back to top

Pages

April 8, 2014

MCYF Day Out

    MCYF Picnic chu Date 2, April 2014 (Wednesday) nia hmang turin meeting chuan thu a passed a, amaherawh chu, picnic naa kal tur memberte kan tlem hle ang tih erawh a hlauhthawn awm em em thung a ni. Picnic kal chhuah hun dar 8:00am a lo rik meuh chuan rin aiin kan thahnem hle a, bus pakhata kan len tak dawn loh avangin bus dang kan han be leh ta chung chunga, nghah deuh a ngaih avangin Breakfast ei turin memberte chu Vai dawrah an kal ta hlawma, eiin siamtu pawh a indaih lo hle ni tur a ni, meng phawk hu huin Thirbel a chawkri rawk rawk a nih kha..hahaha...Secretary Tv. Lalnunpuia leh Asst. Secretary Tv.R  Lalchhuanawmate ei tur awm lo khawpin order a tama, mahse dawr neitute sum hum nei mang lo an Wallet kan han tih khah sak ta kha, a hlim awm thin mang e!!
    Dar 9:30am ah kan chuanna tur Bus pawh a lo thleng ta bawka,   Jungle Loadge lam kan pan ta vang vang mai a, dar 10:30AM velah chuan a hmun kan thleng phei ta hlawl mai a ni. Rin ai daihin a hmun a nuama, zau em em hran lo mahse, a vawt nuamin infiamna hmunte, inbualnate bakah ruahsur leh nisa laka invenhimna in nuam em em mai a lo awm leh zelte khan member kal zawng zawngte hlimna min thlen nasa hle a ni.
     A hmun kan thlenga, MCF Presidient Pu.Ngursaithuama’n hunserh tawi a hmanga, Nl. LC Sangi aw mawi tak kan han ngaithla leh a,MCYF Secretary Tv.Lalnunpuia’n puan tur pawimawhte a puan zawh hnuin, kan Coordinator Pu. Josiaha’n kan hun hman dan tur a lo duan lawk sa chu a takin kan hmang chho tan ta a ni. Item chi hrang hrang hmanga intihlimna hun kan hman zawh hnuin, tlai lam 2:20 vela tang chuan infiam thiam tak takten football an han inkhel chu a hmuh nawm ngei mai, thenkhatin football inkhel an en laih laih laiin, thenkhat an lo in hmet phe chuai chuai bawka, chutihlaiin a then tuia lo cheng tawk lah bo lo; chumai bakah Nl. Suzyi leh Nl.LC Sangiten Chhang leh Fresh Juice zawrh hna an lo thawk ngar ngar bawk, a van hlim awm teh reng em!!!
    Chutianga hlim taka nilenga hun kan hman zawh hnu chuan tlai lam dar 6 a lo ri ta a, kham lo tak chungin KL lama rawn hawng leh turin kan in siam leh ta sang sanga, MCF Presidient Pu. Ngursaithuama a tawngtai a Jungle Loadge chu kan rawn chhuah san leh ta a, dar 7:30 pm velah KL  kan rawn thleng.
     MYCF picnic vawi ‘1’na tluang tak leh hlim taka hmang theia hun tha min pe a, kawng engkima min kaihruaitu Pathian hming chu fakin awm mawlh rawh se! MCYF Picnic a kal  mi 95 (naupang pakhat nen) kan ni. (Tv.Lalnunpuia MCYF secretary)
Continue Reading...

AWMNA HMUN INKHAWMHMUH DAN

                                                                                                                   Tetea pu
   He thu hi a finfiah nan, mi 17 te hnenah zawhna mawl tak ka zawt dawn che a, khawngaihin min chhang hram ang che aw; “ Ni hi khawi lamah nge a chhuah a, khawi lamah nge a tlak?” tiin. Min chhan dan a inang lo nual mai. Tun lai thangthar thalai zingah mi 3 chuan, Chhak leh Thlang, Chhim leh Hmar awmzia pawh hre lo an nih avangin, “Ka hre lo” an ti a; mi 9 erawh chuan, “Thlang lamah ni a chhuak a, Chhak lamah ni a tla a ni lom ni” an ti. Tlema upa phanchang deuh mi 3 vethung chuan, “Kawlramah chuan Thlang lamah ni a chhuak kan ti a, Mizoram ho chuan, Chhak lamah ni a chhuak an ti ve bawk” tiin min chhang. Mizorama piang leh seilian mi 2 te chuan, “Chhak lamah ni a chhuak a, Thlang lamah ni a tla” an ti fak mai bawk.
    A chunga kan hmuh tak ang khian, kan lentlak a rual lo nasa mai a nih khi. Mizorama chengte chuan, nichhuahna lam hi “Chhak”, tlak lam hi “Thlang” an ti. Entirnan, :- Kawlrama cheng Zofate Mizoram han zin changte hian, an nichhuahna lama kan awm avangin “Khawchhakmi” min tih fo thin kha. Khawchhakmi nih hi inzahpui loh tur; Bibleah pawh “Khawchhak mifing” tia koh an nih kha! Tin, Chhak leh Thlang hi hmun sang leh hniam kohnan an hmang bawk. Mizoram hi tlangram a ni a, a leilung hi a rualrem loh em avangin an awmna leilung level aia hmun sang deuha awm chu “Chhak”, hmun hniam deuha awm erawh chu “Thlang” tia koh a ni. Entirnan, :- Tlangpanga awm (or) mual rualrem lo taka awm an nih avangin, a thenawmpa in chu a in awmna leilung level aia a hniam zawk phawt chuan, nichhuahna lamah pawh awm sek sek, kawmthlangpa a ti daih ang.
     Awle, Myanmar Zofate chenna hmun pui ber chu, Kaleymyo phai leh Kabaw velley a ni a, tlak lamah Chin State tlangdung a dum dur mai bawk a. Tlang bulthut hnaia awm kan ni a, kan chenna leilung hi nitlakna lam atangin chhuah lam panin a hniam thla riai riai a, nitlakna lam chu a san deuh avangin “Chhak” kan ti a, nichhuahna lam chu a hniam zawk  avangin “Thlang” kan ti ve ta mai niin a lang. Mizoram angah chuan hmun sang leh hmun hniam chu chhiarsenloh khawpin a tam a, hmun sang leh hniam an koh nana Chhak leh Thlang an tih hi, chhuah lam leh tlak lamin a hril ve lo a ni ber mai. Kaleymyo Tahan phaiah erawh chuan khawi hmunah pawh awm ila, Chhak leh Thlang kan tih lam chu a inang vek mai. Chuvangchuan, hmun sang leh hniam kohna ni lo, compass thlirna ang chi ah, Khawi lamah nge Ni a chhuah? Tia kan in zawh pawhin, “Thlang” lamah tih hi kan chhan dan tlang pui a ni ta vek mai.
   Tahan phai khawtinah Veng Chhak leh Veng Thlang kan nei vek a, Keimahni veng theuhvah veng Thlang lamah ni a chhuak tia kan lo hriat bel tawh avangin, Compass thlir dan takin Chhak lamah ni a chhuak tih hre kur mah ila, kan nitin hmuh leh hriat khan min zem a zo tawh pawh a ni mahna! Tahan phaia awm tawh lo, US thlen tawh hnu pawhin Thlang lamah ni a chhuak kan la ti chheu mai bawk pek a. He hmun sang leh hniam kohna Chhak leh Thlang hian Myanmar zofate thluak a su fai zo tawh ni berin a lang.
    Tin, Awmna hmun inkawhhmun danah hian hnam changkang chuan chi riat an nei. Keini pawh hian hman lar ve atan a tha khawp mai. North (Hmar), South (Chhim), East (Chhak) leh, West (Thlang) bakah a inkara awmte; North East (Hmar Chhak), North West (Hmar Thlang), South East (Chhim Chhak) leh, South West (Chhim Thlang) tiin. Myanmar ram awmna pawh hi, South East Asia-a awm tia khawvel hriat a ni bawk.
   Khi, Saw, Khu, Khian, Khuan, sawn, tih pawh a awmzia hre lo tam tak kan awm fo.
Khi leh Khian :- Hmun sang lam sawi nan an hmang. Khi ta khi. Khi tah khian ka chho dawn. Van sangah khian thlawkin an leng del del.
Saw leh Sawn :-  Kan awmna hmun nena in zawl (level) pui-a awm thil sawi nan an hmang.  Saw ta saw. Saw tah sawn a awm. Saw pa sawn ka ngaihzawng min chhuh sak.
Khu leh Khuan :-  Hmun hniam lam sawi na a ni. Khu ta khu.  Khu tah khuan a awm. Khuarkhurum ah khuan I lut ngam em? Kalemyo khu Tahan aiin leilung level a hniam zawk. Kalemyo-ah khuan dawr kai an tam mai.
     Khawi hmunah pawh awm la, Chhim leh Hmar… inkawhhmuhna tha ber chu compass a ni a, I hman theih loh pawhin; Myanmar pawl khat lehkhabu-ah khan tiang hian min zirtir a.  “ Ni chhuahna lam hawi la, I ban pahnih sir lamah ngil takin phar chhuak rawh. I hma chhawn mek nichhuahna lam kha Chhak (East), I hnung nitlakna lam kha Thlang (West), I ding lam kha Chhim (South), I vei lam kha Hmar (North) tihna a ni e.” A tih kha kan vawn tlat chuan, Awmna hmun inkawhhmuh danah kan bangbo tawh ngai lo vang.
     A bik takin kan Myanmar Zofate hian, Awmna hmun inkhawhhmuh dan hi mual thelha kan thelh fo thin vangin, Naupang thal sikul zirlaibuahte hian in zirtir a hun ta a ni lom ni? Zo pa theuh theuh tawngkam lar tak si kan kehme tih a inan loh fo chuan, miten min nuihzabur dah ang e.
    Englekhawle, Kawl phaia cheng Zofate hian, hmun sang leh hniam kohna hmanga kan lo in koh dan veng chhak/thlang (or) kawm chhak/thlang kha chu ngai reng tho se, Awmna hmun inkawhhmuhna (compass thlirna) lam vethungah Mizoram koh dan angin Nichhuahna lam chu “Chhak”  Nitlakna lam chu “Thlang” ti tlang vek thei tawh ila a va duhawm dawn em.
Mizoram literature hi, Mizo khawvelten kan entawn leh kan hmahruaitu an la ni fo va. Mahse, Myanmar Zofaten kan entawn danah ka rilrua bet tlat vawinni thlenga thil hming kan lam sual fo thin chu, “Awmna hmun inkawhhmuhna(compass thlirna) zingah ‘Chhak leh Thlang’ kan inkawhhmuh dan” hi a ni.
Continue Reading...

Pasal Ngaihhlut Dan

     Rev. Dr. Laldintluanga
   In inneih hmaa i ngaihhlut a pawimawh tlukin i pasal a nih tawh hnuah pawh ngaihhlut a pawimawhna a nep chuang tur a ni lo. I pasal ngaihhlut dan i thiam chuan a zar zotu ber tur chu nangmah tho i ni si. I pasal hlawhtlinna chu i mawina a nih si chuan eng vangin nge chawimawi chu i hreh lem ang. Chuvangin Sabrina Beasley-a chuan pasal chawimawi dan hetiang hian a lo sawi a ni.
Pasal Hmangaih, Chawimawi leh Ngaihhlut Dan
   Mipain a nupui a ngaihlu tur a ni tih thu hi pawimawh tak a ni. Hmeichhiain a ngaihhlutzia a tihlan pawh thil harsa tak chu a ni hmel lem lo a ni. Hmeichheho hi mi awmnem tak, tuiral hma em em bawk leh tihnat awlsam tak mai an ni. Chuvangin mipa chuan eng tia ngaihhlut tur nge tih a hrethiam thei mai a ni.
   Amaherawhchu, hmeichhiain mipa han ngaihlu tur chuan thil namai chu a ni lo tawp ang. Kan suangtuah chhin ngai loh a ni a, chu a hnehin mi ngaihsantlak leh rinchhantlakah kan ngai zawk mah a ni. Mahse i pasal chu i fate i ngai hlu angin i ngaihhlut dan chu a hmeichhe hna lo angin a lang mai thei. Mahse Isua nu, Mary kha hre chhuak leh ila “Mari erawh chuan thusawi zawng zawng chu a rilruin a ngaihtuah a, a vawng reng a” (Lk 2:19). I pasal chawimawiin ngaihlu rawh tih hian a sawi tum tak chu, a hlawhtlinna te, a thuruk te, a mizia te, ngaihtuahna te, thil hmuh dan te, a rilru suangtuahna thinglung te chu ro anga hlu taka vawna enkawl hi a ni. Chung chingchivet nukte chuan a dam chhungin mi hlu a nihtir a ni tih hriatthiampui hram la, tichuan ngaihhlutsak i thiam phah ngei ang.
    Thenkhatten pasal an neih hian ngaihsan leh ngaih hlut vangin an nei chawk thin a, mahse chung ngaihsanna leh ngaihhlutna te chu nupa nih hnu hian a chuai duai duai thin. Mahse tuna kan sawi atang hian i pasal ngaihsan dan leh ngaihhlut dan hi i neih hma ai khan a chuai chuang tur a ni lova, a pawimawh dan a nep phah tur a ni chuang lo vang.
     Nang leh keiin kan neih kawppuia hi mihring a ni mai lo va, mi nung thinglung, feeling nei thinlung na thei, zir chho thei leh hmasawna danglam thei kan nei tih hi theihnghilh miah loh a tha a ni. Minung pawn lam kan hmuh theih aiia thuk zawka tawnhriat nei mi nung a ni.  Chuvangin an chhungril bik a, an nun inthup chu haichhuaka zawng hmutu atan hmeichhiate hi an ngaiin an mamawh hle a ni.
    Chuvang tak chuan, hmeichhiain mipa thilpek ropui tak mai a pek theih thil hlu em em chu, a thiltihsak vang che a, chawimawia ngaihsan ni lovin, a nihna, a chunga tarlan tak, a chhungril, mizia leh ngaihtuahna tinreng hre vektu nihna atanga engmah tihsak vang ni lo mahse amah ngei ngaisangtu i nih chiah hian pasal tan chuan chu baka khawvela thilpek ropui a awm thei tawh chuang lo a ni. I ngaihsan leh chawimawi hi i pasalin a mamawhin atan thil tul ngawih ngawih a ni.

Pasal Ngaihhlut Zir Dan
     Pathianin i pasal atan a pek che hi a mizia leh nungchang te hrehawm ti tak chunga pawm hram hram tur ni lovin, a ziarang te leh pianken te chu ngaisanga ngaihhlutsak zawk tur a ni. A hnuaia tarlante hian a taka tih leh hunte a phut nain, i pasal nena in inbiak dana zei zawk leh i ngaihsanzia tihlan dan thiamna kawngah a pui ang che a, i pasal mamawh leh vei zawng berah a siam bawk ang che.
1.  An bansan rawh. Thufingte buah khawvel hringfa zinga fing ber, Lal Solomona chuan hmeichhiain a pasal phun lo turin a fuih thu a hmuh theih awm e.
·“Nupui an thinna chu eng lai pawha ruah far reng ang a ni”(Thuf.19:13b).
·“Hemichhe an hmang leh phunchiar nena awm ai chuan thlaler rama
   awm a tha zawk” (Thuf. 21:19).
·“ Hmeichhe an hmang tak nena in zau taka awm ai chuan, in chung
   chhip kila awm a tha zawk” (Thuf. 21:9, 25:24).
·“Khawcheng leh hmeichhe an hmang chu angkhat an ni” (Thuf. 27:15).

      An hmang hmeichhe bula awm a harzia chu a hriatthiam mai awm e. Ang reng hmeichhia chuan a pasal hlutna leh zahawmna te a hlih thlaksak thin. Ang reng a nih avangin a ka atangin anhla tinreng a chhuah reng avangin a pasalin a anhla zawng zawng chu a thunawn chawpin a hriat fo a rinawm. Chung anhla, “ I tha tawk lo, ka duhthu i sam lo. Midang lo nei zawk ila tha tur” te chuan pa ber rilru a tina a, chu chuan awm hran duhna a thlen hial thin hi a mak lem lo ve. A hriat ngun ber tawngkam nuberin a sawi fo chu, midang lo neih tur a nih thu kha a ni chamchi tlat a, a tawpah chuan nupa inthenna a thlen nge nge thin.
   Chu ai chuan i pasal hnena sawi duh i neih pawhin rilru sei tak pu chunga thinrim leh ang chung ni lovin tha taka sawi thin zawk nise a tha a. I duh dan i hrilh ang a, a thutlukna erawh i hnial chuang tur a ni lova, zah tak chungin zawm ngai a nih chuan i zawm ve mai tur a ni. 1 Petera 3:2 “ Chutiang bawkin nangni nupuite u, mahni pasalte thu thuin awm rawh u; chutichuan, an zinga tu pawhin thu chu awih lo mah sela, thu lovin an nupuite chetziaa hnehin an awm thei ang, tih dek chunga in chetze thianghlim enin”.Tawngka aiin chetzia leh thuawihnain pasalte hneh thin tur a ni zawk.
2. Tawngka ngeiin fak thin rawh. Tawngka thiltihtheihzia hi Jakoba bu-ah chiangkuang takin a sawi a ni.
     Ngai teh u, kan thu an awih theih nan sakawr kaahte thirbarh kan barh chuan, an taksa  pum pawh kan kai her thin. Ngai teh u, lawngte pawh hi a lian hle a, thli na tak chhem lenin a awm thin na a, a tihertu chuan a kaltir duhna lam apiangah tihherna te tak tein a tiher thin. Chutiang bawkin lei pawh hi taksa peng te tak te a ni a, nasa takin a uang thin. Ngai teh u, mei te tak tein thing a va tikang nasa em! (Jakoba 3:3-5)
I tawngkam chhuakin i pasalah thu a sawi nasa hle a ni tih hriain tawngkam mal thlangsa zetin thu sawi thin chhin teh, a danglamna i pasalah i hmu ngei dawn a ni. A chang chuan i pasal tan  pawi i sawi a ni tih i hriat loh i chhak chhuah palh chang a awm thei ang.
     A nun chawisang theitu leh tichak theitu tawngkam hmang hram thin rawh, danglamna nasa tak a nunah i hmu ngei dawn a, a lawm ber turte zingah i tel bawk dawn a ni. Midang hnenah a tha zawngin sawi thin la, a hna, tuizawng leh thiante chanchin zawt thin bawk la, i pasal chu mi ropuiah i siam ngei dawn a ni. I chhuanziate hrilh thin bawk la, thil a tihthat chang emaw lawmman a dawn changtein ngai pawimawha hlutpuiin thlalakpui hial thin rawh. A thiltihte ngaisang tak i ni tih hriat nan zawtin zir chiang la, a hmanraw hmandan leh a thawhpuite thlengin hriat vek tum tlat thin ang che.
3. Tiphur thiam rawh. Hmeichhia chuan tawngkam hmangin mipa thathona leh phurna a tihchhuak thei. Mahse mipa chuan tawng a nin thin avangin tawngkam chauh hmang chuan phurna leh chakna i tichhuak reng thei lo vang. Mipate chakna leh phurna neihtir dan kawng dang a awm ve tho mai.
· Mitmeiin thu sawi mai rawh. I mit meng atang ringawtin i hmangaihzia leh i chhuanzia tilang mai ang che.
· I taksa ngeiin awmpui thin rawh. Chawimawia a awm ni te, a infiam changtein nangmah kalin va tanpui fo rawh. I va inlan hrim hrim kha thil dang engmah ti lo mah la atan tanpuina leh tiphurtu a tling tawk tawh.
· Inngaih pawimawhtir dan thiam rawh. A sermon lai emaw, a thiltilai thla la la, lianpuiin siamtir la, in chhung langsar berah han tar hmiah mai teh. Mi pawimawh takin a inhre mai ang. Chu chu i pasal tan thil a mamawh berte zinga mi a ni a, i tan leh fanaute tan hlawhtlinna a hmuh theihna kawngka zim chu a ni. Mahni inrin tawkna a neihtir ang a, a thiltiha hlawhtlinna a chhung atanga rinna chuan a neihtir zel thin dawn a ni.
· Fiamthu a thawhin nui hram thin ang che ( a zat vak loh pawhin). Thiam lo tak chunga fiamthu a thawh pawhin nui hram la, tichuan i ngaisang a ni tih a hre mai ang. 
A neih hlu ber
    Nu ber nihna atangin i pasalin a neih ril ber leh thuk ber a thinlung lairil chu hriat theihna pek i ni a. Mipa tan thinlung tak tak pawn lam mi hnena hrilh chu thil awl lo tak a ni. Mahse miin a thinlung an hriata hmuhsit leh ngaihnep nan an hmang dawn lo tih a rin chuan a hrilh duh lawi si a ni.
    Mi thinlung rilru hriat hnu hian ngaihnep emaw ngaihsak lo emaw tihluih emaw a awl duh viau a. Nupuiten fimkhur taka pasal rilru pho lan tawh chu enkawl leh hriatthiampui a tul ang.Chuti a nih loh chuan inrunluih nan emaw hun remchang kan la palh a nih chuan nupa inlaichinna chu a chhe nghal ang a, a thinlung tak tak a hrilh leh tawh ngai lo vang che. Nangmah chauhin a dah ang che a, a hlat tial tial bawk ang che a, in boruak a tha lo viau tan dawn a ni. Mahse a thinlung ril tak hi i hnenah chuan a him tih a hriat ve tawh hnu chuan a thinlung tak taka a chak zawngte leh a duhthusam tinreng a hrilh thin dawn che a ni. Chu dinhmun chu i thleng em? tih zawhna han inzawt lawk ang u.
    Tuna i pasal chu i laka insumin engmah sawi ngam lovin a inkiltawih a ni mai thei e. A rin loh zawng leh a thinlung tinatu pawh i lo ni palh mai thei a, mahse chanchin tha hriattur lawmawm tak mai chu tunah pawh a thinlung hawntir turin a la tlai chuang lo ve tih hi a ni. Thinlung na chu tihdam leh theih a ni a, tuna a chunga sawi takte hi rilru dawhthei taka i hman tan chuan a tawpah nupui chauh hriat theih thil pasal neih zinga hlu ber, a thinlung chu i hre leh thei ang.

Ngaihtuah tur
1. Pasal Ngaihhlut hi tulin kan hria em?
2. Eng tin nge kan ngaihhlutna chu kan lantir ang?
3. I pasal neih hlu ber i hre tawh em?
4. An hi chhun zawm atan a tlak em?
    Pasal fak thin i ni em?
(Kum 2014 MCWF inkhawm thupui bu "Nu Mawhphurhna" Rev. Dr. Laldintluanga ziak a mi kan rawn la chhuak a ni e. Editor)

Continue Reading...

GOOD FRIDAY/ EASTER SUNDAY

     Tun thla chu Ni pawimawh a tam ang reng . April 2 khan MCYF-ten Jungle Lodge-ah Day Out neiin an han kal a, mi 90 chuang an kal a  an hlim hle a ni awm e. Kal ka tum ve teh nan Zo Kawtchhuah bu chhuah kar a ni a, tin pawimawh dang a lo awm bawk nen ka hman ta ngang lo a  ni. Chanchinbu phuai nuaihin emaw chhuak thei lovin emawa awm ai chuan ka tan insum rih mai kha a tha zawk si a ni. A nawmzia an sawi chu ka ang haua lo ngaihthlak a ni mai.
     April 15 khian MSM hminga Chapchar kut hman tur a nia, Zofa lanu val rualten  zan tin lam an zir thin a, a ni lo thleng tur chu kan nghakhlel hlawm teh asin. Kum 2014 Miss Chapchar kut thlan tur a ni a SMS in Vote an pe chur chur tawh a ni. Kum 2013 khan Miss thlan a ni ta lo a, kum 2012 Miss Chapchar kut kha a la Miss ta ngar ngar rih a, hlan chhawng pawh a chak ve tawh ngei ang.
    April 18 lo thleng tur khi Good Friday a ni a, Isua Krista’n Kalvary Kross a kan tan a tawrhna ni, kan tan ni pawimawh tak a ni. Urhsun takin hman kan tum dawn nia. Kan sual zawng zawng kalvary Kross-ah  chuan min phur thlensak a. “Pontia Pilatan nasa takin a tuartir a, khenbehin a awm a, a thi ta a, phumin a awm ta a; Mitthi khuaah a zuk kal a, ni thum niah mitthi zing ata a lo tho leh a; vanah a lawn chho leh a;......” (Apostol-te Thurin). Easter Sunday niah chuan “ropui takin a tho leh ta” tiin hnehna hlado chham thup thupin Amah chu kan fak leh dawn a ni.
    Tun tum ZKC ah hian MCWF inkhawm thupui bu “Nu Mawhphurhna” Rev. Dr. Laldintluanga ziak a mi “Pasal Ngaihhlut Dan” tih thupui kan rawn rawlruk che u a, a pawimawh em avangin ngun lehzualin bik chian kan tum dawn nia. Bu 100 chhut chhuah a ni a, a hnuah Bu 100 chhuat nawn leh  a ni. A bu hial leia in a kawl atan a tha mang e. Tetea pu pawn “Awmna Hmun Inkawhhmuh Dan” tih thupui hmangin a rawn thai a. Ani hi MCF, Malaysia tan hian USA a thlen thlak hnuah pawh a kut chawl lovin thuziak tha tak tak min rawn hlui reng thin avangin a chungah kan lawm hle. Thianpa pakhat pawn “Ka zuk haw chho ang e” a’n tih mai chu a haw dan tur suangtuah a har khawp mai. Tute emaw dan takin A suk a so-in a haw dawn a ang. Chhiar nuam u le.



Continue Reading...

March 30, 2014

ZO KAWTCHHUAH DAY THU INZIAHSIAK

 Zo Kawtchhuah Day Thu Inziahsiak:  June 12 ZKC Day lo thleng tur den chhanin MCF chuan thu inziaksiak a buatsaih a ni. MCF member tawh phawt chu a duh apiang tel theih a ni a, mahni duh zawng thupui hmangin a ziah theih ang.
Theh luh hun    : May 31, 2014 ai tlai lo
Theh luhna    : mcfmls@gmail.com, awmte246@gmail.com (Word chhiar a ngaih dawn avangin email ngeia theh lut tur a ni.)
Word limit    : 800-1000
Lawmman    : 1st prize RM.300/
                    2nd prize RM. 200/
                    3rd prize RM.100/
Intihsiakna a telte chu consolation prize RM.30/ theuh hlan tur a ni.
 
____________________________________________________________________
 
Chapchar Kut Hmang Dawn: Malaysia a awm Zofa zawng zawngtena kan nghahhleh em em Chapchar Kut chu  April 15, 2014 (thawhlehni) zing dar 10:00 - tlai dar 6:00 thleng Compleks Belis Dan Sunkan WPKL 4029, Jalan KG Pandan 55100 Kuala Lumpur (Panjab Temple kiang)-ah  MSM (Mizo Society of Malaysia) hmingin kan hmangho leh dawn a ni. Kal turte tan Alor leh Pudu ah Bus pakhat ve ve vawi hnih a service ang.
    Hnam lam chi hrang hrang leh item chi hrang hrang te show a ni dawn a.  Pudu leh Alor Naupangte pawn talent an rawn show ve dawn a ni. Kum 2014 Miss Chapchar Kut thlan a ni ang a, VOTE a thlan tur a ni. March 23- April 6 thleng SMS hmangin vote a pek theih ang. MCF secretary Pu Lalrinawma (017-287 1323) hnenah emaw MMF Clerk Pu Lalnunzira hnenah emaw i mi duh tak hming chu SMS nalh mai rawh. Miss Chapchar Kut chu chawimawina certificate mawi tak leh RM.500 hlan a ni ang.
   March 24 zan atang khan MCF Quarters-ah thalai rualten lam an zir tan a,  mi kal kan thahnem a alawmawm tak zet a ni. Lam zir pawh en a man hla. Ding lam her tur vei lama her te, ban phar hun turah phar hman ta lo te, ha ha... mahse inkaihkuah hun turah chuan an vaiin an lungrual thei hle a, anin kuah nghet thei viau lehnghal a, tu emaw chuan tu emaw chu lampui nuam a ti mai thei bawk. Lam zirtirtu pawh tu emaw chu a zirtir ngun deuh an ti. Ni tak maw??
_______________________________________________________
 
To
Editor
MCF Palai (Weekly Journal)

Pu Editor i chanchin bu hi chhiar nuam tak leh hriatna tam tak min petu a ni a, theih nise chuan a chhuak tawh zawng zawng hi chhiar vek theih a chakawm hle mai. Heng a hnuaia mite hi MCF hian practise ve chhin ta ila, tha tak ang maw?  tiin thu rawn ka rawn thawh ve e.
1. MCF inkhawma rawn thleng thar leh ramthuamna pan tur (thlawk chhuak tur) te tana tawngtaisakna kan nei thin ang hian, kawl ram lama haw leh tur te tan pawh hian tawngtaisakna nei ve thin ta i la.
2. MCF-ah hian Pastor chauh hi malsawmna pe thei awm chhun a ang a, Pastor awm loh niah chuan inkhawhote malsawmna kan dawng thin dawn lo a ang a, chuvangin, mi tute emaw hnenah hian malsawmna (benediction) pek theihna hi, MCF hian siamsak (pe) ve ta se.
3. Lal biak tawngtaina: Hei pawh hi memberte kan au chhuak nasa tawh na a, Pastor awm loh (Inkhawm theih loh) ah chauh banna siam nan hman kan tum a  ang hle a, tun ang lo deuh, hun hmasa lama hman theih dan te a awm lo’m ni?
4. MCF inkhawmah hian Chairman leh Secretary te hi dawh san (platform) ah rawn thu chhuak thei se la, Programme tawp lama Secretary thupuan hunah hian bungrua dahkhawmna kil lam atanga a rawn pen chhuak ziah pawh hi hmuh a nuam zan lo deuh.
5. MCF inkhawma thuhriltuin a hun a hman tawi deuh tuma Chairman thenkhawten “hun a la tam bawk” tia eng eng emaw an sawi teuh thin hi ban san a tha lom ni, Thuhriltu a duh am deuha hun a hman rei deuh tumah Chairman-in a control ngam leh tawh thin si lo va.
                                                                                               I rin tlak,
                                                                                               Biaksanga
                                                                                               01114294425
Continue Reading...

Chaklote Rapbet

Editorial
   North Korea in Nuclear  ralthuam tha zawk neih tuma a beih vak vak hi kawng lehlama kan thlir chuan a demawm lo a ni. A ram venhim nan tha ber chu Nuclear ralthuam neih ani tih hi a ngaih dan a nih hmel. Mawhlohna lai  a nei.
   Khawvel ram hrang hrangte buaina kan thlirin Nuclear a nei ten an nei belha, la neilo neih tumte neihloh dan ngaihtuahin kawng chi hrang hrangin dan an siam a ni. Ram chak (Nuclear ramthuam nei ramte) ten an duh duh an ti a, tu man an dang ngam tak tak lo, mahse Iraq War ah khan Iraq-in ralthuam hlauhawm a nei tia rinhlelhna vang ringawtin Iraq chu an bei a nih kha. Afghanistan pawh Taliban tawm buk a ni tiin an bei leh hrep.
   Tunah Russia-in Ukraine ram chhungah lutin a vawk lal lena khawvelin engmah ti tak tak ngam lovin pawn lamah an rak an rak vel mai mai sia. Russia President  Vladimir Putin chuan tu thusawi mah a beng khawn lo, a duh chu a ti hmiah hmiah mai ni. Khawvel hi zawng a fair lo kan ti lo maw?
   Hetih a nih zel chuan China tehin Tibet leh Taiwan hi engtikah tak la hneh chhuh ang maw? A Military budget a sang chho zel a, a sipai chakna lah a ni telin a chak tulh tulh bawk si. A ruk tein Tibet leh Taiwan mipuite an thla a phang hle lo ang maw!
    Soviet Union a kehchhiat hma Communist ram 8 inteltual Warsaw Pact (1955) leh khaw thlang lam ramte inteltual NATO (1949) te inepna Cold War chu  Soviet Union a tluk chhiat hnu leh Communist ram te Democracy ram a an inlet phawk phawk hnu khan a reh ta rih a ang a. Mahse tun  hnu reiloteah hian  Cold War emaw Hot War emaw kan hma chhawn thei mai ang em?
Continue Reading...

Kulh Bang Chim Hun

                            
                                                                                                              Lalthuamliana
Tunlai Kulh Bang: Tunlai khawvela min daidantu kulh bangte hi thir hling nei leh leirawhchan hmanga siam an ni lova. Mihring thinlunga chapona kulh bang, mahni hmasialna kulh bang, rethei leh hausa inthliarhranna kulh bang, chi leh hnam inthliarhranna kulh bang, sakhua leh rinna avanga inthliarhranna kulh bang leh political party inbeihna kulh bangte hi an nghetin an chimawm zawk a ni.
     Tlangmite min thenhranga min daidantu kulh bang chimawm tak tak an awm a , an pun belh zel dawnte pawh a ang ta!? Kan hnam, kan khawtlang leh kan rinna (sakhua) tichhe theite an nih avangin hretheiama kan chhutchhiat a hun ta hle mai.Chutianga min thendarha kan inkara dolentirtu kulh bangte chu i lo hmachhawn dawn teh ang.
Chibing Kulh Bang: Zo hnahthlak unau thenkhatten pianpui unau tam tak neia kan vanneihna hi anchhiaah kan chantir mek a. Inthenhrang thei lo tura Pathian min pek kan nihna intawmah hian a ropui zawk leh a thiltithei zawk nih inchuhin unau kan insual ta hrep mai thin hi chu a mualphothlak mang tak e! Hnam khata min siamtu Pathian rilru khi kan tina thin awm teh e, ka ti! Inhmusit leh inlalian bik tur kan awm lova, kan tawngte pawh hi ropui zawk leh nep zawk an awm chuang lo. Zalen takin a tul ang  angin Pathian ropui nan kan lei leh kan ka-te hi tawng chhuak rawh se! A ri lo chhuak chu “Engnge” a ni emaw, “Ziange” a ni emaw, “Bange” a ni emaw, “ Zeithla” a ni emaw Pathian hriakthih tawng mawi leh duhawm an ni vek  a, Pathian chawimawi nan an tling vek a ni. A petu Pathian aia chibing nihna leh tawngte dah pawimawh leh ngaihlu zawkin Pathian fate zingah inthliarhranna leh indaidanna thinlung kulh bang i tichhah suh ang u.
Pawl leh Thurin Kulh Bang: Kohhran chu pakhat chauh a awm a, Isua Krista chu Lal leh Chhandamtua pawma Pathian fa nihna neitu zawng zawngte telna hi a ni. Kohhran din chhan chu Pathian Ram dina tizau turin a ni a. Chu hna (Mission) thawk tur chuan thawh duh dan leh thawh thiam dan a inan vek loh avangin pawl chi hranga insem darhin kan lo awm ta zawk a ni. Kan tum chu pakhat, kan rina pawh pakhat, kan din chhan pawh pakhat a ni a.
   Chu kohhran din chhan leh mawhphurhna aia mahni pawl thurin leh tih dan ngaisanga chawilar tumtute hi Pathian kohhran hnathawh dodaltute an ni ta hial zawk em? Kan rin dan leh tih dan min tawmpui ve lotute hmelma beiha beih kan tum zawngin Pathian Ram tizautu ni lovin tizima mi zawng zawng huapzo thei lo tura kulh bang remtute kan ni dawn. Chu chu kan zui mek Pathian duh dan a ni hauh lo vang le.
Party Kulh Bang: Kan tawngtaina tihhlawhtlinin a awm a, Democracy kalphung zuia min hruaitu sorkar thar duhawm tak kan nei ve ta. mahse zalen taka mahni duhzawng thlan theihna kan lo nei ta hi Tlangmi Kristiante tan chuan anchhia emaw tih mai theih turin kan hmang thiam lo hle mai. Party Politics-in min han luhchilh zet chu khaw te tak te te leh kohhran te tak te teah pawh Party nihna avanga inelrelna a nasa ta hle mai. Hei hi Democracy dik loh vang a ni lova, Politics hriatna tlachham tak chunga inti-Politics khel kual kawi velho chet dan dik loh vang a ni.
   Party hi Politics tum ram chu vantlang mipui zawng zawng huapzo hmasawnna leh thattlanna a ni. Chu tum ram panna kawng min daltu atan party kan hman chuan “Politics kawng bo” kan khel mek tihna a ni.
    Democracy hi nihna sang tak neiha thuneihna chelek theihna a ni lova, vantlang leh mipuite huikhawma intluktlanna, zalenna, inzahtawnna, inpuihtawnna leh rawng inbawlsak tawnna chu thupui bera nei a, kan inanlohna leh danglamna chi hrang hrang pawh inhriatthiamsak leh indawhtawna tanrualna tur a ni zawk. Kohhran leh khawtlang lungrualna tichhe zawng leh lamtang siama hotu nihna chuh zawnga kan zalenna kan hman vaih chuan Democracy hmelma kan ni zawk tihna a ni. Democracy chu mipui huapzo sorkar, mipuite din, mipuite tana mipuite rorelna a ni zawk si a.
Kulh Bang Piah Ram Luhka: Keiniho hi siamtu pakhat kutchhuak, thlahtu bul thuhmun nei, Chhandamtu pakhata rinna nghattu, khua leh tui pakahta chengza, rawngbawlsaka awm lova mite tan rawngbawl tura kohchhuah, a hmasa ber nih duh chuan a hnuhnung ber thlang tura zirtirna dawngtu, mahni aia midangte tha zawka ruat tur leh mi te ber leh hnuaihnung berte thian tha ni tura zirtirna dawngtu, “Lak aiin pekin lukhawng a nei zawk” titu Isua Krista zuitu leh vantlang leh midangte tan nun hlana thih ngam khawpa tlawmngai hnam inti kan ni lo em ni? Hawh u, mahni intihropui leh inchawisan tum ngar ngara thleibik neia “rawngbawlna suak” hi hnawlin kan damna tura mahni inchhamdam thei lo Krista Kross engah inphelh ruakin midangte tana malsawmna kan nih theih nan mahni i inkhengbet ang u. Chutah chauh chuan kan inkara mi daidantu chapona thinlunga siam chi bing kulh bangte, pawl leh thurin kulh bangte hi tih chimin a lo awm tawh dawn a ni.
(March 2012, HRB, tunlai kan hun tawn nen a inmil avangin kan rawn tar lang a ni.Ed)
   

Continue Reading...

INREMNA

Editorial
Kum 1950s leh 1960s vel bawra Negro-hoin zalenna an sual khan “Negro” tih hming chu inhnuaichhiahna tawngkam leh inhmusitna tawngkam-ah ngaiin “Black” tiin an in ko tan a. An leader zinga lang sar ber chu Malcolm X kha a ni. Chuta tang chuan khawvel hrang hranga awm Black-ho hian an awmna hmuna zirin “ Black African” , “Afro-American” leh “African American” tiin anin sawi thin. Kan hnung USA Indiana State a tlangmite leh Black te kara inthihbuainaah pawh khan thenkhatin inkohna tawngkam mawi lo tak tak an lo chhak chhuak a ni awm a, Chu chuan buaina a tiso san tirin silai hial an chelek phah a nih kha!

Kei ni tlangmite zingah pawh hian hnam peng chi hrang hrang kan awm ve a, hmun khatah luang za thei rih lo mah ila  unau kan nih kanin hai lo. Chutia inhriatna ringawt pawh chu hmasawnna ropui tak a ni. Chutih karah pakhat leh pakhat inhriatthiampui tawnnate, tawng leh culture inngaihhlutsak tawnna te  hi a pawimawh em em a ni.

Kan inkoh danah mawlh hian  uluk a tha a, hnam dang unau-ten engtia koh hi nge an duh tih hi hriat a pawimawh  hle a ni.  An duh dana kan kohin kan tan eng mah a hek phah lo a, kan nihna a tlak hniam phat hek lo. Bakah mi dang te lungawina kan siam a, kan inkarah boruak tha a siam bawk a ni tih kan hriat a tha  hle a ni. kan Bible-ah pawh “Atheihphawt chuan nangmahni lam tal, mi zawng zawng nen inremin awm rawh u.” (Rom 12:8) tih a nih kha. Tlawmna nun kan neih hi a va pawi mawh tak em.             





Continue Reading...
 

Zo Kawtchhuah Copyright © 2009