina thlentu angin a lang thei awm e.
           Bible Thuthlung Hlui-ah chuan hmeichhiate chuan dah hniam an hlawh nasa em em a. Hlutna reng an nei lo emaw tih tur hian, chhungkuaah te, social nunah te, sakhuanaah te dinhmun an nei chau em em a ni. Chutiang chu ni mah se, hmeichhe ropui tak tak an lo chuak a. Lalnu ropui tak tak, nun rawng tak tak leh hmeichhe thilti thei tak tak an awm ve zel bawk a. Mahse, chutianga an lo awm theihna chhan chu khangang lai huna hmeichhe hlutna an dah san vang chu a ni hauhin a lang lo. Hmeichhia chu sakhuana, social nun leh politic mualah hmun pek ni lo mah se, an chanchin a tel ve lo thei lova. Chu tak pawh chu an hlutna niin a lang. Hmeichhe lal ropui tak tak an awm angin, Estheri anga thilti thei tak pawh an awm bawk a. Jeriko kulh an auh chim dawnin hmeichhe pahnihten Israel enthlatute an lo humhim hmiah bawk. Chuvangin, politics tlangah pawh hmeichhiate hi an hlu hle a tih theih awm e.

Sakhuaa hmeichhe hlutna:
       Khawvelah sakhua tam tak a awm a. Juda sakhua leh Islam sakhuaah te chuan hmeichhe dinhmun hi a hniam em em a. Inkhawmna biak in leh synagogue-ah te an kal ve thei lo emaw, hmun thianghlimah an kal ve thei lo emaw a ni a. Serh leh sang khawih phei chu a teuh lo hle a ni. Chuvangin, Pathian pawh hi "Pa" tiin an ko va. Hei hian hmeichhia chu mipa aia hnuaihnung zawkah an dah a, an hlut lo zawk tih a entir a tih theih awm e. Hindu leh Buddhist sakhuaah pawh hmeichhia chu serh leh sang khawihtu atan an hmang bik lo. Amaherawh chu, Hindu sakhuaah chuan "nu" hi an zahin an hlut em em a ni.
           Kristian sakhua hi chuan hmeichhe hlutna hi a hmu fuh hlein a lang a. Khawvel chhandamtu Isua Krista ngei pawh kha "hmeichhia"-in a pai a, a hring a, a enkawl a, a chawm puitling tlat. Kristaah chuan hmeichhia leh mipa an awm chuang lova angkhat vek an ni tiin tirhkoh Paulan a sawi bawk (Galatia 3:28). Hmeichhiate chu hlutna famkim nei Kristiante an ni, tiin Rom 2:17 -ah a chuang bawk. Isua Krista phei chuan hmeichhe hlutna hi a ngai pawimawh lehzualin a lang a. Amah rawngbawlsaktute pawh hmeichhia vek an ni a, a thawhleh huna a inlar hmasakna berte pawh hmeichhia an ni.
           Tun lai kristiante zingah ngaih dan inang lo a awm nuk mai. Paula meuh pawhin, hmeichhia leh mipa chu hlutna inanga ngai ang viau mah se, hmeichhiate chu biak inah chuan ngawi mai mai turin a khap tlat bawk si a (1 Korin 14:34). Vawiin ni thlengin Roman Catholic kohhran chuan hmeichhe rawngbawltute hi an la ordain thei rih lo a ni.

Hnam dana hmeichhe hlutna:
       Hnam dan hnuaia hmeichhe dinhmun hi a inchen lo thei hle a. Hnam nun a changkan poh leh hmeichhe hlutna pawh a sang niin a lang. Ram changkang tawh America leh Europe ram thenkhatah meuh pawh hmeichhia hian mipa hlawh zat a hlawh theih lohna hmun a la awm mek zel a ni. Hnam tam tak danah chuan chhungkaw rorelnaah hmeichhia an tel thei lova. Hmeichhia chu bungrua ang leka ngaih an ni thin. A bik takin inneih nikhuaah hian hmeichhe hlutna an teh dan a lo lang thin. Rom lalte hun laiah pawh hmeichhia hian thlarau an neih ve leh neih ve loh thu an sawiho fo thin an ti.
       America, England leh Japan ramah chuan inneihna chu hmeichhe enkawl hna inchhawkna ang deuhin a kal a. Mo (hmeichhia) kha a pasal neih ni atangin a pasalte chhungkuain an lo enkawl dawn tawh tihna a ni. Chuvangin, inneih kut suih dawnin, "he hmeichhia hi tuin nge hlan?" an tih thinna a ni.He tah pawh hian hmeichhia chu an lo enkawl chhawk chauh pawh ni lovin a chunga rorel theihna power pawh an nei nghal ta thin a ni. Hmeichhe hlutna chu mipa hlutna nen inang rengin an ngai angin lang mah se, hmeichhia chu mipa enkawlna leh thuneihna hnuaia awm tho tho an la ni fan. Mahse, hmeichhia chu man leh muala hralh ang ni lovin a peka pek, a hlana hlan a ni thung a. A hlutna erawh an teh lova, hmangaihnaa lo dawnsawn kha a ni zawk.
       Arab, Roman, Babylon, Nigeria, Ghana, Kenya leh Siberia ramahte chuan hmeichhe nu leh paten mipa hnenah an fanu chu a hralhin an hralh tak tak a ni. Man leh mual an chhiar a, mipa lamin a leiin an lei thin a ni. China ramah pawh hetianga nupui an leina hmun a la awm. Heng hnam zingah chuan hmeichhe hlutna chu sum leh paiin an teh a ang hle a. Ral atang mai hi chuan hriat thiam tak tak a har ang reng hle.

Kan hnam dan leh sakhaw hnuaia hmeihhe hlutna:
           Hmasanga kan hnam danah chuan hmeichhia hi bungrua angin an lo ngai
a. Tung chhova kal chu ni ve mah se, chhungkaw thuah emaw, khawtlang thuah emaw inrawlh theihna an nei lo va. Anmahni taksa ngei pawh an thu thei lo va; nu leh pa emaw, an pasalte thu a ni vek. "Hmeichhe thuin tuikhur ral a kan lo," "Hmeichhia leh pal chhia chu thlak ngai," "Hmeichhia chum ngai, darkhuang chum ngai" tihtein hmeichhe ngaihhlut lohna tawngkam kan nei teuh va. Inneih nikhuaah pawh a hralhin an hralh thin a. Bawngpui nufaa hralh tawk na, pawisa cheng 100-a hralh tawk na, cheng sang khata hralh tawk na, dar bu leh puan bu nena lo inthleng tawk mai mai an ni nuk. Hmeichhia hian duhthlan theihna a nei tlem em em a. A nu leh paten an duh phawt chuan, a duh loh leh hmangaih hauh loh mipa tangah an bei luihtir thin a. Mipa ina a va awm hunah pawh mana lei a nih ang ngeiin an lo bungraw en tho va. A pasal awm loh hlanin a pasal chhungten an lo ma daih thei thin! Kan hnam danah chuan hmeichhia hian hlutna reng an nei lo a ang hial thin a ni.
           Kan sakhuana pawh hi hnam danin a tuam vel nasa em em mai a. Kohhran
upa leh hruaituah hmeichhia hmuh tur an tam lo hle thin. Tahan District Methodist Kohhranah phei chuan vawiin ni thleng hian District Standing memberah hmeichhia pakhat mah an la awm hauh lo a ang hle. Chutianga hmeichhiate dah hniam chu kohhran upa thenkhat lawm zawng tak niin a lang. Hmeichhia hi an huphurh hliah hliah emaw tih tur hian a awm a. Vawi khat chu kohhran upa pakhat hnenah ‘hmeichhiate hi E M committee-ah tal tel ve sela; an faitham rinchhana rawngbawl kan ni si a’ ka han ti dek dek a. An tel lo chung pawh hian kan tuar mang lo a nia, an tel lehnghal chuan kan lu chungah an chuang ang, min tihsan ta daih a. Sawi tur a vang hle.

Hmeichhe hlutna chu engin nge kan teh ang?
       Tuna tehna kan tarlan hi hmeichhe hlutna chang ni lovin mihring hlutna tehna a ni zawk a. Hmeichhia chu mihring famkim a nih avangin he tehna thova teh hi a tha berin a rinawm.

Fimkhur taka remruat thiamna: Hei hi Sap tawnga "prudence" an tih hi a ni a. Thil pakhat tih dawnin chik tak, ngun tak, thuhnu leh thuhma dawn chung zela thiltih ching tihna a ni a. Thu pakhat sawi dawn pawhin sawi chhuah tlak a nih leh nih loh ngaihtuah hmasak a, mi huat zawng a nih leh nih loh chik zet a, a tangkai dawn nge tangkai dawn lo tih ngaihtuah hnua sawi chhuah thinte hi a kawh tum a ni a. A bik takin sum leh pai hmanna chungchangah remruat thiam a tul lehzual a. Remruatna tel lova sum hmang thin chuan an chhungkuaah buaina a thlen fo thei ang.
       Nu chengvawng chuan tul lopuia sum hman a tum ngai lova. A sum lut zat emaw, lut ngei ngei tur zat emaw a hre reng a. A sum neih aia tam hman a tum ngai lo. Thla khat chhung atana an chhungkaw mamawh zat tur a ngaihtuah lawk a, an sum lut tur atanga an mamawh tihphuisui dan chu a lo ruahmansa thin. A neih loh pawisaa thil lei a tumin a lei ngai lova, a thenawmte leh thiante hnen ata sum a puk ngai lo bawk. A kuta sum lut chu Pathianin a kawltirah a ngai hmiah a; steward tha leh rinawm nih tumin a hmanna tur lamah a fimkhur em em a. Thil tangkai lo tur atan hman chhuah a tum ngai lo. An chhungkua chu miin "mi rethei" dinhmuna an ngaih ni mah se, mi lei ba hauh loin a enkawl thei a; a fate pawh sikul a kaltir thei tho bawk. Hetianga an awm theihna chhan chu fimkhur taka remruat a thiam vang a ni a. Kan tawng tak hi chuan "hmeichhe fing" kan tih hi a ni mai awm e. Mahse, a fing tehchiam lo mai thei a; remruat erawh a thiam si a.

Dik taka thiltihna: Hei hi Sap tawnga "Justice" an tih hi a ni a. Dik taka thiltih hi Pathian leh mihring duhzawng a ni a. Mi zawng zawngina kan tih dan tur pawh a ni a. Miin dik taka an tih loh pawhin itsik mai lova mahni hmaa a lo chhuah hunah dik taka tih mai chin hi a pawimawh hlein a lang.
       Hmeichhia chuan a pasal leh a chhungte nena an inkarah, a thenawm leh thiante nena an inkarah leh a hnathawhna hmunah dik taka thil a tih thin chuan hmeichhe hlu tak a tling ngei ang. A pasal hnena thu dik a thlen loh fo chuan emaw, a hriat lohva thil a tihruk fo chuan chhungkuaah harsatna a thleng thin ngei ang. A fate chunga diknaa ro a rel loh chuan a fate inkarah in itsikna, inrem lohna leh suala tlukna a thlen thei ang.
       Mahni hnatawhna hmunah dik taka thiltih a pawimawh leh hle a. Isua Krista zirtirna angin, "miin kan chunga an tih kan duh ang chauh mi chunga tih ve" tum hi dik taka thil tihnaa min hruaitu a ni ngei ang.

Mahni invawn felna: Hei hi Sap tawnga "temperance" an tih hi a ni a. Tawng kam hman dan leh thu sawi kawngah te, thiltih leh chetziaah te, zuk leh hmuam chungchangah te mahni invawn fel a pawimawh a. Chutiang kawnga invawng fel theite chu "mi hlu" tak an ni. Nungchang mawi hi hmeichhe hlutna a ni fo va. Nupui tur zawnnaah pawh an hmel en lova an anka leh chetzia en tur tih hi upate thu ro chhiah a ni bawk. Harsatna thlen huna chhelna: Hei hi Sap tawnga "fortitude" an tih hi a ni a. Mahni taksaah leh chhungkuaah harsatna leh vanduaina a lo thlenin rilru dam taka hmachhuan theihna a ni a. Harsatna nasa tak, thihna khawp hial pawh lo ni se, pachang tak maia chhel em em maia tawrh theihna hi a ni.
       Mi tam tak chuan harsatna kan tawnin awm ngaihna kan hre thin lova. Rilru hah em ema awm a, thidang leh buaipui ngaia awm palh a awl hle thin. Hmeichhe then khat chuan rilru pachang takin, an chunga thil lo thlengte chu an tuar hram hrama an tuar chhuak thin.

Tlangkawmna:
    Hmeichhe dinhmun khai san a nih chuan hmeichhe hlutna pawh hi a sang
chho tual tual ang a. Chhungkua, kohhran, ram leh khawtlang tana an talent tha puipuite hi a lo chhuak nasa tual tual dawn a ni.

KUM THAR MALSAWMNA

2012-01-10T17:45:00.000+08:00

    Kum khat chhunga kan thiltih that leh tihsual zawng zawngte chu chatuan hmun panin kum hlui 2011 chuan a liampui ta. Tuipui lianin phairuang hnawl a, kawrvai a thlen ang mai hian kum 2011 pawh khan kan nun hlui zawng zawngte chu hnawlin mual a liampui tawh a. Auh din rual lohin kan nun dan kawng tinrengte chu khuarei chanpui tur leh nakina Lal hmaa kan la dinpui turin a her liam ta vung vung mai. Chhungkim dar ang kan len lai ni te, lenrual kima kan tuanna mual leh kan hlim ni zawng zawngte pawh hringchan khawvelah hian kan tawng leh ngai tawh lo vang. Chutichuan kum thar kum 2012 hian nakina Lal hmaa kan la dinpui tur nun thar duhawm tak min thlen theuh rawh se.
    Mihring nun derthawng tak mai chuan kum 2011 chhung zawng khan ‘engtiang takin awm zel ang i maw’ ti chung zelin kum thar kum 2012 chu Lalpan a kut chakin min hruaikai leh ta reng mai. Khawvel harsatna leh buainain min chim mek a, nat lawk pawh awm loin, thlipui leh ruahpui avang te, lirnghing leh indona avangtein mi tam tak an boral puk puk mai a nih kha! Chu mai ni lovin ei tur bar tur nei lo leh silhfen tur nei lovin mi sang tam tak retheihna khurah an tang mek a, mihring an lo nih ve ngawtna chhan pawh hre lo, siamtu Pathian, chatuan nunna petu hre map lo, khawvelah mi eng zat tak la awm ang maw!
    Vawiinah hian nang leh kei chuan kan thawh, kan tih tel hauh lovin chatuan nunna min petu Pathian nung kan nei a, a fapa mal neih chhun pawh ui lova, min petu chuan thil zawng zawng pawh min pe phal lo vang em ni?
    He kum 2012 hi in malsawm dawn kum lo ni rawh se. In hmuingil kum lo ni se la, taksa rilru thlarauah Lalpa nena in inhnaih kum lo ni rawh se. In beisei tihhlawhtlinin lo awm se la, in ramri zauh lo ni theuh rawh se.

                KUM THAR CHIBAI U

BATUUNTUNG NAUPANG CAMP

2011-12-29T23:13:00.000+08:00

Tetea pu

Malaysia Mizo camping hmasaber CHHANDAMNA CAMPING (Naupang pual ) chu, Dec 13 – 16 khan Batuuntung-ah neih a ni a, Dt- 13.12.2011. 2:15 pm khan KL atangin mi sawmhnih tha vel chu bus-in kan chhuak a, Batuuntung chu 4:00 pm -ah tluangtakin kan thleng.

Pu Vanlaldawnga inah camping-na buatsaih a ni. Naupang campers 30 zet Lalpan a hip khawm a, Speaker chu Rev. Hrila a ni a, naupang zirtir dan a thiam a, ning miah lovin ni li chhung Pathian thu an zir tluan thei a ni. Zaithiam Nl. Daisy-in naupang hla a zirtir reng bawk a, thu leh hlaah Lalpa a inpuang nasa hle a ni. Tawngtaikhawl pawh Pu Sanga hovin mi sawm velin naupang camp chhung zawngin an khawl an ti vir mup mup thei reng a, Pathian Thlarau Thianghlim hnathawh a lo lang a, kan naupangten thlarau chhandamna changin Pathian hnenah an inhlan thei vek a, naupangte e ti lovin, Lalpa hmua hlim leh lawma tapte pawh an awm nual.

MCF sum tamtak kan seng nain, khawvel sumin a lei theih loh Pathian chhandamna hlu tak naupangten an chhar hi van mipuiten kut bengin min lawm pui ngei ang. Bene Hin-a chuan, "Thlarau bo chhanchhuah a baka hna ropui a awm lo," a lo ti nghe nghe a ni.

Kan fatu leader Tv. Manuna hovin vawk Kg 130 zet mai an talh a, tisa lam ruai pawh kan hnianghnar hle a ni. Batu khawpui nu leh paten kawng engkimah tlawmngaihna an chhuah tak zet a, kan lawm hle bawk.

Sawi hmaih hauh loh tur pakhat chu, Kan camp-na hmun hi Malaysia vawk farm ropui tak awmna hmun a ni a, vawk sang rual vulhna kara bawkte khawhna hmun lo niin, kan thlen hlim chuan, vawkek rimin min buala ka rui chhu hlawm a; chumi hmuna ni nga tlawng han khawsak tur chu dam khawchhuakin kan haw thei ang em? Tih hi kan in zawhna a ni tlang pui. Mahse, Pathian thlarauvin min awm pui a, ngaiah kan nei thei a, kan hawn dawn lamah phei chuan a leh rimtui tawh zawk hial a ni.

Batu upa Pu Nghinglova’n inthlah zana a lawmthu sawina tawngkam hi chhinchhiah tlak tak a ni. " Pathianin khawvel sual chhandamna turin a Fapa malneihchhun Lal Isua pian nan hmun tlawm ber Bethlehem bawngin rim chhe tak a thlang ang khan, Malaysia hmun tlawm ber Batuuntung vawkek rim chhe karah Malay Mizo naupang ten chhandamna an chang tlat hi a makin a lawmawm a ni," an ti chu, kut kan beng dur dur mai.

Batuuntung naupang chhandamna campingah hian Pathian thlarau thianghlim a che a, kan hlawhtling haw hlein kan in hria a, Lalpa a ropui hle a ni. Kan naupangte Kristian nun thara ke an pen zel theih nan, kan tawngtainaah i hre reng ang u.

MCF Kristmas Inkhawm

2011-12-29T15:49:00.000+08:00

    Kaihruaitu    : Pu B. Zarzoliana
    Zai hruaitute :    : 1. Pi Lungtiawii
                              2. Nl. Ngurpuii
                              3. Tv. Lyinnte
    Tawngtaitu    : Pu Zoremsiama
    Mipui hla    : Lal pian hun lawmawm tak
    Bible chhiarna: Pu Biakenga ( Isaia 9: 6-7)
    Solo        : Nl. Dindini
    Zaipawl    : MCF
    Mipui        : Kumpui sul
    Solo        : Tv. Te-a
    Zaipawl    : Ngurpuite unauza
    Thilpek lakkhawm
    Solo        : Lalnunpuii
    Thilpek hlantu: Pu Ngursaithuama
    Mipui hla    : Ngai teh Van Lalfa chu
    Mipui Bible chhiarna: Nl. H.Malsawmtluangi ( Luk I: 30-38)
    Solo        : Nl. Lalnunthianghlimi
    Mipui hla    : Mipui thlan hun
    Thuhriltu Bible chhiarna: Pi Partei ( Luk I : 67-80)
    Solo        : Gospeli
    Sermon    : Rev. Gopel Hrilvelthanga
    Ruai tana tawngtaina: Pu Vanlalruata
    Thupuan    : Secretary
    Mipui hla    : Hosana ti zelin Aw
   Malsawmna    : Rev. Lalduhawma

Kumin mas inkhawm kan hman dan hi kum dang ang lo deuhin tihdanglam a ni a, lawmman sem leh thil dang dang zep tawh lovin mipui zaiho leh solo lam kan uar deuh a, hlimawm hlein kan hria.

Inkhawm banah kan biakin hnuaiah Mas ruai theh a ni a, mipui 450 vel kan ni.

Malaysia Lal Thar

2011-12-21T10:09:00.000+08:00

Malaysia-in Lal Thar A Nei Leh Ta

    Christmas a hnaih takah chuan, lal thar piantir ve lo mahse Malaysia ram chuan lal thar a nei leh ta. Malaysia ram hruaitute inhmukhawm (Meeting of the Conference of Rulers) chuan Oct 14, 2011 khan Tuanku Abdul Halim kum 84 mi chu Malaysia ram lal a tan a ruat a Dec 13, 2011 khan Lalthuthleng a luah tan a ni. Tuna lal thlan thar, Tuanku Abdul Halim hi tum hnih a lalna niin a tum khatna chu kum 43 mi a nih lai 1970 khan a ni a. Kum 43 a liam hnuah a tum hnihna tan lal turin an thlang nawn leh ta a ni. Tuna lal thar hi Malaysia ram history-ah lal upa ber nih leh Malaysia rama Lal nawn leh thei awm chhun a ni a. Malaysia ramah hian ram lal te hi a rei lam kum 5 te te a inchhawkin an lal thin a ni.
    Malaysia ram lal hian ram chhunga lu ber a nih avangin thuneihna emaw chen a nei a. Kawng tam takah prime minister leh roreltu (cabinet) te hnen atang thurawn lain thu tihtlukna a siam thei thin. Prime minister a ruat thei a, ram chhung rorelna sang (parliament) kum tawpa an khar thin khar tura ngenna a hnawl thei a, roreltute meeting turin a ko khawm thei a, ram chhunga ralthuam chungchangah lu ber a ni a, sakhuanaah a awmna state-a lu ber nih leh awptu awm lohna hmun Malacca, Penang, Sabah, Sarawak-ah te awptu lu ber a ni bawk. Heng bakah dan hre mi leh court-a roeltute an ruat thei a, tin, dan bawhchhia-a courtin thiam loh a chantir tawhte pawh a ngaihdam thei thin bawk a ni.
                                           (Source: The Sun & The Star)

Kristmas Sermon

2011-12-21T10:05:00.004+08:00

        REMTHU LENG RAWH SE

                                    Zorina pu

    Van mipuiten, “ Chungnung berah Pathian ropui takin awm rawh se, lei chunga a lawm em em mihringte hnenah remthu leng rawhse,” tia hla mawi ropui tak an sak authangkhawk kha, Christmas ni lo thlen hian thin laiah a cham reng thin. “Mihringte hnenah remthu leng rawh se,” a tih hian, Pathian leh mihringte inkar remna leh mihring leh mihring inkara rem thu len tirtu a nih thu a phawk chiang hle awm e.
          La Isua pian hma kum 700 velah khan Zawlnei Isaia’n a zawlnei entlangna hmangin, Mesia (Chhandamtu) lo pian tur thu leh a hming atan pawh Maka, Remruattua, Pathian Chaka, Chatuan Pa, Remna Lal tiin a lo sawi lawk diam tawh a. Chu thu chu Lal Isuaah a rawn thleng dik famkim ta a ni. Zawlnei Isaia hming sak hi hming naran mai a ni lo va, Lal ropui takin power a neihna hming vek a nih avangin, khawvel hringfate sakhming atan chuan a ropui lutuka pungam leh putlak kan awmin a rinawm lo a ni. He hming pangate zinga Remna Lal tih hi hringfate tan a thlen dikzia leh kan mihringpuite hnenah remthu lentir a pawimawh zia lam kan ngaihtuah ho dawn a ni.
           Remna hi Mihring nunhonaa thil pawimawh tak a ni a, khawvel sawrkar hrang hrang an in palai tawn thinna chhan pawh remna awm theih nan a ni. UNO ( United Nation Organisation) hial a lo dinna chhan pawh khawvelah remna leh muanna a awm theih nan a ni. Khawi ram pawh remna leh muanna awmna chu ram nuam a ni thin. Chutiangin inremna a awm lohna ram apiang a hrehawmin a ralti thin a, ram nuam a ni thei lo. Khawvel pawhin a mamawh a lo zawn fo thin remna chu Lal Isua tel lo chuan inremna tluantling tak tak a thleng thei lo va, a keh chhe leh fo thin a ni.
           Kan thlahtute Eden huan atanga hnawh chhuah an nih hnu khan, Pathian nen inrem thei tawh lo sualfate kan lo ni a, chu chu a Fapa mal neih chhun Lal Isua hmangin Remna a rawn siam leh ta hi a va ropui em! Remna Lalpa chu fakin awm rawh se.
           Inremna rawngbawl hna thawh chu Lal Isua hna pui ber pakhat a ni. Uirenu lunga den hlum mai tura an hruai pawh kha Lal Isuan, “Sual nei lo chuan deng hmasa rawh se,” tih hmangin a chalrem ta khauh a nih kha. Palestina ram dung leh vanga awm Galili bial awptu Heroda leh, Judai ram   bial awptu Pilata pawh hi in tai reng, inrem thei ngai reng reng lo an ni a; Lal Isua chung (tual thih tur) thuah erawh an inrem thei tlat zuk nia! Khawvel inrem lo, inrem leh tur hian Isua bak mamawh an nei lo. Inrem lohna hi Isua awmna ramri pawnah a hluar thin a; chhungkua, thenawm khawveng leh kohhran ho kan inrem a ngai a ni. Khawvel hian chu remna Lal chu kan thlang thei rih lo chu a ni si a.
          Isua Krista hi remna siamtu a nihzia chu, kum 1870-a Franch leh German ho indo lai khan, Franch sipai pakhat chu, Christmas zan khan German ho awmna lamah a kal a, a thianpain a hlauthawng a, an kahhlum nghakin a thlir reng a. Zan thiang reh lai takah chu sipai chuan, “Noel Noel, Isaraelte Lal a lo piang ta,…” tih hla kha an sa veng veng mai a. German sipai pakhat pawhin kha hla bawk kha, an mahni tawngin a han sa chhuak ve ta a. Tichuan le, thil mak tak mai a lo awm ta, Franch leh German sipaite chuan chu hla chu a rualin an sa ta dual dual mai a, indo zai reng an rel thei ta lo, an tih chu! Lal Isua pianni (Christmas ni) hi remna ni a lo va ni tak em!
           Vawikhat chu Koria flim ka en a, company pakhata thawk ho zingah hian a hotu lam inrem lohna lian tak a rukin an nei tlat mai a, phuba inlak tawn nain tawpintai an nei lo va, chairman nihna dinhmun an inchhawk zak zak tluan chhuak parh mai a; an company pawh a keh chhiat phah nghe nghe a ni. Chuta ka zir chhuah chu,
(1) Lal Isua tlawmna puan sina remna          siam duh lo tute chu, chhiatna an          tawk thin.
(2) Thuneihna chang lo zawkte kha khawvel thlirnaah chuan a tlawm zawk dinhmun an chang ngei a. Mahse, remna siam duh vanga tlawm an nih loh avangin, an thinlung a tlawm tel ve lo va, lungawilohnain an khat liam a, remna leh muanna thlen thei chi an ni tawh lo, tih hi a ni.
           I nunah Pathian malsawmna a awm leh Pathian fa-a hriat nih i duh chuan, remna siamtu nih kan zir tur a ni. Matt 5:9 –ah “Remna siamtute chu an eng a thawl e, Pathian Fa-a vuahin an awm dawn si a.” a ti. Remna siam hi, tlawn lungawina a ni lo va, tlawmna leh dawhtheihna nun nena rawngbawl hi a ni zawk. Thufing 19:11 ah, “Mifing chuan dawhtheihna a nei thin a, Bawhchhiatna ngaihdam chu atan ropuina a ni” a ti. Dawhtheihna hi finna atangin a chhuak a, finna chu mite dinhmun hriatna atangin a chhuak a ni. Ram leh ram chi leh chi an in do thin te, kohhran leh kohhran thubuai neiin sorkar court-ah an inkhing rup rup thinte hi dawhtheihna leh ngaihdamna hmanga inremna kan siam thin loh vang a ni duh chawk. Remna Lal hi kan nunpui tak tak loh vang te pawh a ni mahna! Inremna siam duh miah si lo va, thubuai hlabuai hneh thei tura tawngtai tluk tluk te pawh hi, mangkhawng hnuaia sazu tawngtai kan ang mai lawng maw? Hemi avang hian Paula pawhin Korinth kohhran mite inkara indona, roreltu ringlo mite hma hiala inkhinna a lo awm chu zahthlak a ti a, in zinga mi pakhat tal in-inkar buaina sawifelpui thei pawh in nei lo hi a zahthlak a ni, a rang lamin lo inrem rawh u, tiin a chah bakah, “Tu pawhin tu chungah pawh thupawi nei ula, indawh tawnin inngaidam tawn ula, Lalpa chuan a ngaidam che u ang tak khan inngaidam ve rawh u” a ti nghe nghe a ni.
           Mahni inpuan chhuah ngamna hi inremna atan hmanraw thil tithei tak a ni. Mahni dinhmun tan tlat tura an beisei lai che a, inngaitlawm taka i tih dik lohnaah mawhphurhna pawm ngam la, ngaihdam dil rawh. I khing puite thinurna a ti daiin an beih tumna che a thiat ang a, inremna a thlen thung ang.
          Dik in ti ve ve inkarah inrem lohna a thleng thin. Mahni dikna tarlana mite diklohna hmuh len viau hi kan tum thin. Chutih hunah chuan, “Ka hre sual palh a ni ang, ka dik lo zawk a ni tak ang e; min ngaidam rawh,” han ti hlauh la, an thinrim rei bik lo vang. I thiamthu i sawi lo va, ngaihdam i dil hlauh avang khan, a zah ang che nga, a thinlung i hneh hlauh dawn a, remna siamtu i lo ni bawk ang.
          Van leh khawvel a inrem theih nachhan chu Pathian a chet hmasak vang a ni a, Pathian nena inrem tawh nun chu mi dang rem turin a che hmasa tur a ni. Midangin min rawn rem nghak lovin, Lal Isua inngaihtlawmna puan sinin mite rem hmasatuah tan i tum theuh ang u. Tichuan, van mipui ten fak hla ropui tak an sak chu sakpui theitu kan ni dawn a ni.
          Remna siamtu kan nih theih nan Lalpan Mal min sawm theuh rawh se.

Kan ngen anga Kristmas Sermon ropui tak min rawn ziak avangin kan lawm hle.
He thupui ziaktu hian kumin 2011 chhungin kan chanchinbu tan sermon leh thuziak tha tak tak sawm leh pakhat a rawn thawh tawh a, kan lawmin ropui kan titak zet a ni.
    Hetiang mi bik, Pathian thu leh hringnun zirtir nei thuziak thiam MCF upa zingah an lo awm hi Lalpa malsawmna liau liau a ni e. Lalpan thuziak tur tha tak tak pe zel rawh se!   Ed.

KRISTMAS LEH THALAITE
                    Edenthara ( Varte)

Hun leh ni inher danglam zel chuan chhandamtu piancham Christmas a rawn herchhuah pui leh dawn ta.. Thal ni sensa rumrut chuan thing hnah leh par zawng zawng a em ro zo a, fur ruahtui lo tlain hnah thar hring leh mawi tak tak a rawn chawr chhuahpui ve ta thung. Sik ni eng rawn paw riaiin Ber thla chawhnu lam a rawn her chhuahpui meuh chuan " U-A-MA" par a rawn vul chuk a, December thla han chuangkai chinah tawh phei chuan suangtuahnain Davida khaw lam tluang a chuan a, Bethlehema nausen mutna tur ngaihtuah reng rengin tlai ni kan vui liam thin.

Lal Isua piancham Christmas hi a ni leh thla,kum thuah ngaihdan leh rin dan a tam khawp a, chungte chu tar chhuah sen ni lo mahse, a tlangpui thua an lo hman tan dan tlem han tarlang ve i la. Constantinople-ah A.D 388 khan an lo hmang hmasa ber a, khawvela Kristian Kohhran lo din chhuahna hmasa ber Antiokei khua-ah A.D 399 khan an hmang tawh bawk. Jerusalem leh Alexandrian-ah A.D 400 khan an hmang tan ve bawk a, heta tang hian Lal Isua piancham Kristmas hi December ni 25 apiangin an lo hmang zawm ta zel a ni. Pathian khawngaihna zarah a chhiahhlawhte kaltlangin kum 1894 khan Zoram khawvelah chanchin tha a lo tleng a, Chanchin Tha an dawn atanga kum 9-na, 1903 khan Aizawlah Kristmas chu mi tlemtein an lo hmang tan ve ta. Lunglei lamah 1912 khan hman tan a ni. Chutiang zel chuan Kawlphai lamah pawh kum 1917 khan Tuivar khua ah an lo hmang hmasa ve ber a, kum 10 a veih meuh chuan kum 1927 khan Tahan khawpuiah mi tam zawkte nen hman tan a lo ni ta zel a ni. Kristmas hi an hmang mai ni lovin Kristmas hian Zonunah zai leh ruai a keng tel tlat mai hi mak ve tak a ni. Mizo-pa irawm atanga chhuak Kristmas hla kan neih hmasak ber chu " Lal pian hun pangpar a vul leh ta" tih hla hi a ni, a phuahtu pawh Pu Zaliana Tahan A Group a mi a ni nghe nghe.

Kristmas hian Zonun a luahdan hi a danglam bik em em mai a, hnampui zawkte neih ve loh Mas ruai kan han kil mup mup maite hian Zonun a timawiin chhungkua leh khawtlang nun inpumkhatna tha tak min siam a ni. He mi ni hi chuan Mizo nih a manhla leh zuala hlimnain chhungril a luah khat a ni ber mai..Mitin kan inan loh ang bawkin kan hun hman duhdan leh kan hlimdan chu a inang lo thei hle awm e. Nu leh pa, thalai thenkhatten " Bethlehem dai a nghawr vel e" an tih laiin tlangval thenkhat zurui buaiin kawtthlerah an au thler duai duai a, thiante leh thenawmte dai lo tinghawr tawk lah bo lo. Dam lo leh tar chak lo tan chuan zan lungngaihthlak a tling ngei ang le!!

Kan hun hman dan hi han ngaihtuah chian chuan piancham neitu ai hian Setana hian hmun a luah tam zawk a, a hming Christmas hi Lal Isua ta niin a hun erawh Setana ta a ang khawp mai. Christmas an lo hman chhan pawh ngaihtuah lem lovin, mahni birthday emaw tiin kan lo phur ve chiam chiam a, birthday neitu hi a hmaizahawm khawp mai. Krismas tan tiin a sur a sa pawh kian phal lovin hna kan thawk a, kan neih ang tawk sum leh pa kan lo khawl ve a, silh leh fen kan phak ang tawk kan lei a, a ni a rawn thlen meuh chuan kan sumpai tisa nawmsip bawl nan kan khawhral leh hiau hiau thin hi chu a nih dan tur a ni chiah lo. " An robawmte hawngin Lal chibai an buka" tih nen chuan inpersan tak a ni. Hetiang zela kan zonu leh Christianna hi a kal zel chuan Christmas hi a nihna bo thak khawpin kan la hmang a nga, thang leh thar zelten a ve tur rengah ngaiin nawmsip bawl nan an rawn hmang chho zel ang tih, a va hlauhawm tak em.!!. Khawvel hi thalaite khawvel tih a ni tawh a, a siamthatu leh a tichhetu pawh thalaite bawk kan ni. Hnam nun siamtu ni lo mah ila a kaihruaitu kan ni tih hriain a chhelai siamthatu nih i tum theuh ang u hmiang.!!!

Kan chanchin

2011-12-21T10:03:00.000+08:00

       MCF FACE-BOOK

    Keini Face-book ah chuan photo lam kan dah vak dawn lo va, data lam a ni thung ang. Kristmas Programme atangin i’n tan teh ang aw!

Ruai:    Kristmas zing inkhawm banah ruai theh tur a ni ang. He ruai hi Kristmas ruai a nih avangin MCF member zawng zawng chuan kil theuh tur a ni e.
    MCF chuan Fatu tlawmngai tur kan mamawh hle mai a, Kristmas leh kumthar tana fatu thei tur kan awm chuan MCF Office lamah in report thei ila, kan lawm ngawt ang. Dec. ni 24 atangin hnatlan tur a ni.

    Fatu Awrden-te
1. Danmawia        2. Manghaka
3. Chhunawmawma    4. Manuna
5. L.Lawmawma        6. VL.Awia
7. V.l-a            8. Hmingtea
9. Hlimtea            10.Mavela

Inkhawm programme:
    Urlawk zan (Dec. 24 Inrinzan) atangin inkhawm tan tur a ni. Urlawk zan hian inkhawm pangngai zawhah intihhlimna hun hman a ni ang. He mi zan hian zan dar 1:00 thleng biak in kan hmang thei dawn a, hlim tak leh zalen takin kan inkhawm thei ang.
    Inkhawm hun zan dar 9:00
Inkhawm hruaitu: K.Vanlalnghaka
Sermon    :Rev. Lalduhawma
Intihhlimna hun kaihruaitu turte:
    1. Lalchhanhima
    2. C.L Dinzova
    3. Hmingsanga
    4. B.Zarzoliana

Kristmas Inkhawm:
Inkhawm hruaitu: B.Zarzoliana
Sermon   : Pastor   (Minute 15)
    Kumin Kristmas inkhawm chu mipui lamin chanvo kan ngah dawn a, kham khawpin Mas hla kan sain kan ngaithla dawn a ni. Tin, Kristmas ni a, zai tur hian kohhranin ruat bik kan nei lo va, Nausen chibai buk nan leh chawimawi nan, Solo thei turte chuan khawngaihin Secretary hnen-ah rawn inhriattir turin kan ngen a che u.

    KUM THAR PROGRAME
    December ni 31 zanlai inkhawm dar 10: 00 atangin zing dar 1:00 thleng.
Inkhawm hruaitu turte:
    1. Lalhmingliana
    2. Pastor
Kum thar ni hian thuthlun inkhawm tur a ni a, ruai buatsaih a ni ang.

Mizo Naupang Camping

    A hmun: Batu Untung
    A hun: 13-16, Dec. 2011
Dec. ni 13, thawhleh zan atang khan Naupang Camping tan a ni a, Speaker, councilors, zai hruaitu, fatute leh tawngtaikhawl te nen mi 40 tha zet an ni. Naupangten Pathian chhandamna an varpawh a, misual nung tlak lote tana a nun petu Krista hmangaihna leh khawngaihna hlu tak chu Thlarau thianghlim tanpuinain an lo hmu thiam ve ta. Kohhran hian sumpai kan seng deuh a ni mai thei, mahse Pathian chhandamna thu tak hi khawvel sum tin reng leh lunghlu aiin a man a tam zawk a ni. Dec. 17, Inrin zing khan mahni in lam theuh panin an tin leh ta.

Kristmas Picnic

    Kumin Kristmas hmuah Picnic tluang takin kan hmang zo leh ta! MCF nihphunga tha em em lo chu, a dawn hnaiha tihhuk kan ching thin hi a ni. Picnic kal tur chuan hming in-report sa tur tiin, a dawn chawlhkar hnihna tangin kan tlangau tawh kha a ni a, in-report ang chuan bus lian pahnih bak hawh a tul lo. Mahse a hun a lo thlen meuh chuan Bus lian pathum (Bus pakhatah mi 44 chuan theihna) leh Bus te pakhat (mi 23 chuanna) bakah Texi pahnih kan hman a tul phah ta! Hruaitute lu a hai thei cham cham hle.
    Engpawhnise hetiang zat kan kal thei hi lawmawm kan ti a, a hmunah hlim tak leh nuam ti taka hun kan hman avang te pawh khan kumin Picnic chu hlawhtling hleah kan inngai a, mi 160 chuang kan kal niin kan hria.

MRO Card siamna Khawl thar:

MRO member tam takin harsatna kan tawh thin chu kan Card vawn changkang lo lutuk kha a ni. Tunah chuan chutiang harsatna lak atang chuan kan fihlim thei ta! MRO Card mawi leh tha lutuk takin kan siam thei tawh e. He Card siamna khawl hi cheng 5,300/- man a ni.
MRO Card hlui thlak dun tan Rm. 10/
Mi thar siam man Rm. 30 /-

Mizo Sport & Game Committee
    January 21, 2012 hian Chin National Day Foot-ball inkhelh leh tur a ni a, Mizo Team hmingin kan tel ve leh dawn a ni. Sport & Game Committee member inthlan thuai a ni ang a, chung mite chu K.Manghaka, Manuna leh Josiah-a ten an huaihawt ang. Chin Day-ah hian Team 17 an tel a, Group 4-a then a ni. Group A
    1. Haka         2. Zotung
    3. Mizo        4. Mindat

KUM THARAH CRUSADE
    Kan puan tawh angin kum 2012 January thla Chinese kum thar lai chuhin Crusade neih a ni dawn a, Speaker atan Evan. Thlamuanthara sawm a ni.
    Crusade-na hmun KLBC
    A Hun : Jan. 22-24 chhun leh zan .

Christmas Sermon

2011-12-13T13:32:00.000+08:00

    Keimahniah Nausen A Piang Tawh Em?
                    Isaia 9:6
                                   By- Lalmuankima ( Nuni pu)

BC 722 bawr vel khan Isarel hmar lam ram chu suahsualna a nasa em em a, zawlnei der tam tak an lo chhuak a, chutiang karah chuan Isaia’n “Kan tan naupang a lo piang a” tih thu hi a lo sawi lawk ta a ni. Nausen lo piang tur hi a chanve Pathian a chanve mihring, tiin Christian tam takin an ngai sual fo mai. Roman Catholic Kohhran chuan a paitu a nu Mari chu ‘Pathian Nu’ angin an ngai a, chuvang chuan Pathianna a chanve mihrinna pawh a chanve an tih phah ta a ni. “Naupang a lo piang,” tih tak hian chiang takin a Pathianna ni lo, a mihrinna zawk a sawi a, tin “Fapa pekin kan awm ta,” a rawn ti leh bawk a, hei hi Chatuan Pathian chu kan tan a rawn piang ta tihna a ni. Chanchin tha Johana 1:14 ziakah pawh “Thu chu tisaah a lo changa, kan zingah a awm ta a. Hebrai tawng chuan ‘Fa Pek’ tih tak mai hi Nitan tih a ni a, a awmzia chu ‘hlan tur, pek tur, hlui tur’ tihna a ni, a awmzia dang leh chu ‘rem tur, dah tur, siam tur, tuartir tur’ tihna a ni leh bawk. Heng atangte hian Fapa chu Pathianin kan tan Thilpek zawng zawng zinga hlu ber leh ropuiber min pek a nihzia a tarlang a ni. Tirh 17:30-31; John 3:16-a kan hmuh angin mi zawng zawng tan a Fapa mal neih chhun min pe a ni.
    Pasaltha chu sa pel turin a ram chhuak a, vawm chal a kap ta hlauh mai, a hnu kar khatnaah a nupuiin fapa a hrinsak a, a lawm lutuk chu a fapa hmingah Vawmkapa a sa ta a ni. Hetiang hi hming kan inphuahdan tlangpui a ni a, kan pi leh pu-te emaw, nu leh pa-te pawh ni se, an mahni nihna a zir leh an mimal nuna an tawn angin hming min phuah sak thin. Mahse vawmchal kaptu tak chu kan ni leh lawi si lo. Tuna kan sawi tum nausen lo piang tur ve thung hi chu ama nihna leh a mize dik tak MAKA, REMRUATTUA, PATHIANCHAKA, CHATUANPA, REMNALAL tia koh turin zawlnei Isaian a lo puang dum dum tawh mai a ni. He hming chi-nga hi kan chhuitur leh kan zir tur chu a ni ang.

MAKA
    Hebrai tawnga MAK tih awmzia tak hi noun chuan ‘pele' tih a ni a, a chhan kimchang taka sawifiah dawn chuan ‘thilmak thlarau lam hnathawh, a ngaihna hre lo khawpa mak’ tihna a ni.

Entirnan:    (i)Thil engemaw dan pangngai lo hriatthiam harsa em em ang chite
    (ii)Thilmak Pathian hnathawh rorelna leh tlanna ang chite…adt..
    He Hebrai thumal ‘pele’ hi ya`ats tih hebrai tawng bawka a chhan tidanglam hretin Adjective (nihna sawifiahtu) angin an hmang thin. ya`ats tih awmzia chu Remruattu tihna a ni, hei hi chu nakinah kan la sawi ang. Tin Hebrai thumal ya`ats tih awmzia bul tak chu ‘thenhrang, mak tih tura thlei hrang, midangte khum, thiltih bik vanga tihhran’ a dawt leh chu a tlanna thiltih vanga tlantu ropui tih a ni bawk.
    Hla siamtu chuan “Mak tiin damchhung ka hmang ral ang, I hmangaihna thukzia ka dawn chang hian, van ropui kalsana sualfa min tlan tura lei thima i lo vak vai hi,” a lo ti a ni. Kristian Hlabu-ah pawh “Thu mak ka sawi nin theih loh chu Kalvari chanchin a ni” a lo ti bawk.
    Ringtu tamtakte zingah nausen Lal Isua kan hmelhriatdan hi a inang lo thei viau ang!!! Kristmas kan hmandan tlangpui hi chu ruaitheh, inkhawm, thawmhnaw thar leina hun, nula leh tlangvalte tana nuamchenna leh engemaw tihna hun nghahhlehawm tak a ni. A hming MAKA a nih rual hian amah Nausen tak pawh hi mak danglam chungchuang a ni tih kan hriat a pawimawh. I nuna thil thlengah khan ‘a va mak ve aw’ i tih vawng vawng chang a awm ang, chu tak chu engdang ni lovin Nausen Isua i chhungah a pian tawh vang a ni. Pathian kaihhruaina zozai leh a tlanna ropuizia hi thiam tawk tein ka chhut ve chet chet thin a, a tha lam chu sawi loh ka vuina tam takte pawh hi a hmangaihna hnathawh mak tak a lo ni zawk zel mai, Pathian hming fakin awm rawh se. Kumtin Dec 25 hi Isua pian cham Kristmas kan ti a, mahse ringtu dik tak tan chuan Lal Isua chhandamtua kan pawm ni tak hi kan chhunga Nausen lo pianna ni dik tak zawk chu a lo ni. Pathian hnathawh mak sawi tur kan nei em? Kan la nei lo a nih chuan a pawi ngawt ang. He nausen kan sawi tum tak Isua hi lei danah chuan A.D 4 khan a piang tawh a, mahse i chhungah khan a piang ve tawh em? Piang tak tak si lo hian X’Mas hi kan lo ngaithupui ve viau zawk nge? Tin, piang tawh siin a thang thei der lo maite hi a ni em lo maw? Ringtu nun chu zawi zawia thang tur a ni tih kan ngaithla thin, a tha e. Mahse chaw kan ei tlat loh chuan a thang hauh lo vang. Bible chhiar leh tawngtai kan ngaihthah chhung chu engang ringtu pawh ni sek sek a thang dawn lo reng reng. Chuvangin a tana hun pe phal tamtu hnen apiangah MAKA chuan MAK a rawn tihtir zel dawn a lo ni.
    Lal Davida khan Sam 40:5,“ Aw LALPA ka Pathian, nangin thilmak i tihte leh keimahni lam i ngaihtuahnate hi a tam em em mai a, Chung chu i hmaa tihlan sen rual a ni lo va, hriattirin hril dawn ila chhiar sen rual a ni lo vang,” a lo ti a ni. Tin, Sam 107-ah pawh “Aw, mihringte hian LALPA chu a ngilneihna avang leh mihring fate chunga a thilmak tihte avang hian fak teh sela aw!” a lo ti bawk. Heng bung leh changahte pawh kan hmu thei Exo 15:11; Job 42:3, Sam40:5; 77:11; 77:14 ;78:12; 78:4; 107:8; 107:15; 107:21; 107:31; 111:4; 119:129; 139:6; Thuf 30:18; Isaia 25:1; 28:29; Jer 5:30; Matt 7:22; 21:15; Thuhriltu 2:11.

REMRUATTUA
    “REMRUATTU” tih chu Hebrai tawng chuan ya`ats tih a nih thu kan sawi tawh a. A awmzia bul tak chu ‘Zilh, biakrawn, ngaihtuahhona pek, thil tum, thil ruahman tihna a ni a, Pathian lam nge mihring lam a kawhchhan a hriat loh a ni. Mahse a Grammatical lam luh thuk tak tak chuan he mi awmzia hi “Pathian Remruatna & Thiltum ngaihtuahhona” a kawk daih.
    Hla siamtuin ‘Aw Lalpa i remruatte hi mitin hriatthiam rual a ni si lo’ tih leh aw Lalpa i remruat hi ka hriatthiam thin loh vang hian’ a lo ti a, sawi dantur pawh a tim awm khawp mai, mahse Biblea kan hmuh angin a thilsiam chungchangah remruattu fing tak a nihzia mai chu tunlaia Scientist tam tak buaina leh hriatphak loh van lam boruak atangte hian a hriat mai. Tin kan taksa bung hrang hrang inchuktuahdan zawng zawngte hi ngaihtuah chian poh leh a lo ni thlap mai a, belhchian hi an dawl ngang a ni. Bible chhungah pawh hian mi thenkhat remruattu fing tlema zawng chu kan hmu a, a tha lama remruattu fing leh a chhe zawnga remruattu fing an awm a ni. Thil engemaw kan ti a, kan tihfuh emaw kan tihsualin emaw Pathian remruat a ni, kan ti leh ngawt thin. Accident avanga thite hi Pathian remruat a ni thei ang ngem? tiin zawhna an zawt fo thin. Tumah hian hei chu Pathian remruat a ni, ni lo tiin kan kawh chat chat theih a rinawm loh, a chhanchu mihring mai kan ni a, remruattu remruat dan hi hrethiam turin kan tan a sang lutuk ani chu hmasang atang tawha remruattu a ni. ( Isaia 25) Engemaw chang chuan hei chu Pathian remruat a ni kan tihtheih chi a awm ve tho va, amaherawhchu hriatthiam erawh a har a ni. Mahse Pathian chuan kan thatna turin engkim min ruatsak thin tih kan hmu thei. Rom 8:28.
    Keimahni hian kan chhungkua, kohhran leh thildanga Reruattu Pathiana chu kan dal fo thin. Rem kan ruat thiam ve viau a ni mai thei, mahse mahni hmalam hun hre lo leh mahni thatna tur tak taka remruat thiamlo kan nih kan inhriat hi a pawimawh. Kan remruat thiamna kan dah lal chhung chuan kan chhunga awm Reruattua zawk hian chet a tum ngai lo, che dawn mahse kan dal tlat si a ni. Kan remruatna hi chuan midangte a tina thei a, intihvuina leh inhauhna chawk chhuakin rei a daih ngai lo. Mahse vawiin atang hian he nausen Remruattu dik tak remruattu zawng zawngte remruat saktu hi kan mimalah, kan chhungkuaah, kan kohhranah leh thildangah pawh Remruattu a ni duh a ni, Pathian hming fakin awm rawh se. Kan zirna hmangtein emaw kan lehkhabu chhiar atangin emaw mi thusawi kan ngaihthlak atangin emaw remruatdan tawkfang chu kan hre bel ve viau a ni thei e, mahse chung chuan tawpchin a nei a, tuna kan sawi Remruattua ve thung hi chu tawpchin nei lova remruat thiam a ni. A tan hmun kan ken phal ni apiangah kan chhungkua, kohhran, khawtlangah dikna leh muanna lui angin a luang del del tawh mai ang.

PATHIANCHAKA
    Hebrai tawnga gibbowr tih chu mizo tawng chuan chak (Adjective) tih a ni mai a, a aia awmze ril zawkah chuan ‘Chaktak, mi thiltithei tak’ tihna a ni. Tin Pathian tih thumal hi Hebrai tawngin 'el a ni a, a ngial a ngana leh dawn chuan CHAKNA tihna a ni. Isaia 9:6 hi kimchangtaka hrethiam tur chuan tawng tul Hebrai atanga chhui a ngai ang. Nichina 'el kan tih kha a thumal bul ber chu 'ayil tih a ni leh ta a, hetiang hian a awmzia han tarlang lawk i la,

I. Beram
a) Beram (chaw atan)
b) Beram (inthawina atan)
c) Beram (savun ro sen, biak in atan)
2) Ban, kawngka biang, ban ang            deuhva ban rem pawn
3) Mi chak, hruaitu, lu ber
4) Thing ropui

    No. I b- na hi Craig Bluemel-a chuan “Beram chu inthawina atan tih a ni a, Thuthlunghluia Berama an inthawi thinna aiah khan kan Lal Isua chu amah ngei inthawina sawiselbovah Pa duhzawg angin a rawn inhlan ta a, mihring leh Pathian inkarah inremna a rawn siam ta a ni,” a ti. Engpawh ni se, ani aia chak Pathian dang an awm lohzia chu Gen 49:24; Deut 7:21; Sam 50:1; 132:2,5; 132:5; Deut 7:21, Isaiah 9:6;10:21, Habakuk 1:12; Jer 32:18-ahte hian kan hmu thei. Israel fate hruaichhuaktu kut chak tak mai pawh kha Buddhist pathian emaw, Hindu pathian emaw, Muslim pathian emaw ni lovin kan Pathian ngei a lo ni a, chu Pathian thiltithei tak mai chuan nang leh kei hi sual bawih ata a Fapa tlanna thisen hmangin min chhanchhuak a, chu veleh thiamchangin ABBA, KAPA tiin kan au thei ta a ni. Khawiah pawh kal ila Immanuela kan hnena awm Pathian chuan min awmpui reng a lo ni.

CHATUANPA

“CHATUAN” tih hi Hebrai chuan `ad a ni a, chatuan, kumkhua, hun lo la awm turah pawh awm reng tur tihna a ni. Hebrai thumal `ad tih hi `adah atanga rawn kal a ni a, a awmzia chu ‘cheimawi’ tihna a ni. Tin ‘Pa’ tih awmzia chu Hebrai chuan 'ab a ni a, Brown Driver & Briggs Hebrew Lexicon definitions chuan 'ab tih thumal hi tihian a sawifiah..
1. Pa tamtak zinga Pa bik
2. Pathian, a mite tana Pa
3. Chhungkua, mipui, hnam tin zinga lu         ber leh enkawltu Pa ber.
4.Thlahtu lamah chuan
   a) Pi leh Pu-te hun hma atang tawh            renga mi Pakhat angin
   b) Mipuite hmanrua pakhat angin
5) Zirna tinreng chhuahna bulpui ber
6) Thil siamchhuaktu leh enkawltu
7) Thilphal tak leh veng thatu
8) Zah leh chawimawia awm
9) Hotute hotu lu ber

    Rotherhama chuan he lai chang Chatuanpa tih tak hi hun lo la thleng tur zawng zawng pawha Pa “Father of Futurities” tiin a let. Sam 67:5b-ah Pa nei lote pa leh hmeithaite ngaihtuahtu a ni tih kan hmu thei a, Matt 6:9, Lk 18:10-14 thua Lal Isuan a zirtirte tawngtai dan a zirtir danah hian Kan ‘Pa’ atangin a tan kher a, hei pawh hian awmzia a neiin Chatuanpa a nih mai bakah mi zawng zawngte Pa, Pathian a lo ni e.

REMNALAL

‘Lal’ tih thumal hi Hebrai chuan sar’ a ni a, a awmzia chu hotu ber, Lu ber, enkawltu, Lal, Upa mipui tana palai tihna a ni. Tin, REMNA tih ve thung chu sahlowm or shalom a ni a, a awmzia chu famkimna, ralmuanna, hamthatna, remna a ni.

a) Famkimna (number-ah)
b) Ralmuanna (taksaah)
c) Hamthatna, hriselna, malsawmna
d) Remna, reh, hahdamna, lungawina
e) Remna, inthianna
f) Mihring inlaichinna
g) Pathian leh Thuthlung inlaichinna
h) Ral laka muanna
i) Remna
    Remna chungchangah hian ram leh hnam tam takin inremna lehkha-ahte hming sign-hnanin inrem an lo tum nasa tawh thin a, mahse chungahte chuan remna tluantling leh belhchian dawl pakhatmah a lo awm lo. Lei leh van inrem tawh lo pawh remtha leh turin amah Pathian ngei chuan Pathian anga awm a, Pathian tluka awm chu thil thlakhlelh hleih theihah a ruat lo va, mihringte anga lo piangin bawih angah a insiam a, amah leh amah a intilawm ta zawk a. Tin, mihring anga lo awmin, a inngaitlawm a, thi khawp hiala thu zawmin a lo awm ta a, kraws-a thihna ngei chu (Phil 2:6). Paula pawhin Rom 12:18-ah ‘A theih phawt chuan nangmahni lam tal, mi zawng zawng nen inremin awm rawh u’ a ti a ni. He mi awmzia chu mihring leh Pathian inkarah remna siam tura Kristan thihna a paltlang ang khan keini pawh Krista hming avanga kan tawrh, kan ngawih, kan tlanchhiatsan veleh Krista thihnain inremna a siam angin kan mihringpuite lakah thihna hmangin remna siamtu kan lo ni thei dawn a lo ni e. Mahni tumna hmanga inremna hi chu a puakchhuak a na thei lutuk a, chhiatna a thleng zawk thin a ni.
    Nang leh kei hi Pathian thinurna laka kan him theihna kawng awm chhun chu a Fapa tlanna thisen chauh hi a ni. Pathian thu ka hre lo tia chhuanlam siam tur tumah kan awm tawh lo, mahse heng a hming chi-nga MAKA, REMRUATTUA, PATHIANCHAKA, CHATUANPA, REMNALAL tihte hian kan nunah a takin thu a la sawi lo a ni mai thei. Lal Isuan nang leh keia tan Palai hna rawn thawkin chatuan atan inremna thuthlung a siam tawh a ni, tih hi kan thlamuanpui a hun tawh tak zet a ni. He nausen hi kan chhungah a pian tak tak leh tak tak loh kan hriat chian ngei a ngai a, piang si lo piang anga lo ngaihthatpui veng veng kan nih chuan tunah hian min nghak reng a ni, keimahni ni tawh lovin amah Maka, Remruattua, Pathianchaka, Chatuanpa, Remnalal zawka chu ka nun a ni, kan tihtheih theuh nan Lalpan malsawm rawh se.

MRO TOBUL

2011-12-12T16:37:00.000+08:00

          M R O TOBUL
                                           Isua Thian

    MRO chanchin ziaktu hi kan awm nual tawh a, keipawhin MRO chanchin ziak ka hmuh chu ka chhiar ve zat zat chuan ka hria. A ziaktuten an ziak thiam vek a, chhiar pawh a nuam vek bawk. MRO hi Malaysia rama din a nih avangin he rama ka chenna a lo rei ve takah chuan chhiartuten kan tangkaipui beiseiin ka hriat ve chin tlem tlem han thailan ve ka’n tum dawn a ni. Ka ziahsual palh a awm a nih chuan min ngaihdam ka beisei a, mimal hming hi hman loh hram ka tum a, loh theih loha hmanna a lo awm a nih pawhin min ngaidam bawk dawn nia. Mimal leh pawlho sawichhiatna a awm lo ang a, fak tlak deuh bik erawh an awm mai thei a ni.
    Refugee chungchanga Mizo inhmunkhawmna hmasa ber chu kum 2005 March thla vel khan Tuivar khuain an inhawh tawm In-ah a ni a. UN officer Letchemi chu tawnglet Tv. Thisenmana’n ( David Mawia ) a rawn hruai nghe nghe a, kan hlimtlangin Refugee lamah kan rilru nasa takin kan pek phah niin ka hria. Han sawi mai mai ila, hetih hun lai hian Mizo-te rilruah refugee tih hian hmun a la chang tlem hle niin a lang. He mi ni pawh hian mi 60-70 vel chauh kan kal khawm a ni. Pu Thangvea ( Tunah chuan Australia ramah a awm ) phei chu refugee duhnachang hre hmasa a ni a, he hun hman a duh avangin KL ah a rawn riak lut a, police-in an man phah nghe nghe a ni. Mahse UN chuan Lung in-ah an va register ta tho. Hetih hun lai hian MCF biak ina inkhawm chu mi 30-50 inkar vel kan ni tlangpui.

Refugee chungchanga Public meeting hmasa ber erawh chu kum 2006 khan MCF inkhawmna biak inah ( FCC Chapel ) a ni a, kan meeting-na chhan chu ACR Meeting-ah Mizo palai mi panga tel tura min rawn beisei vang a ni. He hunah meuh chuan Mizo ten refugee kan hmuhdan a danglam tawh a, meeting pawh kan phur ngei mai. ACR meeting-a kal tur palai mi panga chu kan thlang chhuak ta thuai mai a, chung mi pangate chu refugee chungchanga Mizote mamawh leh dinhmun ACR meeting-a pulut zung zungtu tura ruat an ni. Chung mite chu Tv. Denga, Tv. Sawma, Tv. Liankhuma, Tv. Bawiuka leh Tv. Vulmawia te an ni. Heng kan mi thlante pawh hi an phur hlein ka hria. MRO din hma kha chuan ACR nena thawk hoin refugee tana hmalatute an ni. Kum 2007 ah erawh chuan ACR meeting-a kaltur palai hi mi pahnih chauh an ni tawh a, Tv. Sawma leh Isua Thian te an ni.

Tv. Sawma leh Isua Thian te chuan palai hna hi an thawk kumtluan thei ta bik lo va. A chhan chu hetih lai hian Nl. Hani chhakchhuak chu CWS ah hnathawkin a rawn thleng thut mai a, CWS hruaitute hi ACR lo din saktute an ni, tih chu Mizo mipui thenkhat chuan an hriat khiau avangin Nl. Hani rinchhana Mizo Refugee pawl din an rilruk ta zawk a ni. Vawi duailo Mr. Alex Arokiam leh Mr. Marc Rozed hnenah thu thlen a nih hnu chuan MCF Quarter pawh vawi thum vel an rawn leng a, Mizo mipuiten kan lo kawmdan an hmuh chuan min khawngaih ta a niang chu public meeting vawi thumnaah chuan MRO hi din a lo ni ta a ni. August 15, 2007 khan MRO hruaitu inthlanna neih a ni nghal a, chuvangin MRO birth-day pawh August ni 15 apiangin kan la hmang thin niin ka hria. MRO a din tirh khan ACR leh CRC ah palai a tir lo ve ve a, zawm bik pawh a nei lo bawk.

MRO din a nih dawn hian sum leh pai a tul hmasa ber a, chutih lai chuan Penang MCF hruaituten Rm.400 in min rawn grant thuai mai a, chu sum chu MRO din dawn lai vela hruaituten innghahna ber a ni a, MRO a dinchhuah hnuah pawh Penang sum chu rulh an ni tawh chuang lo va, MRO card-in kan rul hlauh thung. Penang hruitute kha MRO din theih nana mi pawimawh takte an va ni teh lul em!! Pakhat leh chu a sakhming turah duhthlantur a tam leh ngei mai. Chungte chu:- 1) Mizo Refugee... 2) Duhlian Refugee... 3) Lusei Refugee... leh 4) Hualngo Refugee tihte hi niin ka hria. Chu bakah Organization, Community leh Committee tih hi a ni bawk a. Hruaitute lu a hai duh ngei mai. Sawi mawina leh fakselna kan nei nak nak a, a tawpah chuan Mizo Refugee Organization tihah kan lungrual ta a, tun thleng hian MRO tih hi kan pu hlen ta a ni.

Mr. Marc khan an rama ( France ) a hawn dawn khan a computer hman lai chu MRO tan min pe a, khatih hun lai khan MRO Card siam theitu tur chu sawi loh, computer thiam mumal pawh kan member zingah an la awm hauh lo mai nia. Pathianin MRO din hi rem a ti a nih ngei ka ring, kan member zingah computer master Andrew Fanai a lo dah reng mai hi a lo ni. Kan Logo tur leh letter head turte chu a siam chuuak zung zung ta mai a, MRO clerk hmasa ber a ni ta nghe nghe. MCF quarter-a hmeichhe room kan tih mai hi MRO office hmasaber a ni a, hruaitute pawh mihring kan ni a, rilru a dang angin MRO chu MCF hruaituten an hmu thei ta lo em em mai a. Isua piang kha lawmlo mah se, chhandamtu a ni tlat ang khan, MRO chu member lung in tang leh damlohna lamah pawh ni se a buaipuitu leh tlanchhuaktu a rawn ni chho ta zel a. Tunah chuan MCF nen office intawmin an thurual leh ta.

MRO a din hlim hian ruang-am kim biaia in form a ni ve a. President, Secretary, Co-ordinator, Treasurer, Journalist leh Auditor tiin. Hnathawh tur pawh Co-ordinator chuan internal leh external networking a thawk ang a, Emergency chuan police man leh lung in tang lam mawhphurhna a la ang a, Medical Co-ordinator erawh chuan damlo leh raipuar lam a buaipui ang, tiin an inruat ve vek a. Tunah chuan heng zawng zawng hi mi pakhat kutah a awm ta a ni. Office pawh tuna mi hi a tum 4-na a ni a, co-ordinator hi mi parukin an thawk tawh a, tuna thawk mek hi a mi parukna niin a tum sarihna a ni. MRO day hi a dintirh atang khan hman a ni ziah thin a, kumin 2011-ah erawh hi chuan kan haider nge kan hmang ta lo. Hman chu a phu ve hle chuan ka ring a, kum lo kal leh turah chuan ropui takin kan hmang mah na??

Kan sawi tawh angin a din tan atanga hun rei tak thleng kha chu independent khan kan kal ve ngar ngar a, hun engemaw atang khan CRC hnuaiah kan lut leh ta a ni. Independent-a din hi a tha a, member-te tan a hlawk bik em em mai a ni. Mi hnuaia awm chu kan va awmnate hnen atanga thu hre chhawng chawp kan nih mai bakah UN atanga direct-a dawr kan ni lo a, menber hriattur pawimawh thilah pawh kan hnufual tihna a ni. Independent-a dingho chu UN hian direct-in an dawr bika an hlawk phah em em a ni. Engpawhnise, kan thawktu leh EC meeting pawh an tangho anga kan MRO hi INDEPENDENT MRO a ni leh thei ngei ang tih beiseina nen he MRO Tobul tih hi ka rawn ziak ve a ni e.

Kum 2012-ah chuan MRO Card siamna khawl thar neih ve theih kan beisei. Khawl man hi cheng 6,000 (Sangruk) chuang man a ni.

Kan chanchin

2011-12-12T16:28:00.000+08:00

    Kuala Lumpur khawpui chunga veng pakhat Bukit Bintang kawtthler zau lai takah chuan mipui an vei huai huai a, lirthei chi hrang hrang an intlanpel suau suau mai bawk a. An zavai mai chuan, an hmel leh an vun rawng te, an incheina leh an lirthei chuan atangte chuan an inchungnung hlei tih leh mi dang hre chang lo leka mahni hna chauh ngaihtuaha hmanhmawh taka phu suau suau vek an ni tih chu kil khat atanga lo thirtu he editor khawngaihthlak tak pawh hian a hai bik hauh lo.
    Tin, he ti hi a ni a. Shoping ropui tia an sawi, Time Square, Lawyet, Sungei Wang, Parvilian te han lut mah teh. Thil awmdan leh rawng inthlak danglam lutuk avang chuan Ni bik lo thleng tur engemaw chu a awm tih i hre thei ang. Mahse rei loah chung zawng zawng pawh chu hlawkna uma thiltih mai a ni, tih i hre thuai bawk ang. Thupetu an awm a, thawktu an awm bawk. Zuartu an awm a, leitu an awm a, lo lei leh chhawngtu leh thildanga lo siam danglamtu te an insulpel mup mup tih i hmu ang. Ngai teh, ei leh in dawrah sawn mi an tam ber emaw i ti hial mai thei.
    Chutiang mipui zi buai nuai nuai karah chuan kan member pakhat MCF tlangval chhuantawlawl, a hming pawha kan koh phal loh, Te-a kan tih mai chu man theitu ten an hling mawlh mawlh a ni, tih pawh i hre chang lo hial ang. Zan lamah chuan him dam takin an rawn chhuah leh dawn tih i hriat sa bik hauh lo vang!
    Hetiang mipui phu mur mur kar atang hian tal chhuakin MCF huam chhung lamah i pe tek daih teh ang aw!

Kristmas leh MCF
    December EC Meeting chuan Kristmas hman dan tur a duang leh ta thluah mai. A hmasa berin kumin Kristmas chu kum dang ang bawka Dec. 25-ah hman leh tur a ni. He he...
Fiamthu kan han thawh lawk a nih kha! Khai le, Kristmas boruak i han hip tan dawn teh ang.

Kristmas Ruai:
    Kristmas tuk inkhawm banah ruai kil tur a ni a, ruai vawi khat chauh kan buatsaih theih dawn avangin ruai kil theuh kan tum dawn a nia. Kristmas ruai hi kumtharah an buatsaih ngai lo tih kan hriat theuh kha! Hlim tak leh tlai taka Mas ruai kan kil theuh theih nan, Lalpan hun remchang min siam sak theuh rawh se. Eh.... Fatu tur kan la sawi lo.
    Member tam zawkin hlim taka Mas inkhawm kan hman mek laiin Mas thlen in lamah chuan pathlawi ( Nupui then tihna a ni kher lo) rualin rim takin mipui ei tur an lo chhum tluk tluk tawh mai bawk a, heng fatu tlawmngaite thawkrimzia leh pawimawh si zia hi kan hre awm hlawm tak si lo va.
    MCF chuan Fatu tlawmngai tur kan mamawh hle mai a, Kristmas leh kumthar tana tatu thei tur Nule tlangval hman remchang tur kan awm chuan MCF Office lamah in report thei ila, kan lawm ngawt ang.

Inkhawm programmee:
    Urlawk zan (Dec. 24 Inrinzan) atangin inkhawm tan tur a ni. Urlawk zan hian inkhawm pangngai zawhah intihhlimna hun hman a ni ang. He mi zan hian zan dar 1:00 thleng biak in kan hmang thei dawn a, hlim tak leh zalen takin kan inkhawm thei ang.
Inkhawm hruaitu: K.Vanlalnghaka
Sermon   :Rev. Lalduhawma
Intihhlimna hun kaihruaitu turte:
1. Lalchhanhima
2. C.L Dinzova
3. Hmingsanga
4. B.Zarzoliana

Kristmas Inkhawm:
    Kumin chu kum dang ang lo deuh hlekin hun hman kan tum a, kum dang ang lo han tih lemah chuan hetiang deuh hian a ni ang. Biakin kan hman theih hun hi darkar 2:30 chauh a ni a, chumi awmzia chu zing 8:45- 11:15 thleng a ni. Mahse tan hun turah kan tan theih thin loh avangin kan hun neih hian min daih ta thin lo va, engpawhnise Kristmas a nih angin hlim taka zai ho nan hun a tam thei ang bera hman tum zawk mai ila, kan ti ta a ni.
Inkhawm hruaitu: B.Zarzoliana
     Sermon   : Pastor   (Minute 15)
Tichuan, kumin Kristmas hun kan hman dan turah chuan mipui lamin chanvo kan ngah dawn a, kham khawpin Mas hla kan sain kan ngaithla dawn a ni. Tin, Kristmas ni a, zai tur hian kohhranin ruat bik kan nei lo va, Nausen chibai buk nan leh chawimawi nan, Solo thei turte chuan khawngaihin Secretary hnen-ah rawn inhriattir turin kan ngen che u a ni.

Mizo Naupang Camping
    A hmun: Batu Untung
    A hun: 13-16, Dec. 2011
    Ni 13, chhun dar 12:00-ah Pastor Quarter atangin Bus a chhuak ang. Kal tur zawng zawngte chuan Pastor Quarter pan phawt tur a ni a, kalkawng man ( Bus man) chu kohhran tum vek tur a ni e. Malaysia Mizo naupang zawng zawng Krista Isua hmingin kan sawm che u a ni.

Kum Thar leh MCF
    Lei kum chhiar dan atang chuan kum 2011 kum tawp kan lo hnaih leh ta reng mai. Kum thar 2012 tana MCF hmachhawp leh ruahman thilte i lo sawi dawn teh ang u.

1. Thuhriltu inpek ( Sermon)
    Kum 2012 MCF Thuhriltu turte inpe duh apiang inpek tur a ni ang. Kumin 2011 chhung hian rawngbawltu pastor leh mi khual tiam lohin thuhriltu mi 13 kan nei a, kum khat chhungin vawi khat ang hu vel chauh sermon hun an chang hlawm. Kum tharah pawh thuhrilna hun dil duh apiang chuan dil theih a ni e.

Hmeichhe pawl Combined inkhawm

    Hmeichhia-ten pawl hranpa a nei chu a ni hauh lo na a, Hmeichhe pawl han tih mai hi lam a nuam hranpa ve tlat a tin a ni. Pi Lungtiawi’n min dem em lo vang chu maw!
    Chawlhkar hnih liam ta daih tawhah khan a ni a. A hma atanga lo ruahman lawk tawh angin Nov. 27, Sunday tlai lam dar 3 leh tlem a lo rik chuan MMC kohhran nuho pawh Mizo Pastor Quarter- an lo thleng ta phawk phawk mai. Khawlai leng vak, chawl lut naran an ni lo
    He mi ni hian MCF leh MMC (Pudu) Noho combined chu MCF Pastor Quarter-ah hlim leh lawm takin inkhawm an hmang a, hetiang hun an hmang thei hian hmelmapa thikthu a tichhe ngei ang. Zam lo leh hlau lovin inpumkhatna leh thawhhona thuthlung hi keini MCF-te chuan kan kalpui zel tur a ni. Chu chu kan Lal Isua duhdan a ni si a.

Tawngtai pui tura ngenna

2011-12-07T14:11:00.000+08:00

Dear zawng zawngte
Malaysia atanga ramthumna min pansan ta, Rawngbawlpui leh thian duh takte u, Kan Lal Isua Krista pian thla ( December) hun lawmawm takah hian hlimna chibai kan han buk a che u.
Keini Malaysia MCF pawh kan dam tlangin kan rawngbawlna kan tluang zel e. In tawngtai thupui atan hengte hi kan han tarlang duh a.
1. Lalpa rinchhanin kum thar lam tan ruahmanna kan han siam nual a, chung zingah chuan kawlramah Missionary pahnih kan chawm thin kha, kum tharah chuan pali (MEF leh TMEF-ah) chawm kan tum ve ta.
2. Chinese New Year awllen lai chuhin January 2012 hian Kawlram atangin rawngbawltu Evangelist Thlamuanthara rawih kan tum bawk.
3. Tun December thla chhung hian Malaysia Mizo Naupang Camping vawi khatna buatsaih kan tum a, Kristmas boruak sum pai indaih loh hun lai a lo ni bawk nen, tawngtai nasat a ngai a ni ber mai.
4. UN Card hmuh a harsat em avangin Community card mawi hnai ve deuh neih loh chuan Pulis lamin kan MRO Card hman mek hi an ngainep thin a, chuvang chuan MRO Card siamna khawl thar Rm. 6,000 man lei kan tum a, a hau tak dawn khawp mai. Nang leh i thiante pawh ni se, MCF rawngbawlna leh hmalak tur thil tam tak kan neihte hi rilru leh thinlung taka min lo tawngtai pui ve thin turin kan han ngen che u a ni.
Lalpan vengin malsawm zel che u rawh se.

In rawngbawlpui
Zara
KL ( Ph. 017-284 7231)

Keimahni

2011-12-06T11:43:00.000+08:00

Malaysia Mizo Naupang Camping Vawi khatna

    Naupang chu a kalna awm kawngah chuan zirtir la, a upat hun pawhin a thlah lo vang. ( Bible)
    Remruatna hi mihring chan a ni a, a hlawhtlinna erawh Pathian thu a ni. MCF chuan Lalpa rinchhan hi hetiang hian ruahmanna kan siam a, setana thiktham rawngbawlna a ni ngei ang. Keini chuan naupang chhia, engmah la hre thiam pha lo tura kan ngaih laiin setana chuan an thinlung leh ngaihtuahnate an lo hneh daih tawh thin a, chuvangin naupang emaw kan tih lai hian sual mizia hian an nun a lo kaihruai daih tawh thin.
    Tun hun lo hi chu kan fa kan naute tan chhandamna thu in hrilh hun kan nei leh tawhin a rinawm loh. Nu leh paten he hun hlu tak hi chhuh thiam ila, Kan faten Pathian thu an chanfiah loh a liama rohlu dang pek tur kan nei chuang lo vang.
    Camping hun : Dec. 13-16
    A hmum: Batu Untung
    Naupang Camping ni thum chhung eiin tan cheng 1,700/- leh kalna man ( Bus ) cheng 800/- A vaiin cheng 2,500 a tul dawn a, he mi atan hian rinna thlaichi bawm kan hung reng a ni, tih kan han tarlang nghal bawk.

Krismas Picnic tur:
    December ni 10, inrin zing dar 9:00-ah Biak in kawt bawr vel atang hian kan chhuak tan dawn a, Picnic kal tur zawng zawngte chuan a hun i ngaipawimawh ang u. Bus lian mawi leh tha tak tak pathum hawh a ni.

Hruaitu Inthlanna:
    December 11, sunday zing inkhawmah kum 2012 MCF hruaitu tur mipuiin thlan tur a ni dawn a, Pathian tih mi, mi thiam, mi fel mi tha tak tak kan thlan thiam a pawimawh ngawt ang.
    A pawimawh ber erawh chu Pathian leh kohhran rawngbawlna ngaipawimawh mi, inkhawm taima tak ni thei se, a duhawm hle. Mi tha leh fel pui pui, inkhawm ngai chuang si lo leh MCF rawngbawlna zawna hman theih si loh chu, an tangkai viau lo mai thei. Lalpan hruaitu tha min pe mawlh rawh se.

Zan Tawngtai Inkhawm:   MCF Pastor Quarter-ah hian Nilai zan apiangin tawngtai inkhawm hman thin a ni a. Ngai teh u, kan tantirh lai ai khan mi kan pung zel mai. Tawngtainain thil a tihtheihzia hretute chuan an zawng chhang lo thei lo va, an nitin hna leh UN chungchanga an hmabak kawng tinrengah Lalpa thiltihmak an dawng zel ta mai.
   Sunday inkhawm remchang lote pawhin Nilai zan tawngtai hi i hre reng ang u, khawlai leh khawi khawiah emaw hun hmang ral mai mai lovin Lalpa pawl nan i hun hmang fo la. Lalpan thil ropui a tihsak ngei ngei ang che.

MCF INKHAWM: Zing dar 9:0 vela inkhawm tur hian thawh hmat a ngai thin hle mai. Veng hla deuhte tan phei chuan thilawlsam lo tak a va ni teh lul em! Mahse chuti chung chung pawh chuan naupan laia kan hla sak thin ang maiin, “ Zingah sava ten Pathian an fak a,” tih ang mai khan Lalpa chawimawi tura a biakbuk kan la pan thei hi Lalpa zahngaihna a ni.
   Chutichuan amah chibai buk tura kan lo kal hian kan tihtur hmasa ber chu amah fak hi a ni. Pathian fak tur chuan kan chunga a thiltih ropui tak takte kan hriat a ngai thung. “ I inkhawm theih avang te, thawmhnaw hak tur i neih avang te, thawhhlawm tur i neih avang te, i chaw ei tur avang te, chenna tur i neih avang te, thian tha leh pawlho avang te, a va tam tak em!
   Solo, Bible chhiar, tawngtai, hla hruaite leh music tumte hi Lalpa rawngbawlna amah kan fakna a ni, tih kan hriat loh chuan chapona, intihtheihna, zahna leh mualphonaah kan ngai thin.
   Lalpa fak nan leh chawimawi nan hian thil te lua a lo awm reng reng lo. Lalpa chauh hi en ila, engkim hi a lo ropui vek mai nia.

Lawrkhawm

2011-12-06T11:39:00.000+08:00

PHILIPPINE RAM PRESIDENT HLUI THUBUAI NEI
    Philippine court chuan Dec 1, 2011 khan an ram president hlui Gloria Arroyo kum 64 mi chu tuna a inenkawl mekna damdawiin hmun fianrial atanga insawn chhuak a, sipai damdawi enkawlna hnuai Veterans Memorial Medical Centre-a insawn lut turin thu a pe. Arroyo-i hi kum 2007Philippine ram in thlan laia vote tichingpenga puh a nih bakah eiruk thubawi siam sak rin a ni. Pi Arroyo-i hian kum sawm dawn lai Philippine ramah president hna chelhin a lo kaihruai tawh thin a, tunah hian ruh natna, chawei chak lohna leh ril natna te neiin private damdawiin ah ni khat US $ 1,100 (RM 3,200) sengin a inenkawl mek a ni.

Pi Hillary Clinton-i Myanmar Ah Zin

    America ram Secretary of State Hillary Clinton-i chuan Myanmar ram kum 50 chhung mai khawthlang ramin an tlawh pawh tawh loh chu tlawhin Myanmar ram President Thein Sein leh ram hruaitu lute Dec 1, 2011 khan a hmu a. Myanmar ram chhung insiamthatna tam tak a hmuh avangin lawmthu a sawi. Ram-in insiamthatna a neih chungchanga lawm man hmasaber atan America chuan tanpuina tam zawk pek leh America ram ambassador dah leh a nih tur thu a sawi bawk. Myanmar ram hian kum 20 chhung lai America ram ambassdor hi a lo nei tawh lo a ni. Pi Clinton-i hian ram hruaitute hnenah Kawlram a insiam that phawt chuan America in kawng hrang hranga a hreknate tih tawp a nih tur thu leh World Bank leh Internatioanl Monetary Fund kal tlang a Myanmar ram chhung sumdawnna (economy) tlahniam mek thuam that a, tanpui a tum thu a sawi bawk.
    Amaherawh chu America hretna lian tak tak thenkhat erawh hlih kian vek a la theih dawn lo a. A chhan chu, hlip kiang turin an ram rorelna sang (congress) in a pawmpui hmasak zet a tul avang leh dan siam miten Burma ram insiam thatna tak tak an hmuh theih la awm hmain Obama-kaihhruai sawrkar hian tanpuina a va pe hma lutuk ve tia sawiselna te a awm avangin fimkhur a tul thu a sawi a ni. Chutih rualin Pi Clinton-i chuan politics thil avanga lungin tangte chhuah zalen tur leh ram chhunga hel pawl hnam chi hrang hrang nen inrem tur te, nuclear ralthuam siamna kawnga North Korea nen inzawm lo tur leh an inzawm a nih chuan America in hna a thawh pui theih loh tur thute a sawi lang bawk. Pi Clinton-i chuan heng ram chhung insiamthatna hi thil thleng ngai lo thleng ta ni mahse a bul intanna chauh a la ni a, insiamthat tur tam tak a la awm a ni, a ti.
    Pi Clinton-i hian democracy duhtu pawl hruaitu Pi Aung San Suu Kyi nen pawh tum hnih an inhmu a, a tum khatna chu zanriah kil hona a ni a, a tum hnihna erawh chu thu pawimawh tak tak sawi dun a ni. Dec 2 khan Pi Clinton-i hian Pi Suu Kyi-i chu a ma chenna in, pawn chhuak thei lo va sipai in an khuahkhirhna (house arrest) hmunah a va hmu a. Pi Suu Kyi-i leh a miten lawm takin an lo dawng sawng a. Pi Clinton-i hian Pi Suu Kyi-i a biang tum hnih ngawt fawpin chibai a buk a ni, “He lai ka lo thleng mai bakah ka rawn hmu che u hi ka tan chuan chawimawina ropui tak a ni” tiin Pi Clinton-i hian a sawi chhuak nghe nghe. America ram President Barack Obama-an lehkha pahnih Pu Thein Sein, Myanmar ram president tan leh Pi Suu Kyi-i te tan a thawn ve ve a, chu lehkha chu Pi Clinton-i hian an kutah a hlan ve ve a. He lehkha thawnah hian inkunkaihna tha zawk neih a beisei thu Obama-an a tar lang a ni.
    Pu Thein Sein-an insiamthatna tur kawnga sawrkar hma lakna tur minute 45 chhung a sawi naah Burma ram in democracy nih phung a zawh loh thu leh ram in hawng lo a nih thu a sawi lang a. Chuvang chuan sipai inawpna dan atang mipui rorelna a taka in let thei turin America ram tanpuina a ngen thu leh UN in dan leh dun a siam ang kawng zawha North Korea nen an indawr tur thu a sawi. Chu mai bakah Myanmar chuan UN nen a thara thu thlung turin a inngaihtuah mek thu leh a ram ralthuam a siamna hmunte phal bik chin nei lo a, enfiah a phal tur thu pawh a sawi lang bawk.
    Kum 20 chhung mai sipai sawrkar rahbehna hnuaia awm Pi Suu Kyi-i hian ram pum huapa inthlanna neih hma inthlanlailawk (by-election) ah tel ve a tum thu a lo sawi tawh a, hei hian ram chhung a sawrkar insiamthatna hi eng ang chiah a inhawng zau nge tih a hril chiang hle dawn a ni. He inthlan turah hian seat 48 inchuh tur awmin inthlan hun tur erawh chu hriat a la ni rih lo. Sawrkar a lungawilo pawl (activists) te chuan tunah hian mi 500 atang 1,600 vel politics avang a mi tang la awm niin, hel pawl hnam hrang hrangte leh sawrkar indawrnate chuan hmasawnna nei lo angin an sawi ve thung a ni.

(Source: The Star, The Sun & Irrawdy)

UN CHANCHIN

Tun kum chu kan vannei a RSC/OPE hi Dec 26, 2011 ni chauh an khar dawn a ni dang zawng a kal pangngaiin hna a thawk chhunzawm zel dawn a ni. Tin, DHS (Lahwahkah) kan tih hi Dec 9, 2011 thleng chauh an hawng a nga Dec 10, 2011 atang January, 2012 thla lai hawl vel thleng an khar dawn a ni. Amaherawh chu office an hawn vek chuan officer ten kim takin hna an thawk dawn a hna a kal chak viau bei sei a ni. IOM department ve thung, Dec 22, 2011 atang Jan 2, 2012 thleng khar a ni dawn a heng hunah te hian medical check up a theih loh a nga mahse Jan 3, 2012 atang chuan dan pang ngai angin an hna an chhunzawm leh ang.

Mihring Thian Lehkhabu

2011-12-06T11:30:00.000+08:00

MIHRING THIAN THA LEHKHABU

                Lalthuamliana,Tahan

Thuhma : Mihring hian hmuh theihna mit chi hnih a nei a. Pakhat chu, 'taksa mit' a ni a, mit chi khat dang chu 'hriatna mit' a ni. Taksa mit hmuh theih chin chu a tawi em em a, lehkha ziak hi feet li vela hlaah dah ila a hmu thei tawh lo. Hriatna mit erawh chuan taksa mit hmuh theih piah lama thil inthupte pawh fiah takin a hmu thei thin. Taksa mit hmuh theih chin chauhva innghah chu mawlna a ni a, hriatna mit hmangtute chuan hma an sawn thin. Taksa mit chu khua a lo reiin a thil hmuh a fiah lo tial tial a, hriatna mit erawh chu chawm that dan azirin a lo fiah tial tial zawk thin. Chu hriatna mit tichaka tifiah zualtu tha ber chu lehkhabu chhiar hi a ni. Mihring nun tihmasawn turin mihring thian tha lehkhabu tanpuina hi a pawimawh reng dawn a lo ni.

Chuti anga hringnun tihmasawn theitu hriatna mit fiah tha tak kan neih theih nan kohhrante hian chanchinbu te chhuahin leh library te dinin hma a la a, hei hi kohhran leh khawtlang, ram leh hnam hmasawnna bulthut pawimawh tak a ni.

Thian tha lehkhabu
       Thian hi ngah viau mah ila, thian thaa chhal ngam tak tak turte hi chu Var lam Arsi ang maiin an vangin an khat pharh thin a ni. Chu vangin, thian tha tehna chi hrang hrang hmanga teh pawha tling reng, mihring thian tha dik tak chu lehkhabu hi a ni. Lehkhabu chu mihring thian tha a nihzia heti ang hian sawi ila.

1. Zirtirtu tha a ni : Zirtirtu tha chuan a zirtirte chu thil tha leh tha lo hrethiam turin a zirtir thin a, chuti ang chiah chuan lehkhabu hian a chhiartuteah hna a thawk thin. Kan fel lohna leh dik lohnate ngam taka min hrilha min hmuhfiahtira min siam thatu chu lehkhabu hi a ni a, khawvel finna sang tak min pe theitu pawh a ni tih hai rual a ni lo. J.F.Kennedy chu a naupan laiin a hrisel lo em em a, a thiante infiamnaah pawh tel ve thei lo khawpa a bawrhsawm avangin Pathian chungah pawh a vui hial thin. Mahse a thiante, naupang infiamna chi hrang hranga an infiam laiin ani chuan a thian atan lehkhabu chu in chhungah a kawm tam phah zawk a. A hrisel loh em avangin school zirnaah chuan zir sang lem lo mah se, a thian kawmngeih tak lehkhabu avanga a neih finna leh remhriatnate chuan America President chhuan berte zingah a hlangkai ta a ni. Chu vangin, zirtirtu tha lehkhabu chu thiana neitu chuan finna thu hlu a rochung ngei dawn a ni.

2. Min chawisangtu a ni : Mihring thiante chuan itsikna avangin mi paihthlak an tum fo va, lehkhabu erawh chuan amah kan kawm avanga kan thanchhoh min duhsak thung. Mihring thiante chuan an mi duhsakna leh tanpuinaah thang that lak an tum a, an chapo phahin mi an uan khum thin a, lehkhabu erawh chuan amah kan kawm avanga kan hlawhtlinnaah pawh intithei taka lo intihropui ve vak a tum ngai lo. Ngawi renga min lo lawmpuiin a inphah hniam reng zawk a ni. Thingtuluang in chhung, lei chhuat atanga khawvel hna ropui ber thutthlenga thu tura Abraham Lincoln-a chawisangtu chu a thian lehkhabu bawk a ni. Abraham
Lincoln-a khan an in atanga mel 50 bial chhunga lehkhabu awm zawng zawng chu a chhiar chhuak vek e an tih chu! Chu vangin, lehkhabu hi thianah neih ve rawh, tichuan anin a chawisang ang che.

3. Thian rinawm : Thian rinawm lo chungchang Thufingin heti ang hian min hrilh ; 'Sumin thian tam tak a neih belhtir a, mi rethei erawh chu thianten an thlauthla ang' (19:4). Kan 'nipui thiante' chuan fur khawhnawm a lo thlenin min phatsan leh fo thin.Thian rinawm lo, kan neih tam zawh poh leh rilru natna min thlen tam ting mai a ni. Thian tha lehkhabu erawh chuan eng ang khawpa dinhmun chhiaah pawh ding ila, min phatsan ngai lova, min zahpui ngai hek lo. Hna hnuaihnung ber pawh thawkin hmun hniam berah pawh awm ila min zahpui a hnekin min tizahawmtuah a tang zawk hlauh thin. Kan awm dan leh nun danah a dik lo leh tha lo laite pawh rilru dik puin min zilhhau ngam a, Bible-in "Dik taka chhangtu chu thian tha a ni" (Thuf. 24:26) a tih hi lehkhabu hian a phawk zo hle a ni. Kan thatna tur aia kan nuam tih zawng ngawt min tuipuia min en liam mai thintute hi kawm nuam tak angin lang thin mah sela, kan tan thian tha leh rinawm an tling lo. Thian rinawm chuan kan dik lohnaah leh kalsualna lakah min siam tha turin min hliam chang pawh nei mah se, thian rinawm lo min fawhna aiin kan tan a hlu daih zawk (Thuf. 27:6). Lehkhabu chu retheina ruamah pawh min zilhhautu
thian rinawm a ni. Heti ang thian tha leh rinawm nei lotu chu mi vanduai a ni.

4. Nun nawmna dik min petu a ni : Mihring zawn ber chu nun nawmna leh hlimna a ni a. Hlimna leh nawmna neih tumin thil engkim hi kan ti thin ti ila a sual kher lo vang. Isua ringa chhandam nih kan duh chhan pawh chatuana nun nawmna neih kan duh vang a ni. Mi tam takin nawmna umin zu hmun sa hmun an bel a, mahse nawm lohna leh retheihnain a nang ching thuai thin. A thente chuan sum leh pai hlim hnuaiah chawlhna nuam awmin an ring a, mihring dikna leh zahawmna hloh phah hial pawhin sum leh paia nawmna chu an um thin. Mahse, sum leh pai hlim hi chawlhna nuam tak chu a ni kher lo a ni ang. Mi tam tak chu chauvin an tluk chhiat phah zawk a, lungngaihna leh tahna ruamah an lut fo mai. Chu vangin, tu dang eng dang ngai lova, mahni chauh pawha hlim leh nuam taka chawlh hahdam i duh chuan lehkhabu hi kawm mai rawh. Lehkhabu hlim nuam bela amah kawmtute chuan tu dang eng dang mah an ngai tawh ngai lo. Chu vangin, lehkhabu hi mihring thiante thiktham khawpa kawm nuam, kan zawn thin hlimna leh nawmna dik min pe theitu thian tha ber chu a lo ni e.

Thu kharna : Mihringin thian tha a mamawhzia leh mihring mamawh thian tha chu lehkhabu a nihzia kan sawi ta nual a. A tak ngeia lehkhabu kawmtu kan nih a pawimawh hle ang.
    Hun leh sum sengin TV serial film chi hrang hrang chanchin sawi zuah zuah thei leh internet-a saruak lem thlate tuipui em ema changkang ta viauva inngaite hian mahni kohhran chanchinbu chhiar nachangte kan hria em? Lehkhabu tha chhuak tharte ngaihven nachang kan hria em? Chuti ang tih nachang kan la hre lo a nih chuan thian kan la thlang fuh lo tihna a ni. Mihring thian tha lehkhabu hi i kawmngeih zual sauh sauh ang u. Ani chuan kawm duh loh a nei si lo va.

Thuro Hram

2011-11-29T12:08:00.002+08:00

    Thuro Hram

                        By. Lalmuankima (Tluanga Nau Malay)

    Tuk khat chu engin nge min mawlh ka hre lo, ka thangharh hlawl mai a, ka thil ri hriat chu ka manglam emaw tiin ka ngaihthah leh pek a, tichuan muthilh chhunzawm ka han tum leh naklai chuan ka thil ri hriat ngai bawk chu a rawn ri leh riar riar a. Ni danga ka hriat thin ni siin tukin zing chu ka rilru a va khawih ve ka ti rilru nuah nuah a, chu mi lai tak chuan ka sana Alarm ka kam chu a rawn ri chhunzawm ta nghal a, hna thawh a hun ta tih hriain ka riahna thlam buhpawl vawm vum thur mai, kawngka pawh Sakeibaknei puk kawngka ang maia hmul hnawk thur atang chuan ka han dak chhuak a, ni a lo tlangsang hman hle tawh a ni. Ka hmai ka han phih sawk sawk a, bawng ka barh nghal bawk a, tichuan ka hal chhun chu ka tan leh ta nak nak a. Vawi thum vel ka kual hnu chuan ka ri hriat ngai bawk kha a rawn ri leh a, chutah zet zawng i duh tak maw tih leh sairawkherh phawrh ka rual a, ri lo chhuahna lam chu hriat tumin ka pan phei tak zel a. A ni, lui kawr kam tuahpui lerah chuan Thuro pakhat mal tak mai leh lunglen hmel fe hi a lo Tukturukuk kuk mai a lo ni a, a kawppui a chan a ni tih a hriat mai. Rei lovah ani pawh a kawppui ngaiin a thi ve mai dawn tih a chiang. Ka han tin vang vang naa mahse min hmu reng chung siin thlawh a tum der lo. Mak tiin ka en reng a, ka khawngaihleh hnuhnawh lutuk chuan awih ka rei!!! "Khawngaihthlak Thute Thute" tanpui theih che ka va chak em aw mahse ka thei si lo” tiin ka thlir vawng vawng a, tawkfang hnuah min thlawh bosan ta a ni.
    Awle, nunchangte zingah hian Thuro hi a nun nem pawla sawi a ni a, a nu emaw a pa zawk emaw an thih chuan an lungleng hi an thihpah ve hial thin. An tui awp lai, an awm loh hlana va khawihsak pawh hian an rau duh mai thin a, an hram ri han hriat ringawt pawh hi a lunglen thlak a, mi thenkhat chuan “Thuva-te iang hian i nunzia reng a mawi ngei mai," a lo ti thlawt mai a ni. Tahan kawlphai khawte lamah phei chuan kawlho Thuro lei tur zawnga thirsakawra vak vak hmuh tur an la awm nuk mai. A mei var ze tial nei danglam deuh phei chu cheng 20000-50000 pawhin an ngam zuk nia.
    Kan zin kawng a thui ta hle mai, kan sawi tum lam hawi ve dawn tawh ila. Khawi hmunah pawh awm ila, kan thil tawn leh hriat thlemna tling tham tam takte hian awlsam takin Pathian khawngaihna ata min pawt pheleng dawr dawr nghal thei lo tih hi a hmasain hria ila, a chhan chu Isua Krista chhandamtua kan pawm ni a tang khan ThlarauThianghlim duhawm chuan min chenchilha kan taksa hi a in a ni tawp mai (1 Korinth 3:17; 6:19-20). Pathian hming fakin awm rawh se. Inkawm hunah chauh emaw tawngtai hunah chauh Thlarau Thianghlim hian min pawl duh a ni lova, khawiah pawh kalin awm ila min kawm a duh reng a, kawmtur a neih loh chuan amahin a Tukturukuk kuk thin. Thian hi a ngaina hle a, mahse a ti ti duhzawng hi a ho ang reng ‘I tan ka tawngtai sak reng che’, tih vel mai mai a ni.’ Amah hi a hawihhawm bawk a ni ang zing thawh veleh Good Morning tih a beisei a, tih loh chuan a vui leh mai thin.
    Kan thawmhnaw hak turah thleng hian rawn inrawlh a duh a, mahse keinin tul kan ti si lo, a fel zia hi kan hrethiam thin lo va, a pawi khawp mai. Kan thian tha ber nih a duh teh lul nen keini lah chuan kan mak ngaih si lo. Evangelist-te rawn kal chauh hian a tan hun kan pek phal thin vangin, Evangelist lo kal hi a nghakhlel thin ngawt ang. A duhzawng han tihsakte hi min phut a, chungte chu Bible chhiarsak leh tawngtai hi a ni. Inkhawm dawnah Bible kan keng chhuak ve ngei a, biak buk kan thleng a, kan la keu paih lo ta cheu va, inkhawm ban hlan nghakhlel takin kan mawng kan tisawi kan tisawi a, a kham hmel theih khawp mai. TV ennan chuan thu tleivar thak thei bawk si...hui …..ha….hei….ha……”
    Engvanga Thuro chungchang sawi kha nge kan nih? Thlarau Thianghlim hi Thuro anga tehkhinna kan hmu nual (Matt. 3:16; Mk. 1:9-11; Lk. 3:21-22). Tin an mizia pawh a inang hle. Christian tamtakte hian engtiang khawpin nge kan Thuro khawi Thlarau Thianghlim hi kan tih vui hlawm thin ang aw!!! Mal ngawih ngawiha kan awmtir chan hi a va tam dawn tak em! Kan taksa peng thengkhat hi Sakeiin rawn seh tum se, kan ui mai ni lo, kan hlau viau ang tirawh u, mahse keinin a duhzawng ti lova sual lam kan zawm apiang hian Sakeibaknei a ei theih tur zawnga phi ruai hnenah kan inphalrai si thin (Petera 5:8). Kan taksa hi inngaih nan a ni lo va, Lalpa tan a ni zawk e, Lalpa pawh chu taksa tan a ni (1 Kor 6:13). In Taksa chu Krista pengte a ni tih in hre lo vem ni? Krista pengte chu laksakin nawhchizuar pengahte kan siam dawn em ni le? …mana lei in ni tawh min tia kan taksaah hian Pathian chawimawi turin min duh a ni (1Kor 6:15;20). Taksaa Pathian chawimawi tih chu kan thil tawn chet chetah kan hnathawhnaah engkimah Krista mizia inngaihtlawmna leh mi zawng zawng hmangaiha unau anga en a, sawngbawl vel hi a ni mai. Biak in khera va kal emaw va intih sakhaw mi viau a ni lem lovang.
    Thuthlung hlui hun lai khan CHRISTOPHANY Fapa Pathian chuan Mosia, Zawlnei leh Puithiam hmangtein a mite a be thin. Tin, Thuthlung tharah amah ngei chu a rawn inlan a, tunah ThlarauThianghlim Pathian chuan kan chhungah ngei min rawn luhchilh ta, hei baka inlaichinna thuk leh nghet zawk a awm thei tawh lo vang. Thenkhatin an inkhawm apiangin Thlarau Thianghlim chu van ata koh thlakte an tum thin a, an sawm thin a ni. Thlarau Thianghlim chu vanah khian awm teh reng pawh ni se, chu mi ko thla tur chuan thiltihtheihna engang nge kan neih aw, ka ti thin. A hlet neih loh thlak ka ti, nachina kan sawi ang khan kan lei taksa hi a in a ni tawp a, kan taksa chu kan humhalh thiam dan a zirin Thlarau chuan min pawlin min pawl lo thei a ni. Hmun dang atanga koh thlak kan tum chhung chu Thlarau Thianghlim hi kan la hmelhriat tawk lo mai ni lovin kan la kawl lo pawh ti ila a sual lo vang. Chuvangin kan taksa chu mi en atana mawi leh Christian a ni, miin an tih theih tura awm tum satliah ni lovin kan Nun dan tur dik tak Lalpan a duh a ni, tih vang zawka che chhuak turin nang leh kei hi min ko va, min sawm zawk a ni.
    Keimahin ka tithei ringawt hlei nem i ti mai thei. I ti dik thawkhat ang. Mahse i free choice kha a pawimawh tawh a, a chhan chu tihtur leh tih loh tur kan hriat tawh hnuin, anin kan banah pawtin min tilui ngai lo. Thupha chawia tanpui dilna nena a hnena kan kir a ngai a ni. Thiltha tihtur kan hre chunga kan tih loh hian sual a ni. Thlarau Thianghlim chu kawng dik kawhhmuhtu hnemtu mai ni lovin Tlanna ni atan amahah chhinchhiahin kan awm, tivui lo hram turin Paul’n min sawm a ni (Ephe 4:30). Van atang khian chhumpui nasa tak ang thlirtu Van mipui chhiarsenloh (Heb 12:1) ten min thlir thup a, thenkhat mal ngawih ngawih hrehawmah pawh a nuamah pawh hnemtu nei tawh lo nakin lawka tlu mai tur nang leh kei dinhmun chhe tak mai hi min hmu tlang vek a, min khawngaihin min lainat a ni. Chuvangin ThlarauThianhlim Thuro anga nunnem leh zaidam thian lo va awm thei lo, ti em em vui hma em em hlu tak mai, thi lek lek eng set set hi i chhem alh leh ang u. Lalpaah chuan i in tichak leh ang u lah, kan dinhmun ngai Chhandam hlimlawmna kha min petu Amah Pa hnenah i beisei leh ang u.
    Hmana kan ri hriat mawi em em khawvel aw mawi zawng zawng ai pawha mawi zawk, ri riar riar Tukturukuk (Thlarauthianghlim aw, pawlna,hlimna) chu kan mimal tin kohhran tinte nun ro takah hian leih hnawnin awm mawlh rawh se. Chutilo zawngin kan chheh vel Movie leh Media changkanna hian min ei ralin chhan ngaihna awm tawh lo tuipuia pil ang mai kan ni ang. Midang mawhpuhtur zawng lovin keimah ka ni, tiin kan hmul chhiate paih thlawna hmul thara inthuam lehin a hmangaihna ang chhungah chuan i leng leh diai diai ang u hmiang Lalpan malsawm rawh se.

Rilru Thianghlim

2011-11-29T12:07:00.000+08:00

Editorial
RILRU THIANGHLIM

Lawmnaa khat rilru thianghlim,

A mawi tuktinpar aiin;

Fak zai vawr, rilru thianghlim chuan,

A ning lo, tlaini lenin.

    Bible-ah hian Rilru, Thinlung leh Thlarau tihte a awm hrang vek a, chuvang chuan mihring hian thinlung rilru leh thlarau kan nei hrang chiang kan tithei a ni. Khawilaiah nge rilru chu a awm, khawi maw thinlung chu? Doctor-te pawhin mihring taksa an phel sawm vek a, thlarau awzawng an hmu lo te an ti thin. Amaherawhchu mita kan hmuh loh apiang hi a awm lo tihna a ni kher lo. Thli kan hmu lo va, a awm tih kan chiang ang hian rilru, thinlung leh thlarau pawh hi mitin hmuh theih ni kher lo mahse a awm ngei tih hi a chiang a ni.
    Bible-in thinlung a tih tam tak hi chu taksa peng pakhat lung (heart) sawina a nih bakah awmze hrang neiin hman a ni thin. Mahse taksa peng anga hman a nihna chu a lang tlem hle. Hebrai-hote ngaih danah chuan lung chu mihring chakna bupui a ni a, eiin hmanga tihchak a ngai a ( Ror. 19:5) uaiin hmangin tihlawm a ngai bawk. (Sam. 104:15)
    Hei hi taksa peng a nihna atanga sawina a ni a, rilru lam hawia thinlung sawina a keng tel. (Dictionary of Biblical Terms- Revd Chuangthuama) Thinlung chu rilru chawh thawhna ( Seat of emotions) hmun a ni. Chu mi hmun a tanga lo chhuak ( rilru ngaihtuahna) chu Lal Isua pawh kha a ngaipawimawh thin hle. A zirtirte rilru ngaihtuahna mai mai pawh a khukpui vak thin a nih kha!
    A chunga hla thu kan tarlan khi, naupang sande sikulah kan sa thin a, tun hnua ka ngaihtuah let chang hian tha ka tithar leh thin. Khawvel sum tinreng leh lunghlu dil lovin Rilru mawi leh thianghlim hi dil theuh ta zawk ila, kan chenna khawvel hi a van nuam dawn tak em! Khawvel ropuina leh nawmsaknate hi chu Sirva angin a thlawk bo leh thin a, rilru tha, thianghlim hlu tak chuan kumtluang chenin min hnem thei a lo ni reng mai.
    Naupan laia kan lo sak ve satliah mai mai kha, tunah hian tihtak zetin tawngtainaah hmang leh ila, “Aw Pathian, Chhandamtu zarah, Min pe rawh, Rilru thianghlim tiin kan dilna hi chhun leh zanin, fak hla angin chho thin rawh se. Tichuan, kan ni tin nun hi tuktinpar aiin a lo mawi zual zel dawn a lo ni!

Ramchhung chanchin

2011-11-27T15:08:00.000+08:00

Hmeichhe Ruk Bo Chhuah Zalen A Ni
Kuala Lumpur: Nula pakhat kum 19 mi chu Nov. 23, nilai ni zing khan fitness Center atanga a kal chhuak chu, Leisur Mall, Taman Segar, kiang lawkah tu tih hriat loh mipa pa 4 in zing 9:00 A.M vel khan motor-ah an hnuk lut a, an ru bo ta a ni. Heng misualte hian nula pa hnenah rangkachak tlawn (gold bar) 2 a, a fanu tlan chhuak turin an hrilh a. Rei fe an inbiak hnuah Rm.60,000 in an inrem thei ta a ni. Hmeichhe pa hian a fanu ru bo tu ten a dahna tur an hrilh in ruak, Cheras ah pawisa a va dah a. Tichuan, darkar emaw zat hnuah a fanu chu an chhuah zalen ta a ni. He inruk bo chungchang hi police-ah kimchang taka report a ni a, thuneituten an chhui thuai tur thu an sawi.
(Source: The Sun)

Nupui Hrem Nan Fanu Kum 2 mi Shopping Mall Toilet-ah Tlansan

    Nov. 5, 2011 khan Johor Bahru-a cheng nupa tuak khat chu an intihthiam loh avangin a pasal kum 23 mi chuan tumah hriat lohin an fanu kum 2 chu motor-ah hruaiin Malaka lamah a kalpui ta a, Shopping Mall pakhatah lutin Ek-inah a kalsan ta daih mai an tih chu. Hei hi CCTV Camera atanga hriat chhuah leh a ni.
    He hmeichhe naupang kum 2 mi hi Shopping Mall ek-ina a tap thawm atangin he Shopping-a hnathawktu pakhatin a va hmu a ni. Naupang pa hian a nupui chu an fanu bo avanga rilru hrehawm taka awmtir a duh avanga hetianga ti hi a ni awm e.
(Source: edinooyin)

Malaysia-ah Chin mi thah a ni leh ta
    Nov. 16, 2011 tlai lam dar 5 vel khan Cameron High Land-a hnathawk Chin tlangval pakhat chu Yangon, Hmawbi khaw mi Htain Lin an tih chuan chemin a vit hlum.
    He Chin tlangval hi Mindat khua U Thai Khaw Lin leh Pi Li Khaw Nam-te fapa Ki Lawha a ni a, Refugee nihna nei tawh a ni.
    Chema vih a nih hnu hian damdawi in-ah kalpui a ni a, mahse ril pawt khawpa vih a nih avangin a hliam chu a tuar ta lo va, Nov. 17, tlai lam 1:00 khan a thi ta a ni. Htain Lin nen hian hnathawk tlang an ni a, engvanga intibuai nge an tih hriat a la ni lo.
    Chema vittu hi Chin Community hruaituten manin police-ah an hlan.
( Chin News group)

Chawimawina Dawng Kyaw Thu

2011-11-27T14:51:00.000+08:00

Kyaw Thu Chawimawina Doctor Degree Hlan

    Yangon khawpuia Chhiatni tanpuitu Pawl dintu Kawlram ram lemchan thiam ( film star lar ) U Kyaw Thu leh a nupui Daw Shwe Zi Kuat hnenah Yangon Immanuel Baptist kohhran chuan vangtlang tana hnathawk tha chawimawina nopui an hlan.
    Chhiatni tanpuitu pawl Chairman U Kyaw Thu hnenah Mipui vantlang tana thiltitha chawimawina ( Doctor of humane Social Service) doctor gegree hlan a ni a, a nupui Daw Shwe Zi Kuat hnenah master degree hlan a ni thung.
    He chawimawina hi Immanuel Theological Institue leh Union Biblical Seminary ( Rev.Dr.Remlaliana)-te huaihawtna hnuaiah International School of Theology, Bangkok leh Online Bible College International, Australia te inthurualin an buatsaih a ni.
    Immanuel kohhran Senior Pastor Rev. Dr. Paul F. Johns chuan “ U Kyaw Thu-te nupa hian mihringte tawpna hun hnuhnung berah, mi hausa, mi rethei, hnam leh sakhua thliar chuang lovin mi tupawh tanpui ngai apiang an tanpui thin a, phera inzial a, thlana inphum mai mai thinte kha, kuang tha tak siam sakin mawi takin an vui liam sak thin a ni. Kan Bible chuan tapte tahpui turin min zirtir a, mihringte hi eng tikah nge kan tah thin kan tih chuan thihna kan tawh hunah a ni. U Kyaw Thu hi mi hmingthang sa, lemchan thiam a ni a, tuna a thil tihte hi hmingthan a duh vanga ti a ni lo, tlawmngaihna vang liau liau a ni.
    U Kyaw Thu hian hetiang hna hi thawk duh mahse a nupuiin a tawmpui a ngai a ni. Asia ( khawchhak) mite hi chuan thihna kan ngaihdan hi anchhia a ni tlat a, malsawmna a awm lo kan ti thin. Mahse chutiang ngaihdan a paltlang ngam a, mi tam tak sawiselna leh demna karah pawh a pasal a thlawp tlat hi, chawimawi phu kan ti a ni. Chhiatni kan tih hian mitthi ruang mai ni lo, damlo bawisawm pawh a hual tel a, chutiang zawng zawngah chuan an nupa hian he chawimawina hi an phu hliah hliah a ni, a ti bawk. ( Lann thit journal; Nov. 2011)

Lawrkhawm

2011-11-26T17:28:00.000+08:00

Hillary Clinton Kawlramah Zin Dawn

    Indonesian Barlin thliarkara ASEAN Summit hmanga zin US President Barak Obama’n a lo sawi tawh angin Hillary Clinton chu Nov. 30 atanga Dec. 2 thlengin Kawlramah a zin dawn ta.
    Pi Clinton-i hi America ram khawnbawl upa minte an tawiawm dawn a, Kawlram khawpui Nyipidaw lama sawrkar hruaitute leh Yangon-a NLD Party hruaitu Pi Aung San Suu Kyi nen pawh an inkawm bawk ang.
    President Obama leh Pi Aung San Suu Kyi -te phone atanga an inbiak vawi khatna atangin American Secretary of State Pi Clinton-i hi Kawlramah tirh a ni nghal a, hei hi kum 50 hnua America ram sawrkar mi pawimawh kawlrama a zin leh vawi khatna a ni.
    Tun tumah hian America sawrkarin thu a lo thiam tawh angin, Kawlram sawrkar thar chuan a kalphung a thlak danglam avanga tanpuina a pek tur thu, nemnghehna leh hmalam hun zela thawhhona tha an neih zel beisei a ni a, amaherawhchu America sawrkar-in sumdawnna chungchanga kawlram a lo hrekna kha chu tihdanglam a nih dawn loh thu an sawi.
(Irrawaddy)

Kum 2013-ah SEA Games Myanmar-in Thleng Dawn
Myanmar ram chuan SEA Games vawi 27-na chu kum 2013 hian thlen a tum a, kumina thlengtu Indonesia ram, Games organising committee chairwoman Rita Bubow-i chuan SEA Games flag chu Myanmar Sports Minister Tin Sann-a hnenah Nov 22, 2011 zan khan a hlan chhawng ta. He SEA Games hi Myanmar in tum 3 a thlenna tur niin kum 1961 leh 1969 ah te khan Rangoon ah an lo thleng tawh thin a ni. SEA Games ah hian Asia ram hrang hrang 11 an tel a, infiamna chi hrang 30 hmanga infiam thin a ni. Myanmar ram chuan kum 2013 SEA Games an huaihawt turah hian tuna an hman mek infiamna chi hrang 30 mai bakah Chinlone pawh pho lan a tum bawk. He infiamna kutpui hi Naypyidaw ah leh Yangon ah te huaihawt tum a ni a, stadium rinpui ber tur chu Zabyu Thiri Sadium, Naypyidaw niin mi 30,000 len theihna a ni.
He infiamna kutpui hi Dec 11, 2013 ah hawn (opeining ceremony) tur a ni a, infiamna tur hmun (stadium) te hi nakum 2012-ah pelh fel vek tur a nih thu Pu Mying Oo chuan a sawi. (Source: The Star)

Myanmar Ramah Kawng Zawh Phal A Ni

Myanmar ram Sipai kaihhruai Sawrkar chuan a rorelna sang ber (parliament) ah a ram mipuite lungawilohna lantira kawng zawh (sandahpiah) theihna dan chu Nov 24, 2011 khan a phal sak ta. Mahse, kawng zawhtu turte chuan thuneitute hnenah ni nga hmain an hriat tir lawk hmasa tur a ni. Kawng zawh tute chuan puanzar (flag) leh pawl symbol te an keng thei a nga, mahse sawrkar hmunpui (building) leh ram dang sawrkar palai hna thawkho chenna hmun (embassy) ah te kawng zawh phal sak an ni lo thung. He thu (bill) ram rorelnaa put luh hi kawlram hruaitu lu president in a sign hnuah chuan ram dan pakhat ang a lo ni ve tawh dawn a ni.
(Source: The Sun)

Zalenna Hman Thiam

2011-11-26T17:10:00.000+08:00

Zalenna Hman Thiam

                                    Lalbiakngura
    Mi tam tak chuan zalenna duh avangin an nunna hial an hlan a. Chuvangin mihringte mamawh a ni nge mai. Amaherawhchu hman dan kan thiam lo va, chhiatna min thlentu a lo ni leh thin.
    Thufing pakhat chuan, “Thil kawm tak lal hnuaia awm chu a tha lo hle a; thil phal tak lal hnuaia awm chu a tha lo lehzual” tiin a sawi. Zalenna hi kan duh tak mai ni mahse, kan hman thiam loh chuan chhiatna min thlentu a ni thei. Hman thiam zawng a har a ni ang, min thlahtu Evi leh Adamate pawhin an hmang thiam bik lo.
    Mahni tawkin zalenna kan nei theuh a, zalenna hman thiam dan tlem azawng i han ngaihtuah teh ang.

Rilru a pawimawh:
    Kan rilru awmdan a zirin kan kut leh ke, taksa te a chechhuak thin. Doctor-te, Psychologist-te hian rilru thiltihtheihzia ( mind power) an hre chiang hle. Rilrua kan thiltih avangin mi huat kan hlawh thei a, kan rilru a zir vek hian kan nih tur ang kan nih loh phah thei bawk. Thomas Edison-a pawh a thil siam ( research) vawi sangkhat a hlawhchham pawhin a nih theih loh dan chi sangkhat ka hmu chhuak tih zawngin a rilru a siam mai a ni.
    Mizote hi kan rilru a nghet lo tlangpui, hna pakhata rei tak thawk thei kan vang. Mahni kum zat aia tam hna insawnte pawh kan awm. Mi thenkhat chu hna hi an hua a, hmelma angin an ngai hial. Hna hi thian tha tak anga ngaiin mahni in mawi taka sa mek angah inngaih zawk tur a ni. Hna thawh hi anchhia a ni lo va, min tichangkangtu min tizahawmtu a ni zawk. Hna kan thawh loh hian hun awl kan nei tam a, kan rilru hian sual lam a ngaihtuah a, tihpuitlin a lo ni thin.
    Zu in pawh kan pung sawt hle mai, kan chhiatpui a ni tih phat rual a ni lo. Dr. Lalhmingliana chuan, ‘Zu in dan thiam aiin zu in lo thiam hi a tha zawk,” a ti a. Zu in thin mi chu a ngaihtuahna a tawi a, pawisa nen an awmtlang rei thei lo va, pawisak pawh a nei lo thin, Taima leh fel angin lang thin mahse a tluantling thei lo va, a hnuhma a man thei lo a ni. Mi kan tanpui thei lo a nih pawhin a hnawksak zawnga khawsak a tha ngai lo.
    Kan rilrua awm anga kan chetchhuah mai chuan mi an-loh ni mai lovin mi ang-lo (mi a) nihna chikhat a ni. Chuvangin kan rilrua awmte hi kan chhia leh tha hriatnain kan thlitfim hmasak a tul. Tichuan, kan rilru a lo mawi ang a, a lo thianghlim ang a, zalenna hmang thiam kan lo ni ang.

Hun hman that a pawimawh:
    Thil sual tih loh hi hun hman that a ni mai lova, thil tha tih a tul. Hun kan chelh ding thei lo tih inhrilhnawn kan ngai lo. Amaherawhchu hun dah that ( khawl) dan a awm, “A man who spends time wisely is a man who save it,”tih a ni a. Hun hi tha tak, thiam taka kan hman hian hun dah tha kan lo ni reng mai. Hun a danglam lova a chhunga chengte kan danglam zawk a ni.
    Albert Einstein-a Relative Theory-ah chuan, “Eng ( Light) aia kal chak thawlhna (rocket) kan siam theih chuan hun hi a let zawngin a kal ang,” a ti. A dik a ni, mahse eng tluka chak chu sawi loh, a zatvea kalchak pawh siam theih a ni lo ( speed of light= 3*108 ms). Chuvangin hun hi khuahkhirh (Control ) theih a ni lo.
    Mihringte hi hun hnuaia khawsa kan ni a, mi hausain a chang tam chuang lova, mi retheiin a chang tlem bik hek lo, angkhatin kan chang theuh a; kan hman dan erawhchu a inang lo. Hun kan hman dan hian kan nun a tichhe thei ; kan nun a siam tha thei bawk. Chuvangin zalenna hmang thiam tur chuan hun hman that a pawimawh a ni.

Tawngtai a pawimawh:
    Ringtu dik tak chu tawngtai lovin a awm thei lo va, tawngtai thiltihtheihzia a hre bawk. Setana hian kan finna, kan thiamnate a nuihzat thei a, mahse thinlung leh tihtak zata kan tawngtai chuan hlau leh khurin a tlanchhe thin.
    Greek Pilosopher Plato, Aristotle, Socretie-ate pawhin Lal Isua pian hma ( B.C) daih khan, kan hmuh theih, kan khawih theihte hi thil tak tak a ni lo, thil tak tak ( reality) chu chhe thei lo, boral thei lo hi a ni,” an ti a, thlarau ziarang an hre tawh a ni.
    Kan hmelma setana hi keini ai a fing zawk a, kan nihna ang zelin thlemna a siam thin, tawngtaia hneh theih a ni. Martin Luther-a pawh tawngtai mi tak a ni a, “Vawiin chu ni dang aiin ka buai dawn a, ni khat darkar khat tawngtai thin kha darkar hnih ka tawngtai a tul a ni, “a ti thin. Billy Graham-a pawhin “vawiin chu ni lengin hna ka nei a, chaw ei lova tawngtai ka tul a ni,”a ti thin bawk. Ringtu mi ropuite hian tawgntai hi an chakna a ni a, sual an hnehna a ni. Tawngtai ngaina mi chu Pathianin a chenchilh a, a kaihruai a, mal a sawm thin. Chuvangin zalenna hmang thiam tur chuan tawngtai fo a pawimawh a ni.
    Hla siamtuin, “Engah nge ka rilru a buai thin le, he khawvel thilte vang a lo ni e,” a tih angin kan rilru awm hle hle thei lo hi hun hman that chaicheha nghet taka chepin tawngtaina tubauhin chhu chawrh chawrh ila, zalenna hmang thiam kan lo ni ang a, nun duhawm kan lo nei dawn a ni.

Lawrkhawm

2011-11-22T11:56:00.000+08:00

KING JAMES VERSION KUM 400TH NA

    Nov 16, 2011 khan King James Bible kum 400 tlin champha Westmenter Abbey biak in, London-ah ropui taka hman a ni a, Lalnu Queen Elizabeth-in a hmanpui. King James Bible-a Thuthlung Hlui bu hi Hebrew tawng atanga lehlin a ni a, Thuthlung Thar hi Greek tawng atanga lehlin a ni. He Version hi vawiin thleng hian khawvela Bible hman tam ber leh ngaihhlut hlawh ber a la ni hial awm e. Tawng lehlingtu mi 47 ten London, Oxford, Cambridge hmunah te meeting tum 6 meuh an neih hnuah he bible hi an peihfel thei ta chauh a ni.         Kum 1604 khan England ram lal James I ( King James) an tih chuan England ram leh Scotland ramte an ipumkhat theih nan Hampton Court Palace-ah Bible siam tur thu a pe a,   chumi atanga kum 7 hnuah an    puitlin chauh a ni.
King James Bible kum 400-na lawm ni hian Queen Elizabethi mai bakah a pasal Prince Phillp leh a fapa prince Charles-a te pawhin an tawiawm bawk.

NI 11.11.11
    Khawvelah hian ni danglam tak hi a lo thleng thin a, Arsi leh vansang thil awm dan zir mite chuan hetiang hun hi an ngaipawimawh thin hle. A bik takin Buddhist sakhaw be mite hian an ring bik emaw tih tur a ni. Pian ni, inneih ni leh thil tam takah ni bik an thlang thin a, ni serh pawh an ngah em em a ni.
    Ni chhinchhiah tlak leh danglam lo thleng kan hriat ve chinah 8.8.88 te, 9.9.99 te. 10.10.10 -te kha mi tam tak chuan danglam takin an hmang a, Keini Kawlram mite chuan 8.8.88 kha ram buai kum chhinchhiah nan kan hmang ta zel a nih hi!
    Kumin 11.11.11 pawh hi ni danglam tak a ni ve leh tho mai. Khawvelah thil thleng mak leh rapthlak tak sawi tur hre lo mah ila, nula tlangvel inhmangaihten an dam chhung huna an chhinchhiah tur ni pawimawh takah chantirin Malaysia Kuala Lumpur Chinese Temple-ah ringawt pawh tuak 400 an inkutsuih tiap mai a ni. Chu chu Buddhish sakhaw bia chauh an ni a, Kristian leh Muslim mi tam tak, he mi nia inkutsuih an awm bawk. Chu mai bakah he mi ni ngeia nau piang hman tura ruahmanna siam pawh an tam teh mai a sin.

Pi Hillary Cliton-i Kawlramah Zin Dawn

    Asia chhim chhak lam ramte Association of Southeast Asian Nations (ASEAN) summit- chu Nov. 16 khan Indonesia ram Barli thliarkarah tan a ni ta. ASEAN summit-ah hian US President Barack Obama leh Russia President, Dmitry Medvedev pawh an tel a, member ram ni lo – Japan, China, South Korea, India, Australia leh New Zealand-te pawhin aiawh an tir bawk.
    He inkhawmpui hmangtu US President chuan US Secretary of State Hillary Clinton-i chu thlaleh mai hian Kawlramah a kal tur thu a sawi. Nov. 17 ( Nilai ) zan khan Pi Suu Kyi nen an inbiak mai bakah Kawlram Preisdent Thei Sein nen pawh he inkhawmpuina -ah hian an inhmu bawk a ni.
Nov. 19; Irrawaddy

26 th SEA GAMES 2011

    Nov. 11, 2011 atang khan Indonesia ramah South East Asia Games vawi 26-na chu ropui taka tan a ni leh ta. He SEA Games ( Infiamna)ah hian ram 10 atangin infiam mi sang tel an kalkhawm a, Kawlram atang pawhin infiam mi 470 an tel ve a ni.
    Kumin 2011 SEA Games -ah hian Gold medal ( Rawngkachak lawmman) chi 545 siam a ni a, Nov. 17 thleng kha chuan Gold medal hi chi 205 chuang sem tawh a ni. Chung zingah chuan Indonesia ramin Gold 93 a dawng tawh a, Malaysia ramin 32 a dawn laiin Kawlram chuan 2 chiah a la dawng thung. Dawng tlem ber chu Timor ram a ni a, dawng tlem ber pathumna chu Kawlram a ni.
    Kawlram hian kum 2009-ah khan Gold 12, Kum 2007-ah Gold 14, 2005-ah Gold 17 an lo tawng tawh thin a, kumina heti taka an tlak hniamna chhan hi ngun taka chhuttute chuan inbuatsaihna that loh vang te, infiam miten infiamna hmanrua tunlai mila hman tur a neih ve loh vangte leh Gold medal lawmman dawng ngei tura an rinten a hun takah an tihthat theih loh vang a ni, tiin DVB chuan a sawi.
    Kum 1999 khan Brunei rama SEA Games hman a nih tum khan kawlram chuan Gold medal pathum chiah an hawn a, chutiang bawk chuan kumin pawh hian a ni leh lo vang tih sawi theih a ni lo, tunlai khawvel hmasawnna tarmit atanga thlir chuan a zahthlak lutuk mah mah a ni. Silver leh Brone (Dar) kan chantawk a nih leh mai hmel.

Buddhist Mi 5-in Sawrkar Sawisel
    Nov. 15,16 ni hnih chhung khan Kawlram khawpui pahnihna Mandalay-ah Buddhist puithiam mi-5-te chuan sawrkar sawisel-in Politic avanga tangte leh Buddhist puithiam an mante chhuah thuai turin an ngen a, hnam te nau zawkte nena (Kachin) indona pawh titawp turin an phut bawk. Buaina lian tham chhuak a awm lo va, heng Buddhist puithiamte hian an ngen anga sawrkarin a tihthuai loh chuan buaina lian zawk a chhuah theih thu an sawi.

UN THU LEH HLA

2011-11-22T11:43:00.000+08:00

Nov. 16, nilai ni zing dar 9:30 khan UN hmalakna chi khat CDU ( Community Development Unite) an tih chuan Community hrang hrang hruaitute sawmin Chinese Assembly Hall, Maharajalela-ah mi 120 vel an kalkhawm a, Mizo Refugee aiawhin MCF Secretary leh Tv. Lalchhanhimate an tel.
He inhmuhkhawmna hi hun hniha then a ni a, hun hmasa zawkah chuan OPE kan tih mai thin, tun hnua RSC ( Resettlement Support Center) an tih tak atangin khual lian Officer Tabby-i hnen atangin thu pawimawh tak tak kan ngaithla. Hetiang deuh hi a ni:

1. RSC (OPE) chin chunglam zawng hi, UNHCR Office hmunpuiah sungsan (inquiry) theih a ni tawh lo va, hetianga kan tihchhan chu hmun hla tak tak atangin in lo kal a, Texi man in sen mai bakah harsatna tam tak in tawh phah tih kan hria a ni. Tin, he lai UN Office hmunpuiah ngei pawh hian thawktute tana hnawk khawpin mi kan inhnawh thin a, chuvang chuan ngun taka kan ngaihtuahin zawh duh neite chuan phone leh e-mail atanga zawhna siam mai hi tha zawkin kan hre ta a ni.

2. Phone leh e-mail atanga zawhna zawttu hi thlakhat chhungin mi 1,700 an tling hman a, chung zawng zawng fel taka chhang let tur chuan officer leh tawng lettuten hna dang an thawk hman lo hial ang. Nitin RSC (OPE) chang tur buaipui an ngai bawk si.

3. Tunah hian kum 2009 May-June thlaa inregister-te kan ko mek a, keini chuan UN atanga in file a lo thlen chauhin kan ko thei che u a ni.

4. RST chhan atanga kum khat hmain (OPE) kan ko thin. Chutiang a nih loh chuan engemaw harsatna avangin UN lamah in file a la tang tihna a ni ang.

5. RSC (OPE)-ah chhungkaw inthun a theih tawh lo, a chhan chu mi thenkhatin rei tak an nghah laiin thenkhat lo thleng hlim ve chauhte an inthun ( UN Card hmu) leh mai thin hi, thil dik a nih loh avangin kan titawp leh ta a ni.

6. RSC inchhan atanga thla 4 hma chu zawhna rawn zawh a ngai lo vang. Thla 4 chhungin DHS ( Department of Homeland Security; Lah Wah Kah) kohna in dawng lo a nih chuan ehkha or email-in in rawn zawt thei a. Chhanna in hmu lawk lo a nih pawhin karkhatah vawi khat pawh rawn thawn mawlh mawlh mai rawh u.

7. RSC hi US ram in luh theih tur leh luh theih loh tur thutlukna siamtu a ni lo va, in chanchin kimchang taka ziakin DHS ( Lah Wah Kah)-ah thlen saktu che u kan ni. DHS hian US ram in luh tur leh tur loh thutlukna a siam thin.

8. UNHCR ( RST) atanga in file a lo thlen hnua timuang theitu che u chu:
a) Thu dik tak in sawi loh avangin
b) Inchhungkaw boruak ( innei/ inthen) leh in kumte in sawi dik thin loh avangin
c) In contact theih thin loh avangin
d) Interview-ah lehkha pawimawh in ken loh avangin
d) Interview tura koh ni-ah in kal loh avangin
Hengte avang hian in muan phah thei a, chuti a nih loh chuan RSC in chhan zawh atanga in nghah hun chhung chu a tlangpuiin thla 8-12 a ni thin.

Keimahni

2011-11-22T11:37:00.000+08:00

Pastor Bial Fang:
    Pastor tan thla sawm chuang tawngtaia kan dil tawh hnuah zalen zawka rawngbawl theihna (Permit) Lalpan min pe dawn ta! Pathian venhimna hnuaiah Penang, Johor, Tumbuk, Cameron leh Batu Untung-ah bial fangin kan Pastor hi a fehchhuak thin tih kan hre tlang awm e. ‘Lalpan rem a ti a nih chuan Lungin pawh kan tang ve mai ta lawng; mihringin engnge kan tihtheih, man kan cho tihna ni lovin rawngbawla pen chhuak ka nih avangin ka hlau lo khawp mai’ a ti thin a, mahse tunah chuan rilru thlamuang takin a zin chhuak ve thei ta.

Penang-ah: Kan pastor chu ni Nov. ni 10 leh 11 khan Pulau Penanga Rev. F. Vanlalchhuanga M.Div. degree lak graduation service-ah Penang MCF present Tv. Kima, Nl. Ngurpuii, Nl. Tetei leh an pu Mr. Vincent te nen an va tel a. Ni 12 leh 13, zan hnih leh ni khat chhung chu Thingzaikhawl hmunaah Penang MCF unaute nen “Zawn hmasak tur chu” (Mat. 6:33) tih thupui hmangin Pathian thu leh hlaa inpawlhona an nei chhunzawm. Chu thupuiah chuan kan engto leh ngaihpawimawh ber UN thlangtlak) boruak leh a vuakvet te hi Pathian ram leh a felna zawng hmasa zawktute hnena Pathian min pek belh tur malsawmna a nih zawkzia te, ei leh in, silh leh fen kan mamawh tih Pathianin a hria a, kan mamawh ang zelin min chawm zel dawn a ni tih thu te, mahse kan ei in/silhfen tur hi chungleng savaten taima taka an ei khawp bar khawp an zawng thin ang hian zawnga thawk chhuak tur kan nihzia te, Pathian ram leh a felna zawng hmutute chu Bible chhiar, tawngtai, Pathian biak, sawma pakhat pek leh mission rawngbawlnaah Pathian min pek sawma pakua atanga mahni phal leh remtih tawk ang zela theih tawp chhuah zeltu an nihzia te chu zau helh hawlha ngaihtuahho a ni. Pastor chu ni 14/11Mondayah a ko hawng.

Tumbukah: Pastor chuan ni 16 leh 17 khan zan hnih leh ni khat chhung chu Pathian biak awmzia leh Sermon buatsaih dan tih thupui hmangin Tumbuk MCF-ah course a va pe a. Pu Lalzuala te inah course nghah a ni a. Sermon chi hrang hrang leh a ruhrel (pianhmang) ruahman dan te, kan sawi tur sermon hmanga Pathianin min sermon (eiral/ hmin) hmasak a pawimawhzia te, Sermon outline leh sermon ziak chhuah dap a tulzia te, sermon inbuatsaih lawk nan hun tam pek a tulzia te, chutia hun pe tur chuan Time management (hun hman dan bithliah neih) a thatzia te leh mite sermon copy dan te an zirho bawk a ni.

Johor Lam:
    Pastor chuan Nov. 19 Inrinni khan Johor lam bialfang turin Quarter a chhuahsan leh ta a, tluang tak leh hlim taka hun an hman kan duh sak a, tawntaiin i hre reng ang u. Ruahman ang a nih chuan Nov. 20 sunday zanah a lo kir leh ang.

Batu Untung Crusade:
    Batu Untung MCF chuan Pastor sawmin Nov. 22-24 chhung hian Crusade an nei dawn a, tawngtaia puibawm turin mipui min sawm a ni.

Human- Rights Training:
    UNHCR hnuaia pawl pakhat ICMC ( International Catholic Migration Commission) an tih chuan Nov. 18 zirtawp chhun dar 2:00- 4:00 thleng khan MCF Quater-ah training an rawn pe a, chhimtu mipuiten an tangkaipui hle.

MCWF Combined Inkhawm:
    MCWF kan tih ve chamchi hi UN lam pawl hming emaw lo ti tawk kan awm palh takin han sawifiah hmasa ila. MCWF tih chu Mizo Christian Women Fellowship tihna mai a ni a, chu aia sawifiah leh kan tum dawn a nih chuan Mizo Kristian Hmeichhe pawl tih a ni mai.
    Nov. 27 sunday-ah MMC (Pudu) lam hmeichhe pawl nen inkawmhoin zanriah an kilho dawn a ni. He inkawmkhawmnaah hian hlimawm taka hun hman tum a ni a, Wellcome December tih hming pek an tum bawk.
A hmun : MCF Pastor Quarter

Picnic: December ni 10 Inrinni-ah Picnic tur tih kan puang tawh a, kan kalna hmun tur hi kea kal mai theih a nih loh avangin Bus hawh a ngai tih sawi nawn duh tawh lo phawt ang.
    Bus hawhtu turten hawh dan tur an thiam theih nan, Picnic kal tumte chuan hming in report tur a ni e. Tin, Bus man thutna pakhat tan Rm. 20 a ni ang a, Bus chuan hunah khawn a ni dawn tih hria ila, Bus man neih loh chuan mipui zingah zak chem chem dawn ni mai. Bus man chu MCF upa-hoin thilpek khawn angin an khawn mai mai dawn lo. Hming list nen thlap a ni ang. Hria maw Te-a!!!!
    Kan Bus hawh tur lah chu a han tha rap! Nl. Malsawmtluangite company-a mi ngat. Chhe lo tak a ni.

KLBC Christmas Charity Food Fair
    December 4, Sunday hian kan biak-ina lawi hnam chitin atangin Christmas hmuahna ei-in chi hrang hrang zawrh a ni dawn a, chumi atan chuan Ticket zawrh tan a ni ta.
    Ticket pakhat hi Rm. 10 man a ni a, thil chi thum a lei theih dawn a, mahni duh zawng zawng lei tawh mai tur a ni ang. MCF member zawng zawngten lei theih theuh kan tum dawn nia.

Kohhran Sum

2011-11-17T10:29:00.001+08:00

Kohhran Sum

Rev. Gospel Hrilvelthanga

“Ka hrilh a che u. Sum lemin in tan, thiante siam rawh u;
sum a boral huna chatuana awmna hmunah chuan
an awmtir nan che u.” (Luka 16:9-13)

1. Sum lem

Mizo Baibula ‘sum lem’ tia lehlin hi Kawl baibulah khawvel ro sum tlo lo emaw nghet lo tiin lehlin a ni. Sap baibul KJV leh NIV-ah chuan ‘Sum lem’ hi ‘khawvel ro thil’ leh “fel lohna sum, dik lohna sum, sum fel lo, sum dik lo” tiin lehlin a ni a. Heta ‘fel lohna sum’ han tihah hian sum kha amah ngau ngauvah a fel lo a dik lo tihna lam ni lovin, John Wesleyan, “ a hmangtu mihringin fel lo leh dik lo taka sum a dehchhuah a, a hman thin vang a ni,’ a ti. (Fifty-three Sermons, p. 634) Sap NIV Baibulah chuan ‘sum lem’ hi “worldly wealth” tih a ni a, a awmzia chu ‘khawvel ro/hausakna’ a ni. Saphovin sum hi “money emaw mammon emaw” an ti a. Sap baibul lehlin hmasa ber KJV-ah chuan “mammon of unrighteousness” tiin dah a ni a, a awmzia chu “ fel lohna sum emaw dik lohna sum emaw sum fel lo, sum dik lo (unrighteous mammon) tihna ni. Sap tawnga ‘mammon’ hi Greek tawng ‘mammonas’ atang lak a ni a. He Gk tawng hi Hebrai tawnga ‘mamon’ emaw Aramic tawng‘ mammona’ emaw atanga lakchhawn leh a ni, a awmze bulah chuan ‘sum’ chu “ miin a rinna a nghahna emaw rinna nghah chhan” emaw “a rin chhan” tihna a ni.( John Nolland, 35b World Biblical Commentary (Dallas: Word Books, 1998), pp. 805-6). Tichuan ‘sum lem’ chu ‘chatuan daih ni lo khawvela ro thil chi hrang hrang sawina a lo ni ta a. He lei ro sum hi Lal Isuan Vana ro khawlkhawm tura min tih nen a inkalh tlat a ni. Mahse, he lei ro sum (sum lem)- hi kan ta a ni chuang lo va, keini chu a vawnghimtu (steward) te kan ni.

Mi retheite kan tanpui hian sum lemin thian kan insiam tihna a ni a (Lk 12:33). Thian kan siam dan tur chu mi hausa leh Lazara tehkhinthuah Lal Isuan chiang takin min hrilh (Lk 16:19-31). Thilpek (sum) hmangin retheite thianah kan siam tur a ni. Kuta sum hman tur a awm loh lai hi sum boral hun a ni lo va. Sum hmangtu mihringte kan thih hun hi sum boral hun tia Baibulin a sawi chu a ni zawk a. A chhan chu tumahin sumpai hi pialralah kan chhawm tel thei dawn si lo a ni. Tichuan miin khawvel a chhuahsan hunah a dam laia sumpai hmanga a lo tanpuite khan chatuan Pathian chènna ram nuamah hlim leh lawm takin an lo hmuak dawn a ni. (I. Howard Marshall, The Gospel of Luke: a commentary on the Greek Text (Grand Rapid, Michigan: William B.Eerdmans Publishing Company, 1995), p.621)
Sum hi mihringte hmanrua a ni a, mihring chunga thuneitu lal a ni lo. Mahse, sum chu hotua neihin mihringte hi sum bawih (sal/chhiahhlawh)ah kan tang fo thin.

2. Kohhran sum

Kohhran hi Krista thisena lei, Krista chu a kila lung pawimawha neihin Pathianin A Thlarau Thianghlima a din a ni a. Kohhran lu chu Krista a ni. Jerusalema kohhran kha sum kenghet (capital money) nei sa leh project nei sain Pathianin a din lo. Sum leh pai kùt hùm engmah an nei bawk lo va, hei hian sum hi Pathian kohhran din chhan a ni lo tih min kawh hmuh. Kohhran din tirh atangin kohhran nun kal zelah tinungtu Thlarau Thianghlim hian hmun pawimawh ber a chang a. Tinungtu Thlarau Thianghlimin lei kohhrana rorel khawl, rawngbawlna leh nun dan kawng tinrengah lalna leh thuneihna sângber a chànna kohhran chu a nung a, a chhunga chèn a hahdamin a hlimawm em em bawk a, a zalen halh mai a ni.

Tichuan, tinungtu Kristaa nunna thlarau rah chi hrang hrang chu kohhran membarte ni tin nun khawsak danah hmuh theihin a kuhmun a, a pâr a, rah tam tak a chhuah bawk thin. Chu mi nun neitute chuan kohhran membar tàm leh tlèmah te, kohhran neih thil leh hausaknaah te an innghat lo va. Pathian hnena an inhlanna thutiam chu rinawm takin an váwng a, Malsawmtu Pathian thilpek chi hrang hrang chu a mal te tein an chhiar pung thiam tawh a. An chhiar ngun poh leh, Amah Pathiana an hausakzia an hmu chhuak zual zel a. Lei kohhrana thilpek an hlan hi hmangaihtu Pathian chawimawi nan A hnena an pek let sumpai a nihzia an changfiah thar zel thin a ni.

Mihring leh sum inkungkaih dan hi kawng hnihin a chhui theih:
(1)    Kan thawh chhuah sum leh pai Pathian zara kan neih hi kan sum (keimahni sum) a tih theih a. Heng kan sum neihte pawh hi Pathianin talen min kawl lawktir a ni a. Lalpa malsawmna kan dawn sum leh pai te chu rinawm takin kan vawnghim ang a, kan peipung zel tur a ni. Heng sum atang hian Pathian min phut sawma pakhat (1/10) te, inkhawm thilpek leh thilpek dang chi hrang hrang kohhranin a ruahman te leh mimal leh chhungkaw hminga thilpek rawngbawlna te chu kan pe thin a.

(2) Chutia Pathian hnena thilpek a kohhran thianghlima kan pek/thawh tlingkhawm chu kohhran sum Pathian ta a ni. Pathian a thianghlim angin a kohhran leh a sum pawh hi a thianghlim a ni. Tichuan Kohhran sum chu enge tih leh eng atana hman nge a nih tih hi hetiang hian a thliar sin leh theih a: (TT 4:32-37;6:2-4)

(a) Kohhran sum chu mipuite hnen atanga thilpek chi hrang hrang leh sawma pakhat tling khawm,
(b) Kohhran sum chu Lalpa kohhran thianghlima ringtute inpumkhatzia leh inhmangaihzia lantirtu;
(c) Kohhran sum chu ringtu mimal tinte rinna rah,
(d) Kohhran sum chu Krista nunpuitute nunna par,
(e) Kohhran sum chu rethei, fahrah leh hmeithaiten Pathian hmangaihna a taka an chànfiahna nun kawng,
(f) Kohhran sum chu suala phuarte phelhna hmanrua,
(g) Kohhran sum chu Krista kohhranin malsawmtu Pathian ropui nan leh ram zau nana a hman thin hi a ni.

3. Sum kohhran
Amaherawh chu, sum hi kohhran ze dik leh a din chhan khuh bo nan ringtuten tanghmasial takin kan leklâm nasa hle ta mai. Khawvel hi hriatna lamah hmasawnna pialral tih theih hialin a changkang chak em em a. He hriatna khawvela ngaihdan leh thlir dan thar tlânglâwn tak hringfate rilru súkthlék tuamtu chu, “khawvel huap zo dikna tluantling a awm lo, ngaihdan leh zirtir dan dik ber a awm hran lo va, chuvangin, mimal emaw pawl emawin dik leh tha a tih chu a dik ber a, a tha ber a ni mai” tih hi a ni a. He ngaihdan hian zei takin kohhran chhungah bu a lo khuar nghet hle tawh a. Chú chúan kohhran zia a tidanglam a, rawngbawltute leh thawktu dangte pawh a nghawng ta vek a. Tichuan, kohhran chu sum kohhran, Pastor pawh sum Pastor tih kan lo ni zo dawn ta. He dinhmun hi Dr. Ngurliana’n heti hian chiang takin a tar lang:

“Tunlai Myanmar-a Kohhran hruaitute pawh hian Company Director, Boss emaw an inti tawh hlawm a. Dictatorship an duh deuh vek a. An duhzawng khung leng turin Kohhran Dan an pàwt fân a, an duh loh zâwng dángbèt turin dan an phuah belh a. Ri an kham a, An ngaihdan tawmpui lo chu mi sualah an chhuah a. Mi dik an lâng a, dik lo an tlatlum a. Dawtin an rel chhia a. Kohhran zahna pawh nei vak tawh lovin, economic rilru, sumdawng rilru an pû a. Kohhran thil lei leh hralhah an buai a.” Sum lèma thian siam dan dik lo hian kohhran misawn kalhmang dik a tihpian sual dan Dr. Ngurliana’n heti hian a sawi chhunzawm. “…sum leh pai chaknain kohhran thar an din a. Member kan lei a ni ber tawh a. Kohhran phun…chu ring lotute ringtua siama, an zinga Kohhran phun a ni thin a. tunah erawh chuan “kohhran pakhat atangin Kohhran Thar danga inruah tawnna a ni tawh mai a.’..Nebukanezara ang maiin, an duh duh chawisang thei a, an duh duh tihniam thei hialin an inhre tan tawh hlawm niin a lang a. Kohhranah lamtang an siam a. Mi dik an chak chuang lova, a dik lo an chak fo. A dik lo tih hre reng mah se, tlem azawng azar zo theih a nih dawn chuan, a dik lo lama tan mai pawisa tawh lo kan pung tawlh tawlh a.” tiin. (Globalization & Zofate, Op.Cit., pp.55,56)

Pathian hnena kan pek kohhrana kan thawh sum leh pai, buh leh bal, ran, arva leh thlai rah leh thlai hnah zawng zawngte hi malsawmtu Pathian ropui nan, a hming thianghlim chawimawi nan kan hmang tak meuh em le? Chhungkua leh mimal tinten Pathian zara kan thawh chhuah sum leh pai hmang hian Lalpa kan chawimawi em? Lal Isuan sum ngah hi mihring dam chhan a ni lo a tiha ‘sum ngah’ awmzia hi mahni chhungkaw nun theuhvah kan seng luh thiam a pawimawh hle.

Heti hian sawi ta ila. T.V. leh VCD, DVD, chhuahna khawl neih te, Internet khawvel (se lo ltk khawvel, entirnan email, facebook adt…)a zinkual te hi sual a ni lo; mahse Kohhran thiltih leh Pathian biak inkhawm tlai phah nan, thulh phah nan, inkhawm chhung rei lo teah Pathian lama thinlung pe lova, inkhawm ban veleha en/tih chhunzawm tur lama suangtuahna lo neih vung chiam te, kum la tling lo fanaute leh kum tling tawh pawh nise ringtute ena tha hauh lo sual hmahruai lemchan en te, fanau zirlaite zirna tibahlah zawnga ennawm zuna uaitir te, Lemchan DVD, VCD phek lei leh en nan sum leh hun tam tak seng thin a, Lalpa leh a kohhran tan thilpek leh hun pek lama insûm ral thiam lawi si te hi sum lema mahni hmelma insiamtute an ni. Lal Isuan, “ mahni tana sum khawl a, Pathian lama ngah si lo” (Lk 12:21) a tihte hi an ni.
Sum kohhran huang chhungah chuan a hnuaia mite hi an khawsa thin:
(1)    Kohhrana mahni (mimal leh chhungkaw) thilpek zat, rilru chhungrila chapopui nana chhinchhiah khiau va, a khât tawk hun remchang apianga mite hnena sawi chhuah fo nuam titute Pathian kohhran tana mipui thawh sum tlingkhawm chu ren hauh lova ‘thilthlawnpek hman hiau hiau’ ching, hruaitu riltam reng leh kohhran hminga thiltih leh audit nikhuaah kohhran sum chu audit senso tur zat aia tam chu mit, beng leh hrawk tihtlai nana hmangtute Kohhran pakhat chuan audit leh kohhran hminga thiltih nikhuaah kohhran sum hi Zuk leh Hmuam’ (zial, kuhva, khaini, tuibur, kunpawng, sahdah,vaihlo etc…) lei nan hman an khap a. Sum endik hunah vei lamah zial var, ding lamah pen, ka chhungah kuhva, leh chaw dawrah Bear and chaw, chutianga “thí leh khu leh sakei (Tiger)” kawpkep thiamte hian mahni intodelh ta ila. Zuk-hmuam-thial leh Bear lei nana kohhran sum kan hmang thin hi “I sumin Lalpa chawimawi rawh” tih nen a inpersan viau mai.
(2)    Pathian kohhran sum ren thiam tak, rethei tanpuina leh membar insuihkhawmna atana hman pawimawhah pawh kohhran hmakhaw ngai ber ni awm taka sum hman chhuah phal meuh lo, mahni kuta kohhran sum tam fe kawla chhungkaw mamawh atana peipung thiam sum kawltute.
(3)    Pathian kohhrana pe duh si lo, khawimaw hmunah, tu emaw hnenah Pathian min phut sawma pakhat sem zai thiam; a hming maia kohhran bela mahni ngaihdan chauh dik bera ngai, kohhran hriatpui lem loh eng pawl pawl emawa che tha tak, mahse kohhran chak lohna chauh pir chhuak thiam te,
(4)    Kum tir sum lut/chhuak ruahmannaa tel lo, loh theih lohva kohhran mamawh ni chuang si lo, mimal invaivung nana kohhran sum mahni duh tawk tawka hman tum, hruaitu thuduh takte,                                    (5)    Kohhran sum kawl hi mahni ngaihdan vai luh theih nan thuneihna anga hmang a, sum hmanna tura kohhran rorelna hrûlah mahni kut zungchal lo vilik a, mite rilru tihliamtute;
(6)    Kohhran mamawh thiltih nikhuaah mohphu (thingpui man) hmuh theihna kawng lo dap ru khiautute,        (7)    Kan thawh a, kan thawk bawk a, kan ei tur alawm tiin kohhran sum chu tlang suma ngaitu; kohhran mipui, pawl emaw dipatmen membar zawng zawng huap lem loh, a kawmiti bila invoh bikna kawng daptute,    (8)    Hnatlanga zawh mai theih thilah pawh hlawhfa inrawihtirna kawng zawng thiam tak, thawh hlawk si lote,
(9)    Hnatlan nikhuaah a ei hun nang tawk chauhva thahnemngaitute,
(10) Zuk-hmuam-thial, chawdangral leh ennawm en nana sum hman ren hauh lo, Pathian leh a kohhran rawngbawlna 1/10, inkhawm thilpek, misawn sum ilo pek kawnga uikawmte

    Sum hi tanghmasial taka hlimpui a, buaipui thintu chuan a tawpah a tahpui a, a thihpui thin.

( Modified- Zawlbuk leh Biakin 2010)

EVANGELIST & PASTOR

2011-11-17T10:04:00.001+08:00

Editorial

Ramthumna thleng hmasa tawh, a bik takin US lama thian thenkhatte hian hun an hai chawk ni tur a ni, zing tawkah phone-a mi kaihthawh an ching a, meng phel phawk, phak deuh chuala biak an tul fo thin. Hetiang an chin avang hian ka dem a ni hauh lo. An hun remchang chuhin min rawn bia a ni ve mai. Keini a kar min la rawn be duh ve hi lawm zawk tur a ni ang.
    Tukkhat chu North Carolina atangin thian pakhat hian min rawn bia a, an veng chu khawvela Evangelist ropui Billy-Graham-te veng a nih thu leh amah Billy-Graham-a pawh upa lam a ni tawh a, a chak tawh loh thute min rawn hrilh ve luam a. A hmun la thleng ve lo nafam chu ngaisang awm takin “A nih tak chu maw le” ka han ti thla ve ngawt a.

Evangelist:      : He mi tuka ka thianpain Billy-Gramham chanchin tlem a han sawi, ‘ Evangelist ropui’ tihte hian thu tam tak min ngaihtuahtir ta a. Evangelist tih chu Pathian thu hrila zin vel mi tihna a ni. Pawl bik emaw kohhran bik emaw an thlir tur a ni lo. Mi tute hnenah pawh zalen takin Pathian thu an hril mai thin, tihte min hriatchhuahtir a. Hei vang hi a ni ngei ang “Pastor emaw Reverend emaw ti lo va, Evangelist ropui” tih a ni ngat zel hi, ka ti a. Sawi mai aiin a lo ropui tak zet a ni.

Pastor:    : Pastor emaw Reverend kan tihte erawh hi chu kohhran enkawltu leh hruaitu an ni a, member bik an nei thin. Puithiam hna thawkin serh leh sang khawihtu an ni bawk.
    Tunlai hian Evangelist leh puithiam hna thawktu Pastor-te hi kan ngaihfin zo ta emaw ni. Sawi tlawr thiam deuhten Krista tlannaah chuan mi tute pawh Puithiam hna thawktu kan ni e, lo ti ve bui bui tawk lah bo lo.
    A thuhrimin lehkha zir san vak pawh ngai lo hian a hming a dang angin a tum leh a hna pawh a dang tih hi hriat ve bawk tur a ni. Evan. an nih chuan mi tumah thliar lovin Pathian thu an hrilh tur a ni a. Chu chu Lalpa kohna leh a hming Evangelist tihin a tum chu a ni. Kohhran tikeh zawng te, pawl inthen zawngte inpumkhatna tichhe zawngin Pathian thu an hmang tur a ni lo. Chutiang tihching an nih chuan Evan. suak an ni ngei ang. Pathian thu chu remna a ni a, remna thu kengtu chuan remna a siam tur a ni dawn lawm ni!
    Mi tam tak chuan Pastor hi Evangelist tluka Pathian thu sawi duah hluah turah kan ngai chawk. A ni lo chu kan tihauh lo. Mahse kohhran inawpna hnuaiah member (mipui) enkawltu leh hruaitu a ni, kan tih tawh kha! Setana hian ringlo mite ringtua kan siam hi chu pawi a ti vak lo. Ringtu kohhran zingah inthenna/ inrem lohna hmangin min bei thin. Chutiang hunah chuan Pastor chu themtleng te zawk ang maiin a hman hlel tur a ni a, inpumkhatna leh inremna zawngtu tur a ni.
    Malaysia ramah Mizo tlemte chauh kan awm a, inrema inpumkhat dial dial tak a ruanga min fuihpawrh a, min tithen a, hmelma ang maia mahni leh mahni min indotirtu hi tunge ni ang? Setana hian kei ka ni lo, Evangelist leh Pastor-hote an ni, ti ta se la!!!!!!!!

Miss World 2011

2011-11-15T15:21:00.000+08:00

Miss World 2011
    Nov. 6 sunday zan khan Earl Court Two, England khawpui London-ah Miss World Vawi 61 thlanna chu ropui taka neih a ni a, khawvel ram hrang hrang atangin nula hmel tha leh piannalh, zei leh tuak tak tak an inthehkual siau siau mai. Zorock-a hla ang maiin “I taifen mawi leh kawngbawr nalh kha, ka thlir ka thlir ning thei lo” tih awl tak tur a ni. Mi 120 vel tel thei tura beisei nimahse visa leh harsatna neuh neuh avangin mi 113 chauh an tel thei a ni.
    Tehna chi hrang hrang hmanga endik a, zawhna khirh tak takte pawh chhan fel vek a nih hnuah Miss Venezuala Ivian Sarcos kum 22 mi chu Miss World 2011 thlantlin a ni ta. Miss Venezuala hian ni kuma thlan Miss Alexandria Mills,United State chu a thlak dawn ta a ni.
Miss thlante:
    Miss World 2011- Ivian Sarcos, Venezuala ( 5 ft 11 in)
    1St Runner up - Gwendoline Gaelle Sandrine Ruais, Philippines ( 6 ft)
    2 nd Runner up- Amanda Victoria Vilanova Perez, Puerto Rico ( 5 ft 8 in)
    Kumin Miss World hi kum 8 mi a nih atangin a nu leh paten an boralsan a, a nun beidawn thlak tak avang chuan hmeichhe puithiamahte tan tumin kum 5 lai a lo inzir ve hial tawh thin a ni. Tuna hetianga Miss World hial a lo ni thei hi Pathian vang a ni, a ti a, kum khat chhung chu khawvel hmun hrang hrang tlawhin mite tanpui hna a thawk dawn a ni.

Lawrkhawm

2011-11-15T14:48:00.000+08:00

Pu Aung San-a Thlalak Zuar
    A thihna pawh kum 60 chuang a ni ta, sipai sawrkarin kum 20 chung ram a awp lai khan Pu Aung Sana thlalak reng reng hmuh tur a awm mang lo a nih kha.

    Tunlai hian Yangon khawpui mipui punkhawm tamne leh kawng lun laiah chuan Pu Aung Sana leh Pi Suu Kyi-te thlalak zuartuten sum an la lut nasa hle niin an sawi.
    Kum tam tak liam tawh mahse, Mipui rilru leh thinlungah Pu Aung San-a hian hmun a lo la luah hle tih a hriat theih a ni. Ram hruaitu hlui Pu Nay Win leh Pu Than Shwe-a te, Pu Saw Maung leh Pu Khin Nyut-ate thlalak hi tunge lei duh awm ang.     Ram leh hnam hmangaih tak taktute chu thi tawh mahse kan thinlungah hian an nung reng dawn a ni.

UN General Secretary Asia-ah zin dawn
    General Secretary lian Ban Ki-moon chu Nov. ni 12 atanga Nov. ni 20 thlengin khawchhak ram fangin a zin dawn a, Thailand, Banladesh leh Indonesia -te a tlawh dawn a ni.
    Heng ram pathuma hmeichhia leh naupangte hriselna chungchanga hmasawn dante a enkual ang.
    Indonesia, Bali thliarkara United Nations and the Association of Southeast Asian Nations meeting a hman hnuin Nov. 20-ah New York-ah a kir leh dawn a ni. Bali thliarkara Asia hruaitute nan an inhmuhkhawmna hmunah hian Myanmar ram President Thei Sein-a nen pawh an inhmuh ngei beisei a ni.

Malaysia Proton Company Dollar Maktaduai 44 sengin Kawlramah din dawn
    Malaysia Proton Motor Company chuan US dollar maktaduai 44 sengin Kawlramah motor siam chhuahna kawlpui bun an tum thu company palai U Kyaw Nain chuan Nov. 2, khan a sawi. Asian ramah Malaysia Proton Motor Company hi mimal motor siam chhuaktu awm chhun a ni a, Misubishi leh Lotus ( England) company thiamna hmangin an siam chhuak thin a ni.
    Khawvel ram hrang hrangah an motor siam hi maktaduai khat aia tam an thawn chhuak tawh a, kawlramah motor siamna khawl an bun zawh theih chuan motor pakhatah cheng nuai 120 velin an zuar thei dawn a, company din tur hian sawrkarah pawh dilna theh luh mek a ni a, tun thla chhung hian an sawiho leh dawn a ni.

INCHAWIMAWI THIAM

2011-11-15T14:40:00.000+08:00

INCHAWIMAWI THIAM
Mizote hi kan pi leh pute atang khan inchawimawi thiam tak an lo ni. Mi fel te, mi tha te, mi taima te, chhiat ni that niah te, val-upaten an thinlung phekah an lo chhinchhiah thlap thin. An hunpui, Kutni vangthla a lo then meuh chuan heng mi hming thate hian chawimawina Nopui an dawm hma chuan tuman zu no an dawm thei lo a ni. Amaherawhchu, an tlawmngaihna te, an taihmakna te leh an huaisenna zawng zawng te kha lawmman hmuh beisei vanga ti erawh an ni hauh lo. Hei tak hi chawimawi an phuna leh a hlutna tak pawh niin a lang.
Inchawimawi hi a tha kan tih rual hian, a kawng dik lo erawh a awm tih kan hriat tel ve a tul ang. Chawimawina hi a phu lovin an dawn chuan kha chawimawina hlutna kha a nep zo vek thin. Nopui pawh kha a phu ve lovin dawm ta sela, lawmpui aiin nuihzatna leh ngaihnepna a awmtir thei ang. Sipai chawimawina ropui tak dawngtu Marchal Lefever-a pawh hi a thianpa chuan vannei a ti a, a fak chiam mai a. Lefever-a chuan, “ Pen 30-a hlaah sawn va ding la, vawi 20 silaiin ka han kap che’nga, i thih loh chuan ka lawmman hi a vaiin i dawng dawn nia. Kei chu hei aia hnaiah hian vawi sangkhat zet min kap a ni.” tiin a chhang a. Nobel Peace Prize dawngtu Mother Teresa-i pawh hi a nun kawng zawh ve tur hian mi tam tak chuan kan tlin lo a ni. Heng chawimawina dawngtute rilru-ah chuan, “I tihtur chu lawmman hmuh beisei vang mai ni lovin, a dik avang zawkin tih tum rawh,” tih hi a bei nghet tlat a ni. Chawimawina hi a phu lovin an dawn chuan chaponain a zui ve nghal vat thin.
Zofate zingah pawh chawimawina sang dawng thei kan nei nual ta. Kan lawmpui a, kan ngaihsan thiam pawh a tul ang. Inkhel mi te, lehkhathiam te, mahni hnathawh kawnga hlawhtling te, thu leh hla thiam te, ect.. kan chawimawi thiam zel pawh a pawimawh ang. William Shakespear-a hi an ram, an sawrkarin a chawimawi thiam avangin khawvel huapin amah mai nilovin, English-in khawvel ngaihsan a hlawh phah a ni tih kan hria. Ram changkangah chuan chawimawi tlakte hi elrelna leh itsikna rilru a tel ve ngai lo. Khawvelin tunge a nih an hriat phah thin. Zofate pawh hi talent nei tha tak kan ni a, khawvel tuverhah kan dak chhuak mek a, tun aia nasa zawkin mahni zawn theuhah tan la ila, ram leh hnam chawimawi tlakin i han bei zel teh ang u.
( Feb. Thu leh Hla; 2009)

Man Tawh Palha Hmachhawn Dan Tur

2011-11-13T13:13:00.001+08:00

MRO HUANG

November 5, 2011 a NGO pawl pakhat, Lawyer of Liberty (Ukil pawl)chuan Refugee-ten man kan tawh palh huna kan tihdan tur hetiang hian thuchhuah an siam.

1. Kalkawngah police nen in inhmachhawn tawh a nih chuan tlanchhe duh kher suh ! IC (identity card) an dil che a ni mai thei, i UN card emaw, community card emaw i neih neih kha hmuh mai la. I thiam ang tawka tawngkam thlum leh mawiin hawihhawm takin bia ang che. Police-in an zawt hmasa che a nih lo chuan UNHCR card i la neih loh thu sawi duh kher suh.

2. Man i tawk a nih chuan refugee i nih thu chiang takin hrilh la, i chanchin (Hming, pianni, etc.) UN- ah record vek a nih tawh thu hrilh bawk rawh . Chutia i hrilhfiah chung pawha police quarter-ah an hruai che a nih chuan a mantu police hming, a theih chuan a number leh khawi hmunah nge an hruai che tih mahni community hruaitute hnenah phone in emaw, sms in emaw hriattir ang che.
    Heng hi hriat a pawimawh ang
Mahni hming:
UN/ Community Car number
Khawi hmunah nge an man che:
A hun leh a hmun:
Engvang nge an man che:
Khawi hmunah nge an hruai che ( Lung in hming)
Lung in Body Number:
    Heng hi kan sawi theih loh chuan inzawn chhuah theih a ni lo tih kan hriat a tha ang.

3. In chenna inah oparasi an rawn lut a nih chuan refugee in nih thu tha takin lo hrilh fiah la. Tin, sawrkar mi dik tak (oparasi) an ni nge ni lo zawh fiah theihna right i neih ang ngeiin tha takin lo zawt ang che. A chhan chu misualin lem an chan thin avangin fimkhur a ngai hle. Sawrkhar mi an nih chuan mihring chauh man theihna right an nei a, in thil neih erawh lak sak theihna dan an nei lo.

4. UN card nei tawh i ni a, police station-ah emaw, camp ah emaw an hruai che a nih chuan thuneitu hnenah rorelna court-a i chungthu rel turin dil ang che. Court-ah chuan refugee i nih thu fiah takin sawi la, engvanga refugee ni nge i nih kimchang takin sawi ang che. I case i sawi theih chuan a tha hle bawk. Malaysia-ah hna thawk tura lo kal i nih lohzia te, i rama kir leh chu i nunna atan a derthawnzia leh hlauhawm a nihzia hrilh la. Rorelnaah i chungthu an ngaihtuah hmain UNHCR nen inbiak phalsak tur chein i dil thei tih hria ang che. Tanina dah i nih hmain i tanna chhan leh vang (reason) malay tawngin      chhiar chhuah thin a ni a, tawng i hriat loh chuan tawng lettu i mamawh thu sawi   ang che. An thu sawi/chhiar zawng zawng hrethiam si lovin “AW” emaw     “Lubu” in emaw i lantir a tih chuan an thu sawi zawng zawng dik ti, pawmpui tih a kawk a. Chutianga ti tawh ten an hriat lohna avangin rei tak lung inah an lo tan phah tawh thin. Fimkhur a tul hle.

    Hriattur Pawimawh
-    Sunday-ah emaw public holiday ah emaw UN office atang phone kan dawnin mi thenkhat chuan mak kan ti a, awi harsa kan ti thin a; fiamthu emaw te pawh kan ti fo thin. Mahse, thisen check tur emaw, thlawk chhuak tura hriattir emaw, hridanna (vaccine) inchiu turin emaw Sunday leh public holiday-ah phone kan dawng a ni thei. A hnuaia tarlan phone number an nih phawt chuan fiamthu satliah mai ni lovin IOM atang a ni, tih kan hriat a tha ang.
Contact Nuber:
03-92355430
03-92355422
03-21442043

Co-ordinator (source: Authawng)

MCF Huang

2011-11-13T13:03:00.001+08:00

November Meeting:
    Nov. 6, Sunday chawhnu dar 1:00 khan MCF Regular EC Meeting a ni a, rawngbawltu nen member mi 20 an kal. Meeting hi MCF Vice chairman Pu Ngursaithuama’n a kaihruai. Hunserh hman a nih hnuin October thla chhunga rawngbawl dan chi hrang hrang MCF Secretary, Auditor, Pastor, MRO Co-ordinator leh Literature Secretary hnen atangin report a ni.
    Rawngbawl dan leh sum report atangin kohhran upa-te an lawm tlang a, rawngbawl zel dan tur chi hrang hrang pawh hetiang hian rel tluk a ni.

1. Naupang Camping:     December thla chhungin Naupang puala Camping neih tur a ni a, Pastor-in a huaihawt ang. Tul leh pawimawh tinreng tawlrel turin Camping Organizing Committee din a ni bawk. Naupangte hian Pathian thu ril leh thuk pui pui hre thiam hrih dawn lo mahse, Pathian hmangaihna leh khawngaihna chanchin erawh kan hrih nawn fo an tul a, naupan lai atanga Pathian thuin a hneh tawhte chu puitlin hunah pawh an ngaihtuahawm tawh ngai lo.
    Thu mai bakah hla hmang te, infiamna leh innel tawnna chi hrang hrang pawh buatsaih a ni ang. Ei leh in tul mamawh zawng zawng kohhranin a tum vek dawn avangin mimal thawh theite hnen atang pawhin kut kan dawh nghal e. Tun tum Campingah hian Nu leh pa-ten kan fate i kaltir ngam ang u. Nu leh pa zui ve duh tan pawh zui theih a ni ang. Naupangte hmang hian kohhranin thlarau malsawmna thar kan dawng ngeiin kan ring a ni.
        Ahmun : Batu Untung ( Hmun fianrial tha tak a ni)
        A hun   : December 13-16 ( Nithum chhung)

Christmas Picnic:
      Hlimna ni ropui chu a eng,
     Zantiang hi kawlrawnah a liam;
December thla a lo thlen tawh hi chuan Christmas leh a kaihhnawih thil velah kan hmanhlel zo tawh a, chuvangin kan programme reng reng pawh hi Christmas lam hawi a ni lo thei lo.
    MCF chuan tihdanphung kan lo neih tawhte zingah Christmas Picnic hi kan hlimpui ber thin a, kan sawi tak Hlimna ni ropui a nih vang a ni ngei ang.
    A hun : December ni 10 (Inrin)
    A hmun: Port Dickson
Kumina kan Picnic-na tur Port Dickson hi kum 3,4 kan lo kal tawhna hmun a ni a, thalai tam takin ‘hmun dang ni ve tawh se’, an tih pawh kohhran rorelna chuan a hai lo. Mahse rorelna reng reng chu a tam zawk duhdana thu tihthluk thin a ni a, chuvang chuan mipui tam zawk kal phak chin, senso ziaawm si, chhungkaw member tam deuhte tan pawh hautak lo tur ngaihtuahin a hmun ngai hi meeting kal a chanve aia tamin vote tihthluk a ni ta a ni.

    A hmun chungchangah hian phunnawi lo hram ila, tun atang hian kan hna off dan turte ruahman lawkin, hlim takin Christmas Picnic kan kal leh theuh dawn nia.

Kum 2012 Hruaitu Inthlanna:
    December ni 11, Sunday inkhawmah Public Meeting neih a ni dawn a, he mi ni hian kum 2012 MCF hruaitu turte thlan an ni ang. Inthlan danah hian mipuiin EC member thlan phawt a, chung kan thlante chuan OB an inthlang leh dawn a ni.
    MCF-ah hruaitu tha tak tak kan neih theih nan, mipui lam pawh rilru leh ngaihtuahna fim tak hman tum ila, Pathian hnenah tawngtaiin i dil bawk ang u.

Music Vs Key-boar Thar:
    Kohhran inkhawmah hian Music tel ta lo se, inkhawm boruak a dang daih ngei ang. Kan inkhawm hian hlim tak leh nuam ti taka Pathian fak kan chak a, sermon nung tak hmanga kan thlarau nun chawm kan mamawh bawk.

    Pathian malsawmna dawngin kawng chi hrang hrangah hma kan sawn kan tih rual hian Music a bik takin Key-Board tumtu kan nei lo leh tlat thin hi, beidawnthlak tak a ni. MCF member zingah Key-Board tum thiam an awm loh vang em ni?
    Tuna kan kal danah hi chuan Tv. Mahrila’n a tum hman loh chuan Key-Board tumte kan nei lo a, inkhawm boruak a danglam phah thin. Solo tura kan ruatte an lo kal a, music tum saktu an nei lo. Mipui zai hruaitu tur lah chuti bawk. Eng kan ti zo ta nge?

Hetiang hian kan Ngaituah: Tuna kan Key-Boar hman mek hi Roland a ni a, keini ho Tahan leh a chheh vela kan hman thin chu YAMAHA a ni si a, chuvang a ni. YAMAHA lei ila, thalai zingah Key-Board tum hian an awm teuh a lawm, tih chu kan thu vuakthluk a ni ta.

Key-Board Thar chu:   Kan Key-Board ROLAND hi Methodist kohhran min lei sak a ni a, kan leina dawrah thleng dil ila, cheng pawh a tul dan anga pek belh ni se, kan ti a. Chumi chungchangah chuan Pastor leh Tv. Mahrila mawhphurhna pek an ni. Amaherawhchu chutianga thleng theih a nih tak loh avangin leh kan duh ang YAMAHA pawh Company a tawp tawh avangin a tlukpui KORG PA 50 SD cheng 2,648 man chu kan lei ta zawk a ni.

Key-Board Tumtu:   Kan sawi tawh angin inkhawm boruak tinung a, mipui zai min hruai turin mi tupawh Krista hmingin kan sawm che u a ni. A bik takin Key-Board chungchangah chuan Tv. Mahrila hi kohhran chuan kan pa pek deuh a, ani pawh hnathawk ve bawk a nih avangin hman loh chang a nei thin a, chutiang hunah chuan tumah inthlahrung lovin Lalpa zara kan ta vek a ni, tih hi kan sawi nawn mawlh mawlh a ni.

Pastor Quarter chungchang:
    Tunhma deuh kha chuan Quarter chungchang hi committee apiangin kan sawi hnawk chiam thin a, a chhan ber pawh a neitu kan tam em vang a ni mai thei. Pastor Quarter chu a thianghlimin a zahawm tur a ni a, tin, a nelawm tur a ni bawk. Mi tupawh ngaihngam tak leh tlangnel takin an lut chhuak thiang a, amaherawhchu kohhran leh a enkawltute dan siam kan zawm tur a ni thung.
    Mizo thuziak thiam Vanneihtluanga chuan “ Pator Quarter’ tih chhinchhiahna intarna in nuam leh nalh tak takah ka lut tam ve ta fe a. KL-a Mizo Pastor Quarter tluka ‘beramte’ tlangnelna in hi kei chuan ka la hmu lo. A luahtu ber hi tu nge ni ang aw... tih vang vang ngai khawpin in inti-neitu vek mai! a ti a nih kha ! (Kan Lenna Vangkhua)

    Kan sawi tum tak kan sawi hman leh dawn pek lo! Thlalaka kan hmuh ang hian in pui lam atanga choka panna kawng tluanin lungphek mam (Tile) kan phah tluan ta dup mai. Chu mai a ni nem, choka leh ek in thlengin maw le!
    Kan member zingah hetiang lam thawk thiam Pu Riliana leh Pu Badura kan nei hian senso an tiziaawm bakah mahni ta ang taka an cheibawl avangin kohhran tan malsawmna ropui tak a ni. Anni pahnih hian chakkhai mamawh engkim an intodelh char char a, ni nga chhung tehmeuh an thawk a ni. Anni puibawm tur hian Tv. Manuna a duty reng bawk a, ani pawh hian hmabak thawh chhunzawm tur a ngah mai le! Pathianin rem a tihchuan hmeichhe room kan tih mai thin pawh kha Aircon vuah leh tur a ni a, chutah chuan tawngtai inkhawm leh Meeting te nau chu kan thu thin tawh dawn a ni.
    Kohhran kan lo lian zel angin, tul leh pawimawh pawh a tam ve zel a nih ber mai hi!

MI RINAWMTE HLAWHTLINN

2011-11-07T12:48:00.001+08:00

                        Rev. Laichungnunga,Kanan


    Hlawhtlinna chu hausak thur thur emaw, nuamsakna emaw a ni mai lo va, mi a hnathawh kawngah rinawm taka a thawh chuan hlawhtlinna kawng khat tal a nei thin a. Rinawmna tel lo chuan hlawhtlinna kawng a zawh theih loh va. Chuvangin mi rinawmte an hlawhtling thin. Rinawmna chu hlawhtlinna rahbi a ni.
    Kan khawvel hian thangtharte hun tharah a hlangkai mek a. IEC (Information, Education, Communication) hmasawnna chuan kawng engkimah mi thiam filawr nih a pawimawh chho zel a. ‘Survival of the Fittest’ khawvel a ni kumkhua dawn a ang hle. Khawvel changkang zel chuan culture tam tak a cho chhuak a, nun dan a danglam chho hret hret bawk a. Khawvel tukverh chauh atanga thlir chuan khawvelah hian himna tak tak (security) a awm ngai dawnin a lang lo. Ngaihruat khawvel hi a awm ngai a nih chuan chu khawvelah chuan a awm mial mahna le!
    Khawvel Indopui II-na chu Hiroshima-ah tawp mah se, ram leh ram inphiarrukna tenawm leh tihbaiawm Cold War a hring chhuak tih chu tu’n kan hai lo. Rikrum thila Nuclear ralthuam hawl chhuah ve tur neih loh hlauvin khawvel ram tam takte hi an inpuahchah mup mup reng a nih hi. Heng vang hian a ni teh pheng ang chu nunphung hrim hrim leh lemchan nun ninga rilru hel an tam em em hi ni!! Nunphung pangngai ninga helna rilru atanga chhuak, hriatna leh ngaihtuahna hruai thei ‘Psychedelic Music’ hmanga thalaite nun hruai khawlo thei nia hriat tam tak a lo chhuak tawh a. Kum 1969 vela ‘three days of love, Sex Rock’ tih thupui hmanga America thalai sang tamin khawmpui WOOD STOCK FESTIVAL an hman te, WOOD STOCK 11 te, HAPPIE CULTURE te ngei pawh kha nunphung pangngai (hlui) ningho leh nun duh tawk lote ngaihtuah chhuah a ni awm e. Hengte avang hian nunphung pangngai laka rinawmna a thamral a, hlawhtlinna leirem rap thei lovin mi tam takte chu an awm a. Nun duhdahna leh pawisak neih lohna lamah rilru a hruai a. Rev. Dr. Lalsawman, “Experience hla hnaivai, thlawhbaw hla te te kan sa uar a, Pathian fak tak tak hi kan thleng tawk lo deuh a ni lo maw? .... Zai laia awmhmun sawn sek mai, thawmhnaw hak thlak zut mai, a lo entu mita lan mawi tum hawiher insiam vel nen, tu nge a chawimawi chu le aw? Pathian a thleng mawlh dawn em ni? Khawvel mite inlawmna (entertainment) a ni. Khawvel thila pawisa zawnna (Showbis) a ni” a ti.

Chhungkaw tan Thalaite rinawmna:
       Chhungkua chu in pakhata chengho rorelna pakhat hnuaia awm, thu chhia
thu tha relho, hlim tlang leh tuar tlang hlim taka chengho a ni a; sum leh pai lak luh hmun khata chhung, ei leh bar lamah hnar khat ring tlang a, a thlum a al ei za, zem khat zen a ni.” Chu hna ropui tak tihlawhtling tur chuan thalaite kan pawimawh ta a. Thalaite hi chhungkaw tan kan rinawm tlat a tul a ni.

Nu leh pa leh fate inlaichinna (Parent Child Relationship):
       Chhungkua laimu ber chu Nu leh Pate hi an ni. Chhungkuaah hian vanduaina hrang hrangin min tlakbuak thei a. Vanduaina avanga nu leh pa nei tawh lote tan chhungkuaa Thalaite hi chhungkua khaidingtu a ni. Chhungkua hian khaidingtu emaw, mawh latu emaw a awm loh chuan chhungkua a phuisui thei lo. Mahni sum hmuh mahni kawl hrang mai chhungkua kan nih chuan chhungkua a hlim thei lo va, hmasawnna a awm thei lo. Nu leh Pa chawimawi chu Fate mawhphurhna liau liau a ni bawk a.

(1) Thuawihna: Thuawih awmzia chu intukluh, inpekna, zahna (respect), ngaihpawimawh leh thuzawmna te a ni. Fate chunga an thatna leh hmangaihna hi dam chhungin rulh sen rual loh a ni. Chuvangin an thuawih chu kan bat a ni. Thalaite zingah nu leh pate laka hel, ngaihdan hran nei, fing leh changkang zawka inngai tlat kan awm thei bawk a. An lo upat deuh phei chuan mi zingah kan zahpui duh khawp mai bawk a. Nu leh pate thuawih aia pawn lama kan thiante thuawih leh pawisak zawk a awm theih bawk.

(2) Nu leh Pa chawimawi: Pathian thu rawn kher lo pawhin Nu leh Pa chawimawi chu leilung pian hmaa thu dik awmsa a ni. Chawimawi awmzia pawh ka nu leh pate hi an fel, an tha tia fak chiama nun leh thiltiha lantir leh si lo chuan chawimawina a tling lo. Kan chunga an thiltih zawng zawng min enkawlna leh zirtirna, kawng tinrenga lawmna lanchhuahtira, an thu pawisaka zawm, an mamawh leh thil tul ang ang ngaihtuahsaka pek te a tul a. Tawngkam chhuak leh nunchanga lantir tur a ni (Ex. 21:17; Lev. 20:19; Thuf.20:20,30).

(3) Rinawm taka hna thawh: Rinawmna chu hlawhtlinna bul kan ti tawh a. Ram leh hnam changkang apiangin hna an thawk nasa a. Hna thawh nachang hre lo leh thawk thiam lo mi phei chu piansualna chi khat a ni. Mahni intodelha chhungte tihzangkhai zir a tha. Taima, hrehawm kawnga chhel tak, a nachang hriatna (Common sense) neih a tul a. Hna reng reng hi zahthlak a awm lo. Sum leh pai pek leh dawn kawngah pawh rinawm a tul a. Kan rinawm loh chuan miten eng hnaah mah min ring dawn lo. Chuvangin rinawmna chu hlawhtlinna kawng a ni.

(4) Inrelbawlna (Economy): Rinawmna hi zahawmna kungpui a ni. Rinawmna a awm loh chuan inrelbawlna fel a awm thei lo. Sum lak luh aia tam thil neih tumte, dinhmun aia khawsak tihsan tum te hi a tul lo. Nihna aia lan mawi tuma inchei chiam te, mahni hriselna ngaihtuah lova ‘kain a duh’ vang ngawta ei leh bar duham te hian hriselna a khawih pawi thei. Engkimah hian kan phu tawk a awm ve mai. Kan nundan apiang hi Pathian rawngbawlnaah ngai ila. Kan phak tawkah rinawm takin hna thawk ila, malsawmna chuan min um zui ve mai thin.
       “Rinawm leh fel taka awmin,
      Ni tin rawng i bawl ang u.”
Zirlaite tan pawh rinawmna leh taimakna a pawimawh a. Kan thlan tui far fap fap pawh hi khaw lo la awm tura malsawmna toruah a la ni ang. Kan hna thawhna hmunahte, khualzinna hmunahte rinawmna a pawimawh hle. Rinawmna tel lovin hlawhtlinna a awm thei lo ang bawkin chhungkuaah leh khawtlangah khawvel thar a din theih loh.

(5) Nulat tlanval kawnga rinawmna: Thlemna hautak ber chu nulat tlangval kawngah hian a ni. Entawn tur Pathian thuah kan hmu a. Josepha chu Potiphara nupui Zuleika-i lakah a rinawm a. Josepha chu Zuleika-i hian a ngaizawng ta tlat mai a. Mutpui turin a thlem thin a. Vawi khat chu Zuleika-i hian Josepha chu a lal pindanah a hruai lut a. A khum chunga a pathian biak thin lim chu puanin a khuh a. Thil sual tihpui tur chuan a thlem leh ta a. Josepha chuan, “Engtin nge he sual lian tak hi tiin Pathian chungah thil ka tihsual theih ang?” tiin a hnial ngam a (Gen. 39:9).
       Juleika-i hian Josepha chu thlem leh vau fawmkemin sual tihpui turin thlem chiam mah se, a pu Potiphara leh Pathian lakah rinawmna a vawng reng a, a kawrfual a man beh chung pawhin, a kawrfual chu a hnutchhiah ngam a, Jail run thim a dai phah ta hial a nih kha!
       Nula tlangvalte hian ngaihzawng neih tur a ni a, ngaihzawng nei thei lo ka nih chuan mi a nih leh mihring dinhmun pha lo kan ni ang. Ngaihzawng nei hi sual a ni lo. Kan hmangaihte chungah rinawmna a pawimawh a. Nupui pasal inzawn chungchangah fimkhur a tul a. Thisen entir hmasak a, thisen thianghlimte chauhvin inneihna buatsaih tur a ni. Doctor-te pan hmasa rawh.

(6) Pathian tana rinawmna: Josepha chuan rinawmna a vawng reng a, chawimawina leh malsawmnain a um zui nghal. Pathian tana rinawmna chu engtin nge? Kan chenpuite leh kan mihringpuite laka rinawm hi Pathian tana rinawmna a ni. Rinawmna chuan hmangaihna a keng tel nghal a. Mother Teresa chuan, “Mi retheite hian i chhang an mamawh lova, i hmangaihna an mamawh zawk. Saruakte hian i puan an mamawh lo va, mihring zahawmna humhimsak an mamawh zawk” a ti a.
Sumdawnna kawngahte, thawhhona kawngahte, khawtlang tan leh ram leh hnam tan rinawm a pawimawh hle a. Kohhrana rawng kan bawlna kawngahte rinawmna tel lo chuan a hlawhtlin theih loh. Chuvangin, hlawhtlinna lamtluang zawh a, leirem rapin leilung fate tana pawimawh tak chu rinawmna lungphum hi a ni.

UN RUAHTHAMLOH THU THAR

2011-11-06T18:31:00.001+08:00

UN Thar
    November 4, zirtawp 2011 khan UN lama thuneitute sawmna angin Community hrang hrang hruaitu mi 100 chuang kalkhawm chuan Chinese Assambly Hall-ah meeting neih a ni a, MRO atangin Co-ordinator, MCF Secretary leh Hmeichhe aiawh Nl. Daisy-te an tel ve a, chhun dar atanga tanin dar 3:45-ah sawihona tihtawp a ni.
    He meeting-ah hian Malaysia rama UN hotu lu ber Alance-a’n thu pawimah tak tak a sawi a, chungte chu:

1. Sep 30, 2011 thleng khan UNHCR register tawh zat (asylum-seeker and refugee) mi 94,846 an ni a, mi 10,000 vel la register lova hriat a ni.

2. Heng asylum-seeker leh refugee-te hi Myanmar, Srilanka, Somalia, Irag leh Afghanistan ram mite niin 100 a 92 chu Myanmar mi an ni.

3. Tuna UNHCR leh Sawrkar inbiaknaah UN mi leh sate chu Malaysia sawrkar thuneitu ten man tawh loh nise, an ti.

4. UN chuan a mite humhim nan leh dan ang thlapa hna an thawh theihna turin sawrkar ruahman anga kutnem programme hi tha tih a ni.
5. UN miten Kut kan nem a nih chuan kan hming leh kan chanchin zawng zawng chu khawiah mah put chhuak lo tura thup tlat ( confidential) a nih tur thu Malaysia sawrkar chuan a sawi.

6. UNHCR chuan a ma mi leh sa zawng zawng kutnem tir vek a tum a, chumi chungchangah chuan a hmaa inziak thin “ Pianna rama haw lehtur” tih inziak tawh lovin form dang hlak refugee mite tan bik siam a ni ang. Khawpui pawn lam atanga tan hmasain chumi hnuah khawpui lama chengte tan buatsaih ve leh a ni ang. Tin, immigration hmunah ni tawh lovin hmun dang Hall / Biakin emaw hmun remchangah ruahman a ni ang.

7. Kut lo nem tawhte pawh UNHCR hriatpuina hnuaia nem that leh or nem nawn leh vek tur a ni.

8. Kutnem dan turah chuan chhungkua nupui/ pasal fanau UN la inthun thei lote tan nem hmasak tur a ni ang.

9. UN la hmu rih lote chu tun maiah chuan UN hriatpuina hnuaia kutnem tir an la ni hrih dawn lo va, amaherawhchu man an tawk palha lungin hial an tangte a nih chuan UN hmalak mek angin lakchhuah leh an ni ang.

10. UN Office-a register a pek tharte chu UN hriatpuina chauhin sawrkarah kutnem tur a ni.

11. UN hian Mobile registration lak a la duh reng a, mahse sponsor a awm mai rih loh avangin UNHCR Office atanga dan pangaia a lak chauh hi a chhunzawm zel hrilh dawn a ni.

12. Tuna UN hriatpui kutnem hi January 2012 thla velah tan theih beisei a ni a, mahse chu ai pawh chuan a tlai thei bawk. UN atanga hriattirna lo nghah phawt tur a ni.

13. UN hian mi eng zat nge a la lak zel dawn tih sawi theih a ni lo nain kumtin mi tam zawk lak zel an duh thu a sawi.

14. Mi tupawh police emaw thuneituten emaw an man a nih chuan mahni community-ah hrilh a, UN ah hrilh chhawn thin tur a ni.

15. Hnathawhnaah UN card neih loh vang emaw, kutnemna lehkha neih loh avanga harsatna kan tawk a nih chuan UN-in min puih an inhuam reng a ni tih an sawi bawk.
                                                Co-ordinator

Thil Tha Tih

2011-11-06T18:26:00.000+08:00

                Biakenga

Khawvel sakhawtin mai hian thil tha tih kan inzirtir theuh a, keini Kristiante bible-ah pawh thil tha tih ning lo turin min fuih nasa hle.
    Bible dung leh vang han fan chuan sual leh tha a awm a, Thil sual tih chu setana lam chan a ni a, Thil tha tih erawh Pathian lam chan a ni thung. Thil tha tih kan tih pawh hi, mihring ngaih dan leh mahni ngaihdana tha a awm a; chungte chu Pathian ngaih dan a ni vek kherin a rinawm lo bawk. Entirnan, Communist ho chuan, “ A hmawrbawkna a that dawn phawt chuan eng ang hmanrua pawh hmang ila a thiang vek a ni” tiin an inzirtir thin. He zirtirna hi sumdawng thenkhat chuan kan tawmpui hmel hle. Hausakna tur a nih dawn phawt chuan mi bum te, dawtsawi te, hringnun ti tawitu ruihhlo leh puak theite hmanga sumdawn kan hreh ta lo hle niin a lang. Mizoram vethungah chuan, eirukna (corrouption) avanga, building leh car tha tak tak neite khu Thil tha ti ah kan ngai vek ang em? Kan Bible thu nen chuan a inpersan hle lawng maw?
    Thutak zirtirnaah chuan, “Mihring thiltihte hi Pathian mithmuhah a tlaktlai lo tih an hriat chian em avangin an chhuang lo va, Thil tha titu chu an chet chhuahtir mai zawk thin,” an ti awlsam et a. Mi thenkhatten hrethiam lovin kan thil tha tih zawng zawng hi Lalpan a hnawl vek tih changchawiin thil tha tih lama ke penna tur hre tawh lo va thuthluang kan awm ta nual mai! A hrethiam lo tan chuan buaina tham a tling reng a ni. Betsy-i’n, “Thil tha tih ka tum changin….Lalpa tel lo that tum zawng engmah lo mai a ni, Lalpa nang chauh ka thatna i ni” tia a thlawh veng veng hla hian a sawi fiah hle. Kan bible hian thil tha tih hi a hnawl lo va, Chhandamna kawngah chauh erawh chuan kan Thil tha tih vanga chhandam kan ni lo va, Rinna avanga khawngaihnaa chhandam kan nih thu (Ephesi 2:8 -10) ah Paulan a auchhuah pui nasa. Chuvang chuan, John Wesley / Whitefield-an a ti, tih lamah buai lovin, Bible-in min hrilh hi dah lal ber ila a him berin a rinawm.
    La Isuan “In eng chu mi mithmuhin eng rawh se, chutichuan in thil tih thatte an hmu ang a, in pa vana mi an chawimawi thei ang, (Matt 5:16)” a ti. Nun nei tawhte, kan thil tha tih hi Lalpaa kan enna hmanrua a ni thei tlat. Nigeria ram Ibadam khuaa rawngbawltu Miss Catherin Dick-i chu, a thil tha tihte avangin a hmelah Isua an hmu thin a ni ang; pa pakhat phei chuan, “Pathian i hmuh duh chuan, Miss Dick-i hmu mai rawh” a ti hial a ni. Kan thusawi aiin kan thil tha tih (kan nun) hian thu a sawi ring zawk e, an lo ti fo thin!
    Jakoba 2:15-17 ah “In unaute saruaka awmin an nitin chaw tlachham sela, in zinga tuin emaw an hnenah , ‘Thlamuang takin kal ula, lum tak leh puar takin awm rawh u’ ti ula, taksa tana thil chakkhai chu in pek si loh chuan enge sawt ang? Chutiang bawkin rinna chu thil tih nei lovin a mah chauhvin a awm chuan thi a ni,” a ti. Sermon kan ngaihthlak hian ‘Zanin   sermon chu a va tha em!’ tihah kan duh tawk fo. Jakoba 1:22 ah “Ngaithlatu mai ni lovin zawmtu lo ni zawk rawh u,” a tih avangin ka thu hriatte chu nunpui/zawm turin min duh a ni. Jakoba 4:17-ah, “Tupawh thil tha tih tur hriaa ti si lo chu, a tan sual a ni” a la ti leh zel a. Thil tha tih tur kan hriatte kan tih loh changte a tam si a, sual nia kan hriat miah loh Pathian ngaiha sual kan tih thin hi a va tam duh dawn em! Sual thuphachawi tur kan ngah hle dawn a nih chu! Chuvang chuan rinna leh thil tih hi inkawp tlat, then hran theih loh a lo ni e.
    Sakhaw dang zirtirnaah chuan, “Miin in chunga an tiha in duh loh tur ang chu mi chungah pawh ti suh” tiin an zirtir thin a; Lal Isua erawh chuan, “Miin i chunga an tiha in duh tur ang zelin mi chungah pawh ti ve rawh u, (Luka 6:31)” tiin a zirti ve thung. Khawvel mifing (Philosopher) te chuan a hmaa zirrtirnate kha a lehthal chiang hle a ni, an ti. Mitin mai hian kan chunga thleng tura kan duh chu thil tha lam hlir a ni a, chutiang chu mi chunga ti ve turin min chah mawlh mawlh a ni.
    Kawl thufing chuan, “Nitin thil tha tih pakhat tal nei thin rawh” an ti. Keini ringtute zingah pawh nitin chhung inkhawmna nei thei kan awm chuan, kan fate Pathian thu kan zirtir bakah nimin/vawina kan thil tha tih te, Lalpaa lawmna kan neihte in zawt thin ila, kan faten thil tha tih tur nei lova awm an duh bik reng reng lo nia., a huhova chanvo kan neih tlan chuan chhungkaw maicham an hlim duh phian. Tirhkoh Paulan, “Thil tha tih i ning suh ang u, kan inthlahdah loh zawngin a hun takah kan seng dawn si a; mi zawng zawng chungah thil tha i ti ang u, (Gal 6: 9-10)” a ti. Thupuan 22:12 -ah a sawi chiang leh zual, “Ngaiteh ka lo kal thuai dawn e; mitin an thil tih ang zela pek turin ka lawman ka hnenah a awm,” a tih avangin, Lal Isua lo kal leh hunah chuan nun neitute zingah kan thil tha tih tam ang zelin a lawman min pek tur pawh a la dang lam leh zel dawn a nih chu!
    Thil tha tih a that rual rualin thil tha lo titute tawpna rapthlak zia pawh Sam 37-ah “ Thil tha lo titute avangin in tilungngai duh suh la, fel lo taka titute chu awt hek suh. Hlobet angin ah thlukin an awm thuai ang a, hnim hling angin an vuai dawn si a.” tih kan hmu. Lalthanhawla’n politic campaing-ah an hmang rim hle.
    Paula’n, “ Pathian ring tawhte chuan thil tha ti zel turin ngaihtuah rawh se, (Tita 3:8)” tiin min fuih a. Aw unau duh tak, mite tana hnawksak leh huat hlawh nge i nih, mi te tana thil tha ti tu? Mahni tan chhungkaw tan mi dang tan leh Lalpa tan thil tha tih i ning suh ang u. Thil tha ti tura siam kan ni a, chu thil tha tih chu Vana kan lawmman tur Lalpan a buatsaih lawkna a ni. Lalpa chu fakin awm rawh se.

THLUAK SAWIZAWINA HRILHFIAHNA

2011-11-06T18:24:00.002+08:00

(1) Bawng rual hian, tuilian an rawn daikai a, pa pakhatin, vaukam atangin a lo thlir reng a, a tawp berah bawngpa hi a rawn tel ve a, a til a lo en a, a huh miah lo engtinnge a huh loh theih?
     Ans. Vau kam a tanga lo thlirtu khan, ama til a lo en a, a huh miah lo.

(1) Bawng rual hian, tuilian an rawn daikai a, pa pakhatin, vaukam atangin a lo thlir reng a, a tawp berah bawngpa hi a rawn tel ve a, a til a lo en a, a huh miah lo engtinnge a huh loh theih?
     Ans. Vau kam a tanga lo thlirtu khan, ama til a lo en a, a huh miah lo.

(2) Pa pakhat lo mawngah thingkung lian tak mai a awm a, Pa pakhat lo lu-ah thingkung lian tak mai a awm bawk a, Thuro nupa an fu a, an inchuk an inchuk a, engtinnge an inchuk theih?
    Ans. Lo lu leh lo mawng inri an ni a, an lo inkara thingkungah chuan thuro nupa an fu a, an inchuk maw le.

(3) Taikuang lawng pakhat Kg.100 chauh phurh theihna a awm a, pafa thumin ral lehlam kai an duh a, a pa Kg.100 a fate Kg. 50 ve ve an ni si a, engtin nge an inthiar kai theih dan?
    Ans. An unauvin an kai hmasa a, a u zawk chu amah chauhin a pa hnen lamah a kir leh a, a pa chu amahin a kai phei a, lo kai hmasa a nau zawk chuan, a u hnen lamah a khalh phei ve leh a, tichuan an unauin an kai phei leh a, an vaiin an kai theih ta a ni.

(4)   Pa pakhat hian Sanghar, arpui leh Buhhum hi lui ral lehlama thiar kai a duh a, an vaia taikuang lawnga a phurh dawn chuan, an ineiin, an in chuk ang tih a hlau bawk si, Sanghar leh arpui a thiar hmasak chuan, buhhum a va lak chhungin, an lo inei ang tih a hlau si, Arpui leh buhhum a thiar hmasak chuan, sanghar a va lak chhungin, arpuiin a lo chuk hman ang tih a hlau bawk si, engtin nge a thiarkai theih dan?
    Ans. Sanghar leh buhhum kha a thiar hmasa a, chuan, arpui kha a va la leh a, him takin a thiarkai thei a ni.

(5)   Naupangho pawnto tur hi, Group 'A' leh 'B' ah an inthen a, Group A lamin, inzinga pakhat kha kan lamah lo phei u la, kan zahve chiah in ni ang an tia, Group B lamin, inzinga pakhat kha lo phei zawk u la, kan inzat chiah ang an tive bawk a, eng zat ve ve nge an nih ang?
    Ans. Group 'A' ah mi pasarih Group 'B' ah mi panga an ni ang chu.

(6)   Za leng Lawng hi enge ni le?
    Ans. Mi za lenna Lawng, a ni mai a lawm. HHmm... Ka lawm e.

                                    By- Alai (V.L.Fanai)

MCF HUANG

2011-11-01T11:24:00.000+08:00

                KAN CHANCHIN

    Kan chanchin ka han tihluai tak naa eng teh lua ni lovin, hmanni Oct. 26 khan Malaysia rama MCF rorel inkhawm lian ber kan neih thu leh chu mia kan thu buanthluk thenkhat han tarlan kan tum mai a ni e.
    Malaysia ramah hian MCF hmun 6-ah kan ding a, kum khatah vawi hnih Chinese kumthar leh Deepavali-ah combined meeting kan nei thin. Chu meeting-ah chuan kan sawi tak hmun hrang hrang atangin Palai kan kalkhawm a, MCF inrelbawldan leh rawngbawl zeldan tur kan ngaihtuah thin a ni.
    MCF hian inkaihhruaina dan fel tak kan nei a, chumi zui chuan KL atang hian hmalak a ni tlangpui. Hmun hrang hranga MCF-te chu Branch kan ti a, mahni inenkawl thei ngawr ngawr an nih avangin KL atang hian rawngbawlna kawng engkimah chhawmdawl an ngai khawp mai.
    Pastor pakhat chauh kan la neih theih avangin bialfan a hau tak hle. Entirnan Johor kal nan Rm. 350 a ngai a, chutiangin Penang kal nan Rm. 350 bawk, Tumbuk leh Batu Untung kal nan Rm. 220/- chutiang chu a nih avangin thla khat chhunga bialfanna senso ringawt pawh KL atang hian cheng 1,000 chuang kan sen chan a tam a ni.

Kumtharah chuan:
    Kumin 2011 hian Kawlramah Missionary pahnih kan chawm a, chu pawh Mission sum atang chuan kan tlin ngawr ngawr a ni a, mahse ringtute hian ring lo mite zinga rawngbawl hi kan tih tur a nih tlat avangin MCF sum neih en lovin nakum 2012-ah chuan Missionary pali ( 4) chawm kan tum tawh dawn a ni. Hei hi kumin MCF Combined meeting rorel hlawm lian tak leh hau tak zet tur a ni a, amaherawhchu kan sawi tawh ang khian kan chakna rinchhan lovin Lalpa zawk kan rinchhan dawn a, chumi zawnah chuan nang leh kei hi a vawnfung kan nih a tul ta! Kawlrama Missionary pa 4 chawm nan hian cheng nuai 24 a tul dawn a, tunlai Malay pawisa rate chuan Rm. 9,400 vel a ni ang.

Inkhawmpui:
    Kumthar Chinese New year-ah rorel inkhawmpui neih leh tur a ni a, chumi rual chuan mipui inkhawmpui pawh buatsaih tum a ni. Kan beisei dan chuan Speaker tur pawh kawlram atangin Evagelist rawih a ni dawn a, chhun lam rorel laiin Biak in lamah Pathian thu zirna leh zan lamah inkhawm neih chhunzawm tur a ni ang.
    Combined Meeting-ah hian Member kan kal tha hle mai a, “MCF din chinah vawiin ang tluka Combined meeting kan kal that tum a la awm lo,” Chairman Pu Ngursaithuama chuan a ti hial. Chumai ni lovin kohhranpui tak kalhmangin rorel a zahawm a, upa pui pui kum 60 chuang tawhte pawhin min la ho thei reng a, thlarau mi tak takin min telpui thei bawk a, MCF hi Lalpan a hmangaih a ni, kan ti lo thei lo.

MRO Lam:
    MRO Card siamna khawl thar lei turin rorelna chuan a passed tawh a, mahse kutah cheng a awm mai si lo. Kan hriat theuh angin MRO Card hi tunlai hun nen a inmil chiah tawh lo va, UN lam leh sawrkar thuneitu (zawng) lam tan danglamna awm lo mahse, Card mawi leh zahawm deuh neih ve a hun ta hle niin kan hria. Tunlai Card siamna khawl man hi Rm. 6,000 ( sangruk) chuang man a ni tiap mai.

Chhungkaw Card: Chhungkaw tam tak, (nupa pawh) UN-ah kan la inthun theih loh avangin engemaw buaina lo awm palh thila inven nan MRO chuan chhungkaw Card a siam thar ta. He Card-ah hian nu / pa zawk UN hmu tawhte leh la hmu lote card (community) nen MRO hriatpuinain lehkha pakhatah belkhawm a ni ang. He chhungkaw Card siam man hi Rm. 20 a ni.

Combined Meeting Palai kal dan:
1. KL mi 19        2. Penang mi 2
2. Johor mi 2    3. Tumbuk mi 4
4. Batu Untung mi 2

Chanchin Lawrkhawm

2011-10-30T18:35:00.000+08:00

'Magwe Division Pakkokkhu-ah Tuilian
    Oct. 19, 20 khan ruah nasa tak a sur avangin Pakkokkhu chhuahlam Shwechaung lui chu tui a lian thuta hriat theih chinah mi 106 chuang an thi a, thlai chinna lo acer 3,000 vel a chhe vek a, chhungkhua 7000-ah a zahve aia tamin in leh lo an chan bawk.
    He Shwechuang lui hi tui a lenna lohna kum 10 chuang a ni tawh a, chuvang chuan luikam velah hian in leh lo dinin chhungkhaw tam tak an cheng a, rin loh taka tui a lo len thut avang hian mi tam tak an insaseng hman ta lo a ni. Tin an in leh lo mai bakah an ranrualte pawh tuilian hian a len bo deuh vek a ni. ( Mizzima)

Pa Zawkin Naupai

Khawvela mipa raipuar hmasa ber Arizona rama nupa Thomas Beatie leh Nancy-te nupa chanchin hi a mak danglam ngawt mai. Thil ni thei a nih i ring lo hial ang. Mahse a ni ve thei tho bawk si.
    Thomas Beatie an tih chuan a hmangaih tak Nancy an tih chu nupuia a neih hnuah amah zawkin fa pathum ngawt a hring tawh a ni. Kum 37 mi Thomas hi Hawaiin thliarkara piang a ni a, a pian hlim chuan hmeichhia nimahse mipa nih a chak zawk avangin kum 20 mi a nihin damdawi chi khat Testosterone ( mipa nihna tilangtu)in a inchiu thin a, tichuan hmuihmulte lo neiin a aw pawh a lo til pawr aw ta a ni.
    Kum 2002 khan a hnute a paih leh a, mahse a hmeichhe nihna chu a tidanglam bik lo. Mipa anga lengin nupui a nei a, a nupui erawh chu chhul paih tawh a ni thung. Fa neih an lo duh ve tak chinah chuan a inchiu thin damdawi chu inchiu tawh lovin a lo lang hmeichhia leh ta a, a chhulah mipa chi thunin kum 2007 khan fa a hring a, tunah chuan fa pathum a hring der tawh.

Thailand tuilian zual zel
    Thailand Tuilian-in Thailand khawpui Bangkok a chim belh zel avangin mi sang tam takin an chhuahsan mek a, bus station leh airport-te a lun hle a ni.
    Khawpui hmar lam chu tuiin chim deuh vek tawhin lirthei pawh an tlan hlei thei tawh lova, mi tam tak chuan an in leh dawr-te, tuiin a chim loh nan cement bangte an siam a, veng hrang hrang tlawh pawhna kawngte chu tuiin a chim deuh vek tawh a, tuilian avanga insaseng tumte chu Bus leh rel chawlhhmunah an inhawr khawm nasa hle a, lamlian-ah pawh lirthei tam tak chesawn thei lo-in an awm a ni.
    PM, Yingluck Shinawatra chuan tui lian lakah khawpui chhung hmun hrang hrangte chu ven him zawh an ni dawn loh avanga pawi a tih thu sawiin, dan pangngaia Zirtawpni leh Inrinni-a tuipui fawn thin chuan khawpui chhungah harsatna nasa zawk a thlen thei reng a nih thu mittui parawl kuang chhungin a sawi bawk.
    Thailand sawrkar chuan ni 5 chhung chawlh a puang ta hial a. He tih lai hian Kawlram mi tam tak, hawn tumin an inbuatsaih ve mup mup a. Oct. 23 atang khan ramri inkalpawhna (Mae Sot) ah sawrkar phalna lehkha lak tumin ni khatah mi 1500 vel an innek vut vut reng mai a ni. Thailand-ah hian kawlram mi hnathawk nuai 10 aia tam an awm a, Thailand sawrkar thuneitu ( immigration) leh Kawlram lam (Myawaddy)-a thuneituten tuilian avanga mangang kawlram mite hnen atang hian sum an lo la khawn zui!

I THO ANG U KHAI, I DIN TEH TAK ANG U

2011-10-28T16:27:00.002+08:00

(Nehemia 2:18)

K. Zochhuangi,Tahan

Nikum 2010 khan, kum dang aiin kan Kohhran chu kum 2011 tan kan
inthlang hma a. A thawven thlak ang reng hle mai. Christmas
inbuatsaihna hun kan neih tam phah ti ila a sual awm love. Nikhat chu
intihharh pah fawmin khua ka fang a. Building in tha pui pui leh mawi
tak tak mai a lo tam tawh hle mai. A thente chu sak lai mekte an ni
nual hlawm a. Biak in te, Office-te an ni bawk. Tahan khua chu a lo
ropui tawh hle, fan tham tak a lo ni. Bible-a Ninevi khaw ropui pawh
a ang hial dawnin ka hria.
Thlasik ni tawi hun a nih vangin thui pawh fang hman lovin haw zai ka
rel ta a. Kawngah chuan tunhma Tahan ka hmuh dinhmun leh tun dinhmun
inthlauh tawhzia ka ngaihtuah chhunzawm a. Kan changkang sawt hle mai.
Hun a inher thuai a, Christmas leh kum tharte pawh chu hlim takin kan
hmang liam leh ta.
Kum 2011 kan han chuangkai leh a, kum dang ang lo tak bawkin Synod
pawh hma taka hman a ni leh a, Tahan D.M.W.A chuan January ni 7,
2011-ah kan hmang. Mission Veng-ah - mahse Meeting room-ah ni lovin
M.Y.A. Chapel-ah kan Committee daih mai!! Zanriah kan han kilho leh
a, bang neilo, a chhuat leiah kan han kil leh a, a thaw veng ang reng
naa a zahawm nep hle thung. Hetiang hian Committee rorelah mi tam tum
chuan bang neilo chhuat leiah chaw kil a ni thin a, mi tlem deuh leh
Hmawnghnuaiah a ni leh mai. Tichuan ka rilruin kan District Compound
chu a fang thuak thuak a, District Chairman in up Churh mai te, kan
Office lum em em te, chak hlui belkhawm Meeting room te, Principal in
hlui thing lutukte ka hmu hlawm a. Aw, kan hotute hi heng in leh lo
din that lamah hian han piang thar sela aw, ka ti ta vawng vawng mai a
ni.
Christmas hmaa Tahan khua ka fana Building in tha tak tak kan aia
ding hnuhnung zawk Kohranten an sak laite ka mit thlaah a lo lang a,
rual awh a na duh ngei mai. Kan Missionary-te sulhnu hi kan ngaina
viau a ang. Ngainat viau pawh a awm e. Mahse, anniho hian rawn hmu leh
ta se changkang lo leh hmasawn lo min ti mai long maw?
A hun ngaihtuah chuan entawn tlak khawpa Hall tha, Office tha,
Building in chhawng tha nei tawh tur zawng kan ni maw le.
Engpawh nise, kan tum tlat chuan tihtheih hun a la awm ngei ang.
Jerusalem kulh chhia siam tha turin Nehemia leh mi hausa, mi rethei,
mi lian, mi te, mipui mimir thukhat vuain lungrual takin leh rinawm
takin an thawkho tih kan hmu a, an hmelmaten tibuai thin mahse,
hriamhrei nen inralring rengin an thawk chhunzawm zel a, Lalpa rin
chhan tlatin an awm bawk a, a tawpah chuan an hlawhtling ta nge nge a
nih kha.
Chutiang bawkin keini pawh, inthurualin leh rinawm takin kan sum
paite tun hma aia thawh tam tum theuh ila, mi tibuai theitu lo awm
thin mahse, chung mi sual thal alh thei zawng zwng tih mihna rinna
phaw (Eph 6:16) chu i la ang u. I tho ang u khai, i din teh tak ang
u.
* * * * *

HE TI ZAWK HIAN

2011-10-28T16:26:00.000+08:00

Zalianthanga,Tahan

1. Lawm fo rawh ;
Miten thil eng emaw an pek reng reng che hian “Ka lawm e” tih ziah ang
che. An thilpek a te emaw a lian emaw pawh nise, i ban rualin a petute
kha i lawmzia entir nan en kar a, hlim hmel chhuah thin hram rawh. Leh
lam hawi sanin thilpek la ngai suh ang che. Mi thil kan pek pawhin
nautat zawng leh holam deuha pek nawmnah hi a thiang ngai lo.

2. Ninhlei suh;Tute emaw inah i lo leng a ni thei e. Eng emaw i tih
dawnin phalna la hmasa zet ang che. Thian thate an ni emaw, nel leh
ngamtlak an nih mai avangin a tawng a pawngin engmah tawk mai lo la,
bangrela mi pawh dawhkana mi pawh nise, chinchang hre hmasa lovin
khawih mai mai suh ang che. TV remote control te, Computer thil te,
Tape leh eng bungrua pawh ni se, vawi khat hmeha chhe thei thil a nih
avangin ar nghal lena len loh hi a him thlak ber a ni.

3. Thlahdah suh;Naupang harh deuh kan nei emaw nei lo emaw pawh nise,
thenawmte ina an len dawn pawhin an awm dan tur leh ninhlei loh tura
thu hrilhsa hi a tha hle. Thil pawi tak an khawih theih avangin thlah
liam mai mai a tha lo va, hun bik nei leh lehkha chhiar lai a nih phei
chuan mite harsatna kan siam thei a. Zana naupang kan lentir fo pawh
hi hum sual daina a ni a.
4. Ka lo hawh lawk: He tawngkam hi kan hmang rim hle. Thenawmte eng
emaw kan lo ban lawk a nih pawhin hman zawha pek vat hi a him ber a.
Ka lo hawh lawk kan ti a, rei fe kan kawl chuan theihnghilhin a rawn
um zui leh nghal a, a tawpah thenawm innghirnghona a chhuak thei a ni.
Buhfai kan lo puk a nih pawhin kan puk laia, buhfai ang thlapa pek leh
thin hi a tha. Tin, kawr emaw thlai, thei rah mi kan pek dawn pawhin
hak tlak ei tlak pe thin ila a tha hle. Mahni paw’na kan iai leh duh
loh thil hi chu mite paw’n an duh bik dawn em ni?

5. Bawlhhlawh: Duh duhnaa eng emaw fun neuh neuh kan paih mai mai
chuan keimahni bawkin harsatna kan tawk leh ngei ngei thin. In tinin
bawlhhlawh bawm nei thei ila, a tha hle. A chhan chu ni tina kan chet
tlatnaah hian hmuh theih loh bawlhhlawh atanga thil funna eng emaw
avangin thil rimchhia leh rannung a ko khawm thin a, chu chuan natna a
rawn hring chhuak thin a ni.Sahkan, Khum, Bizu, Bangrel leh a
chhehvelte han en chiang teh maw? Chu chauh a la ni lo, in hnuai, ek
in, vawk in, pal hung leh tui hawk luan kawr kam velte hi en chiang ta
ila, eng nge kan an le? A zawng a za chuan kan tlin lo pawh a ni thei
e. Amaherawhchu, a tlangpuia en rem theiha mawi tawk chuan a then fai
theih ngei ang. Ka chhehvel a hnawk chuan rilru pawh a thaw veng thei
thin lo.

6. Zan men rei: Chhuna hnathawk lo tan chuan zan men an thei mai
thei e. Chhuna dawr kai leh hnathawk tan phei chuan zan hi a
thlakhlelawm a. Taksa hriselna hun hlu tak pawh a ni. Tun laiah
chuan Korea film bakah Sap film chenin Mizo tawnga lehlin a rawn
chhuak nual tawh a, en pawh a hlawh hle. Thenkhat phei chuan zan rei
tak tak thlengin an en thin a, a tuk hnathawh tur tan phei chuan a rim
thlak ngawt ang. Inkhawm leh thil pawimawh thulh fo nana hmang kan
awm chuan a fel thei lo ang.
7. Thawm neih: Zan reha mi kan kaitho dawn a nih pawhin, “thin
thawng zawnga in au lovin ‘chu - mi - kha - mi chu kan ni e’ tiin
emaw thawm neih hmasa a, in chiau au hi a tha hle. Mahni inchhung
ngeiah pawh hian zan reha zun ram thiar leh pawimawh kan neihin
chhungte hriata thawm neih hi a tha hle a. In bualna leh In thiarna
room (ek in) kan kal dawn pawhin thawm neih hmasain in awm em? tia
zawh hmasak thin hi chin dan tha tak a ni.

7. Insawizawi: Dam hrisel chuan kan taksa hi che reng tur a ni a; a
khat tawka taksa in sawi zawi hi kan tih fo thin a tha hle. Ni lenga
thu tan chuan taksa a thum thei a, a bikin dawrkai, puanthui, thu
chunga hna thawk reng rengte hian in sawi zawi a tul lehzual a. Zing
hma taka tei hawi leh tlai inbual hmaa taksa tih chet emaw xdkifx
(Khupsuk) emaw taksa zawh tawka Exer lak hi hriselna tha tak a ni. A
khat tawka thlan tihtlak fo hian, thau lutuk te, lu hai te, taksa kham
themthum te, ke hit leh zeng ang dawn dawna kan awmte hi Exer kan lak
loh vang a ni mai thei bawk.

8. Ei leh in: Thei rah leh a hnah kaurau kara rannung hlo bet ter
tuar hmuh loh vang leh a nachang hriat loh avanga taksain a tuar hi a
awm nual ta ve ang. San Piauh dawra tho bawm a nih leh nih loh pawh
ngaihtuah lem lova, kan ei in liam ta te, kawng sira thil zawrh,
vaivut khu kara mi kan ei mai te, dawr ilo vela thil funsa ei mai te,
kut sil fai mang lova eng emaw kan ban maite pawh hi ngaihtuah chian a
hun tawh hle. Vawk thau ei natsat avanga thisen sang vei kan va tam
ta em. Taksa hriselna ngaihtuah lem lova, engemaw kan ei in reng
chuan natnain a tlak buak fo reng thin a ni.

Tlangkawmna:
Mahni chhia leh tha hriatna hmanga inven leh tihtheih tam tak a awm
ngei ang. A nachang kan hriat loh avanga tihsual palh chu dah that,
inthlahdah leh thatchhiat avanga kan tih tur ti ta lo hi a tam zawk
mai thei. Hriat loh na na na hria anga awm tum phet hi mualphona a ni
thei a. Thu rawn ngai chang thiam leh inngaitlawm taka awm thiam mi
erawh chu mi vannei kan ti thei ang chu. Engpawh nise, mite kan tanpui
thei anih loh pawhin an harsatna va siam loh hram ila, ni tin hian zir
tir eng emaw kan dawn zel a, a tha zawk leh fel fai zawka a awm theih
nan “he ti zawk hian” tia siam that hna hi kan mawhphurhna a ni.

THLUAK SAWIZAWINA

2011-10-27T12:12:00.000+08:00

THLUAK SAWIZAWINA

(1} Bawngrual hian, tuilian an rawn daikai zut zut a, pa pakhat hian vaukam atangin a lo thlir reng a, a tawp berah bawngpa hi a rawn tel ve a, a til alo en a, a huh miah lo, engtinnge a huh loh theih?

(2}    Pa pakhat lo mawngah Thingkung lian tak a awm a, Pa pakhat lo lu-ah Thingkung lian tak a awm bawk a, Thuro nupa an fu a, an inchuk an inchuk a, engtinnge an inchuk theih?

(3}    Taikuanglawng pakhat Kg. 100 chauh phurh theihna hi a awm a, pafa thum te chu ral lehlam kai an duh si a, a pa kg.100 a fate kg.50 ve ve an ni a, engtinnge an chuankai theih dan?

(4}    Pa pakhat hian, sanghar, srpui leh buhhum, lui ral lehlamah thiarkai a duh a, an vaia taikuanglawnga a phurh chuan, an ineiin an inchuk ang tih a hlau bawk si a, sanghar leh arpui a phurh hmasak chuan, Buhhum ava lak chhungin, anlo in-ei ang tih a hlau si, arpui leh buhhum a thiar hmasak chuan, aanghar a va lak chhungin, arpui-in a lo chuk hman ang tih a hlau bawk si a, engtinnge a thiarkai theih dan?

(5}    Naupangho pawnto tur hi, Group 'A' leh 'B' ah an inthen a, Grp.A lamin, in zinga pakhat kha kan lamah lo phei u la, kan zahve chiah in ni ang an tia, Grp.B lamin, nangmahni zawk kha, kan lamah lo phei u la, kan inzat chiah ang an ti a, engzat ve ve nge an nih ang?

(6}    Zaleng lawng hi engnge ni?
                A hrilhfiahna chu karleh palai-ah bawk rawn tih chhuah a ni ang.
                                        Alai, Vl. Fanai

Lawrkhawm

2011-10-25T11:42:00.000+08:00

Muammar Gaddafi A Thi
Lybia ram mimal thuneihna hmanga kum 40 lai kaihruaitu Gaddafi chu Oct. 20 khan NATO sipai-ten a tawmrukna bukah an kap hlum. A thih hian kum 69 mi a ni.
Gaddafi-a rorelna hnuaiah hian pawi sawi lo mi tak takin harsatna leh nunna hial an chan a ni tih khawvel hriat a ni a, a ram chhungah hian thla riat chhung indona a thleng tawh a ni. NATO ( Tangrual sipai)te hian Gaddafi hi thah an tum lova, a rorelna atanga paihthlak an tum mai a ni a, mahse silai mu a het fuh palh ta a ni awm e!

Mipa atangin Hmeichhiaah thlak
    Thailand ram Bangkok khawpuia Doctor pakhat Dr. Preecha Tiewtranon an tih chuan mipa serh atangin hmeichhia serh-ah a thlak sak thei an tih chu le! Dr. Preecha hi California atanga lo kalin Bangkok khawpuiah hian damdawi in (Clinic) a hawng a, a damdawi in hi a danglam hle, mipa atanga hmeichhiaa insiamna tih a ni tawp mai.
    He Doctor hian mi 3,500-te chu hlawhtling takin mipa nihna atangin hmeichhiaah a thlak sak tawh a, chung mite chu an thih thlenga hmeichhia tawh turte an ni. “Mami atangin Mama”tih an ni tawh dawn a nih chu! Hetianga mipa nihna atanga inthlak nan hian US dollar singhnih an sen a ngai.
    Bangkok-a dawr ( Clinic) a inhawn tan dawn hian mi 4 a thlawna siam sak turin chanchin a tlangzarh a, mi 2,000 (sanghnihin)in hming an rawn pe hluai mai. Mipa sang hnih chuangin hmeichhia ( Sex Change) nih an chak tihna a nih chu!
    Heng mite atang hian mi panga thlang chhuakin an serh a thlakdanglam sak a, chung mite tan chuan cheng nuai 1,500 dawn ai pawhin a lawmawm zawk an ti.
    He Clinic-ah hian:
Awmbawr siam danglamna man Dollar                         2,500
Hmel ( hmai) tihdanglam nan dollar                             2,000
Serh siam danglam nan dollar   8,500

    Mizo upate chuan “hmel a thlak danglam theih loh nungchang erawh a siam theih” an lo ti thin kha a ni a, tunlaiah chuan tihtheih loh a ram pawh a awm ta mang lo a ni lawm ni tih tur khawpin thiamna a sang ta.             Hetianga nun piangsual ta lutukte pawh hi an awmherh vang hrim hrim chu a ni bik hauh lo. Kawng lehlamah chuan khawngaihthlak tak an ni zawk a sin. I tuina lamte a lo nih ve hlauh chuan Thailand ramah i thlawk thla zuai dawn nia.

Minute Hnih Zelah Mipakhat Chinna Ramah Mahni Inthah An Tum

    Chinna hi khawvelah mahni inthah tamna ber ram a ni a, minute hnihah mipakhat zel mahni inthah tum ang an ni, tiin Chinna ram sawrkar Media chuan a tarlang.
    Chinna ram hriselna vawnghimtu pawl leh mihring nun venghimtu pawlte sawi danin mihring 100,000 (Nuai khat)-ah mi 22. 23-te chu mahni inthat an ni, a ti.
    Beijing khawpui hriselna lama thawktu Mou Yu an tih chuan kan ram hi khawvela mahni inthah tamna ber ram a ni, tiin Beiling Youth Daily chanchinbu a hrilh.
    Mihring 1.3 Billion awmna Chinna ramah hian kumtin mahni inthat mi 287,000 (Nuai hnih singriat chuang) vel an awm a, maktaduai 20 velin mahni inthah an tum thin.
    Heng mahni inthah tumtute hi kum 15-34 inkar thalai an ni tlangpui a, an intihhlum chhan chu zirna lam harsatna avang leh hnathawh tluan loh vangte a ni thin. Mahni intihlum zingah hian khawte lam mi aiin khawpui mi an tam zawk a, zaa 75 vel an ni.
    Kum 2009 khan Britis damdawi lam Journal “The Lancet”an tih chuan Finlan, Lybia, Hungary, Chinna, Japan,.. ramah mi nuai khatah mi 20 mahni inthat angin an chhut.
    Khawvel thiamna hi sang eng ang mahse, thihna erawh an dang zo chuang lo vang.

KAWLRAM LEH MALAYSIA RAM LUNG IN TANG INTHLENG TUR CHUNGCHANG

    Kawlram leh Malaysia sawrkar-in mi tang an inthleng tur chungchangah Refugee an tel loh tur thu ram chhung chungchanga thuneitu (Minister of Home Affair) Datuk Seri Hishammuddin Hussein chuan ni 17 (thawhlehni) ni khan chanchinbu mite a hrilh. Sawi zawm zelin Kawlram thuneitu Deputy Minister U Aung Myint nen kan inbiak hma hian UNHCR nen kan inberawn hmasa tawh a, Refugee dik takte chu tang inthleng tur zingah an tel lo vang, mahse refugee card changchawia kan rama inhnawhkhawm vak hi kan duh lo a ni, a ti.
    Malaysia ramah Kawlram mi mi nuai 5 vel kan awm a, chung zingah chuan Chin leh Karen an tam ber. Ram dang mi an man an dahkhawmna tan in (Camp) hmun 13-ah Kawlram mi mi 3,000 vel an awm angin Burma campaing-Malaysia chuan a sawi a, chung zing atang chuan mi 1,000 thawn hawng tura tih an ni.

Malaysia Rama Danlo-a Awmte Man Dawn
    Malaysia ram chhunga danloa awm ramdang mite ( Illegal migrants) leh anmahni hnathawka chhawrtu Boss-te chu man turin Malaysia sawrkar chuan mihring nuai -40 ( 4 million) hman an ni dawn a, chung mite chu Rela nuai 30, Police 125,000 leh Sipai 110,00 an ni ang. ( The Star Oct. 15)
    August thla chhung khan Kutnem ( 6P Pragrame) beihpui thlak a ni a, kha mi hun chhunga nem hman hrih lote tan hun pek pelh leh an ni ang, tiin Home Ministry Secretary-general Tan Sri Mahmood Adam chuan a puang. Pu Mahmood chuan sawrkar pawl hrang hang leh tualchhung pawlte nen an tanrual tur thu a sawi a, Oparasi tan a nih hma a inpete chu engmah chawitir an ni lo vang a, mahse an hawnna man tur erawh chu an Boss-ten an tum sak vek ang, a ti.
    Sawrkar chuan danloa hnathawktute leh an Boss-te tan kumin kum tawp thleng hian khawngaihna hun (grace period) hawn sak an la ni a, kum thar atang chuan operasi runpui a lo thleng leh dawn ni awm tak a ni. Keini erawh chu UN kaltlangin Lalpan min hum ngei ang.

Pu Hualsailova'n USA Min Kalsan Ta

2011-10-25T11:07:00.001+08:00

MRO C0-ORDINATOR & MCF PRESIDENT USA A KAL TA
    Kan tum leh beisei ber ni miau si hek, a hun a lo thlen ve meuh erawh chuan lawm tur nge lawm loh tur tih min ngaihtuahtir rum rum mai. Ni, Pu Saia hi zawng Malaysia Mizote hian kan ngai dawn em atin a ni.
    Pu Hualsailova hi kum 1995-2000 inkar khan kum 5 chhung Malaysia-ah hian a lo khawsa hrep tawh a, Malaysia rama Mizo kal hmasa pawl a ni. Heng hun lai chuan sumpai zawng an nih angin rim tak leh thahnemngai takin hna an thawk a, Malaysia rama hnathawka inhlawh zingah chuan a hlawhtling berte zinga mi a ni bawk.
    Kum 2007 Nov. ni 4, khan a tum hnih nan Malaysia a lo thleng thla ve leh a, tuna a hnathawhna Mizo Pastor Quarter-ah hian a inpu lut ve rawi a, chung lai chuan choka lam hi a chan tawk a ni awm e! Chawlhkar hnih chhung chu Choka-ah hian a sipai mut ve ngat thin.
    A tum leh beisei angin UN lam kawng thim tak mai chu a han dai ve tan ta a, ral khat atanga a lo hriatdan nen a inang ta hauh lo. Tihdan chi hrang hrang hmangin a han bei ve thin tak naa, tlingthelh a piang a pawi, tih ang mai khan a thangkam a perthelh ta fo mai a, a tawp a tawpah chuan Jan. 3, 2008 khan Cameron Highland tlangram khawvawtah UN hmuh beiseiin a ram mu ta ngawt mai a ni.
    He hmunah hian chanchin tam tak sawi tur a awm a, kan kalkan hrih mai ang. Tichuan he hmun atang hian Dec. 5, 2008 khan UN chu amah leh a thuihruai mi 51-in an hmu ta a. He hmunah hian a tirah chuan mi tam tak an awm a, mahse ram hnuaiah kum khat dawn mai han khawsak chu mi tam zawkin an tlin ta lo a, UN-in an rawn lak chinah meuh chuan mi tlemte an ni tawh.
    Kum 2008 October. thla khan Rev. Lalthuamluaia leh upa dangte ngen angin MRO Co-ordinator hna hi a thawk tan a,, a thawh chhung 2009-2010 inkhar khan mobile atangin Mizo mi 520 chuangin register an hmu a ni. Damlohna avangin mi 40 vel leh naupai atangin mi 30 tha zet register a hmuhpui bawk.
    MRO Co-ordinator mai bakah kum 2009 khan MCF President atan thlantlin a ni zui a, kum thum chhung MCF a kaihhruaina zawnah pawh hriat reng tlak sulhnu tam tak min hnutchhiah a ni. Amah hi palian mai ni lovin rilru lian tak nei a ni a, a zaidamin a tawng tam lo hle.
    MRO Co-ordinator a thawh chhung hian tawnhriat ( Experian) tam tak a nei a, “ damdawi in lam te, NGO leh UN hmalakna chi hrang hrangte hi a ropui tak zet a, an sawi tam lem lo va, an thawk tam mai niin ka hria,” a ti thin.
    MCF rawngbawl danah pawh hian ngaihpawimawh leh sawi chak tak tak nei ve thin bawk mah ila, keimahin ka tlin loh tur, mi tih atana sawi teuh hi ka tum lem lo. Hei erawh chu ka’n sawi ve hram teh ang.
     1) Member nihna chi hrang hrangah ( MRO, MCF member leh chhiatni fee) hian i tel kim vek ang u.
    2) Malsawmna min petu kan Pathian hnena sawma pakhat pek hi inthlahdah lo vang u, hei hi kawng chi hrang hranga malsawm kan dawn letna a ni, tih hi! Chutichuan Pu Saia leh a thiannu Pi Mi mi-te chuan Oct. 24, thawhtan ni zing dar 10 khan USA ram Indianapolis pan turin Malaysia ram leh an rawngbawlna MCF chu min chhuahsan ta. MCF mipuite’n kan ngai mai dawn chauh pawh ni lovin, kan hre reng tawh dawn a ni! Dan rual an ni si lo, Raltiang an kai zel e.

MCF Leh Chhiatna Neuh Neuh

2011-10-23T12:49:00.000+08:00

A Pawi thin mang tak e!
    Oct. 11 zan khan kan member tangkai tak tak, Music tumtu Tv. Dinpuia (Dramer) leh Tv.Lalrinliana ( Bass)-te chu an thian Tv. Dinzova ( Lead ) hnena leng turin Alor atangin Damansara panin Bike-in an chhuak a, KL huam chhung an pel, Serdang huam chhung an lut rei loah vanduai thlak takin an chesual ta a, an pahnih hian Serdang damdawi in-ah dah an ni.
    Chutia an chesual chu engmah hre lovin rei lote chu an awm hman a ni awm a, Dinpuia zawk chu a harh leh thuai a, mahse insaseng thei lo khawpin a lo insawhna tih a inhre nghal a, a thian Rina chu a han ngaihven a, ani pawh amah ai daihin a lo inhliam na zawk tih a hmuh chuan theih ang tawkin a han bawisawm a, chutia kalkawnga Bike chesual mi pahnih let reng an hmuh chuan mi thenkhat an lo kal hnai a, damdawi in motor ko-in zing dar 4 vel-ah chuan Serdang damdawi in-ah an phur thleng ta hram a ni awm e!
    Dinpuia chu pem neuh neuh bakah a ngal ruh a sawh auh a, khawng fahrana daktor-ten an tuam sak hnuah Oct. 12 tlai lam dar 6:30 vel khan damdawi in atangin an chhuahtir lehnghal mai a, a dam hma chu a tan thil tangkai tur a nih hriain amah va buaipuitu MRO Co-ordinator pahnih Pu Saia leh Pu Josaia-te chuan Kebul tiang an lei sak tawp.
    Rina zawk erawh chu a inhliam nual a, a ngal ruh a tliak a, a kut vei lam zungtang pahnih ( niin ka hria, an tuam tlat a, ka hre thiam lo, amah pawhin a hre bik lo) a tliak bawk. Tin, a hmai hmun thumah a thler a, hmun khatah vawi 5/ 6 vel chu an thui niin ka hria. A ban dinglam a pilh nual a, an tuam bur bawk.
   ( Rina pawh tunah chuan Pastor Quarter-ah a awm leh tawh a, a dam that zel theih nan i tawngtai pui zel ang u)

Misualin Chem-in vit hlum
    Oct. ni 13 zan dar 8:20 vel khan Pudu ACR Office piah lawkah khuan Tv. Simon Lian Uk, kum 21 mi chu misual tu tih hriat loh mi pahnihin   chemin an vit a, a hmunah a thi nghal.
    Simon-a hi Pu Khaw Za Thawng (Mizo ram) leh Pi Sui Khaw Nuam (Malaysia)te fapa pahnihna a ni a,   zuk leh hmuam ti ngai lo, tlangval fel tak, a nu leh a farnute enkawltu ber niin an sawi. Time Square Shopping Center lam atanga Miharja lamah hawng tur Pudu LRT station pana a kal laiin hetiang hian misualte chuan an lo ti ta mai a ni. An va lainatawm tak em! I tawngtaipui ang u. ( Oct. 17 khan Klang thlanmualah vui liam a ni) ta)

Birth-Day Kan Lawm

2011-10-21T15:29:00.001+08:00

Birth-day Kan Lawm
    Oct. ni 10 Thawhtan zan khan Nl. Masari leh Nl. Chhuani te thiandun chuan Pastor Quarter-ah an piancham lawmna an buatsaih a, an sawm angin thian tha leh kohhran upa-te an kal thahnem hle.
    Kan member-ten hetianga Pastor leh kohhran upate sawmna chang an hria hi lawmawm kan ti a ni. Mi tam zawk hi chuan khawi khawiah emaw thiante nen Pathian hming chhete pawh lam eih loin a terek zawngin birthday kan lawm a, chutiang mite chu Birthday a zawh rualin a lawmpuituten a rukin an nuih zat thin.
    Kan lawmna leh kan lungngaihna zawng zawng pawh kohhran leh Lalpa hnenah thlen nachang i hre thar zel ang u. Birthday min neihtirtu chu Lalpa a ni si a.

Penang leh Cameron Highland Bialfang

2011-10-21T15:11:00.002+08:00

Penang leh Cameron Highland Bialfang

    Oct. ni 8, Inrin chhun khan Pastor, Pu Saiate nupa leh Tv. Dintharate chu Penang lamah bialfangin an kal a, Oct. ni 9, sunday kha Penang MCF-ah an inkhawm.
    Penang MCF hi member an tam lo hle nain rawngbawlna zawnah chuan duai lo tak an ni thung. Thilpek lamahte hian an chak em em a, sum phut an pe thei reng a, mission sum pawh thawhhlawk thei tak an ni.
    Member mi 15 vel chauh an awm tawh a, chuti chung chuan chhuanlam engmah an siam ve ngai lo. Kohhran tana an tihtheihna zawn theuhah an tangruala an phur em em vek mai a ni. Johor Bahru te, Tumbuk leh Batu Untung lamte pawh hian entawn ve se, kan ti hle mai.
    Thilpek chungchangah hetiang hian i han sawi thui deuh teh ang u. Member 30/40 awmna Branch-ah hian sawma pakhat pe kim ta vek ila, Pastor pakhat chu kan chawm thei ngei ngei ang. Mi pakhatin thlatin sawma pakhat cheng 50 chauh pawh thawh ta ila, mi 30-ah chuan cheng 1,500 a ni daih. Cheng 1,500 thlatin kan thawhkhawm thei a nih chuan Pastor pakhat kan chawm thei tihna a ni. Sawma pakhat hi dik takin pe ta vek ila, chu ai chuan a tam zawk hrim hrim. Thlakhatah cheng 800 aia tam hlawh nei deuh vek kan ni zawk.
    KL MCF pawh hian khawilam atang mahin tanpuina an dawng bik hlei nem? Mipuiin sawma pakhat an thawhkhawm a, chumi atang chuan rawng an bawl mai a ni. Chuvangin Malaysia ramah hian hnathawk lo kan awm lo. Hnathawk vek kan ni a, kan thawhrah Pathian malsawm kan dawn atang hian sawma pakhat pe theuh ila, mite tanpuina dawn tum kher lovin mite tanpuitu nih i tum zawk ang u. Tichuan kan kohhran (MCF) hi mite tan malsawmna a ni zawk ang.
    Kan thupui ka hai palh! Pastor bialfanna lam kan sawi kha, hetiang hi a ni. Chutia Oct. 9 sunday Penang lama an inkhawm ban veleh chuan Cameron Highland lam tlawh turin an inpu chhuak leh ta hlawm a, chawlhni serh loh vang ni lovin amah chawlhni lal Pathian hminga inpu chhuak an ni zawk e.
    Penang atang chuan tlaiah Cameron Highland lam pan chuan an tlan leh ta vang vang a, sunday zanah Cameron MCF member-te nen inkhawm an hmang ho. Pastor-in nausen leh puitling pakhat baptisma a pe nghe nghe. Cameron MCF hi 2010 kum chanve hnu lam atang khan member an awm tawh mang loh avangin Pastor pawhin a tlawh ta miah lo kha a ni a, mahse tun hnaiah mi 9 lai mai an lo thlen belh leh tawh a, Lalpan rawngbawlna ramri min zauh sak lehah kan ngai.
    Oct. ni 10 Thawhtan tlai dar 6:30 khan Pastor leh a zuitute chu tluang takin Quarter an lo thleng leh ta a ni.

MCF THLATHAR MEETING

2011-10-11T02:24:00.000+08:00

Thlatin chawlhkar hmasa ber sunday hi EC Meeting hun a ni, tih inhrilhnawn ngai lovin kan hre tlang tawh awm e. Oct. 2, 2011 Sunday khan Meeting kan thu a, Lalpa leh a kohhran tana rilru leh thinlung zawng zawnga thahnemngai rorel khawl member 20 rual kan kalkhawm a, committee meeting boruak a hlimawm ngei mai.
    Hmanah Rev. Vulchuka’n a sawi hi ka hre reng thin, “pawn lamah thu fing leh tha tak tak sawi sawi thin mah la, rorelna hmuna sawi a nih si loh chuan engmah a tangkai chuang lo” tih hi! Kan upa zahawm tak takte pawh hian hei hi hre thar leh thin ila, ka ti khawp mai. MCF kalphung leh hmalak dan tur kan duhthusam chu huai takin meeting-ah kan sawi ngam tur a ni.

Sawisel suh: Sawisel suh han tih hian sawisel khap bur kan ni lo va, a tha zawk duh vanga sawisel chu a pawi lo vang. Amaherawhchu a hmunah ngei hian ni thei hram se, pawn lam atanga sawisel leh ringawt thin lovin a chhung atang hian siam that ngai a awm chuan siam that hna thawk ta theuh ila, a sawt zawk ngei ang. Pawn lam atanga sawisel hi borauk hnek ang vel a ni a, a sawt mawh phian.

Lawmthu: Lawmthu sawi tur a va han tam tak em! A hmasa berin vawiin thlenga min hruaitu kan Pathian hnenah lawmthu kan sawi. Kan rawngbawlna kawng chi hrang hrangah kan tlin loh leh fel lohnate min hai der sak a, rawngbawlna nung leh lawmtlak min siamsaktu kan Pathian hming fakin awm rawh se!
    MCF member kan pung mai chauh ni lovin, thilpek lamah pawh kan chak sawt hle mai a, tin kan tum ram kan panna kawnga UN lam kan din hmun chungchangah pawh mi tam tak hma an sawnin ramthumna kal chhuak tawh mai tur kan awm ta nual bawk.

Rawngbawlna hmachhawp: MCF rawngbawlna han tih hian Halelui dum dum lam a ni ber lo. Heng chanchinbu, Saptawng zirna, Lehkhabu chhuah, damlo damdawi in kalpui leh tanpui ngaite tanpui zawng zawng pawh hi rawngbawlna a ni. Rev. Lalthuamluaia khan “ kan mihringpuite kan tanpui hi rawngbawlna a ni ”a ti thin.
Tanpuina kan pek tawh dan tlangpui
      1. Tahan Chapchar kut:      693/-
      2. Penang mitthi        294/-
      3. Kapthangmawia damlo    500/-
      4. K. Lalnunpuia vuina      2000/-
      5. Kanan khua            427/-
      6. Mandalay Mizo Day       416/-
      7. MCWF Mothuam           1000/-
      8. TCYF Icon                             416/-
      9. Tv. Chhantea bible zir    300/-
    10. Missionary pa-2          4,800/-
    11. Damlo mi 15               1,500/-
    12. Inkutsuih 23          2,300/-
    13. Nausen Baptis 19      1,900/-

Crusade lam:
    Oct. 11 Thawhlehni atang hian Tumbuk lama Crusade buatsaih a ni dawn a, mahni duhdan pawha nung thei tawh lo, zu leh khawvel thil dang dangin a tihbuai nun beidawng tawhten Pathian chhandamna a thara an hmuhfiah leh kan beisei tlat a ni.
    October thla chhung hian Pi Remtluangi Mizoram chu Malaysia-ah rawngbawlna nei tura biak mek a ni. Pathianin rem a tih chuan Oct. ni 16 atangin rawngbawlna tan tum a ni. Pi Tluangi hi tihdam rawngbawlna keng a ni a, a pasal Pu R. Vanlalzaua hi thu sawi thiam mai tak niin, ani-in Pathian thu sermon lam a sawi thin ang.
    December thla chhungin Naupang Camp buatsaih tum a ni a, kan Pastor-in min hruai ang.
    Tin, January 2012 Chinese kumtharah Kawlram atangin Evan. Thlamuanthara lo kal tura sawm a ni tawh a, chu pawh Pathianin rem a tih chuan Jan. 17-23 chhun leh zan crusade hman tur a ni, biak in ( Shalom) pawh biak fel vek a ni tawh.

Combined Meeting:
    Kum khat chhungin Combined Meeting tum hnih kan nei thin a, kumin February Chinese kumthar khan tum khatna kan hmang tawh a, October 26 Deepavali ni hian hman leh tur a ni ang. Branch tinte a tam thei ang bera lo kal turin kan inhriattir e.
    Tin, Branch tinten kan rawngbawl dan leh kan thawhlawm sawma pakhatte chanchinbua tarlan theih turin min rawn thawn thei u la, rawngbawl dan inhriat tawnna hian nasa takin min tichak thei a nia.

MRO Co-ordinator thar:
    MRO Co-ordinator Pu Hualsailoa chuan ram thumna min pansan dawn tak avangin MRO chuan Co-ordinator tur a mamawh dawn ta, Sept. 25-Oct. 2, thleng dilna hawn a ni a, tichuan diltute zingah Pu Josiah Zathanga Khiangte chu thlan a ni.
    Tun atang chuan MRO Co-ordinator thar hi mipui lam pawhin kan hmelhriat tawh dawn nia.
             Contact: 012-691-0376

INLENG KAN NEI:
    October 3, 2011 khan CDU an tih mai ( Community Devolopment Unit) UNHCR hnuaia hnathawk nasa ber pawl officer Pi Joani chuan MRO Office min rawn tlawh a, thawktute nen boruak hlimawm tak an hmang.
    Pi Joani ( Nula chu a la ni nan) chuan MRO hmalak dan chi hrang hrang leh tuna hruaitu thawk laite leh hruaitu inthlan dan chanchinte uluk takin min zawt a, MRO member zat te, UN hmu tawh leh la hmu hrih lo zatte ngun takin min zawt bawk.
    Ruahmanna kan neihte pawh min zawt zel a, kan thalai tam tak zuk leh hmuam lama kan lo fel zawk zel theih nan, Camp buatsaih chungchang leh Computer zirna neih ve theih kan beisei thute kan hrilh a, UN- a kan harsatna chhungkaw inthun chungchang pawh “mobile resgistration lai khan mi singli vel resgister an ni a, an nupui fanaute nen chuan mi nuai khat dawn lai in ni si a, thawktu leh hnathawhna hmunin a la zir bawk si lo, dawhthei takin lo nghak hram hram phawt mai rawh u,” tih chu min chhandan a ni hrih phawt.

MCF Inkhawm
    Kan inkhawm boruak hi MCF rawngbawlna zawnah chuan a pawimawh ber kan tithei hial awm e. Sawi leh sawi hnu sawi leh thin ila, ni tin khel lovin hnathawh a tul a, sunday inkhawm hman lo leka hnathawk pawh tam tak kan awm.
    Keimahniah Pathian hriatna chu awm ve bawk mahse pawlho anga Pathian biak erawhchu kan dinhmunin a zir loh avangin mi tam tak chuan biak in kan pan thei ta lo a nih ber tak hi!
    Engpawhnise keimahni leh Pathian inkar hi a pawimawh lai tak chu a ni a, inkhawm hman lote pawhin kan awmna hmun atangin Pathian kan pawl thei reng tho a, chutiangin inkhawm thei dinhmuna dingte chuan inkhawm i thlahdah lo hram ang u!
    Kan inkhawm hian taksa zawnah leh rilru, thlarauah malsawm kan dawng thin a ni.

Zaihruaitute:
    Kum tantirh lam kha chuan zai hruaitu lam pawh thahnem an ngaiin zaipawl chenin theihtawp an chhuah thin a, tunlai hian a inringthul deuh em aw!!

MISUAL AN TAM ZUAL

2011-10-11T02:22:00.002+08:00

Oct. 5, 2011 Nilaini khan ACTS Clinic-ah Community hrang hrang hruaitute meeting koh a ni a, chutah chuan MRO Co-ordinator Pu Hualsailova pawh telin Dr. Carroline chuan hetiang hian thuchhuah a siam.
    “Tunlai hian Raltlante zingah misual kut tuar an tam em em a, a tlangpuiin heng misualte hi Vai Texi driver an ni thing.” Community hrang hrangah fimkhur turin min chah a ni.
    Misual-ho hian cheng leh kan neih thil dang dang min laksak mai bakah kutthlak hial tuarte pawh an awm nual tawh a, tunhnai lawkah pawh UN-ah interview chhang zo, pafa Johor lama hawng tur chu misual-in an neih zawng zawng an laksak bakah chemin a pa zawk chu a nghawngah an vit a, tin, Bahtu Awrang lamah pawh Driver-in a thiante punin Regufee tlangval pakhat chu an sawisa hrep bawk a ni.

Keini pawh misual kan tawk:
    Hun tei tak UN atang RST chhan hun tur beisei taka a nghah hnu chuan Oct. ni 6 (ninga) a chhang turin Lalrinthanga chu phur tak leh hlim takin Oct. ni 5 zan khan Pastor Quarter-ah a rawn invawm lut ve rawi a, a tuk zing Oct. ni 6-ah   RST interview tur chuan UN hmunpui chu a pan ve ta hna hna a. MCF General worker Manuna’n a va thlah nghe nghe.
    Chutianga interview a chhan zawh hnu chuan a hnathawhna hmun Tumbuk lama haw turin a inak chhuak ve leh a, hawnna man tur pawh Pastor leh Manuna’n an puk a ni awm e.
    Chutianga Mizo Pastor Quarter atanga a chhuak chu, Klang Bus chawlhna hmun pan tura a Taxi hawh chu Vai Taxi a ni tih hre tho mahse, misual a nih a ring bik si lo. Chu driver chinghne beram vunsin chuan a thian sawmin Lalrinthanga chu an hruai bo ta a, a hruaitute hi pa lian tak tak Manuna ang tiat vel an nih avangin tal chhuah ngaihna a awm tawh lo.
    Tichuan khua a lo thim tan tawh a, an hruaina hmun a hre si lo, a sum neih chhun Pastor leh Manuna hnen atanga a pukte chu an hnehchhuh a, phone an laksak hnuah pawh an la duh tawk chuang lo. Kut an thlak a, i thiante phone la, cheng 1,000 min pek loh chuan i sa kan ei ang tiin an vo reng a, kut an thlak leh thin.
    Chutiangchuan mangang takin a awm a, engemaw ti tiin MRO Office atangin chanchin kan lo hre ve thuai a, Co-ordinator chuan hma a han la nghal zung zung nain, heng misual-te hi khawiah nge an awm, engtia zawn hmuh chin nge hriat theih an ni si lo.
    Thian tha leh u leh naute an buai rilru hle tawh mai a, amah Lalrinthanga tak pawh a chiai zo tawh a ni ber ang. Phone-a biak pawh hleih thei a ni tawh lo va, an awmna hmun a sawi theih loh mai bakah a thu sawi pawhin mu leh mal a nei thei tawh hek lo. Chutichuan u leh naute tangrualin sum an han thawhkhawm a, misual ho-in an phut angin an bank account-ah cheng 500 chu an thun ta ngawt mai a ni. Mahse an dil zat cheng 1,000 an tlin si loh avangin an chhuah duh chuang lo va, a lu-ah a beng a, a nakah an hnek bawk a, thirin a kutah an vuak sak leh thin a, a hma lawka RST interview a chhan laia a hlimna zawng zawngte chu boruakah an liam zo ta!
    Khua a tlai tawh a, zing lam atanga engmah ei mumal tawh bawk si lo chu, a taksa a lo chau tan ta bawk nen, rilru pawh a mumal hleithei tawh lo. Mahse chu tak chu Pathian hnathawh a ni ngei ang, engmah hlauh leh pawisak pawh nei tawh lo niawm takin a chuanna motor kawngkhar chu a tlawh hawng thuai a, a tlan chhuak ta nghal a, Bank atangin cheng 500 leh a phone cheng 450 man lai an laksak tawh vang emaw ni, misual-te pawh chuan an umzui ta lem lo va.
    Chutianga a tlan chhuak chu a thlenna chi a hre chuang lo va, Chinese dawr pakhatah tanpui a va dil a, mahse an lo pui thei bik si lo. Duli dere pawh nei lo chuan Texi bawk chu biain Chinese driver pakhat chuan “ I awmna leh i kal duhna Klang hi a inhlat tawh lutuk, ka letleh hun tur nen chuan ka tlaivar a ngai ang, mahse he laiah hian Kawlram mi hnathawk an awm a nia,” tiin Kawl pakhat nen chuan a inhmuhtir a, Kawlpa chuan bus man atan cheng 15 a lo pe a.
    Zan dar 9 vel a ni tawh a, Bus chuan dan tur pawh hre chuang si lo hawina lam apiang chu a thim zual hian a hria a, vanneih a siamin Kotaraya tih inziak bus a hmu fuh ta hlauh mai, chutah chuan chuangin zan dar 11:30 velah Mizo Quarter a lo thleng ve leh ta hlawl mai a ni.
    Lalrinthanga hi Tahan khua a ni a, Malaysia a thlenna kum 3 vel a ni tawh. Tumbuk-ah vawk vulhna hmuna hnathawk a ni. KL hi a kal khat avangin hawn dan tur pawh a thiam em em lo a ni awm e. Hemi zan hian a tan kan lo tawngtai nasa hle a ni.
    ( Sawi zawm tawh lo mai ang )

Thu bawkna: Mi tumah hi an landanah misual a ni, tih kan hriat theih mai loh avangin keimahni lam kan fimkhur a ngai. Taxi kan hawh dawn a nih pawhin Vai ni lo hram se, tin, Texi man tlawm nazawng hi um lutuk loh tur. Zing hma lutuk leh zan tlai lutukah mahniin vak chhuak lo hram ila, Texi kan chuang dawn a nih pawhin thian neih theih hram a tha ang. Engkimah Lalpa venhimna dilin i tawngtai fo thin ang u.

Kristian Etik

2011-10-06T16:07:00.000+08:00

THUHMAHRUAI

Rev. Gospel Hrilvelthanga

Kawmpuitur (Computer) Khawvel emaw Hriatna khawvel tia koh kan chenna khawvel hi a changkang chak a. A Changkan ruala thil danglam tam tak rawn inher chhuak mêkte chanchin hi a chhia a tha hriat thiam ve a tul a. Nimin lawka thil chhuak thar leh chin thar kha vawiinah chuan hlobet par angin a chuaiin a chul ta mai si thin a. Mihringin tha leh hlu kan tih te, dik leh mawia kan pawmte pawh hi kan hun tawng azirin a inher danglam chho zel a ni. Mihring thiamnain khawvel a tichangkang a, khawvel hmasawnnain mihringte rilru sûkthlêk dan leh ngaihdan a thlakthlengsak ni berin a lang. Hmanah tuikhur atanga tui tawt thin Mizo nu khan tunah chuan khawl tha hmangin tui a pam chhuak char char thei tawh a. An tlangval laia Rediaw (Radio) pawh hmu ngai lo Mizo pa khan tunah chuan a fate Internet chat room leh Telivizon (Television) hmaa hun khawhral mai mai lo turin a zilhhau ngun ta hle bawk.

Tin, Zofate Kristianna kum za a lo tlin meuh chuan kan khaw thlir (worldview) dan pawh hi a insem kák ta chuk mai. Thenkhatin ramhuai hlauva thing bul, lung bul biakna lak ata hmasawnna leh changkanna min petu Isua Krista leh a thu zirtirte chu khawvel thil dang zawng aia an ngaihhlut laiin, thenkhat ve thung chuan Gospel êngin a nemngheh tâk, Mizo nunphung mawi leh ze duhawm tak takte chu an suangtuahna dârthlalangah pawh an hmu peih tawh lo niin a lang! “He khawvelah ringtu zawng an tam ngei e” tih hi “mahse ringtu nun dan thiam an tlem ngei e,” tih tel lo chuan a khingbai tlat ta si a. Zo nun mawi leh Chanchin Tha hi tunlai khawvel mila kan lâk kawp thiam loh avangin, Zo nunin a mawina a hloh hma hauhvin Zofaten zo nun mawi chu kan hloh bo lek lek tawh a. Zo nun mawi, chatuan daih Kristian Zo nun mawia siamtu kalvari chanchin pawh chu kawng chanve lekah kan hnutchhiah phal têp ta si a.

Ram sorkar, khawtlang, chhungkua, kohhran leh mimal nunin Pathian min pek “Zalenna” chu mahni ipte tihpuar nan, mimal hming thatna leh tisa châkna tlingtlâk nan kan hmang thiam ta hle mai a. Pathian duh dan thianghlimna nun tlachham tawh khawthlang rama kristiante tuizawng, Pathian leh a kohhran hmaa tiamthu inhlanna awm hauh lova innupatna “living together” tih leh ze inthup lepchiahna te pawhin thangthar zofate zingah zei takin tual a chai tan ta a. A tha leh a sual, a dik leh dik lo hian hringnunah awmzia a nei thei tawh meuh lo. Chuvangin, Zofaten Kristaa kan dinhmun leh nihna dik tak chu vawngnung chhunzawm zel turin Baibul zirtir dana khawsak a tul a. Krista zirtirna mila hringnun hmang thiam turin “Kristian Nun Dan Tha” (Kristian Etiks/Christian Ethics) hi chik taka kan zir a pawimawh ta a ni.

A.    ETIKS AWMZIA

Tawngbul lam chhuinaah chuan mihring nungchang leh chêt dan hmang sawifiah nan thumal pahnih hman a ni thin a. Chungte chu Sap tawngin “Ethics leh Morals” tih a ni.

1. Etiks (Ethics)
Sap tawng thumal “Ethics” hi Greek tawng “Ethos” emaw “Ethos (he-thos tia lam rik) atanga lâk chhàwn a ni a. A awmzia chu “mihring hnam nunphung (Culture) pakhat khatin a pawm theih hnam tih dan emaw thil chin than,” tihna a ni a. Ziaktu thenkhat chuan Ethos leh ethos (hethos) awmzia hi tihian an thliar hrang thin:
Ethos hian thil chin than leh chêtze kawnga dik taka khawsak hi a kawk a.
Êthos (hethos) erawh chuan rilru thlêkna lama dikna leh felna a sawi thung.

Mihring rilru sûkthlêk dan hian mimal tinte nungchangah hmuh theih “chet dan hmang” a siamsak thin a. Luke 22:39-ah Lal Isua chu “a dan pangngaiin” Oliv tlangah a kal tih kan hmu a. Heta “a dan pangngaiin” tih hi “a lo tih dan thin emaw chin than angin” tihna a ni. Tin, Mat.14:14-ah a thuawi ngaithlatute chu Lal Isuan a khawngaih ta em em a, tichuan mipui 5000 chu tlai leh puar takin a hrai tih kan hmu. Heta kan hriat tur chu Lal Isua thinlung vervek kha khawngaihna thinlungah thawkleh-khata’n a inthlak thut a ni lo va, a khawngaihna thinlung ngei chuan khawngaihnain mipui a en a, an mamawh a hmu a, chu khawngaihna chu thil tha tihah a rawn rah chhuak ta tih hi a ni.

    2. Moral
Tin, sap tawng thumal “Moral” hi Latin tawng “Mores” atanga lâk chhàwn a ni a. A awmzia chu “sawsaiti pakhat khatin a hriatpui emaw rem tihpui nungchang leh thiltih” tihna a ni. Ethics nen hian a awmzia a inhrûl a, sawi hran thiam a harsa hle.

    Thil chin than te, pi pu hnen atanga kan chhawm nun zel thurochhiahte leh hnam tih dan chi hrang hrang hi kan chenna hmun (society) azirin a danglam a, hnam azirin a inang lo thei bawk. Entirnan, chibai an inbukin Korea-ho chu kâwng chen vela hniamah an kun bu lâwp lâwp thin a, mikhual chibai buk tur an tam tum phei chuan an hah thei thin hle a ni. Kawl miziaah hian inzahna entir nan aia upate leh zirtirtu emaw thuneitute hmaah kut kuangkuahin thu sawi thin a ni a. Chu mizia chu Korea hnam tih danah chuan inzah lohzia tih lanna chi khat a ni ve tlat thung. Hetia a hun leh a hmun azira thil a danglam thin avangin hnam tinin mahni hnamzia leh tih dan hmang chu an sawsaiti milin tehna an siam thin a ni. Mizo mizia atana tha leh mawi chu hnam thenkhat tan thil pawm tlâk loh a ni thei bawk.

Chuvangin, mihringte awm dan, chet dan leh thil tih thante chu pawm tlâk a nih leh nih loh hriat theih nan khawvel pum huapzo tehkhawng (the universal norm) kan neih a lo tul ta a. Mahse, he khaikhawmna tehkhawng (the collected norm) hi mihring hnam nunphung atangin a chher chhuah theih loh a ni. Chuvangin, hringnun tehkháwng (the norm of human ethics) dik tak kan zam chhuah theih nan Etik awmzia leh a tumte chu zau taka chhui a lo pawimawh ta a ni.
a.    Etik: a then sawm a, a chhui fiah.
Etik hian miin a chhiat leh tha hriatna atanga a thiltihte chu dan kawngkal fel tak hmangin a tahtawl te tein a thensawm a, a chhui fiah thin. Mimal ngaiha thil dik chu khawtlang mit hmuhah sual a nih theih avangin he chhia leh tha hriatna ril atanga thiltih hi a dik leh dik lohna tehkhawng hmanga kan chhui chian a tul a. Tichuan thil dik titu leh thil sual titu chu ama thawh rah chunga mawhphurtu a lo ni dawn a ni. Mi tupawhin “duhthlan theihna zalen” (the choice of free will) kan nei theuh a, he duhthlan theihna hi mihring thil chin than leh thiltih than” te innghahna (tobul) a nih avangin fing taka kan hman thiam a pawimawh ta a ni. Prof. Ross-a’n “etikah hian ngaihdan dik leh tha a inkawp reng a, pakhat hnawlin a pakhat zawk a pawm theih loh va, dikna leh thatna hi an kal thiang reng a ni,” tiin a sawi.

(b) Etik: Mihring nun a endik
Tin, Etik hian mihring nun awmzia leh a dam chhan chiang takin a endik a. Mihring mizia, nihphung, a nungchang leh a thiltih lam thlengin a thlir thin. Heng zawhnate hi kan inzawt thin tur a ni.
-Mihring tana tha chu engnge ni?
-A chang changin kan tih châk zawng tak kan han tih mai hi a pawi lem dawn em ni? -Engvangin nge thil thenkhat chu tha leh dik ti siin a dang erawh chu tha lo leh dik lo kan tih leh miau thin?
Heng zawhnate hi mahni tanghmasial lova chhang turin mimal tinin mawhphurhna kan nei a. Heta ‘endik’ tih tawngkam hian sikul naupangin a chhiarkawp zirlai a chawh dik leh dik loh endikna lam a huam tel lo va. Mimal nuna chhiatna thlen thei emaw pawi khawih thei mihring thiltih lam zâwk hi a huam a ni.

a.    Etik: Buaina leh Harsatna hmaah

Thil bul lam chhui mi, Kristian mifingte (Christian philosophers) chuan etik dik tak chu mihring hi harsatna te, buaina leh thil khirh pui pui nen a inhmachhawn hunah hian fiah takin a rawn lang chhuak thin tiin an sawi a. Hei hian etik (nun dan tha) lam hawia inzirtirna kan mawmawhzia min kawhhmuh a ni. Tichuan, mihring chhia leh tha hriatna ril takin a chinfel tawh mihring duhthlanna atanga hmuh theiha rawn irh chhuak, Kristian nunphung dik duhawm tak chu “Kristiante danglam bikna” a lo ni ta a. Hei hi Prof. O’Donovan-a’n “Kristiante mawhphurhna pawimawh ber a ni,” tiin a sawi.

Mahse, tunlai khawvel dinhmun hian dikna leh thatna hi a tipiangsual tawh a. A dik leh mawi, a sual leh tha thliar hran theihna mihring “chhia leh tha hriatna” pawh hi a ngâwt bel tlun tawh a. Thil tha lo pawh chu a that lohna haiderin, thil dik leh hlu-a ngaiin ni tin nun khawsaknaah an seng lut a, thil tha lo tih kawngah an hmanhlel bawk thin.

Etik hian thil dik leh thil dik lo chiang takin a thliar hrang a, mihring nun leh etik hi thenhran theih a ni lo. Etik hian mihringin a chanvo leh a mawhphurhna dik tak leh tha taka a hlen zawhna hi a kawk a. Etik chu awmze dik tak leh dikna, thinlung nena nitin mihring chanvo leh mawhphurhna kan hlen zawh fel theihna hi a ni. Etik awmzia leh a tum kan sawi tak zawng zawngte khi Phi. 4:8-9-a Tirhkoh Paul zirtirna hmang hian tawi tein kan khaikhawm thei a ni.

Etik Nihna    Etik Tehkhawng    Etik Puitlinna
1.    a dik apiang te
2.    a zahawm apiang te
3.    a fel apiang te
4.    a thianghlim apiang te
5.    a duhawm apiang te
6.    a thangmawi apiang te
Miten tha an ti ang a, an fak bawk ang
Ngaihtuaha nunpui nghal tur a ni.

Tin chang 9-ah ti hian a sawifiah bawk:

ETIK TOBUL    ETIK PUITLINNA
1.    Thil Zir
2.    Thil Pawm
3.    Thil Hriat
4.    Thil Hmuh
Ti thin rawh u.

Chuuvangin, mihring thiltih hi etik a la ni mai lo va, a dik leh dik lo tehkhawng hmanga kha thiltih kan tehna kha etik chu a ni.

B. ETIK CHI HRANG HRANG

Etik awmzia leh a tum kan tar lan tâkte khan khawvela sakhuate, hnamte leh mimal tupawh a huam vek a. Kristiante leh Kristian ni lote tan pawha pawm leh zawm theih tura awmze nei ril leh zau a ni.

Etikah hian mihring dam chhan, a thiltih leh thil tum zawng zawng chu chîk taka enfiah a nih thin avangin etik nena inkungkaih lo tumah kan awm lo va. Hetia etik nena kan inzawmna hi mi tam takin an hre thiam thin lo va. Tichuan khawtlang tibuaitu an lo ni fo thin. Heta kan hriat hmaih hauh loh tur thil pawimawh tak mai chu, etik hi, “phuartu, mihringte zalenna kawng khartu leh mite rilru lung-In-a khungtu a ni lo,” tih hi a ni. Keini Zofate zingah etik (mihring chanvo leh mawhphurhna) lam hawia inzirtirna kan tlachham hle a. Kan Pathian thu hril leh chhandamna kempinga sarmonte hi Eden bawhchhiatna leh sual inchhirna hruiin a thlung bet tlat a. Sual inchhirna, tah leh lam dawrh dawrh nun zêmah kan inkhung a, Kristian nun kawng dik inzirtirna Kohhranin buatsaih mah se, mi tam takin kan zir puitling ngai thin lo a ni. Tuna Kristian nun kan tih fo hian Krista anna nun dik tak a pawh pha rih lo va. Tin, Etik lam chhuina lehkhabu pawh sawi tham kan la nei lo a ni.

Chuvangin, Zofaten Kristianna hi a thuanawp zawngin kan chênda têp tawh a. Kristian sawsaiti leh Kristian nun reng reng hi englai pawhin Baibul etik (Bible zirtirna mila khawsakna) hian a cheimawi ang a, a tivul ngei ngei tur a ni a. Baibul etikin thu a neih phâk lohna sawsaiti leh mimal nun chu a ro va, an nunah sualna chi hrang hrangin ro a rel thin. Chuvangin, etik chi hrang hrang leh an thil tumte hi kan hriat bel hle a tul a. A hmasain a hnuaia zawhnaah hian kan ngaihtuahna innghat phawt se la a tha ang.

i. Mihring tana tha chu engnge ni?
ii. Mihringin chan/neih a châk ber, a damchhan chu engnge?
iii. Mihring nuna thatna sangber (emaw) tha chungnung ber (Latina tawnga Summun bonum) an tih) chu engnge ni?
Heng zawhnate hi mimal leh sawsaiti hmasawn nan etik kawng zawhtu (ethicist)-in chîk tak leh dik taka a chhan thin chuan amahah etik nung a awm tihna a ni a, mahse chu etik chu khawvel ngaiha dik leh nung nge, Baibul zirtirna mila dik leh nung tih hi thliar fuh thiam a pawimawh hle thung.

Zau taka thlirin etik hi thlur lian pui pui pahnih, sakhaw lam hawi etik (Religious ethics) leh khawvel lam hawi etik (non-religous ethics) tiin then hran a ni thin. He thliar dan thlur hnih hi a tlangpui chauhin i han chhui thuak thuak teh ang.

1. Khawvel Lam Hawi Etiks:
Khawvel lam hawi tih hian that lohna te, sual leh fel lohna lam hlir a kawk lo va, khawvel sakhaw lian deuh deuh; Kristian sakhua, Juda sakhua, Islam sakhua, Buddhist sakhua leh Hindu sakhuate zirtirnaa innghat lo, mimal atanga puak chhuak etik lam hawia inzirtirnate a nih avangin Khawvel Lam Hawi Etik (KLHE) zirtirna tiin a hming pek a ni. Tawngkam danga kan sawi chuan, khawvel sakhuate inzirtirna lehkhabu (entir nan Baibul etc...)-a zung kai lo, khawvela mi thiam hmingthangten etik lam hawia an zirtirna chu Khawvel Lam Hawi Etik tia koh a ni.

Heng etik thlirna hian mihring tana Tha Chungnung Ber (Summun bounm/the highest good of man) chu tar lan a tum ber a. Khawvel taka ngaihtuah phei chuan he lei hringnun dam chhung tawitêah hian hlimna zawnga mite an lo buai phîli hle thin hi an demawm lo a ni. Mahni zalenna chu mahni hlim leh lawm nan, thlamuan nana han hman hmiah mai hi a pawi dawn em ni le? Rilru hah thawi dam nana eng lo han tih zeuh hi a thiang ve tho dawn lawm ni? tiin zawhna tam fe kan inzawt thin a. Tin, he khawvel lam Hawi Etik hi hmanlai Dan (Hmakhawsang Dan) ah te, mihringte tawnfiah leh finna infawkkhawmah te, Pi pute ngaihdan leh tih dan hmangah te a inngat bawk a ni. Chuvangin, tun hmaa khawvel thiamna lama mi fing hmasate chhui dan hai chhuah a tul ta a ni. KLHE peng hrang hrangte chu a hnuaia mi ang hian a chhui theih.

(a) Nikawmechian etiks (Nicomachean ethics)
Mihringte mizia, nungchang leh mawhphurhna zir chhuaktu Greek mi fing Aristotle-a (384-322 BC) zirtirnate chu Nikawmechian etiks tiin BC. Zabi 4-na bawr vel khan an lo thui khawm tawh a. He ngiihdan zam chhuaktu Aristotle-a chanchin hi i han thlir zawk teh ang.

Aristotle-a hi kum 384 BC khan a piang a. A pa chu Masedon (Macedon) ram Lal rorelna hmuna damdawi lam thiam (doctor) an chhawr ber a ni. Kum 17 mi a nihin Aristotle-a chu Athen khuaa Plato-a sikulah a kai tan ve a. Tichuan Plato-a ke bulah kum 20 chhungin finna leh thiamna thûk tak tak a zir chhuak vek a, chu sikul vekah chuan zirtiritu hna a thawk nghal a. A zirtirtu Plato-a thih hnuah Alexandria khawpuiah a insawn a. Chutah chuan Macedon Lal Philip II-na (Alexander Ropuia an tih bawka) fapa chu kum thum chhung a zirtir bawk. Tichuan 335 BC khan Athen khawpuiah a kir leh a, he finna khuaah hian Linsem (Lyceum) tih sikul thar a din a, chutah chuan kum 12 chhung a zirtir a ni.

Aristotle-a hian etik chungchangah zirtirna inkungkaih deuh deuh chi hnih a nei a: mihring mimal nuna thil thleng leh sawsaiti (emaw) sorkar huapa thil lo thleng-te a ni. Aristotlea’n hringnun vawrtawp (the end of human life) chu “Hlimna (happiness),” hi a ni tiin a zirtir a. A awmzia chu hlimna hi mihringte damchhan ber a ni tihna a ni. Mahse chu hlimna chu he khawvel hausakna te, nawmsipbawlna chi hrang hrang leh hmingthannate hmangin a neih theih loh va; mi tupawh hming thang hle mah se, a thih hmain a hming chhe ve leh thei a, mi hausa ber pawhin hlimna leh muanna nei lovin a khawvel hringnun a hmang liam thei bawk. Chutiang bawkin, hlimna zawnga khawvel nawmchenna par chi hrang hrang tlântute hian a tawpah chuan mit tui tam tak nen hringnun hi an mangtha leh mai si thin a.

A nih leh Aristotle-a puan chhuah hlimna chu engtinnge kan chan theih ang? Aristotlea chuan he ‘Hlimna’ hi mihringin rilru ngaihtuahna fim tak hmanga he khawvel thu dik, thu tak, thu ril thûk thirh pui pui a suangtuah a, a thensawm a, a chhuinaah hian a chang thei a ni” tiin a zirtir.

Mi tam tak tan he Aristotlea hlimna hi chan a harsa hle thin. Ama nun ngeia a lo hman, a lo tawnfiah tawh thin a nih avangin Aristotlea tan chuan he hlimna hi a tak a ni. He etik hi sualna leh bawlhhlawhna pakhat te mah tel lovin Aristotle-a’n a chher chhuak a ni tih hi hriat reng a pawimawh a. Mahse, mi lungmawl leh zir thui lote tan he hlimna hi a chan ve theih loh tihna ang a ni.

Tin, khawtlang inrelbawl dan chungchangah Aristotle-a’n tihian a zam chhuak: “Mi tha chuan sawsaiti (khawtlang) tha a siam a, mimal thatna chu khawtlang thatna leh hmuingilna a ni a, mi tha tak tak leh thatna a punna khawtlangah chuan hlimna leh muannain hma a hruai a, tichuan sorkar tha a din thin a ni” tiin.

(b) Epikuirian etik (Epicurean ethics)
Greek mi fing Epicurus-a (341-270 BC) chuan Athen khaw hluiah sikul a din a. Khawvel leilung leh mihringte lo pian chhuah dan hi ama finna hmangin a duang chhuak ve a. Khawvel leilung chungchangah tihian a sawi, “Van boruak zau takah khian thil te tak tê tê an phe leng kual vel a, chutiang thil tête chu an insu ta a, tichuan tuna khawvel leilung hi a rawn piang chhuak ta a ni, chutah chuan mihring a cheng a ni,” a ti a.

Chuvangin, Epikhiuras-a tan chuan leilung leh mihring hi siamtu nei lova rawn puak chhuak ve ve an nih avangin mihring chungah mihringte aia thunei zawk hi engmah a awm lo va, thil eng pawh ti se mihring hian vênthawn tur a nei lo va, zalen takin a che (khawsa) thei a ni tiin a zirtir a. Epikhiurasa’n mihring damchhan (summun bonum) chu, “nawmna, hlimna vawr-tawp hringnuna rawn thleng hi a ni,” tiin a puang a. He hlimna vawtawp chang tur hian mihringin dikna leh felna te, rilru dikna te, tlawm taka khawsakna nun,” te hi a hnuchhawn tur a ni tiin a zirtir bawk.

Hringnun damchhan (hlimna vawrtawp) a zam chhuah atang hian Epikhiuras rilru hi a verther lo va, a thil tum tak pawh hi a ngil hle a ni tih a hmuh theih. Mahse Epikhiurasa hian thlir hmaih pakhat a nei. Chu chu thenkhatin dikna leh khawsak tlawmna (awlsam taka nun hmanna) kal tlanga hlimna leh nawmna an chan theih laiin, lehlama mite erawh chuan dik lohna te, chungnunna te, vertherna leh vervekna hmangin hlimna vawrtawp an lo chang ve thin tih hi a ni. Baibul zirtirna atanga thlir phei chuan mihring leh leilung lo pian chhuah dan (Epikhiurasa Filosawfi) hian awmzia a nei reng reng lo va. Tirhkoh Paula’n Athen khuaa Epikhiurasa zirtirte (zirtirna pawmtute) hnenah Isua Krista hringnun a channa leh a thawlehna thu a sawi khan an rilru a kuaiher teh chiam lo a nih kha.”(TT 17:16-32)

(c) Hedonizim (Hedonism ) Sap tawng thumal Hedonism hi Greek tawng “hedone” (nawmna, hlimna) atanga lak chhawn a ni a. Chuvangin hedonism awmzia chu, “mahni hlimna” tih a ni. Mahse, Hedonism zirtirna keng kawhtuten nawmna leh hlimna chu dangdai takin an hmang ve thung. Hedonism chu hetiang hian a khaikhawm theih a ni.
i.    Hringnun vawtawp chu NAWMNA a ni a, tisa châkna zawng zawng hi nawmna hmahruai a ni a; châkna dik leh dik lo te, mihring felna leh hringnun tehfung thlengin chu nawmna chuan a dawlh fai vek avangin a dik leh a sual, a mawi leh a bawlhhlawh reng reng a awm thei tawh lo a ni. Chuvangin, mihring damchhan chu “nawmnaah” a tawp a, he mi piahah engmah a awm tawh lo. Lutuk awm lova nun hman hi a thiang.
ii.    Khawtlang huapa nawmna emaw hlimna a awm thei lo. Mahni tana chakai khawrh vek kan ni. Mahni tanghma haia nun hlimna zawn hi a pawimawh ber fo. Mihringin a thian tan a hlim kep thei lo. thatna pawh châkna leh mahni hmasialna khurah phum bo vek an ni. Mihring chu a châknain a ei zo vang.
iii.    Hmangaihnain nawmna a thlen thei lo. Hedonism chu pumbilh nun a nih avangin tumah hmangaih theih a ni lo va, mahni vengte ei hlum hi a pawi lem lo bawk. Mi tha leh mi sual a awm theih loh va, hmangaihna hi mahni hmasialnaah chuan phum bo a nih avangin hedonism thu uar ber chu, “Ei la, In la, Hlim takin awm rawh, naktukah i thi dawn si a,” tih a ni.

Amaherawhchu dikna te, dan leh dunte leh felnate tel lo hian kan khawsa thei hlawl si lo. Remna leh muanna te, thatna leh zalenna te chu khawtlang nuna a lo par chhuah theih nan sorkar-in pulis (Police) leh sipai te min buatsaih sak a ni.

Tin, mihringte hi Pathian kutchhuak kan ni a. Dikna thinlung leh ngaihtuahna thianghlim nei theiin min din a. Dik taka khawsatu tan Pathianin lawmman a buatsaih sa diam tawh a. Hmangaihna hian hlimna min pe a, lawmnaah min hruai lut thin. Dikna tlakchhamnaah chuan lungngaihna leh duhamnain ro a rel a, retheihnain a luh chilh bawk thin. Chuvangin, Paula’n ringtute chu “Lalpaah” hlim (lawm) turin min fuih nasa (Phi 4:4ff; 1Kor 7:40). Entirnan, ka thenawm pain kuminah buh kham khawp a thar a. an chhungkuain an hlim em em a. Kei erawh chuan kham khawp ka thar ve lo va. Kan lungngai deuh hlek a. mahse thenawmpa hlawhtlinna kha va lawmpui mai lovin Lalpa zara a hlawlhtlinnaah ngei khan ka va lawm ve thei tur a ni.

Mihring tana tha chungnung ber chu Pathiana lawmna leh amah nena “thinlung inzawm thlapa inpawlna” hi a ni a. Mahse, Kristian thenkhat chuan kohhrana inhman vena te, Pathian ram zau nana inpumpekna leh thawhlawm thawh tam avangin hlimna leh lawmna an beisei thin. Nawmna hi malsawmnaa ngaiin Pathian hmangihna pawh chu in leh lo inbenbel nan, lehkha thiam nan, hausakna leh hmingthanna atan CHUAH hman an tum thin. Heng mite hian Pathian hmangiahna chu Hedonism zirtirna hrulah an kalpui a ni.

Kristian tana hlimna leh lawmna dik tak chu Pathian hminga mi tana kan impekna (inhmanna) ah a chan theih a. Mahni nuna Krista hmangaihna chu mite lawmnaah lo chang mawlh rawh se. Mite tana hlimna hmanrua kan nih venaah, rilru lawmna chuai thei lo kan lo dawn hi keimahni leh mite lawmna atanga rawn piang chhuak a ni mai lo va, Pathian thilpek zâwk a ni.

“A rem lo ve, a thiang lo ve,
Mahni hmasiala’n piang lo ve,
I lawmna lili par iang e.”

(d)Zutilitarianizim (Utilitarianism)
David Humea (1711-1776) hi Scottish mi, Germany ram Edinhurgh khawpuia piang a ni a. Kum za bi 18-naa British rama mi fing filawrte zinga chhiar tel a ni. Humea thuvawn chu, “mihring thiltih hi a thil tawnfiahin a hrin a ni,” tih hi a ni. Humea hi Utilitarianizim zirtirna hmahruaitu a ni.

He thurin/ngaihdan zam chhuaktu tak tak chu Jeremy Benthama (1748-1832) a ni a. Utilitarian sikul a din bawk. A thu uar ber chu, “Mipui mimir tana hlimna sang ber,” hi a ni. Mihring thiltih hian mi dang tan hlimna a pek (thlen) si loh chuan chu thiltih chu rah nei lo thingkung ang a ni a, a tangkai hlek lo. Chuvangin, mi tam tak tana tangkaina hi thil tha leh tha lo thliar hranna tehfung a ni tiin Utilitarian ho hian an puangzar.

Han thlir thuak chuan he thurin hi a that hmel hle a. Mahse mi tam tak hlim nan, mi tlem zawk (tute emaw) tangkaina chu tihchingpen a hlauhawm deuh a ni. Tin, he thurin hian mi dang tan hlimna thlen thei eng thiltih pawh a huam vek a. A zungah innghat lovin a rah chhuah zawkah a innghat a. Lal Isua’n thing kung tha lovin rah tha a chhuah lo a lo tih hi Utilitarian ho tan chuan thu pawm harsa tak a tling. Mi riltu ngil thiltih chu a ngil a, mi rilru kawi thiltih erawh chu a sâwi thin.

(e) Marksian etik (Marxian Ethics)
Marxian tih mai hian Karl Marx-a te, Frederick Engels-a te leh an zirtirte ekonomik leh politik thurin lam min thlirtir a. Marxian tih phei hi chu Germany rama mihring khawsak dan zirna lama mi thiam (sociologist) Karl Marx-a (1813-1883) hming chawia an rel chhuah a ni nghe nghe a. Marx-a nu leh pa te hi Juda mi, eng emaw remchanna beisei avanga Kristianna rawn vuan hnuhnawhtute an ni (Krista an hmagaih vang a ni hauh lo). Marxian thurin hi Karl Marx-a leh a thianpa Engelsa-ten kum 1848-a an tihchhuah komuinis Inpuanna (Communist manifesto) tih thuziak atang lak a ni ber. He thuziak hian mi retheite, mi hnuaihnug zawkte leh neih nei mang lo kut hnathawktute hamthatna leh hmasawn tlanna lam a sawi uar hle.

Marx-a hian etik lam hawiin zirtirna engmah hnutchhiah lo mah se, a thurin reng reng hi “mihring leh sawsaiti” a thlir danah a innghat tlat a. Mimal thiltih a chhui fal ngai lem lo va. Dikna leh dik lohna hi khawtlang huap veka thliar hran thiam a tul a ni tiin a sawi. Marx-a etik chu tihian a khaikhawm theih a ni.
i.    Tisa khawvel thil hi a pawimawh ber. Chutah chuan thlarau lam thu hla reng a leng lo. Pathian a awm hek lo. Sakhua hi mipuite ruih hlo leh sorkar hmanraw pakhat mai a ni. Sakhuana hian mihring leh mihring inkarah buaina a siam a, inthlauhthlaknain a daidan bawk.
ii.    “A rahah in hre mai ang,” tih thuvawn hi a vawng nghet tlut. Mahni thil tum tihpuitlin nan (rah tha hmuh theih nan) thil engkim tih a thiang a. Sual leh dem kai a awm thei lo vang.
iii.    Sorkar ding lai thlak turin thi leh thau nena tan lak a tul lem lo. Mahse a thlakthleng theih dan kawng awm chhun chu zawh mai tur a ni tiin a sawi thung.
iv.    Mimal tinte tanrualna leh thawhhonain khawtlang thatna a siam.

Marx-a hian sakhua a awm tih a hria a, a ring lo a ni. Khawtlang siam that nan mimal neih sum, bungrua leh In leh Lovin tuar (hnehchhuh avanga tuar) mah se, a thiang vek tiin a zirtir a. Mi thenkhat tahna chu thenkhatte lawmah chang se tih nen a inthuhmun reng a ni. Tirhkoh Paula’n lawmte chu lawmpui ula, tapte chu tahpui rawh u (Rom 12:15) a tih nen hi chuan a inpersan hle thung.
(f) Existentialism (Eksistensializim)
He ngaihdan hi Indopui pakhatna laivel German ramah a lar tan a. France ramah erawh chuan Indopui pahnihna a zawh fel rual chiah khan a ni. He rindan/ ngaihdan vuantute hi Khawvel thu thuk leh thuril lam chhui thin mi fing tak takte leh lehkhaziak mite ni hlawm mah se, “thu unkhun tak tak ni lovin alemchan lam hawia thuziak hmangin an ngaihdante (thurinte) chu an puang darh thin.” He ngaihdan pawmtute hian sikul emaw pawl emaw an din lem lo. Mahni mualah mahni hmuh leh hriat ang angin an lâm ve mai a ni.

An thuvawn laimu chu, “Nun hian awmzia a nei lo,” tih a ni ber a. Thenkhatin Pathian chu a thi a, mihring chunga rorel thei tumah an awm lo. Tun hmain, mihring tana ruat lawk ruahmanna pakhat mah a lo awm lo va, tuna a nihna hi amah chu a ni mai. Mirhing engmah lo mai a nihna hi a zalenna leh a engthawlna chu a ni,” tih hi an tlangzarh a. Thenkhat erawh chuan “duhthlanna hi hringnun laimu a ni a, kan duhthlanna chu keimahni kan ni (mahni duhthlannaah kan khawsa). Mahni duhthlannain kan indin chawp a, khawtlang huapin thil tha a tih theih loh va, inbumna mai a lo ni. Chuvangin “mimal chanvo leh mawhphurhna hi mahni khawsak nan a pawimawh ber,” tih hi an uar hle a. Tichuan, Pathian awm ring lotu Jean Paul Sartre-a ve thung chuan “mihring chu hlauhthawnnain a khat a, hringnun lah hi engmah lo mai a nih bakah thihna dar vuaa thlanmuala mi hruai luttu a ni bawk si a, mimal zalenna pawh chu ei leh in zawn buaina te, sorkar inawp dante leh khawtlang dinhmunte hian a phuar bet tlat a, mahni intihhlum mai hi zalenna vawrtawp chu a ni,” tiin beidawng takin a puang. Kristian Pathian thu thiam Soren Kierkagaard-a te, (1813-1855), Rudof Bulfmann-a (1884-1976) leh Paul Tillia (1886-1965) te hian mihring nunphung leh awmzia hi sakhaw lam hawia an chhui avangin an chanchin leh zirtirnate chu kan tar lang lo mai ang.

(g) Nihilizim (Nihilism)
Sap tawnga Nihilism hi Latin tawng thumal Nihil atanga lak chhawn a ni a. A awmzia chu “engmah lo” tihna a ni. He thumal hi Russia mi, thawnthu ziak thiam hmingthang Turgenera’n a rawn hmang lar tan a. Khawvel inrebawl dan thar din chhuak turin Karl Marx-a bovin 1850 bawr vel khan Russia ramah pawl pakhat anga din a ni. Kum 1870 hun lamah phei kha chuan nasa taka chawi lar a lo ni chho va. Nihilism pawl hian “ram sorkar ding lai inawp dan, inrelbawl dan, Dan leh thuneihna te, dikna leh rorelna te, pipute thurochhiah zawng zawng te” `chu thiah a, tihboral fai vek a tum a. An ngaihdan chu Dostoevki-a’n “Pathian awm lo sela, engkim tih a thiang,” tiin a sawi. Mihring chanvo leh mawhphurhna dan chu mahni tanghamsial takin tihian an zam chhuak.
i.    Zalenna a awm theih nan, Pathian leh Pathian nena inkungkaih thil reng reng chu tihchimih vek tur.
ii.    Thuneihna a bo nan dikna hi nuai bo a ngai.
iii.    Felna leh dikna te, khua leh tui hmasawnna te, in leh lo neih sum te, a dik leh a sual thliar hranna te leh inneihna chenin hnawla tihboral vek tur.
iv.    Mimal hlimna chu mimal Dan sang ber ni rawh se.

Nihilism thurin chawi lartute hian Pathian chu thil hlauhawm, tihbaihawm tak, thikthu chhia leh Dan tê leh lian hmanga mihringte phuar bet thintu a ni tiin an puang darh thin.

Mahse, Pathian chu hmangaihna a nihzia te, mihring hi a anpui ngeia a siam thu te (Gen 1:26) leh Krista hmangihna avanga zalen kan nihna hi an thlir hmaih fo va. Khawvelah hlimna kumhlun a awm, chu chu Kristaa kan lawmnaah chauh a chan theih a ni.

2. Sakhaw Lam Hawi Ethics
Khawvela sakhaw lian deuh deuh pangate hian mihringte nitin nun khawsak dan tur kawng duhawm, tha, pawmtlak, leh zawmtlak tam tak min zirtir a. Mihring hlutna leh mawhphurhna pawh hi chiang taka inzirtir thin a ni. Mahse, nungchang tha inzirtirna piaha thil lo la thleng tur inkawhhmuhna chungchangah erawh chuan Kristianna hian sakhaw dang aiin a sawi ril zawk a ni. Tun laiah Pathian thu thiam thenkhatin Kristian sakhua (Baibul sakhua) leh sakhaw dangte hi chhandamna chungchangah inthuhmun rengin an sawi tan hi chu a pawi hle a ni. Chatuan nunna kawng pakhat chauh a awm, Isua Krista a ni. Chatuan thu tak pakhat chauh a awm, Isua Krista a ni. Chatuan nunna pakhat chauh a awm a, Isua Krista a ni tih hian chhandamna (van ram kai theihna) awmzia leh a neih theih dan min zirtir chiang hle a. Tin, sakhaw dangin “khawngaihna avanga rinna kaltlanga chhandamna” hi an nei ve lo a ni.

Khawvela thil thleng leh thiltihte chu Baibul zirtirna eng atanga kan enfiah dawn avangin sakhaw dang chanchin leh an zirtirnate chu chhui a tul lo vang. Khawvel pum huap zo tehkhawng chu Pathian lehkhabu Thianghlim (the Holy Bible) hi a ni si a. Chuvangin Kristian Etik (Nun dan tha) hi kan zir chian a pawimawh hle a ni.

TI HIAN KA NGAIHTUAH

2011-10-06T15:35:00.002+08:00

Editor

Kan in luah pindan zim teah chuan chhungkuain kan inchhungkhawm ve a, kan mut hmun chu kan chaw eina a ni nghal a, chu hmunah vek chuan inleng kan kawm a, TV kan en nghal bawk. Dik taka sawi chuan khaw lama kan vawk in tiat velah chhungkaw khawsak kan rel a, nupuite sam zai tla chhar khawm tur kan hmu thei hlur a, kan chenna a zim ang bawkin kan khaw hawi a zimin, kan rilru pawh a zim sawt hle a ni ta ve ang.
    Kan beisei leh lungkham ber chu Ju En a ni a, chu hmunah chuan mit kan len a, kohna lo thlen hun tur kan ngaichang a, mahse keini lah chuan MRO card kan renew chhen mai a la ni si. Thianten RST an chhang dawn tih kan hriat chuan kei hi min va ko har ve, kan ti a. Thiante an lawm laiin kan lawm ve thei tlat lo. Khawinge a hmunpui lam i han luhchilh teh ang, kan han ti a, mahse an lo khar leh tawh bawk si. Pu Saia kan han rawn a, “ an rawn ko ve mai ang che u,” tih bak chu min han hnem ngaihna a hre bik si lo.
    Thiante an liam zung zung laiin chhungkaw inthun theih hun tur kan nghak ve chauh a, Nupui fanauten khawlai len an timin, pawimawh tawp khawk loah chuan vah chhuah an ngam si lo, inchhung zimte chu kan chhungkaw khawvel a ni ta ber mai. Aw.. hetiang ringawt chuan engtin nge maw kan tih tak ang le!
    Engpawhnise kan tihtheih a tlem em hi! Pathian hnenah i hlan leh phawt mai teh ang u. Mi fing leh felte chauh hi Lalpan duhsak bik ni dawn ta se, a duhsakna dawng pha ve lo tur, mitkhap kar pawh dam zo lo tur hi kan awm teuh vang. Chuvang chuan Liandingpuii hla,
    Lalpa remruat dan hi
    A makin sawi thiam a har lua e,
    Mite ngaiha vanduaina lo thleng hi
    Kei misual ber tan malsawmna... a tih angin tunah hre thiam hrilh lo mah ila, a mite thatna tura kawng engkima thawk thin kan Pathian chuan nang leh keia tan pawh thil tha min la tihsak ngei ang.
    Lalpa chungah hian hel lo phawt ila, a remruat danah hian lawmin, sam ziaktu thukhawchang ang hian a dan thute chu a chhun a zana kan ngaihtuah lo ni se, keini amahah kan awm a, a thu keimahniah a awm bawk chuan kan duh apiang kan dil min phalsak si maw le, tihte ka ngaihtuah ta mai mai a.

UN lam bihchianna

2011-10-03T16:33:00.002+08:00

He lai hmun awlremchangahte hian UN lam chanchin tlem tlem kan han thilkhawm ve leh dawn a, mahni chettlat lohna hmun a nih avangin rinthu leh tlem belhkhawm bak chu haleluipui tham tur kan pai mawlh si lo a le!
    UN hnathawh dan leh thiltih vel dan hi Pathian thu nente pawh inanna lai a nei deuh reuh a, kan tih ve lam hi a han ni lo laileng khawp! Chutih laiin ‘ inring rengin awm rawh u, in inrin loh laiin a ni, a lo kal dawn,’ tih ang mai khan, kan inrin loh lai takin kohna ( phone) a lo lut thei ve bawk. Kohna pumpelhte chu Nazarent Isua a kal liam ta, nakinah an la ti ang, tih ang kha kan ni dawn a ni. Chumi tichiang em emtu chu RST, RSC ( OPE an ti tawh lo ) leh IOM te, thisen check ang chi atang hian koh theih loh an nei nual thin, chutianga koh theih loh i nih leh nih loh chu MRO Office-ah list i en dawn nia!
    Koh hun tawha inngai kohna dawng si lo, kan dinhmun eng ang nge a nih tih hriat tumin UNHCR hmunpui lamah tuktin mai mipui kan inhnawh vut vut thin a, thil danga interview turte tan pawha hnawksak khawpa chinchang hriat tum ( inquiry) kan tam tak avangin venhimna leh thawktute tan pawh thil buaithlak a lo ni ta.
    Chutiang avang chuan September 20 bawl vel atang khan Raltlan hmunpui atangin ruahmanna dang an siam ta ngawt mai a, chu chu hetiang hian a ni.

1. OPE kan tih mai thin, tunah chuan RSC ( resettlement support center ) tia a hming an thlak takah hian chinchang zawh i duh a nih chuan a hmunah va kal a ngai tawh lo. Phone/ Email-in zawh tur a ni. Tawng chungchangah chuan mahni tawngin biak phawt mai tur a ni a, sap tawng chu a tha ber ni mahse a thiam lo kan tam zawk avangin Kawl tawng pawh a pawi lo mai thei. Kawlram mi kan ni tlat a!
   Email: klinquiries@rescue.org
   Phone: 03-2141 5846

2. September 29, 2011 atang khan OPE ( i ti leh tho mai teh ang u) an khar leh hrih a, mahse rei an khar dawn lo a ni awm e! Thudawnnain a sawi dan chuan chawlhkar khat vel a nih hmel!

3. Lah Wah Kah pawh September 28, 2011 atang khan an khar leh hrih a, thlakhat hnuah chuan an hawng leh mai dawn niin thudawnna chuan a sawi.

   MRO Lam ve thung: MRO Co-ordinator pawh October thla chawhnu lamah chuan Indiana lamah a thlawk chhuak dawn ta! Kan lawmpui a, kan lungngai bawk si!   Oct. 2, 2011 Sunday khan MCF EC chuan MRO Co-ordinator thar tur Josaih Zathanga Khiangte chu la fel a ni ta. October 6, 2011 atangin a hna a tan ang.
UN Lama kan dinhmun kan thlen chin theuhah Lalpan kan ramri min zauh sak theuh rawh se. ( Ed. )

Batu Untung Day

2011-09-26T14:36:00.000+08:00

B.zara

Thuhma tawi:            Ka mobile phone a ri ral ral a, computer hmai bih a, chanchinbu endik lai tak hi chuan rilru leh ngaihtuahna hi sawr bing ve deuh a ngai thin a, chutih lai kara USA lam atanga phone dawn palh hlauh erawh chu buaithlak tak a ni. An lungleng khawhar tihtur hre lo hian rei zet mi biak an ching thin a, sim vat hlawm teh se. Pu Zalawma ka tihchhan kher lo!
    Tun tuma ka phone dawn erawhchu a dang zak mai, ka’n bih chiang a, Ralliannuaia tih a lo inziak kalh mai. E heu.. ‘khawilam atang tak ni maw’ ka ti hman a, mahse ka hre chhuak thuai mai, Batu Untung MCF Secretary a lo ni. A thu rawn sawi lah chu! “Pu Zar, kan Day chu a tam thei ang berin lo kal in tum dawn nia, vawk pawh kg 160 kan man tawh, Uisa pawh a awm ang,” tiin. Chu chu Sept. 17 inrin zan kha a ni.

Thupuan:    Sunday zing kan inkhawm a, Secretary chuan “ Vawiin hian Batu Untung MCF Day hmang turin Bus pakhat hawh a ni a, a kal duh apiangte chu chhun dar 1:00-ah 7/11 dawr kawtah innghahkhawm tur a ni” a ti a. Mahse bus pakhatah mi 46 vel chauh chuan theih a ni si a, kal tur thahnem ta viau ila, engtia tih nge an tum le? Kan hruaitute thiltih vel dan hi chu aw!

Val Kosong ho:    Inkhawm kan bang fel, tukthuan kan ei kham meuh chuan chhun dar 1:00 a lo ri hnai ta reng mai, chutih lai tak chuan ruah phingphisiau a sur ta! Nihliap chu sawi loh ruahhliap pawh khum ila, tihngaihna a awm lo. Darkar chanve hnuah chuan ruah pawh a lo ziaawm ve ta deuh a, phone a lo ri leh rang rang a, ka’n en nak chuan Danmawia a lo ni a, a thu sawi lah chu a ho ang reng. “Pu Zar, kan thulh leh a mi? 7/11-ah kan kim vek tawh a nia, khawnge bus chu? tih vel mai mai hi a pu Awtea’n a rawn zawhtir a ni awm e!
    “A.. ruah a la sur sia, bus pawh a lo thleng tep ang, pawisa in neih ve chuan 7/11-ah khan thil lo lei khawmuang ta che u, Val kosong ho,” ka’n tih tak zek kha!

Batu Untung lamtluang:     Ruah si ser ser hnuaiah chuan Qt. atangin Pu Saia leh Pastor-te nen kan inzui chhuak ve thei ta hram a, bus kan thleng chu mak tak maiin keiniho thutna tur bak chu an lo khat thap tawh mai nia. A va lawmawm tak em! Ni e, thiltihvel hi a harsa fu thin a sin. Kal thei tur zat inhriat lawk theih a ni si lo, bus lah duh hun huna koh theih a ni bawk si lo, mi kan thahnemfu a ngem? Kal tur hi kan awm mang lo mai ang a? tihte ngaihtuahin rilru a buai ru ve thei khawp mai. Mahse tun tum chu a tawktea vaipa siam niawm takin bus pakhat leng tawk chhiah naupang nen mi 49 kan ni.
    Chhun dar 1:30-ah KL atangin kan chhuak a, zunram thiara chawlh pawh awm lovin tluang takin kan tlan a, mahse kan nula zaithiam a hming pawha kan koh phal loh ‘Day’ kan tih mai chu zun chhuak lutukin a tawn keh lo chauh hi a lo nia, tlem tlemin lo hnam chhuak ta pawh nise, tu’n kan hriatpui hauh lo. Tlai 3:30-ah Batu Untung kan thleng a.
    Ball-pet: Day thlen in-ah innghatin, Batu Untung hruaituten min lo hmuak a, ( member leh hruaitu an ni vek mai) kan hlim dar dar e. Pi Ziki-te in lamah Hongkong Ta bai thiam deuhin an chan nghal char char a, changkha hnah veh tawk, ( an veh thin ni hmiang ka ti mai a) japan zawngtah lo tawk, ansate sik tawk, facebook lama post tur thla lo la tawk lah bo lo, kan va tul hlawm tak em! Vawk vulhna rimchhia reng kan hre chang lo. Lalpa malsawm rim a ni vek mai.
    Ball pet turin fiel lamah kan chhuk thla diah diah a, Tumbuk lam an lo thleng ve nghal bawk nen, hetiang hian Batu Untung Day lawmna foot-ball inkhelh tur a ni. KL Vs Tumbuk, chak zawk final, chak lo leh Batu Untung. Match 3 inkhelh tur a ni a, Pet hun minute 15+15, chawlh awm lo.
    KL Vs Tumbuk = 1-0 KL chak
    Tumbuk Vs Batu Untung = 4-5 Tumbuk chak ( penalty)
    Final KL Vs Tumbuk = 2-0 KL chak
An sawi danin Batu Untung hian in neitu an nih angin mikhual an hlahthlem a, Tumbuk hian KL lam lo kalna a hlat em avangin an hlahthlem bawk niin an insawi, mahse entu mipui chuan an awih chuang lo. An tang tih a hriat reng, Tumbuk President pawh khan a pet sang thei e mai, an ti tlat.

Inkhawm hun: Naupang, nula, tlangval leh nu leh pate nen hlim taka fiel lama kan chai zawh hnu chuan zanriah ei turin Aigupta sa bel ni lo, Batu Untung sa bel awmna lam chu kan pan ta hum hum mai le! Fatu lam an lo inring thap tawh a, chutichuan kham loh hlau miah lovin Day lawmna ruaipui chu kan theh ta mup mup mai a ni. Pi Mawii-te hoin ‘he lamah uisa” an han tih rite chu a mawi em em mai hian a hriat a, vawk lu, a kawchhung, a famkim kher mai. Vultea leh Pu Thuamate kan hlep rap!
    Zanriah ei kham chuan inkhawm kan tan nghal a, zan dar 9 a lo ri der tawh mai. Bus kan hawh kha, zan 10 thleng a ni si a, chu chuan rilru min kap deuh na a, mahse tluang takin kan programme hman tur ang zawng zawng chu kan hmang tluan ta tho a. Solo KL-3, Batu Untung-1 Tumbuk 1, kan ngaithla a, KL naupang lam kan en bawk. Sermon Pastor Hrilvelthanga a ni a, Batu Untung chanchin tawi Pu Saipuia’n a sawi. Inkhawm chairman Pu Lalhunliana president a ni a, lawmthu Pu Nghinglova’n a sawi bawk. Zan dar 11:10-ah inkhawm kan bang thei tawk a, a rei na van vana nuam tak a ni. Inkhawm zawng kha mi 100 kan tling mai lo maw Pu Nuai!

Thubelh:    Batu Untung MCF hi 2009 Sept. 18 khan MCF branch pakhat ni ve tura din tan a ni a. Kum 2010 khan a din cham an hmang thei lo va, kumin a kum hnihnaah hian Day vawi khatna an hmang ta a ni. Member an tam lo hle mai a, chuti chung chuan Day hmang ve ngei tura an tanrualna leh an thawhhah hlawmzia kan hre reng a, an sen ral zawng zawngah Lalpan a let tam takin malsawm rawh se.
    KL Nilaizan veng inkhawm atangin Rm. 400 lawmpuina an dawng a, Baner ziak man chanve Rm. 40 Pu Zara’n a tum sak a, Ball pet lawmman Central MCF lamin an thawh bawk.

PUAN

2011-09-26T14:32:00.000+08:00

pst. com

    Kan hnung Thawhlehni (13/9/2011) khan New York khawpuiah spring/summer 2012 thuamchei show buatsaih a ni a, a tawp ber zan a ni nghe nghe. Chu mi zan, zan danglam leh lawmtlaka siamtu chu American actress Kirstie Alley-i’n a thuamchei thar hak a inhmeh lutuk chu a ni. Rangkachak rawnga luan a sam put tle mawi tak leh a hmelthatna chu a kawr thar chuan chungnunna a khumtir emaw tih turin a inhmeh hle a. Chu kawr mawi tak duang chhuaka thuitu (designer) chu, American film star hming thang tak takte thuam cheisaktu, America rama awm Malaysia designer, Zâng Toi-a a ni. He mi zana Alley-i’n kawng a rawn zawh hian a kawr mawi tak thuitu designer nen an rawn inkuah chhuak a. Mipuiin an lo lawm hle mai. Designer hian he kawr hi African leh Arab culture pahniha thuamthei kalhmang lain a thui a ni. A design-tu a thiam a, a hatu actress Alley-i hian a zir bawk a, thlirtu mipui mit a tlai hle. Tin, a hatu leh a duang chhuaktute an lungawi ngei ang. A designtu leh actress Alley-i te hi tun hma atanga lo innel sa an ni a, Toi-a hian Alley-i inhmeh tur zawngin puanthan chu a duang a, a thuisak a ni. Alley-i hi hetiang thuamchei show-a a tel vawi khatna a ni.
    Plaza lian leh te han fang ila, puanthan dawr khawiah mai pawh hian hmeichhe thuamcheina lam hi a tam zawk zel a. Ram a zalen angin puan design duh dan a danglam thin. Kum 10 kal taa Kawlram nulate inchei dan kha thlirlet ila, tuna an inthuam mawi duh dan nen hian inthlau tak a ni. Tunah chuan mal-bet-kekawrtluan mai ni lovin kekawrte aia u hrat, bul tawi hmak mai pawh hmun thenkhatah chuan an ha tawh, chu chu Kawlramah a nia. Malaysia leh Singapore rama cheng Kawlram nulate hak duh zawng puanthan leh thuamchei duh dan hi a changkang kan ti dawn nge, a tunlai kan ti zawk dawn, an duai lo zawng a ni. Puanthan leh thui-sa zawrhna dawr thenkhatah phei chuan nghawngbah puan emaw, rawmawl emaw tih tur ang puan thehlep takte hi hmeichhe hak tur kawr te a lo ni daih a. Thenkhat chuan langtlang thei puan inbel hi zangkhai an tih bakah mite thinlung mit a lak tlat avangin hak nuam an ti a. Mi en leh thlir an hlawh tih inhriatna thinlung chuan chung incheina chu a haktir fo thin. Tin, mak ve ang reng chu, thangtharte zingah an inhmeh leh inhmeh loh aiin mite tih leh thil thar, chin thar a nih avanga mahni inhmeh loh puanthan leh hakdawr inbel hmuh tur an tam ta mai hi a ni. An demawm lo ve, tunlai khawvelin a ken tel ze chi khat a nih avangin. Thenkhat chuan an puan inbel aiin an taksa mawina an ngai pawimawh zawk bawk thin.
    Khawvela hnam thuam leh puanchei ze hrang hrangte hian ropuina leh mawina an nei theuh ngei ang. Eng puan pawh hi a mawina tak tak lang chiang turin a inbeltu pianhmang, nihna leh dinhmunah a innghat tam hle, a designtu’n a thiam tawka nalhin thui mah se, a hatu’n a zir ngang loh zawngin thilthu buaithlak a tling tho tho.
    Chutiangin, Lehkhabu Thianghlima kan hmuh dan chuan Lal Isua puan thiltihtheihna chu Ama thiltihtheihnaah a innghat a. Chu puan thiltihtheihna chu a dektu nazawngin an chang kher lo a ni. Lal Isuan, “Tu nge ka puante dek kha?” tiin a zawt a, chu mi titu chu hmuh tumin a zawng nghal bawk a. Amah zuitu mipui tam tak nek leh deh huai huai a nihna dinhmun atanga va thlir chuan a zirtirten, “tu nge mi dek engtin nge i tih theih a, mi hei zozaiin an neka an deh huai huai che hi i hre si a,” han tih mai awl tak tur a nia. Mahse, Isuan “a chhung ata thiltihtheihna chhuak thin chu a chhuak tih” a hre tlat. Mipui zinga thilthleng chu a zirtirte leh mipui nek huai huaituten an hre hauh lo. Chu thil, a ruka thleng chu mi pahnih chauhvin an hria: Isua leh dam- lo te an ni.
    Khawvelah hian kohhran pawl hrang hrangte hian Bible zirtirna kalpui duh dan hrang theuh an nei, kohhran kaihhruai dan thlengin uar bik leh duh dan a inang lo hle thin. Mahni kohhran pawl bing thurin leh inkaihhruai dante hi mihring theih tawpa famkim leh thain zam thin mah ila, Lal Isua thiltihtheihna a tel loh chuan engmah a ni chuang lo. Isua puan dek ve reng si a, a thiltihtheihna chang ve ta lo ringtute kan inhnawhkhawm chiam tawh em tih hi zawhna hraw tak a ni. Tawngtai puan sin chunga a thiltihtheihna chang pha lem lo ringtu te, fakna hla puan leh Amah chibaibukna puan inbela “a chhung ata thiltihtheihna chhuak thin” la chhuak ve zo lo ringtute, Kristian puan sin a, sakhaw rawngbawlna a kawr maia hmanga Isua thiltihtheihna puan dek ve mai mai ringtute hi kan tam tawh hle lo maw? Mahni theuh inbih chian a hun ta hle mai.
    Actress Alley-i’n Toi-a duansak puan leh kawr kha a inhmeh hle mai a. Toi-a leh Alley-i te hi an inhre chiang hle. He inhriatchianna hian mawina leh hlawhtlinna a rah chhuahtir a ni. Chutiangin, mahni inhriat chianna leh Lal Isua hriatchianna hian kan mamawh min tihpuitlinsak thin a ni. Mimal tin hian Lal Isua puan deh kan mamawhna lai tak hriat a ngai. Chu mamawhna nen, Isua thiltihtheihna puan awmna a kohhran huang chhunga kan zuan luh a tul. Amah Isua tihdamna kan mamawh hliah hliahna kha a pawimawh ber fo. Thi-put natna vei hmeichhe damlo khan, “Isua chanchin ” a lo hriat chuan a puan hmawr chauh pawh dek se tihdamin a awm a ring nghal tawp mai a. Thil dang a ngaihtuah tawh lo, rinhlelhna pawh a nei lo, Isua puan hmawr chauh dek turin mipui zingah, Isua hnung lam atangin a rawn pan a, a rawn dek ta a, a dam ta nghal a ni. Lal Isua thiltihtheihna puan dektlak leh a tihdamna chang tlaka tling zo tumah kan awm lo. A thiltihtheihna puan dektlak lo pawh kan awm chuang lo. Lal Isua puan hi a thiltihtheihnaa design a ni a, Amah hi designer a ni bawk. Amah mamawhna leh a tihdamna, a malsawmna, a thlamuanna ringhlel hauh lova beiseitute hnenah an mamawh ang zelin, A thiltihtheihna puan chu a lo design-sak a, khawvel mithmuhah chatuan nunna puan sintir theitu designer ropui ber a nihzia a tilang thin a ni. Lal Isuan, “ Tu nge ka puante dek kha?” a ti.

LOVE LETTER

2011-09-26T14:25:00.000+08:00

Edenthara

Leilung leh a chhunga thil awm zawng zawng Siamtu hmingin chibai le, ka Nu, bang lova i mi tawngtai sakna a zarah ka damin ka hna pawh ka la tluang ve zel a nia, nang pawh chung khuanu venhimna hnuaiah dam tea i lo awm ka beisei.
    Hun leh nite an herliam a, hnah hluite lo tilin hnah tharin an rawn thlak ang mai hian duat taka i mi chawi seilenna, i hmangaihna tang nemah bei reng duh thin mah ila, hringnun hi kan duh dan ringawtin a inher thei si lo, hreh taka lenna tlang dan a lo ngai leh thin. Ka lo puitlin hun nghakhlel takin ka nitin nun i lo thlir reng thin a, mi ang sa ang ka lo nih theih nan i nun zawng zawng ka tan i hlan a, hun leh nite lo herliamin ka lo puitling ngei mai, mahse i beisei lo ang takin i hmangaihna leh min chawiseilenna lamtluang kha haiderin i rilru tihahtu, i mittui titlatu ka lo ni fo mai kha chu khawvela ka thiltih sual lian ber a ni. Engtin nge hetiang thil hi ka lo tih theih? Puitling ka ni ve tawh a, hmun hrang hrangahte kalin lehkha ka zir a, lenrual ka kawm a, tawnhriat pawh tam tak ka lo nei ve ta, chung ka tawnhriat zawng zawng zinga ropui ka tih ber chu danglam ngai lova i mi hmangaihna hi a ni. Khawvel zirna school sang tak taka Professor zirtirna ai pawha tha zawk chu mawlmang taka i hriat chhun, nun kawng tha ka neih theih nana i mi zirtirna kha a ni, khang ka naupan laia i mi zirtirna kha lo zawm zel ni ila, master-te master ka ni hial tawh ang.
    Zan ka mut theih loh chana ka ngaihtuah chhuah hmasak ber thin chu, kan naupan lai khan thal khawlum karah thlanzah (hmaizah) kengin kan unau zain min mut tlartir a, duat takin min zap hliau hliau thin a, tawngtai dante min zirtirin Pathian Thu Samari mitha chanchin min hrilh thin laite kha ka thinlungah hian a cham reng a, ka theihngilh leh ngai tawh lo vang. Khawvelah hian ka tan i hlu ber a, nang ang nu ka lo nei hi vannei ka intiin ka chhuang hle thin che a sin. Tun dinhmun thleng theia in mi enkawl seilenna chungah ka lawm tak zet a ni.
    Ka Nu, mi ramah chuan maw nun hi a lo danglam duh khawp mai. Nitin hna kan thawk a, Sunday off theih loh phei hi chuan karkhat vawikhat inkhawm pawh hi har tak a ni, nun hi a chauvin a ngui reih mai. Lal Isuan, "Tupawh mi zui duh chuan mahni hrehawm pawisa lovin a kross puin mi zui rawh se" a tih hi a lo va har tak em!! Midangte chhawmdawla tanpui chu sawi loh mahni kross chawisan a hnek hian ka kross put hian min delhbet lo chauh ni ta berin ka hria. Chuvang chuan i mi tawngtai sakna hlu tak kha ka ngai tak meuh meuh a, ka chhandam nun hlimna kha ka ngai a ni.
    Nu, atthlak taka ka thil lo tih tawh zang zawngah khan min ngaidam hram la,tun atang chuan fapa fel tak i nun tihlimtu nih ka tum tawh ang. Keimah avanga i mittui tlakna leh zan mu pawh chhing thei mang lova i rilru ka lo tih hahna zawng zawngte, i rilru, taksa leh thlarau tan Lalpan a let tam takin malsawmnaah chantir mawlh rawh se tih hi ka tawngtaina a ni. Nu, ka rilru chhungrila awm tlat thil pakhat ka han hrilh ang che, khawvel nu zawng zawngah hian i hmeltha bera, i fel ber bawk, ka tan hian nu nih i tling tak meuh meuh va, ka lei malsawmna leh rohlu i lo ni tak zet a ni. Ka hming i lamna i awrawl mawi tak kha khawvel zaithiam ber an tih aw ai pawhin ka bengah chuan a mawi zawk a, ka beng hriatna leh thinlungah hian a la cham reng thin a sin.
    A tawp ber a tan chuan,lo inenkawl tha la, i fapa hian ka ngaiin ka hmangaih tak meuh che a ni tih hi i lo hrereng thin dawn a nia . Tawn leh ni tur thlir chung zelin mangtha mai le.

    Nute hmangaihna hi tunge sawifiah thiam ang le! ( Ed.)

RAMTHUMNA KAWNG

2011-09-22T15:50:00.002+08:00

Victor Zika

Kum 1990 chho vel atang khan inhlawhfak nan tiin Mizote pawh Malaysia ramah hian kan lo thleng tawh a. Hun a inher zela pawisa a kaisang zel bawk a. Inhlawhfa tura lokal pawh kan pung chho chak hle a ni. Tunah meuh chuan pawisa thlengna lam aiin ramthumna kawng zawkin kan rilru a luah khat zawk tawh a ni.

Ramthumna kawng han sawi dawn takah chuan ram hnihna kan thlen dan leh kan khawsak dan han tarlang hmasa ila, kan fiah thei zawk ang. Malaysia thleng tur hian sum leh pai a hautak em vangin beihpui kan thlak a. Mi pawisa a pungin kan puk a, kan neih ro thil tamtakin an tuar bawk. A kalate chu in atangin kan chhuak fihlim tawh a, a hnuchhuitu erawh kan kalsan kan chhungte an ni duh chawk. Malaysia kan han thlen meuh chuan kan khawsak dan a lo changkang a, kan thawh chhuah sum leh pai lah keimahni thu vek a lo ni tawh bawk a. Inchhung leh khawlai khawsak danah pawh a zalen halh mai bawk si, thalai rual tamtak chuan kan zalenna hmang thiam lovin sual kawng kan zawh mek bawk.

Kan kal chhuah hma kha chuan kan chhungte hnenah rinawm taka awm turin leh thahnemngai taka thawk turin thu kan tiam tih pawh kan hrechang thei tawh lo. Kan kalkawng man tura kan puk sum pungin kan in leh lo a ei zo dawn tih pawh ngaihtuah thei loin, he ram zalenna kan hip sual a, huau huau leh nawmsip bawlna lamah ke kan pen zel a ang ka ti thin. Kan chhungte mangang leh lungngai thawm pawhin kan thinlung a kokir hlei thei tawh hek lo. Kan thlen hlim chuan Mizo inkhawmna pawh kan ngaina riau thin a, hun a lo rei a ningkhawng han hriat hnu meuh chuan kan hnampuite pawh kan hlau lek lek tawh a ang phian zawk.

Kum 2004 vel atang khan mizo zingah Refugee tihnachang hria kan awm ve pheuh pheuh a. Chung ho pawh chuan tihtakzetna thinlung an nei chuang lem lo. He mi kum chhunga ramthumna kal chhuak pawh kut tangthliah tham chauh kan la ni awm e. Mizo tawng hmang pawh mi a zatel kan ni chho tawh a, mahse refugee lamah rilru kan la pe ve hlawm lo. Ramthumna kal beiseina pawh kan la nei tehchiam lo a ni. Nula chu sawi loh hmeichhia pawh hi tlemte chauh kan la ni a, he ramah hian nupui pasal inneiin fa kan hring dawn a ni tih phei hi chu kan ngaihtuah chhin ngai hauh lo mai. Hun inher hian thil tamtak a herliampui in a herchhuahpui chu a nih ber hi!

Kum 2007 a rawn nih chhoh meuh chuan kan thil duh loh kha kan duh leh lutuk tawh a, a chintawk pawh hre lovin kan duh a ni ber mai. Mizo pualin inkhawmna pakhat chauh kan la nei a, KLBC a kan lawiluh kum pawh a ni bawk. Mi tamtakin UN register kan hmuh kum pawh a ni nghe nghe. Pastor full time-a kan koh theih kum a lo ni leh zel nen. Hmeichhia chu sawi loh nula ringawt pawh thahnem tawk kan nei ve ta. Inkhawm kan phur a, inkhawm bana zu dawra thu mai mai thin tamtak pawh zu dawra thu tawh lovin UN hmuhdan ngaihtuahin an thu khawm thin tawh a. Nupui fanaute kan ko chur chur mai a, nupui la nei lote pawhin “Bungus” tur ngaihtuahin rilru kan seng hle thin tawh zawk. Inngaihzawn lawkna awm lem lo mah se, nupa-ah kan insiam zung zung bawk a. Heng hun lai hi Malaysia atanga ramthumna pan mek zofate tan chuan a nawm lai ber niin a lang hial awm e.

Ramthumna kawnga kan kal lai hian kan mizo ten thil tamtak kan tawnhriat phah niin a lang. Kan rama kan awm lai kha chuan TB natna leh natna chi hrang hrang pawh kan hlau em em khan a lang a, hetah erawh TB natna nei pawh mi vannei-ah kan chhuah thei hial a ang zawk. UN luh theihna tur awm chi natna neite chu kan bawr vut vut thin a, natna inleisak a, in zawrhsak hun niber pawhin a lang. Heng kan thawmvang hriain khaw lama kan chipuite pawh a minin an rawn min ni awm tak a ni. Malaysia ram kan lut sup sup bawk a, hlawhtling tamtak kan awm rualin hlawhchham tawk pawh kan awm ve tho bawk ang. Ramthumna i thlen hnuah chuan i duh duh naah i zung tawh lo ang a, hnap leh chil chhak tak ngial ah pawh i fimkhur hle a tul tawh ang. Bawlhhlawh paih duhdah vang pawhin lei i chawi thei bawk a, nupui fanaute vuak vang ringawt pawhin lungin i tang thei tih hriat a tha khawp ang.

Kan rama kan awm lai kha chuan hnamdang inleng nei chu kan hmu tleu duh thin a. He ram kan thlen hnuah hian engtinnge rilru kan la put zel dawn ni? Eng hnam ber nge an nih pawh kan hriat loh hi kan makpa leh kan mo an ni nual tawh bawk. Vanlal nau ang tahnaah kan dang chuang lo tih hi kan chawi vawng tawh hle a ang nia. Hmangaihna kan la na sawt em em a, kan culture leh sakhuana pawh hian a dang zo tawh lo. Ringlomi baptisma chang an awm rualin sakhuana ngaihsak loh phah nana hmang pawh kan awm nual bawk ngei ang le. A bikin kan makpa hnamdangte vang hian kan ramthumna kawng a tibahlah deuh niin Zohnahthlak pawl hrang hrang chuan an sawi nghe nghe. Min hmangaihtu nilovin ramthumna thlen duh vang chauh hian min nei ang tih chu a hlauhawm a ni. Kan hnam pumin a tuar dawn si a. Ramthumna kawng harsa tak leh bumboh tak mai a hnampum in kan zawhna chhan ni bera lang chu kan fate hmalam hun thlir vang niin a lang. Ramhnihna kan thleng tawh ro ro a nih chuan hlenchhuah theuh pawh kan tum tur a ni.

He ramthumna kawnga i kal mek lai hian Pathian chu rinchhan ber fo thin la, i tum dan leh suangtuah anga a lo thlen loh chang pawhin beidawng lovin, i hmaah mi tamtak an thleng tawh a, i tawrh ang hi an lo tuar chhuak vek tho a ni tih hrereng fo ang che. In chhungkaw tana hriselna lama thatna, eibar zawnna kawng awlsam zawk leh i fate tana zirna tha zawk an neih theihna a ni tih hre rengin tuar fan fan chungin, dik tak leh fel takin he ramthumna kawng hi zawh chhuak ngei ang che. Nakin lawka thawnthua chang leh mai tur a ni a, thawnthu tha tak i neih theih ngeina turin ka duhsakna ka hlan che a ni.