back to top

Pages

March 19, 2011

TAWNGTAINA RAH

 (Jr. 33:3; Lk.11:5-13; Joh.15:7)
Rev. Luan Maung, Mandalay

Tawngtaina chu kan thlarau leh Pathian inbiakna zawng zawng hi a ni. Dilna, lawm thu sawina, mi dang tana dilsaknate, Amah biak rawnna leh a aw ngaihthlakna te hi tawngtaina an ni vek a ni. Ngaihtuahna pawnlang atang kan duh zawng tinreng kan dilna mai hi tawngtaina tak tak a tling lo.
    Pathianin tawngtaina hmangin khawvel hi mal a sawm thin a. Pathian chuan kan duh zawng apiangte chu a hnena thlen turin a ti a, kan awmdan leh a tul dan ang zelin chhanna min tiam a ni. Amaherawhchu, kan dil apiang hi Pathianin min pe vek lo va, a chhan chu kan mamawh tak ni lem lo, kan nawmsak nan kan dil hian kan dil dik loh avangin kan hmu lo a ni (Jk.4:3). Sam ziaktu chuan, “Ka thinlunga sualna ka ngaihsak chuan Lalpan mi ngaithla lovang” tiin min hrilh (66:18).
    Pathian chuan thinlung lungchhia tawngtaina a ngaithla a, Hani tan fapa Samuela a pe a (I Samuela 1:20). Lal Hezekia mangang tawngtaina chu a chhang a, a dam ni kum a tihpunsak bawk (Isaia 38:1-8). Lal Isuan inchhir ngawih ngawih a, tawngtai chhiahkhawntu kha a hmusit hauh lova, Amah autu mitdel Bartimaia mit a tihvar sak bawk a ni. Thlarau leh tihtak zeta Lalpa autute tawngtainaah chuan Pathianin rah a chhuahsak thin a ni. Tawngtaina rah chhuah tam tak zingah hengte hi han tarlang ila:

1. Ram leh hnamah:
    America ramah miten Pathian a thi an tih laiin, Billy Grahama chuan, “Tukinah Pathian nen rei tak kan inbia” tiin a sawi. President Bush chu Beijing Olympic chhima a cham chhung rei lo teah pawh Pathian biaa tawngtaiin Biak In kal a thulh hauh lo a ni. Amah ngeiin zingah Pathian biaa ka tawngtai hmain mi dang ka be ngai lo a tih bakah a chakna thuruk chu tawngtaisaktu pawl a neih hi a ni.
    Pathian thatna tem nachang hretu America-ho chuan an pawisaah “Lalpa nangmahah chauh kan innghat (In God We Trust)” tiin an puang. November 11, 1620 kuma America ram hmuchhuaktute England ram atanga pem chhuakho ringtu pawl mi 102 te chuan an thlen ve leh, “Lalpa i hming chauh ropui rawh se, I ram zau nan chauh a ni” tiin tawngtainain bul an lo tan a ni.
       An President hmasa ber General Washington-a chu Pathiana innghat mi, tawngtai mi a ni a, sepoy operation kal chhuak turte hnenah kal thlengin vur leh dai, khawvawt tak karah pawh tawngtaina hmanpui thintu a ni. An ramin zalenna an hmuh hnuah Perliament an thut apiangin thingthi ngata tawngtaina hmang thintu a ni bawk. An President-te zinga nasa lo ber an tih Trumen-a meuh pawhin President mawhphurhna a han chelh dawn tum chuan tawngtaisak turin a ngen a ni.
       Kuwait chhanchhuah nan Iraq an beih tum pawh khan George W. Bush-an Billy Graham-a chu tawngtaiin White House-ah a khawsak tir tlat tih te khan Pathian an rinzia a tilang chiang hle. An tawngtaina rah chu malsawmna leh hlawhtlinna hlir a ni a, Pathianin meiah ni lovin lu-ah khawvel hotuah a dah zel a ni.

2. Piantharnaah:
       Augustina (354-430) Hippo khua Bishop chu Tagaste, North Africa-ah a piang a. A pa chu ring lo mi a ni. A nu Monica-i ringtu tha tak chuan a enkawlin a tawngtaisak thin a. Augustin-a chu a sual zual sauh sauh a. Rom lamah a tlan bo va, sakhaw dangah a inlet a. Mahse a nu chuan a tawngtaisak reng tho a. Augustin-a chu a dam lova a lo dam tha leh ta a. Africa atanga a nu tawngtaisakna avanga dam a ni tih a hre tan ta a. Vawi khat chu beidawng taka huana a awm laiin “Tolle, Lege” (Take and read) “La la, chhiar rawh” tih aw a hria a, tichuan a Baibul chu a keu thawk a, Rom 13:13 thu “Zu in buai leh zu ruia awm lovin, hur leh inngaih hmanga awm lovin,... chhuna awm angin mawi takin i awm ang u” tih hi a chhiar fuh hlauh a, a lo piangthar ta a ni. 387 AD-ah Baptistma a chang a, a nu tawngtaina a ni tih hriain lawm thu sawi chak em emin hmanhmawh takin a nu hmu turin a hawng a, an khua Tagaste a thlen ni chu a nu thih ni a lo ni reng a, a lung a chhiain pawi a ti hle a ni. Augustin-a leh a fapa Alipia te an piantharna hi a nu Monica-in kum 31 chhung ngawt a tawngtaisakna rah chhuah a ni.

3. Sum leh paiah:
       China ram missionary C.T. Studd-a chu ei-in tur engmah an nei tawh lova, an nupain pindanah minute 20 chhung zet an tawngtai a. Lalpa’n a chhang a, Frank Crossley-a hmangin pound 100 a pe a, (chung hun lai chuan pound 100 chu hlu tak a ni.) Crossley-a chuan ti hian lehkha a thawn a, “Pathianin pound 100 thawn tur che uin min tir a, ka la hmu ngai lo che u, in chanchin chu ka hre zeuh zeuh chauh a ni. Engpawh ni se, hei ka rawn thawn che u a, in tan thil tangkai a nih ka beisei” tiin. Lal Isua chuan zirtirte chhiah chawi tur cheng hnih sangha ka
atanga a pek ang khan a mite mamawh chu a duh duh hmangin a pe thin a ni.
    Myanmar May Flower Bank dintu U Kyaw Win-a (Shan-Mone Win hnam) chu ti hian a tawngtai a, “Lalpa kan Pathian, Nang, engkim Siamtu i ni. I hriat loh leh i tihtheih loh engmah a awm lo, kan Bank-ah hruaitu ni la, kei chu hmanruaah chauh min hmang ang che, hlawhtlinna i ta a ni, khawngaih takin min pui ang che” tiin a dil a. Lalpan a cheng maktaduai sang chuang, singkhat thelh neih tirin a hlawhtlintir ta a ni.

4. Damnaah:
       Martin Luther-a chuan a thianpa leh a rawngbawlpui Phillip Melanchthona chu thih ngamin a na a, a thi tep tawh a ni. Luthera chu a rilru a na em em a, a bulah thingthiin a tawngtai a, a lo dam ta a. Philipa chuan, “Ngati nge thlamuang takin min kaltir mai loh?” a rawn tih chuan Lutheran “Hnathawh tur a la tam lutuk, chawlhahdam hman i ni lo ve” tiin a chhang a. Mifel tawngtaina chuan rah a chhuah thin tak meuh a ni.

Tlangkawmna:
       Lal Isuan, “Tinungtu chu Thlarau a ni” a ti a (Joh.6:63). Kan tawngtai tlem chuan Thlarau lamah kan chau va, kan thi a, khawvel lamah kan nung thin a ni. “Mi au la ka chhang ang che” tia min tiamtu Pathian chu i hnaih ang u. Leilung leh a chhunga thil awm zawng zawng hi Lalpa ta a ni a, chu chu kan tan, chhungkaw tan, Kohhran tan, ram leh hnam tan tawngtainain i seng lut zel ang u.

0 comments:

Post a Comment

Engnge i ngaih ve dan?

 

Zo Kawtchhuah Copyright © 2009